“Azərbaycançılıq bu günün qızılbaşlığıdır”

“Akademik baxımdan Ramiz Mehdiyevin araşdırma və yaradıcı fəaliyyəti bütünlüklə bu xəttin üzərində qurulub”

“Gənc nəslin vətənpərvərlik hisslərinin tərbiyəsi istiqamətində televiziyanın, mətbuatın da rolu böyükdür”

Vətənpərvərlik məsələsi cəmiyyətdə həmişə aktual olub. Millətin vətənpərvərliyi onun tamlığının, bütövlüyünün təməlidir desək, bəlkə də, səhv etmərik. Bir xalqın, millətin vətənpərvərlik şüuru onun digər xalqlar və millətlər tərəfindən qəbul edilməsi, tanınması, hörmətlə qarşılanması, ən əsası isə o xalqın yaratdığı dövlətin bütövlüyü, varlığı, suverenliyi ilə ölçülür. Azərbaycanın igid, cəsur oğulları, qeyrətli qızları həmişə vətənpərvər olmuş, yadelli işğalçılara qarşı qəhrəmancasına mübarizə apararaq Vətənini düşmən ayağına verməmişlər.

Mərd, mübariz oğul və qızlarımız öz doğma vətənlərini həmişə hərarətlə sevmiş, onun qədrini bilmiş, vətən naminə canlarını qurban verməkdən çəkinməyiblər. Bu igid Vətən övladları doğma yurd naminə canlarından keçməklə əsl vətənpərvərlik nümunəsi göstərmiş, şərəfli bir iz qoyub getmişlər. Bu gün milli vətənpərvərlik Vətənin göz bəbəyi kimi qorunmasında təzahür edir və bunu bu günkü gənclərimiz bütün məsuliyyəti ilə dərk edirlər. Fəhlə öz vətənpərvərliyini yaxşı işləməklə, alim maraqlı elmi kəşfləri ilə izah edirsə, müasir gənclərimiz doğma torpağımızı və dövlətimizi fədakarlıqla müdafiə etməkdə görürlər. Milli vətənpərvərlik hissinin məzmununu doğma Vətənə məhəbbət, onun tarixi keçmişi, adət-ənənələri ilə fəxr etmək, Vətənin, millətin mənafeyini öz mənafeyi kimi dərk etmək və onun müdafiəsinə hər an hazır olmaq təşkil edir. Vətən üçün ümumi anlayışlardan olan duyğu məfhumu olan “vətən sevgisi”ni ərəb şairi Asmayi belə ifadə edir: “Bir bədəvinin belə dediyini eşitdim: “Əgər kişini tanımaq istəyirsənsə, onun vətəni və dost-qardaşları üçün necə darıxdığına, onları arzuladığına və keçmiş zamanı üçün ağlamasına bax”. Bu hiss vətənə bağlılıqdır. Hər kəs böyüyüb, boya-başa çatıb, suyundan içərək, sərvətlərindən yediyi üçün o vətəndə onun ruhi və hissi ehtiyacları var. İnsan vətənini sevməli, orada yaşamağa səy göstərməli və öz ixtiyarı ilə oranı tərk etməməlidir. Vətəni sevmək insan daxilində kök salmış elə bir xüsusiyyətdir ki, insanı orada qalarkən rahatlıq tapmağa, oradan gedərkən darıxmağa, ora hücum olunarsa müdafiə etməyə və torpağı alinarsa qəzəblənməyə sürükləyir. Bu təbii formada olan vətənpərvərlik bəyənilən bir əməl, ülvi bir hissdir. İnsan vətənini tərk etməyə nə qədər məcbur olsa belə, yenə də vətən həsrəti zehnində qalaraq ondan ayrılmayacaq. Tarixin minillik inkişafı sübut edir ki, insanların yalnız şəxsi mənfəətlərini düşündüyü, cəmiyyətin və dövlətlərin problemlərinə biganə yanaşdığı hallarda bu təkcə onlarının özünün deyil, bütün cəmiyyətin daxilində mənəvi aşınmaya səbəb olur, insanlar arasında ünsiyyət zəifləyir, nəticədə bütövlükdə dövlətin mövcudluğu üçün təhlükə yaranır.

Azərbaycan Respublikasının qarşısında duran bir çox problemlərin həlli gənclərin milli vətənpərvərlik ruhunda tərbiyə edilməsindən, onlarda yüksək dövlətçilik şüurunun, mənsub olduğu millətə və dövlətə qarşı qürur hisslərinin formalaşdırılmasından çox asılıdır. Məsələ ətrafında yaranmış suallara Emin Piri, Ceyhun Rasimoğlu və Oral Mədənçi cavab verdilər.

