“Döyüşə bilməyən xalqın

25 min şəhidi ola bilməz!”

Rövşən Qasımov: “Şagirdin qarşısına qoyduğumuz əsas məqsəd təkcə təhsildə yüksək nəticələr deyil, onların vətənpərvərlik duyğuları da yüksək olmalıdır”

Qloballaşma şəraitində milli dəyərlərin qorunması, gənc nəslin milli vətənpərvərlik ruhunda tərbiyəsi aktual məsələyə çevrilib. Bu işdə valideynlərlə yanaşı məktəbin də üzərinə böyük yük düşür. Müsahibimiz Qarabağ müharibəsi veteranı, Bakı şəhər Zaur Məmmədov adına 171 saylı tam orta məktəbin direktoru Rövşən Qasımovdur. Onunla gənc nəslin vətənpərvərlik ruhunda tərbiyəsində məktəb-valideyn, məktəb-media, məktəb-QHT əlaqələrinin vacibliyindən danışdıq.

-Rövşən müəllim, gənc nəslin hərbi vətənpərvərlik ruhunda tərbiyəsində məktəbin üzərinə hansı vəzifələr düşür?

-Gənclərin vətənpərvərlik ruhunda tərbiyəsi işində məktəbin üzərinə böyük məsuliyyət düşür. Bu iş sinifdə aparılmalıdır və fənn müəllimlərin üzərində böyük məsulliyyət var. Deməzdim ki, məktəblərdə hərbi vətənpərvərlik tərbiyəsi lazımi şəkildə aparılmır. Əksinə, bu sahədə uğurlarımız var. Təkcə orta məktəbin yuxarı siniflərində deyil, aşağı siniflərdə də hərbi vətənpərvərlik tərbiyəsi düzgün qurulur. Bu gün şagirdlərimizin təhsil aldığı təhsil ocaqlarında təlim, tədris, təhsil, eyni zamanda vətənpərvərlik tərbiyəsi düzgün aparılır. Əslində bunlar bir-birindən ayrı proseslər deyil, əksinə bir yerdə, sistemli şəkildə aparılmalıdır. Bu gün şagirdin qarşısında qoyduğumuz əsas məqsəd təkcə təhsildə yüksək nəticələr deyil, onların vətənpərvərlik duyğuları da yüksək olmalıdır. İstənilən halda bizim yeniyetmələr, şagirdlər müstəqil həyata atılanda, ölkəmizi xarici ölkələrdə təmsil edəndə yüksək vətənpərvərlik duyğuları nümayiş etdirməlidirlər. Onların vətənpərvərliyi yüksək səviyyədə olmalıdır ki, vətəni də layiqincə təmsil edə bilsinlər. Bunun üçün məktəblərdə bir çox tədbirlər həyata keçirilir. 20 yanvar, 26 fevral, 31 mart faciələrinin anım günündə tədbirlər təşkil olunur. Ümumtəhsil məktəblərimizdə “Ana dilimiz-Yurdumuz” mövzusunda açıq dərslər tədris olunur. Ana dilimizin mükəmməl şəkildə öyrənilməsi, şagirdlərə sevdirilməsi vətənpərvərlik tərbiyəsinin ayrılmaz hissəsidir. Ana dili millətimizin pasportudur, müstəqilliyimizin əsas atributlarından biridir. Biz gərək uşaqlara ana dilimizi sevdirək. Ana dili yoxdursa, sevilmirsə, o ölkənin müstəqilliyi də təhlükədədir. Təhsil işçiləri ümumtəhsil məktəblərinin 3 pilləsi üzrə:həm ibtidai, həm orta, həm də tam orta məktəb təhsili üzrə vətənpərvərlik tərbiyəsinin möhkəmləndirilməsində mühüm rol oynayırlar. Şagirdlərin, öncəliklə də oğlan şagirdlərinin qarşısında məqsəd qoyulmalıdır: sən sabah gedib xalqına, vətəninə xidmət etməlisən. İstər oğlan, istər qız olsun, onlara ana vətən anlayışını başa salmalıyıq. 25 ildir müstəqilik, torpaqlarımızın 20 faizi işğal altındadır. İşğal olunmuş torpaqlarımızın adlarını hər dəfə sadalamaq nə qədər xoş olmasa da, biz hər dəfə bunu şagirdlərə xatırladırıq. Torpaqlarımız düşmən tapdağı altındadır, o torpaqları azad etmək bizim borcumuzdur. Şagirdlər tariximizi mükəmməl bilməlidirlər. Eyni zamanda milli qəhrəmanlarımız haqqında kifayət qədər bilgili olmalıdırlar. Təkcə milli qəhrəmanları yox, Birinci Qarabağ savaşında iştirak etmiş, şücaətlər göstərmiş bütün insanlar tanımalı, onlara sayğı ilə yanaşmalıdırlar. Hətta ikinci dünya savaşında iştirak etmiş, qəhrəmanlıqlar göstərmiş azərbaycanlları tanıtmalı, şagirdlərə sevdirməliyik. Qoy onların kumiri qəhrəman insanlar, vətən uğrunda savaşmış, sağlamlığını qurban vermiş, həyatını itirmiş döyüşçülər olsun. Qəhrəman insanları tanıtmaq üçün dərs ilinin əvvəlində siniflərdə inşalar yazdırmaq olar.

