Hər bir gənc vətənpərvər olmalıdır

Bu, müstəqil Azərbaycan

üçün vacib əhəmiyyət kəsb edir

Müstəqillik əldə etdikdən sonra Azərbaycanda yetişən gənc nəsil öz bilik və bacarığı ilə fərqlənir. Bunun üzərinə sağlam ruh və intellekti də əlavə etsək Vətəni qorumağa qadir nəslin formalaşdığı qənaətinə gələ bilərik. Bütün sadalananlar heç şübhəsi ki, gənclərin milli adət-ənənəyə sadiq, vətənpərvər ruhda böyüməsinə zəmin yaradır. Hazırkı gəncliyin intellektual səviyyəsi geniş olduğundan vətənpərvərlik anlayışı da genişdir. Təsadüfi deyil ki, bu anlayış bir sıra dəyərlərə söykənir. Gənclər üçün vətənpərvərlik anlayışı təkcə torpağa, Vətənə bağlılıqla məhdudlaşmır, odur ki, müasir gəncliyin timsalında vətənpərvərlik hisslərini özündə təcəssüm etdirən bir sıra xüsusiyyətlər əxz olunub.

Hüquqşünas Rövşən Qasımov deyir ki, bu gün gənc nəslin düzgün yetişdirilməsi, onlarda vətənpərvərlik ruhunun inkişaf etdirilməsi, milli kimliyin aşılanması kimi məsələlər ölkə siyasətində önəmli yer tutur: “Əsası ümummilli lider Heydər Əliyev tərəfindən qoyulmuş dövlət gənclər siyasətinin Prezident İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri bütün sahələrdə özlərini doğruldurlar. Heç şübhəsiz ki, gənclərin beynəlxalq aləmdə əldə etdikləri uğurlar Azərbaycan dövlətinin nüfuzunun artmasına səbəb olur”. Onun sözlərinə görə, gənclərin həyatında baş verən bu kimi yeniliklər dövlət tərəfindən onlara göstərilən diqqət və qayğının nəticəsidir: “Ümummilli liderimiz Heydər Əliyev öz siyasətində daima gənclərə qayğı göstərmiş, onların bir fərd kimi yetişməsinə xüsusi önəm vermişdir. Ulu öndər respublika rəhbərliyinə gəldiyi ilk dövrlərdən gənclərin himayədarı kimi çıxış edərək sağlam düşüncəli yeni nəslin yetişdirilməsi sahəsində misilsiz işlər görmüşdür. Hakimiyyətə gəldiyi ilk günlərdən başlayaraq gənclər siyasəti ilə bağlı bir çox fərman və sərəncamlar imzalayan ulu öndər gənclərin milli və vətənpərvər ruhda tərbiyəsinə həmişə önəm vermişdir. Heydər Əliyev nitqlərinin birində bu barədə demişdir׃ "Gənclərimiz milli ruhda tərbiyə olunmalıdır, milli-mənəvi dəyərlərimizin əsasında tərbiyələnməlidir. Gənclərimiz bizim tariximizə yaxşı bələd olmalı, dilimizi yaxşı bilməlidir. Hər bir gənc vətənpərvər olmalıdır, vətənpərvərlik böyük məfhumdur. Bu, sadəcə orduda xidmət etmək deyil, vətənə sadiq olmaq, vətəni sevmək, torpağa bağlı olmaq - budur vətənpərvərlik". Onun sözlərinə görə, hazırda gənclərin milli şüurun inkişafı və vətənpərvərlik ruhunun yüksəldilməsi istiqamətində təşəbbüsləri kifayət qədərdir. Məhz həmin təşəbbüslərin nəzərə alınması gənclərdə özünə inamı artırır, Vətənə və dövlətə sadiq vətəndaş kimi formalaşır: “Ümumiyyətlə gənclərin vətənpərvər ruhda böyüməsi istiqamətində iş elə təşkil edilməlidir ki, milli şüur və vətənpərvərlik ideyaları nəinki ölkənin iri şəhərlərində, hətta regionlarda yaşayan gənclərə çatdırılsın. Bunun üçün çoxlu sayda gənclər təşkilatının yaradılmasına ehtiyac var. Xüsusən elm və təhsil müəssisələri ilə əlaqəli şəkildə çalışan vətəndaş cəmiyyətlərinin fəaliyyəti stimullaşdırılmalıdır. Gəncliyin potensial qüvvəsi olan tələbə-gənclərə dəstək omalıdır ki, onlar həmyaşıdları arasında vətənpərvərlik ruhunun artırılmasında fəal iştirak etsinlər”. Hüquqşünasın qənaətincə, ölkəmizdə məqsədyönlü şəkildə həyata keçirilən işlərin nəticəsi olaraq bu gün müasir Azərbaycan gəncliyi yeni inkişaf mərhələsinə qədəm qoyub. Ölkə rəhbəri tərəfindən uğurla davam etdirilən dövlət gənclər siyasətinin düzgünlüyünü bu sahədə qazanılmış uğurlu nəticələr də təsdiqləyir. Prezident İlham Əliyevin gənclərin potensialından ölkənin mənafeyi naminə tam və düzgün istifadə olunması, onların faydalı məşğulluğunun, dövlət idarəçiliyi sistemində iştirakının təmin edilməsi məqsədilə 2005-ci il avqustun 30-da imzaladığı "Azərbaycan Gəncliyi Dövlət Proqramının (2005-2009-cu illər) təsdiq edilməsi haqqında" Sərəncamı da gənclərə dövlət qayğısının davamı idi. Bütün bunlar deməyə əsas verir ki, ölkəmizdə uğurla həyata keçirilən dövlət gənclər siyasəti gələcək nəslin vətənpərvər ruhunun və intellektual səviyyəsinin artmasına olduqca müsbət təsir göstərir. Onun sözlərinə görə, respublikada təhsil sahəsində aparılan islahatlar da gənclər siyasətinin ən vacib istiqamətlərindən biridir. Çünki bu halda gənclərin milli kimliyinin dərk edilməsi məsələsi önəmə çıxır. Gənclərin maariflənməsinə, savadlanmasına, elmi inkişafına göstərilən xüsusi diqqət və qayğının davamı olaraq, “2007-2015-ci illərdə Azərbaycan gənclərinin xaricdə təhsili üzrə Dövlət Proqramı" çərçivəsində tələbələrin dünyanın məşhur universitetlərində təhsil almaq üçün göndərilməsi xüsusi diqqətə layiqdir. "Gənc istedadlar üçün xüsusi təqaüdlərin təsis edilməsi haqqında", "Azərbaycanın gənc istedadlarına dövlət qayğısı haqqında" Prezident fərmanları bu istiqamətdə görülən mühüm tədbirlərdəndir. Məhz bu kimi amillər nəzərə alınaraq ölkəmizdə gənc nəslin problemlərinin həlli, onların cəmiyyət həyatında layiqli iştirakının təmin olunması, milli-mənəvi dəyərlərə bağlılığının möhkəmləndirilməsi üçün də dövlət səviyyəsində bütün zəruri tədbirlər həyata keçirilir.

