Azərbaycan gənci kifayət

qədər vətənpərvərdir

Şamil Sabiroğlu: “Vətənpərvərliklə bağlı fəaliyyətlərin daha da koordinasiya olunmuş şəkildə həyata keçirilməsinə çalışmağımız lazımdır”

Azərbaycan gənclərinin milli mənlik şüurunun inkişaf etdirilməsi, onlarda vətənpərvərlik hisslərinin artırılması hər zaman prioritet istiqamətlərdən hesab edilib. İstər dövlət və onun müvafiq qurumları, istərsə də qeyri-hökumət təşkilatlarının da bu istiqamətə ciddi diqqət yetirməsi və müxtəlif layihələr, tədbirlər həyata keçirməsi gənclərin vətənpərvərlik hisslərinin artırılmasına öz müsbət təsirini göstərir. Gənclərin vətənpərər ruhda tərbiyəsi, onlarda Vətənə, millətə sevgi hissinin artırılması istiqamətində məqsədyönlü fəaliyyət göstərən və bu istiqamətdə çoxsaylı layihələr, tədbirlər həyata keçirən təşkilatlardan biri də "Xocalı Soyqırımını Tanıtma" ictimai Birliyidir. İctimai Birliyin sədri Şamil Sabiroğlu ilə söhbətimizdə bu istiqamətdə mövcud olan vəziyyət, eləcə də atılması vacib olan addımlar barədə danışdıq.

-Şamil bəy, Azərbaycan gənci bu gün nə dərəcədə vətənpərvərdir?

-Hazırda Azərbaycan gənci kifayət qədər vətənpərvərdir və milli mənlik şüuru formalaşmışdır. Şəxsiyyətin sosiallaşması istiqamətində fərdin özünü vətəni ilə eyniləşdirməsi böyük əhəmiyyət kəsb edir. Bu zaman "vətən" anlayışı təkcə insanların yaşadığı coğrafi ərazi, tanışları, yaxınları və qohumları ilə deyil, həm də bütövlükdə cəmiyyətə və dövlətə qarşı emosional-psixoloji münasibətilə də müşayit olunmalıdır. Atalarımız "torpaq uğrunda ölən varsa vətəndir" deməklə, vətənin sadəcə, coğrafi bir ərazi olmadığını, yalnız insanların ona qarşı xüsusi münasibətinin formalaşdığı zaman müqəddəs bir anlayış olduğunu nümayiş etdirməyə çalışıblar. 1991-ci ildə müstəqilliyini yenidən bərpa etmiş Azərbaycan xalqı üçün isə "vətən" anlayışı həm də yaratdığı milli dövlətə-Azərbaycan Respublikasına münasibətdə yeni məna kəsb etməyə başlamışdır. Bu baxımdan da, Azərbaycan Respublikasında gənclərə vətənpərvərlik və vətəndaşlıq hisslərinin aşılanması bir-birindən təcrid olunmayan vahid Konsepsiya şəklində həyata keçirilməlidir. Həmçinin gənclərdə vətənpərvərlik və vətəndaşlıq hisslərinin gücləndirilməsi istiqamətində Azərbaycan Respublikasının dövlət rəmzlərinin təbliğinə xüsusi yer verilməlidir. Vətənpərvərliklə bağlı fəaliyyətlərin daha da koordinasiya olunmuş, sistemli bir şəkildə həyata keçirilməsinə, daha çox nəticə əldə olunmasına çalışmağımız lazımdır.

-Gənclərimizin vətənpərvərlik hissinin artırılması istiqamətində hansı zəruri addımların atılmasını vacib hesab edirsiniz?

