“Vətənpərvərlik hisslərinin gücləndirilməsi

bütün sahələrdə aparılmalıdır”

Rövşən Nəcəfov: “Biz, gənc olaraq anlamalıyıq ki, vətənimizin ən əsas parçasıyıq”

Hər bir dövlətin gələcəyi onun sağlam, vətənpərvər ruhda yetişən, böyüyən gəncliyindən asılıdır. Əgər bir dövlətin yetişməkdə olan gəncliyi milli ruhdan, vətənpərvərlik hisslərindən kənardırsa onun gələcəyi də təhlükə altındadır. Qürurverici haldır ki, Azəbaycanda belə bir mənfi tendensiya müşahidə edilmir. Əksinə gənclərimizin milli mənlik şüurunun inkişaf etdirilməsi, onlarda vətənpərvərlik hisslərinin aşılanması istiqamətində sistemli şəkildə iş görülür.

Bu məqsədlə müxtəlif dövlət proqramları həyata keçirirlir, müvafiq sənədlər qəbul olunur Öz növbəsində gənclərimiz də fərdi və təşkilat şəklində bu prosesdə yaxından iştirak edərək gənclərimizin milli mənlik şüurunun inkişaf etdirilməsi, onlarda vətənpərvərlik hisslərinin artırılması istiqamətində məqsədyönlü fəaliyyət göstərir, bununla bağlı müxtəlif layihələr həyata keçirirlər. Belə təqdirəlayiq layihələrdən biri də “Mənim Təhsilim, Mənim Gələcəyim!” Kampaniyasıdır. Sözügedən kampaniyanın rəhbəri Rövşən Nəcəfovla söhbətimizdə gənclərin vətənpərvərlik ruhunda tərbiyə edilməsi istiqamətində görülən işlər, qarşıda duran vəzifələr və s. barədə danışdıq. Rövşən Nəcəfov “OLAYLAR”-a verdiyi müsahibədə qeyd edilən istiqamətdə dövlət və onun müvafiq strukturlarının da məqsədyönlü işlər gördüyünü söyləyib.

-Rövşən bəy, Azərbaycan gənclərinin milli mənlik şüurunun inkişaf etdirilməsi, onlarda vətənpərvərlik hisslərinin daha da artırılması istiqamətində hansı tədbirlərin görülməsinə ehtiyac duyursunuz?

-Vətənpərvərlik anlayışı insanın qürur hissindən yaranır. Hər kəs öz hisslərini müxtəlif cür ifadə edir. Vətənə bağlılıq hər kəs üçün eyni deyil. Kimisə vətənə onun ailəsi, kimisə onun sevdiyi, kimisə isə, onun maddiyyatı bağlayır. Əgər bir gənc öz uğurunu cəmiyyətlə paylaşırsa və töhvələr verirsə, ona daha çox imkanlar yaradılmalıdır. Çünki, vətənpərvərlik uğur ampluasıdır. Cəmiyyət həmin ampluanı udur və yayılmağa başlayır. Vətənpərvərlik hisslərinin gücləndirilməsi bütün sahələrdə aparılmalıdır. Biz, gənc olaraq anlamalıyıq ki, vətənimizin ən əsas parçasıyıq. Hazırda, vətənpərvərlik anlayışı keçmişə nəzərdən daha fərqlidir. Vətənpərvərlik elmin və uğurun üzərində köklənib. İstənilən elmi yanaşma və ya kəşf dünyaya vətənimizi tanıda bilər. Yaradıcılıq əsrində yaşayırıq. İstənilən ölkənin tanıtımı onun yaradıcı vətəndaşının ərsəyə gətirdiyi məhsul olacaq. Bir filmin gücü bütün məğlubiyyətləri qələbə ilə əvəzləyə bilər. Bir söz, bir fikir və bir kitab dünyanı dəyişmək gücündədir. Həm dünyada, həm ölkəmizdə təbliğat imkanlarını genişləndirmək gərəklidir. Gəncin özünü təsdiq etməsi onun milli şüurunu formalaşdıracaq. Yəni, o axtarışdan xilas olacaq. Vətənpərvərlik isə bütöv xalq şüurunu formalaşdırmaqdır.

