Vətənpərvərliyin təbliği üçün

telekanallar ciddi iş görməlidir

Tərlan Eyvazov: “Çünki hazırda ən çox izləyici kütləsini televiziyalar yığıb”

Azərbaycanda gənclərin milli mənlik süurunun inkişaf etdirilməsi və və vətənpərvərlik hisslərinin artırılması ilə bağlı maarifləndirmə tədbirləri aparılır. 90-cı illərin əvvəlləri ilə müqayisədə bu gün bu prosesə daha geniş yer ayrılıb, gənclərin maarifləndirilməsi üçün kifayət qədər şərait yaradılıb. Azərbaycanda yetişən gənc nəslin də yaradılmış bu imkanlardan istifadə etməsi vacibdir.

Bu gün Azərbaycanda 100-ə yaxın gənclər təşkilatları var ki, həmin təşkilatlar öz üzvləri ilə yanaşı, ölkədəki gənclərin də milli mənlik şüurunun inkişafına və vətənpərvərlik hisslərinin artırılmasına diqqət yetirir, gənclərdə vətənpərvərlik hisslərinin yüksəlməsinə çalışır. Əslində, bu proses Azərbaycanda 90-cı ilin əvvəllərindən başlansa da, həmin vaxtlarda şəraitsizlik bu cür təbliğatların aparılmasına, yüksək səviyyəyə çatdırılmasına mane olurdu. Ümummilli lider Heydər Əliyev yenidən hakimiyyətə qayıdandan sonra Azərbaycanın inkişafı ilə yanaşı, gənc nəslin inkişafına da böyük diqqət ayırdı və Azərbaycan gəncinin aktiv fəaliyyətinə şərait yaratdı. Bu gün bu sahəyə daha böyük diqqət artırılmaqdadır və Azərbaycan gəncinin özünü dərk etməsinə daha geniş şərait yaradılıb. Amma, bu şəraitdən daha geniş istifadə etmək vacibdir. Müharibə şəraitində yaşayan Azərbaycanda Azərbaycan gənclərinin vətənpərvərlik hissi daha çox olmalıdır.

Ölkədə gənclər üçün normal şərait yaradıldığı halda gənclərin milli mənlik şüurunun inkişaf etdirilməsi və vətənpərvərlik hisslərinin artırılması ilə bağlı görülən işlər qənaətbəxşdirmi? Bunun üçün hansı tədbirlər görülməlidir?

“Qorqud” Araşdırmalar Mərkəzinin rəhbəri, ehtiyatda olan zabit Tərlan Eyvazov hesab edir ki, bu sahədə əvvəlki illərə nisbətən inkişaf var. Tərlan Eyvazov deyir ki, əvvəlki illərdə bu sahədə vəziyyət qənaətbəxş deyildi. Amma, hazırki dövrdə irəliləyiş mövcuddur: “Son illərdə kütləvi informasiya vasitələrində, ictimaiyyətdə, birinci növbədə isə dövlətin orduya, Silahlı Qüvvələrə böyük ümidi var. Bu da ictimaiyyətdə vətənpərvərlik hissinin artmasına səbəb olur. Bu ilk növbədə dövlətin orduya qayğısının nəticəsidir. Dövlətin orduya diqqəti, ordunun silahlandırılmasına diqqətin artırılması, hərbçilərin məişət şəraitinin yaxşılaşdırılması, əsgərlərə qayğının artırılması, əsgərlərin təsərrüfat işlərindən uzaqlaşdırılması, bu işlərə mülki şəxslərin cəlb edilməsi, zabitlərə mənzillərin verilməsi, hərbçilərin maaşlarının artırılması, əsgərlərin sırf döyüş hazırlığına cəlb edilməsi bu məsələdə böyük rol oynayır”. Tərlan Eyvazov deyir ki, son vaxtlarda Ali Baş Komandanın və müdafiə nazirinin hərbçilərə düşmənə layiqli cavab verməsi barədə tapşırıq verməsi də Azərbaycan ordusu ilə yanaşı ictimaiyyətdə də ruh yüksəkliyi yaradıb: “Yəqin ki, sonuncu vertolyot hadisəsini xatırlayırsınız. Bizim hərbçimizin düşmən vertolyotunu vurmasından sonrakı vəziyyət ictimaiyyətin, gənclərin orduya olan inamını, vətənpərvərliyini bir daha artırdı”. Tərlan Eyvazov deyir ki, son illər Səfərbərlik üzrə Dövlət Xidmətinin gördüyü müsbət işlər də gənclərdə vətənpərvərlik hisslərini artırıb: “Son illər orduya qeyri-sağlam çağırışçıların aparılmaması, çağırışçıların ciddi yoxlanılması təqdirəlayiq məsələlərdəndir”.