-Dövlətimiz bu istiqamətdə bütün lazımi şəraiti yaradıb. Lakin bununla yanaşı problemləri inkar etmək olmaz. Bu sahədə ən böyük məsuliyyət Təhsil Nazirliyinin üzərinə düşür. İbtidai sinif dərsliklərinin hazırlanmasında, dərs proqramlarının tərtibatında milli şüur, vətənpərvərlik hisslərinin tərbiyəsi priroritet olaraq qalmalıdır. Təəssüflər olsun ki, bu istiqamətdə problemlər hələ də var. Bu istiqamətdə məsuliyyət eyni zamanda medianın da üzərinə düşür. Bayağı mövzular, ucuz reytinq naminə hazırlanan televiziya proqramları, videokliplər, televiziya məkanında etik normalara uyğun olmayan verilişlər təbii ki, gənclər arasında vətənpərvərlik hisslərinin tərbiyə baxımından ciddi fikir ayrılığına gətirib çıxara bilər. Bizdə elə televiziya kanalları var ki, onlar ümumiyyətlə efir mədəniyyəti, efir standartı deyə mövcüd olan anlayışı təmiz siliblər. Sanki evdə oturub palatka toyuna baxırsan. Və bu bir veriliş çərçivəsində baş vermir. Bu demək olar ki, bütün günü davam edir. Ona görə mən hesab edirəm ki, mediada, xüsusilə də televiziya məkanında ciddi islahatlar getməsə yeni nəsil manqurtlaşa bilər. Onu da qeyd edək ki, bu gün Azərbaycanın qarşısında duran bir çox problemlərin həlli gənclərin milli vətənpərvərlik ruhunda tərbiyə edilməsindən, onlarda yüksək dövlətçilik şüurunun, mənsub olduğu millətə və dövlətə qarşı qürur hissinin formalaşdırılmasından çox asılıdır. Təəssüflər olsun ki, torpaqlarının 20 faizə qədəri işğal altında olan, tarixi əraziləri başqa dövlətlərin tərkibində qalmış Azərbaycanda gənclərin vətənpərvərlik və vətəndaşlıq ruhunda tərbiyə edilməsi, onlarda vətəndaşlıq vəzifələrinin və dövlətə sədaqət ruhunun aşılanması istiqamətində həyata keçirilən tədbirlər gözlənilən effekti vermir. Məhz bunu nəzərə alaraq qeyri-hökümət təşkilatları, o cümlədən media qurumlarımız, dövlət qurumları gənclərdə vətənpərvərliyin artırılmasında yeni texnologiyaların, müasir gəncliyin şüuruna nüfuz edə biləcək vasitələrin araşdırılıb tətbiq edilməsi işini həyat keçirməlidir.

-Rəhbərlik etdiyiniz təşkilat gənclərin vətənpərvər ruhda böyüməsi istiqamətində hansı layihə və tədbirlər həyata keçirir?

-“Xocalı Soyqırımını Tanıtma” İctimai Birliyi və “Yeni Yurd” Sosial İnkişaf İctimai Birliyinin fəalları mütəmadi olaraq ön cəbhələrdə yerləşən hərbi hissə və taborlarda olur, Azərbaycanın ərazi bütövlüyünü qoruyan zabit və əsgərlərimizlə görüşlər keçirir.