Tarix elmləri üzrə fəlsəfə doktoru Məhərrəm Zülfüqarlı qeyd edir ki, hazırda ölkədə gəncləruin vətənpərvərlik ilə bağlı həm ali, həm də orta məktəblərdə müxtəlif dövlət qurumları tərəfindən işlər görülür. Məhz görülən işlərin nəticəsidir ki, gənclərin vətənpərvərlik ruhu göz qabağındadır: “Ancaq etiraf edilməlifir ki, bu istiqamətdə görülən işləri yetərli hesab etmək olmaz. Bunun üçün ilk növbədə dərsliklərdə müəyyən dəyişikliklərin edilməsinə ehtiyac duyulur. Xüsusən, Azərbaycan tarixinin müasir dövrünə aid hissəsində yeniliklər edilməlidir. Nəzərə almaq lazımdır ki, Azərbaycanın tarixində gəncləri vətənpərvər ruhda tərbiyə etmək üçün kifayət qədər faktlar, nümunələr və örnəklər var. Təəssüf ki, bu faktlar dərsliklərdə lazımi səviyyədə təbliğ olunmur. Məsələn, Qarabağ müharibəsinin müxtəlif dönəmləri var ki, onlar Azərbaycan ordusunun müvəffəqiyyətləri dövrüdür. Lakin bunlar dərsliklərdə öz əksini tapmır. Dərsliklərdə yalnız 20 Yanvar faciəsi zamanı Sovet ordusunun qırğın törətməsi, Qarabağ müharibəsində məğlubiyyətlərimiz əksini tapır ki, bu da vətənpərvərlik məsələsinə mənfi təsir edir. Odur ki, yaxşı olardı ki, gələcəkdə Azərbaycan milli ordisunun qəhrəmanlıq tarixi, müvəffəqiyyətləri, Qarabağda göstərdiyi qəhrəmanlıqlar daha çox təbliğ olunsun”. M.Zülfüqarlı əlavə edib ki, Azərbaycan tarixinin digər dövrləri də lazımi şəkildə dərsliklərdə əksini tapsa, gənclərin vətənpərvərlik ruhunun inkişafına müsbət təsir göstərə bilər: “Məsələn, 1-ci Rus-İran müharibəsini götürsək, o dövrdə Vətən torpağını qorumaq üçün böyük işlər görülüb, lakin zaman keçdikcə bu işlər unudulub. Fransız yazıçısı və tarixçisi Jean-Jironun “Unudulmuş qəhrəmanlar” kitabı var. O kitabda çoxlu sayda faktlar var ki, azərbaycanlıların qəhrəmanlığından danışır. Ancaq biz özümüz bunları unutmuşuq, yalnız fransızın kitabından öz qəhrəmanlarımız haqda oxuyuruq. Təəssüf ki, belə faktların heç biri Azərbaycan tarixi dərsliklərində yoxdur. Həmçinin Abbasqulu ağa Bakıxanovun “Gülüstani-İrəm” əsərində Salyan hakiminin qəhrəmanlığı haqqında kiçik bir epizod var. Halbuku qadın olan bu şəxs rus zabitini qətlə yetirb və rus qoşunlarının oradan qaçmasına səbəb olan fəaliyyət göstərib. İndi bu barədə məlumat heç bir kitabda yoxdur. Amma Abbasqulu ağa Bakıxanov rus ordusunda xidmət etməsinə baxmayaraq bu faktı yazaraq bizlərə çatdırıb. Demək istəyirəm ki, tariximizin bəzi məqamları yenidən yazılmalıdır. Azərbaycanın qəhrəman övladları tanınmalıdır. Bu kimi faktlar gənclərə aşılandıqda təbii ki, daha çox vətənpərvər olarlar. Məlum olduğu kimi Azərbaycan xalqı böyük və zəngin tarixə malik xalqdır. Amma nədənsə xalqın şərəfli tarixi lazımi səviyyədə gənclərə çatdırılmır”.