Mərkəz rəhbəri deyir ki, buna baxmayaraq bu sahədə bəzi problemlər qalmaqdadır və bu da vətənpərvərliyin artırılmasına müəyyən təsirlər edir: “Qanunda nəzərdə tutulduğu kimi, 17 yaşlı çağırışçıların cəlb olunması, onların fiziki və hərbi hazırlığının artırılmasında nöqsanlar hələ də var. Bu problemlər tam aradan qaldırılmalıdır”. Tərlan Eyvazov deyir ki, bu gün orta məktəblərdə hərbi hazırlıq, vətənpərvərliyin təbliği var: “Orta məktəblərdə bu cür tədbirlərin keyfiyyətinin artırılmasını müşahidə edirik. Bu istiqamətdə görüləsi işlər çoxdur. Bunlardan biri də onillik təhsildən onbirillik təhsilə keçməsində baş verib. İndi orta məktəbi bitirən oğlanların hərbiyə hazırlanmasına çox az vaxt qalır. Bu da bir növ diskomfort yaradır. Bu prosesdə çağırış yaşının 19-20 yaşa qaldırılması məqsədəuyğun olardı. Bu mənim fikrimcə öz effektini verərdi. Çünki, orta məktəbi bitirən oğlanlar sinif oturacağından birbaşa hərbiyə yollanır, onların hərbiyə hazırlanmasına, özünü hazırlamasına imkan olmur. Bu da çağırışçıların mülki həyatdan hərbi həyata adaptasiyasında çətinliklər törədir. Amma. Orta məktəb məzununun hərbiyə hazırlanmasına müəyyən vaxt olsa, məncə bu problem aradan qalxar”.

Tərlan Eyvazov deyir ki, bu cür halların aradan qaldırılması gənclərdə hərbi vətənpərvərliyin artmasında yüksək dönüş yaradar.

Telekanallarda bayağı verilişlər yox,

vətənpərvərlik proqramları hazırlanmalıdır

Ekspert deyir ki, bu sahədə əsas maarifləndirmə vasitəsi ölkə televiziyalarıdır və telekanallar öz fəaliyyətində bu sahədə ciddi dönüş yaratmalıdırlar. Telekanalların ictimaiyyəti maarifləndirməsini vacib sayan Tərlan Eyvazov deyir ki, gənclərin milli mənlik süurunun inkişaf etdirilməsi və vətənpərvərliyin artırılmasında televiziyaların rolu böyükdür: “Bu sahədə görəcəyimiz işlər çoxdur. Çoxdur ona görə ki, gecə-gündüz kommersiya adlandırılan və ancaq şoularla məşğul olan, ən çox izləyici toplayan telekanallarımız bu məsələyə çox az diqqət yetirir. Düzdür, bir tərəfdən telekanallar azaddır. Amma, digər tərəfdən onlara bu məsələ ilə bağlı tapşırıqlar vermək olar. Əslində, bu sahədə təbliğat telekanalların öhdəliyi olmalıdır. Telekanallarda professional səviyyədə vətənpərvərlik proqramları hazırlanmalıdır. Daha bayağı verilişlər yox. Telekanallarda bayağı verilişlər, şoular nə qədər maraqlı ola bilər? Maraqlı ola bilər, amma bu qədər də yox. Hər şeyi ifrat dərəcədə etmək lazım deyil. Bu boyda problem ola-ola, torpaqlarımızın 20 faizi 25 ildən artıq işğal altında olduğu halda, vətənpərvərlik proqramlarını nəyinsə xətrinə etmək düzgün deyil. Bu sahədə telekanallar ciddi tədbirlər görməlidir. Milli Televiziya və Radio Şurası bu məsələyə ciddi müdaxilə etməlidir. Bu sahəyə telekanallar ciddi diqqət yetirməlidir. Gənc nəsilin vətənpərvər yetişməsi, milli mənlik şüurunu inkişaf etdirmək üçün telekanalların üzərinə böyük vəzifə düşür. Çünki hazırda ən çox izləyici telekanallardadır. Telekanallar yalnız ordu günü, respublika günü və digər bayram günlərində deyil, vətənpərvərliklə bağlı gündəlik verilişlər hazırlamalıdır. Telekanallarda bu təbliğat yüksək sahədə qurulmalıdır, bu sahəyə peşəkarlar cəlb edilməlidir”.