“Xocalı Soyqırımını Tanıtma” və “Yeni Yurd” ictimai birliklərinin fəallarının sinələrini düşmən gülləsinə sipər edən ərənlərimizlə görüşü demək olar ki, ənənə halını alıb. Bu təşkilatların üzvləri 2014- cü ildə Gəncə, Tovuz, Qazax, Ağdam, Tərtər bölgələrindəki hərbi hissələrin şəxsi heyətinin qonağı olub. Bu il fevralın 7-də Şəhid Milli Qəhrəmanımız Mübariz İbrahimovun xidmət etdiyi hərbi hissənin şəxsi heyətilə görüşən QHT fəalları, martın 3-də Tərtər bölgəsindəki “N”saylı hərbi hissənin yubileyində iştirak ediblər. Azərbaycanın Milli Qəhrəmanı Asif(Fred) Məhərrəmov adına İnkişaf Fondunun sədri, II dərəcəli müharibə əlili Hacı Ədalət Məhərrəmov, ”Gəncliyə Yardım Fondu”nun vitse-prezidenti Salman Əliyev, “Ana harayı” qəzetinin baş redaktor müavini, şair Vaqif Nəcəfzadə, “Xocalı Soyqırımını Tanıtma” İctimai Birliyinin şöbə müdiri Dilbər Sultanova da bu tədbirlərdə aktiv iştirak ediblər. Martın 19-da hər iki Təşkilatın fəalları cəbhə bölgəsindəki “N” saylı hərbi hissənin zabit, gizir və əsgərlərilə görüşüblər. Xalqımızın milli bayramı-Novruz bayramına həsr edilən tədbiri şair, bədii qiraət ustası Elşən Sabiroğlu və istedadlı müğənni, “Ozan” mükafatı laureatı Zeynəb Məmmədzadə açdı. “Xocalı Soyqırımını Tanıtma” ictimai birliyinin sədri, “Yeni Yurd” Sosial İnkişaf İctimai birliyinin icraçı direktoru, “Ana harayı” qəzetinin baş redaktoru, “Tərəqqi” medalının mükafatçısı olaraq mən və “Yeni Yurd” Sosial İnkişaf İctimai Birliyinin sədri Mahirə xanım Əsədova əziz bayramı ön xətdə, Vətənimizin keşikçiləri ilə birgə keçirdiyimizə görə hədsiz məmnun olduğumuzu dilə gətirdik. Mahirə xanım, yeganə oğlu, 8 yaşlı Nurəlinin Azərbaycan Ordusu sıralarında həqiqi hərbi xidmətə yola düşəcəyi günü səbirsizliklə gözlədiyini qeyd etdi. 20 Yanvar Cəmiyyəti sədrinin I müavini, Azərbaycan Respublikasının Prezidenti tərəfindən müxtəlif mükafatlara layiq görülmüş Mustafa Əliyev, Respublika “Əsgər Ailəsi” Cəmiyyətinin sədri, ehtiyatda olan baş leytenant, jurnalist Roza Əliqızı (Hüseynova), “Xocalı Soyqırımını Tanıtma” İctimai Birliyinin şöbə müdiri, şairə Dilbər Sultan, həmin təşkilatın Abşeron rayon şöbəsinin müdiri, şairə Zeynəb Şahidqızı, “Sosial Rifah və Tədqiqatlar” ictimai birliyinin sədri, “fact-info.az” saytının baş redaktoru Əkrəm Bəydəmirli, "Yeni Yurd" ictimai birliyinin sədr müavini Natiq Qasımov, həmin Təşkilatın Kütləvi Tədbirlər şöbəsinin müdiri İlkin Məmmədzadə, “Xebertv.az” saytının rəhbəri,"Ana harayı" qəzetinin şöbə müdiri, müharibə veteranı Əvəz Almədətov, Beyləqan rayonunun tanınmış ziyalılarından, “Xocalı Soyqırımını Tanıtma” ictmai birliyinin fəal üzvü Asif Quliyev, “Beyləqan Gənclərinin Maarifləndirilməsi və Sosial İnkişaf” İctimai Birliyinin sədri Zaur Quliyev və başqaları Azərbaycanın namusunu qoruyan ərənlər qarşısında çıxış etdiklərinə görə özlərini çox xoşbəxt sandıqlarını bildirdilər. Tanınmış şairə Zeynəb Şahidqızı, Dilbər Sultan, Mustafa Əliyev və başqaları Vətənə, torpağa və Azərbaycan əsgərinə həsr olunan şeirlər söylədilər. Beyləqan rayon Niyazi adına Uşaq Musiqi Məktəbinin “Aranqala” instrumental ansamblının üzvləri, habelə, bu ansamblın solistləri Yolçu Quliyev, Yavin Hümbətov, gənc aşıq, II dərəcəli əlil Azər Göyçəli (Mustafayev), müğənni Zeynəb Məmmədzadə, Elşən Sabiroğlu və başqaları maraqlı konsert proqramı ilə şəxsi heyət qarşısında çıxış etdilər. "Yeni Yurd" və "Xocalı Soyqırımını Tanıtma" İctimai Birlikləri adından 100 əsgərə qiymətli hədiyyələr, 10 zabit və əsgərə isə Fəxri fərman və diplomlar təqdim edildi. Bundan başqa “Xocalı Soyqırımını Tanıtma” və “Yeni Yurd” Sosial İnkişaf İctimai Birliyi ilə birgə Füzuli rayonu ərzisində, ön cəbhədə yerləşən “N” saylı hərbi hissənin zabit, gizir və əsgərləri üçün Novruz şənliyi təşkil edərək, bayram sovqatı apardıq. Hər bir əsgərin Azərbaycanın mövcud sərhədlərinin qorunmasında və vətənin düşməndən müdafiəsində xüsusi rolu var. Hesab edirəm ki, “Xocalı Soyqırımını Tanıtma” İctimai Birliyi tərəfindən 15 iyun Milli Qurtuluş gününün hərbi hissəsədə qeyd edilməsinin vətənpərlik ruhunun yüksəldilməsində əhəmiyyəti böyükdür. Qeyd etməliyəm ki, hərbiçilərimizin vətənpərvərlik ruhunun yüksəlməsində Azərbaycan dövlətinin şəxsən Ali baş komandan cənab prezident İlham Əliyevin orduya göstərdiyi qayğı və diqqətin xüsusi rolu var.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2015.- 29 iyul.- S.15.