Yeri gəmişkən qeyd edək ki, ölkə əhalisinin tərkibində gənclərin sayının əhəmiyyətli şəkildə artmasıdır. Bu isə dövlətin inkişafı, strateji hədəflər baxımından olduqca müsbət tendensiyadır. Çünki elə ölkələr var ki, orada əhalinin azalması ilə yanaşı, həm də qocalması prosesi gedir. Azərbaycan əhalisinin sosial tərkibinə baxsaq görərik ki, gənclər böyük çəkiyə malikdir. Məhz bu halda bir sıra dövlətlərdə olduğu kimi, Azərbaycanda da gənclərin vətənpərvər ruhda tərbiyə olunması başlıca vəzifələrdən biridir. Xüsusən də müstəqil Azərbaycan üçün bu olduqca vacib əhəmiyyət kəsb edir. Dövlətin qarşısında duran başlıca vəzifələrdən biri də gənclərin milli mənlik şüurunun inkişaf etdirilməsi və onlara vətənpərvərlik hisslərinin aşılanmasından ibarətdir. Nəzərə almaq lazımdır ki, gənclər də dövlət qayğısını daim öz üzərlərində hiss edərək, nailiyyətləri ilə onlara göstərilən qayğını doğrultmağa çalışırlar. Prezident İlham Əliyev gənclərə olan münasibətini belə ifadə etmişdir: “Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram”. Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər bütöv və müstəqil Azərbaycan naminə bütün güclərini toplamalı, vətənin inkişafı üçün səylə çalışmalı, öz siyasətində onlara arxalanan ölkə Prezidentinin etimadını həmişə doğrultmalıdırlar.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2015.- 17 fevral.- S.15.