Orta məktəblərdə vətənpərvərlik

təbliğatına yüksək şərait yaradılıb

Orta məktəblərdə vətənpərvərliyin təbliği ilə bağlı görülən işlərə gəlincə isə Tərlan Eyvazov deyir ki, sovet dövrü ilə müqayisədə hazırki dövrdə bu təbliğat zəifdir: “Düzdür, hazırki vaxtlarda bizim orta məktəblərdə bu istiqamətlərdə görülən işlərlə maraqlanmağa o qədər də şərait yaradılmır. Çünki, əvvəlki kimi, hər istəyən şəxs, hərbi təşkilat və hərbi ekspert bu məsələ ilə maraqlanmaq üçün məktəblərə buraxılmır. Amma, məlumata görə, 10 il əvvəllə müqayisədə, məktəblərdə də bu istiqamətdə təbliğat güclü aparılır. Bu sahədə irəliləyiş var. Amma, yenə də bu irəliləyişlə kifayətlənmək olmaz. Bütün məktəblərdə istər Təhsil Nazirliyinin, istərsə də digər aidiyyəti təşkilatların xətti ilə müxtəlif kabinələr, o cümlədən də hərbi kabinetlər yüksək səviyyədə yaradılıb və bütün lazımi avadanlıqlarla təmin oliunub. Qaldı ki vətənpərvərlik dərslərinin təşkilinə, o artıq həmin məktəbin rəhbərliyi və kollektivinin təşkilatçılığından asılıdır. Ola bilər ki, təbliğat aparan müəllim yaxşı zabit olsun, amma yaxşı pedaqoq olmasın. Bu məsələlərə də diqqət yetirmək lazımdır”.

Ailələrdə vətənpərvərliyin

təbliği ailə büdcəsindən asılıdır

Ailələrdə vətənpərvərliyin təbliğinə gəlincə isə mərkəz rəhbəri bu məsələdə ailənin maddi gəlirinin də əsas rol oynadığını iddia edir. Onun sözlərinə görə, ailədə övladın vətənpərvər böyüməsi üçün ilk növbədə həmin ailənin dolanışığı normal olmalıdır: “Statistikaya baxsaq, Azərbaycanda ailələrin gəlirlərində artım var. Əgər ölkənin pul gəlirləri artırsa, insanların da sosial rifahı yaxşılaşmağa doğru gedir. Bu birinci məsələdir. Əgər ailənin gəliri azdırsa, onun vətənpərvərliyi normal yaşayışı olan ailənin vətənpərvərliyi ilə bir ola bilməz. Dövlətin imkanı varsa, vətəndaş bu imkanlardan yararlanırsa, həmin vətəndaşın ailəsində də vətənpərvərlik təbliğatı inkişaf edəcək. Son illərdə gəlirlərin artması, insanların şəraitinin yaxşılaşması ailədə böyüyən uşağın da vətənpərvərliyinə, inkişafına müsbət tədsirini göstərir. Və digər tərəfdən, gənc görəndə ki, hansısa ata üzünü televiziya kameralarına tutub yüksək ruhla “Oğlum Vətən yolunda şəhid olub” deyir, bu söz həmin gəncdə vətənpərvərlik ruhunu yüksəldir. Bu cür sujetlərə baxanda insan qürurlanır. Azərbaycanlı valideyn erməni valideynlərdən fərqli olaraq övladının vətən yolunda şəhid olmasından qürur duyur. Bu gün azərbaycanlı valideyn övladının ön cəbhədə olması ilə fəxr edir, daha əvvəlki kimi övladını ön cəbhədən yayındırmaq üçün müxtəlif vasitələrdən istifadə etməyə çalışmır”.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 14 yanvar.- S.11.