-Medianın, ictimai sektorun məktəblilərin vətənpərvərlik tərbiyəsində rolunu necə qiymətləndirirsiniz?

- Tərbiyə işi komleks aparılmalıdır. Sözsüz ki, şagirdlərin hərbi vətənpərvərlik tərbiyəsində təkcə məktəb rol oynaya bilməz. Şagird ailədən gəlir, mətbuatın, sosial medianın təsirinə məruz qalır. Təbii ki, onların tərbiyəsinin formalaşmasında medianın, ictimai qurumların da rolu var. Çox təəssüf ki, indi bəzi telekanallarda şou proqramların sayı çoxdur. Bu verilişlər cəmiyyətdə, şəxsiyyət kimi formalaşmaqda olan şagirdlərdə mənfi meyllər yarada bilir. Doğrudur, media müstəqildir və sahibkarlıq subyektidir. Onlar bazar iqtisadiyyatı şəraitində gəlir əldə etməyi düşünürlər, bu da təbiidir. Ancaq unutmamalılyıq ki, hər kəs cəmiyyətdə baş verən proseslərə məsuldur. Xüsusən ictimai rəyə təsir gücü olan qurumlar. Uşaqlar bizim gələcəyimizdir, onlar birlikdə tərbiyə etməliyik. Şou proqramı hazırlayan da valideyndir, qardaşdır, bacıdır. Onlar gərək hazırlanan verilişin gənclərə təsirini hesablaya bilsinlər. Biz övladlarımız elə tərbiyə etməliyik ki, sabah əziyyətini çəkməyək. Azərbaycan haqsızlığıa məruz qalmış ölkədir. Torpaqlarımızın 20 faizi işğal olunub. Ali baş komandanımız, cənab prezident İlham Əliyevin dediyi kimi hər an müharibəyə hazır olmalıyıq. Müharibəni təkcə ordu aparmır ki. Bütün cəmiyyət müharibənin içində olur. Biz müharibəyə, torpaqlarımızın müdafiəsi işinə hazır cəsur gənclik yetişdirməliyik. Televizya məkanında hərbi vətənpərvərliyi təbliğ edən proqramlar yox deyil. Azərbaycanı, vətənimizin tarixini tanıdan, sevdirən verilişlər, intellektual viktorinalar da var. Ancaq bu verilişlərin sayı artırılmalıdır. Mətbuatda vətənpərvərlik mövzusunda araşdırma yazılarının çoxalmalıdır. Hərbi vətənpərvərlik tərbiyəsi boğazdan yuxarı olmamalı, saxta rəqəmlərə əsaslanmamalıdır. Bu xalqın gerçək qəhrəmanları var və onların həyatı, fəalliyyəti, döyüş yolu, göstərdiyi şücaətlər öyrənilməli, təbliğ olunmalıdır. Yeniyetməyə o çatdırılmalıdır ki, vətən uğrunda həyatını itirmiş insanların əsas məqsədi ana vətənin, xalqın namusunu qorumaq idi. Onların başqa bir maddi marağı yox idi. Ordu haqqında, müharibə haqqında mənfi təsirli yazılara yer verilməməlidir. Son zamanlar Qarabağ müharibəsi mövzusunda, tarixi qəhrəmanlarımızla bağlı filmlərin sayı çoxalıb. Bu filmlərin şagirdləri vətənpərvərlik tərbiyəsinə böyük təsiri var. 60, 70, 80-ci illərdə gənc nəslin tərbiyəsinə Babək, Koroğlu, Mehdi Hüseynzadə, Həzi Aslanov haqqında çəkilmiş filmlər böyük təsir gücünə malik idi. Sevindici haldır ki, müstəqillik dövründə də bu cür filmlər çəkilib. Bu filmlərin sayını artırmaq olar.