-Sizcə orta ümumtəhsil müəssisələrində gənclərimizə kifayət qədər vətənpərvərlik hissləri aşılanırmı?

-Dərsliklərdə, həmçinin müəllimlərin keçdiyi dərslərdə vətənpərvərlik ilə bağlı kifayət qədər məlumatlar verilir. Bunların hamısı nəzəriyyədir. Ancaq gənclərimiz üçün vacibdir ki, nəzəri biliklərdən praktiki məşğələlərə keçsinlər. Vətənpərvərlik gənclərin atacağı addımlara bağlıdır. Onların öz sahəsində qazanacağı uğur, onun vətəninə edəcəyi xidmətlərlə əvəzlənəcək. Bunun üçün məktəblərdə uğur qazanmış insanların gənclərlə görüşlərini keçirmək olar ki, gənclər də öz suallarını açıq şəkildə ifadə etsinlər. Bu gün sevindirici hal ondan ibarətdir ki, cəmiyyətimizdə bu istiqamətdə hər cür təbliğat gedir. Gənclərimiz də öz növbəsində görməli və bilməlidir ki, uğur qazanmış insanın vətənə bağlılığı var.

-Bəs gənclər təşkilatları və QHT-lər gənclərin vətənpərvərliyi ilə bağlı layihələrə üstünlük verirlərmi?

-Azərbaycanda fəaliyyət göstərən bütün təşkilatların və qurumların il ərzində fəaliyyətlərində vətənpərvərlik layihələri icra olunur. Eyni zamanda dövlət səviyyəsində vətənpərvərlik layihələrinə dəstək olunur. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası, Azərbaycan Respublikasının Prezidenti yanında Gənclər Fondu və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun elan etdiyi bütün qrant müsabiqələrinin əsas prioritet mövzusu məhz vətənpərvərlikdir. Əgər dövlət səviyyəsində vətənpərvərlik əsas prioritetlərdən biridirsə, istənilən təşkilat və qurum bu mövzuda layihələr yazıb təqdim edir. Layihələrin effektivliyini artırmaq və daha geniş auditoriyalara təqdim etmək yaşadığımız informasiya müharibəsində trenddir.

-Bu gün Azərbaycan gənci torpaqlarını işğaldan azad edə biləcək dərəcədə vətənpərvərdirmi?

-Biz, torpaqlarımızı azad etməliyik. Dövlət başçımız cənab Prezident İlham Əliyevin qərarı müharibə olacaqsa, biz müharibə yolu ilə buna nail olacağıq. Azərbaycan gənci düşməninə bütün sahələrdə qalib gəlməlidir. Öz yaradıcılığımızla, biliyimizlə və bacarığımızla informasiya əsrinə sahiblənməliyik.

-Televiziyalar, kütləv-informasiya vasitələrinin bu mövzuya olan diqqəti qaneedicidirmi?

-Televiziya hər kəsin evinin qonağıdır. Özü də daimi qonaqdır. Ancaq etiraf etmək lazımdır ki, vətəpərvərlik verlişləri kifayət qədər deyil. Bizim televiziyalarımızda olan vətənpərvərlik verlişlər daha çox hərbi üzərində köklənib. Hər kəs vətənpərvərliyin əsas meyarının hərbi olduğunu bilir. Bütün dünyada bu belədir. Gəncliyimizin diqqətini vətənpərvərlik mövzusuna yönləndirmək istəyiriksə, vətənpərvərliyin fəlsəfəsini təqdim etməliyik. Niyə vətənpərvərlik? Nə üçün vətənpərvərlik? Kim üçün vətənpərvərlik? Bütün sualların cavabı aydın şəkildə ifadə olunmalıdır. Gənclər birbaşa müzakirələrin dinləyicisindən iştirakçısına çevrilməlidir. Bütün sualların cavabını da özləri tapmalıdır. O zaman, vətənpərvərlik onlar üçün dəyərə çevriləcək. Kütləvi-informasiya vasitələrimizin vətənpərvərlik mövzusunda işıqlandırdığı materiallar gənclərimizin suallarına geniş cavablar tapmasına təsir etməlidir. Vətənpərvərlik sahiblənməkdir. Gənclərimizin gələcəyinə sahiblənməsi onların vətənpərvərliyinə bağlıdır.