- Qarabağ müharibəsində iştirak etmisiniz. Bəzən belə fikirlər səslənir ki, Azərbaycan gənci döyüşə bilmir, müharibə istəmir və s...

- Qətiyyən bu fikirlə razı deyiləm! Döyüşə bilməyən xalqın 25 min şəhidi ola bilməz! Azərbaycan gənci cəsurdur, döyüşkəndir, qəhrəmandır. Qarabağ müharibəsinin mən şahidi olmuşam. Silahlı Qüvvələrimizin paradı zamanı gənclərimizin vətənpərvərliyi məndə böyük ümidlər yaratdı. Vətənpərvərlik gənclərimizin içindən gəlir, boğazdan yuxarı deyil. Dövlət tərəfindən atılan addımların, məktəblərin apardığı işlərin əhəmiyyəti var və nəticələri görünür. Bununla belə məktəblər, valideynlər özləri bu işi dayandırmamalıdır. Vaxtaşırı məktəblilər Şəhidlər Xiyabanına aparılmalı, onlara mənfur düşmənlərimiz haqqında məlumat verilməlidir.

- İbtidai hərbi hazırlıq dərslərində hansı yeni metodlardan istifadə olunur? Gənclərə silahla davranış qaydaları öyrədilirmi?

- Hazırda müəyyən məktəblərdə təlim xarakterli silahlar öyrədilir. Elektron silah layihəsinin icrası nəzərdə tutulur. Məktəblərin hərbi hissələrə daşınması məsələsi gündəlikdədir. Təhsil Nazirliyi ilə Səfərbərlik və Hərbi Xidmətə Çağırış üzrə Dövlət Xidməti arasında razılıq əldə olunub. Ola bilsin ki, tədris ilinin sonuna qədər tanışlıq məqsədilə yuxarı sinif şagirdlərinin hərbi hissələrə aparılması həyata keçirilsin. Elektron silah layihəsi də uğurlu ideyadır. Bu, şagirdlərdə silahla davranış, atış vərdişləri formalaşdıracaq. Bu, həm də təhlükəsizlik baxımından yaxşıdı. Şagirdlər nişanalmanın qaydalarını biləcəklər.

- Sovet dövründə yuxarı sinif şagirdləri arasında “Üfiqdə parıltı”, “Qartal balası” və hərbi hazırlıq yarışları keçirilirdi. İndi bu tipli yarışlar keçirilirmi?

- “Cəsurlar” və “Şahinlər” hərbi idman oyunları keçirilir. 7-8-ci siniflərdə “Cəsurlar”, 10-11-ci siniflərdə “Şahinlər” hərbi idman oyunları təşkil olunur. “Cəsurlar” da komanda da 5 oğlan, 2 qız, “Şahinlər”də komandanın təkibində 17 nəfər: 13 oğlan, 4 qız olur. Öncə yarışların məktəbdaxili mərhələsi başlanır, sonra rayon mərhələsi, sonra şəhər və mayın 10-da respublika mərhələsi keçirilirdi. “Cəsurlar” hərbi idman-turizm oyunları ləğv edilib. İndi yalnız “Şahinlər” hərbi idman oyunları keçirilir, ancaq komandanın say tərkibi dəyişdirilib, indi 14 nəfər olmalıdır. İndi bu yarışlar 8-10-cu siniflərin şagirdləri arasında keçiriləcək. Gələn tədris ilindən etibarən “Cəsurlar” hərbi idman-turizm oyunlarının əvəzinə başqa yarış keçiriləcək. Məktəblilər arasında keçirilən daha bir maraqlı yarış “Mahir nişançlar” devizi altında güllə atıcılığı yarışlardır. Bu yaxınlarda rayon mərhələsi yekunlaşdı. Yaxın vaxtlarda şəhər və respublika mərhələsi keçiriləcək. Rayon turniri Bakı şəhər Zaur Məmmədov adına tam orta məktəbdə keçirildi. 171 saylı məktəbin komandası 35 məktəb arasında birinci yerə layiq görüldü.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2015.- 3 mart.- S.15.