-Region gənclərində bu hisslər hansı dərəcədə yüksəkdir?

-Regionda yaşayan və çalışan hər bir şəxs vətənpərvərdir. Vətənpərvərlik vətənə xidmətdir. Vətənə xidmət insanlara xidmətdir. Öz vətəndaşına xidmət göstərən hər bir gənc gələcəyini öz torpaqları üzərində qurmaq istəyir. Düşmənlə sərhəddə yaşayan gənclərimiz varki, onların taleyi vətənlərinə bağlanıb. Bir məqamı da qeyd edim ki, ayrı-ayrı gənclər və qeyri-hökumət təşkilatlarının bu istiqamətdə həyata keçirdiyi layihələr, rayonlarda gənclərlə keçirilən görüşlər, onlarla aparılan söhbətlər də region gənclərinin vətənpərvər ruhda tərbiyə olunmasına öz müsbət təsirini göstərir.

-Ali Baş Komandanın ordu quruculuğuna göstərdiyi diqqət və qayğı gənclərin vətənpərvər ruhda böyüməsinə hansı müsbət təsiri göstərir?

-Ali Baş Komandanımız cənab Prezident İlham Əliyev bütün çıxışlarında və fəaliyyətlərində hər zaman vətənpərvərlik mövzusu ətrafında fikir mübadiləsi edir. Ruh yüksəkliyi nümayiş etdirir. Vətənimizi ordumuz, vətənpərvərliyimizi isə diqqət və qayğı qoruyur. Cənab Prezidentin ordumuza göstərdiyi diqqət və qayğı gənclərin vətənə sevgisini artırır. Vətənə sevgimiz vətənpərvərliyimizdir. Güclü ordunun vətəndaşı olmaq, xidmət edən gənclərimizin əməyidir. Ali Baş Komandanımızın hər bi hissələrə səfəri zamanı gənclərlə etdiyi söhbətlər, onlarla kəsdiyi çörək diqqət və qayğının nümayişidir. Məhz bu səbəbdəndir ki, Azərbaycan gənci Ali Baş Komanda, cənab Prezidentlə fəxr edir, qürur duyur. Qürur duyur ki, onun vətənini sevən vətənpərvər bir Ali Baş Komandanı, dövlət başçısı var.

-Sizcə Azərbaycan xalqının qəhrəmanları, sərkərdələri barədə yazıçılarımız kifayətqədər kitablar yazırlarmı və bu amil gənclərin vətənpərvər ruhda böyüməsinə necə təsir edir?

-Vətənpərvərlik haqqında və ya qəhrəmanlar haqqında kitab yazmaq üçün ədəbi mühit formalaşmalıdır. İctimai müzakirələr aparılmalıdır. Gənclər də müzakirələrdə iştirak etməlidir. Qəhrəmanın qələm ustası tərəfindən təqdim olunması, gələcək üçün etdiyi xidmətdir. Köhnə kitablar var ki, qeyd olunan mövzuları əhatə edib. İndiki dövrdə, yazıçılarımız bu mövzulara müraciət etmir. Bunun üçün tələbat formalaşmalıdır. Gənclərimizin vətənpərvər ruhu artdıqca, bu tələbat yaranacaq. Yazıçılarımız qəhrəmanın yaşadığı mühiti təsvir etmək, onun keçirdiyi hissləri qələmə almaq üçün qəhrəmanların ailəsindən real hekayələrə müraciət etməlidir. Gənclərimizin kitab oxumaq vərdişi yaranmalıdır. Bunun üçün, bütün vasitə və imkanlardan yararlanaraq, hər kəsi kitab oxumağa dəvət etməliyik.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2015.- 20 noyabr.- S.15.