Emin Piri (yazar): “Ümumiyyətlə, bu məsələyə tarixə, dünya dövlətlərinə, məkana və zaman baxaraq qiymət verməliyik. 90-cı illərə baxanda istər ədəbiyyat olsun, istərsə digər sahələrdə tendensiya ayrı cür idi. Daha çox mərsiyə, ağlaşma və şablon, pafoslu ifadələr vətənpərvərliyi əvəz edirdi. Bu çox təhlükəlidir. Pafoslu ifadələr özünü aldatmaqdırsa, ədəbiyyat, ümumiyyətlə, incəsənətdə üzgünlük isə özü-özünü məhv etməkdən başqa bir şey deyildir. Mənim fikrimcə vətənpərvərlik – özünü tanımaq və öz milli kimliyinə sevgini yaratmaq, bütövlük naminə ideoloji xəttə sadiq qalmaqla mümkündür. Digər hallar özünü deyil, bütün cəmiyyəti də məhvə aparmaqdan başqa bir şey deyil. Özünü sevmədən qonşuya və ya qarşındakına nifrət hissi qarşındakıyla bərabər özünü də məhv edir. Necə ki, nasist Almaniyası bunu yaşadı. Adolf Hitlerin söylədiyi kimi” “Liderlik sənəti kütlənin diqqətini bir düşmənə yönəltməyə və heç bir şeyin bu diqqəti dağıtmasına imkan verməməkdən aslıdır” . Millətin bütün düşüncəsini bir düşmənə yönəltmək sonradan məhv edənin özünün də məhv etməsinə səbəb olur. Yenə dediyim kimi bunu qorumaq üçün öz milli kimliyi yalnız sevərək, yaşadaraq həm gücləndirə, həm də düşmənini məğlub edə bilərsən. Tarixə boylansaq, bu gün Azərbaycan müəyyən dərəcədə XV əsrin sonlarını, XVI əsrin əvvəllərinə bənzər durumunun olduğunu görə bilərik. Şah İsmayılın yürütdüyü siyasət, daha çox milli İslam, yəni qızılbaşlıqla dövlətə məxsus olan məkanda etnikləri bir kimlik altında birləşdirə bildi. Və bu kimlik daha çox mili dini-ideologiya idi. Bu gün də həmin milli-dini-dövlət ideologiya öz əhəmiyyətini itirməyib. Və deyərdim ki, məkan və zaman baxımından ən uğurlu siyasət budur. Heydər Əliyev isə təhlükəsizlik və siyasi aparatdakı təcrübəsindən bütün bunları bilirdi. Və müasir azərbaycançılıq bu günün qızılbaşlığıdır. Daha doğrusu eyni nəzəriyyə məkan və zaman baxımından milli-dini-dövlət ideologiyasını Şah İsmayıldan sonra ikinci kərə tətbiq etdi. Bu üç ideoloji xəttin birləşməsi Azərbaycanı bütövlüyə aparan xətdir. Fərqi yoxdur, hakimiyyətdə kim olacaq. Önəmli olan bu xətti qorumaq lazımdır. Akademik baxımdan Ramiz Mehdiyevin araşdırma və yaradıcı fəaliyyəti deyərdim ki, bütünlüklə bu xəttin üzərində qurulub.

Ceyhun Rasimoğlu (“Səs” İnformasiya Agentliyinin Xəbərlər şöbəsinin müdiri): “Bu gün Azərbaycan dövlətinin gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi istiqamətində gördüyü işlər əvəzsizdir. Buna misal olaraq dövlət başçısı cənab İlham Əliyevin gənclərlə bağlı imzaladığı sərəncamlar və verdiyi fərmanları göstərə bilərik. Heç şübhəsiz ki, bu işdə valideynlərin və orta məktəb müəllimlərinin də rolu böyük əhəmiyyətə malikdir. Amma bu da bir faktdır ki, valideyn himyasindən və nəzarətindən kənarda qalan gənclərdə milli mənlik şüurunun inkişafın etdirilməsində müəyyən problemlər yaranır ki, bu da sonradan onların müxtəlif pis vərdişlərə aludə olmasına gətirib çıxarır. Təbii ki, bunun da qarşısının alınmasında valideynlərin üzərinə böyük məsuliyyət düşür. Bu gün ölkəmizin müxtəlif regionlarda Gənclər Mərkəzinin yaradılması, yeni-yeni Olimpiya İdman Komplekslərinin fəaliyyəti gənc nəslin asudə vaxtını daha səmərəli keçirməsinə müsbət imkanlar yaradır. Bununla belə, qeyd edərdim ki, gənc nəslin vətənpərvərlik hisslərinin tərbiyəsi istiqamətində televiziyanın, mətbuatın rolu böyükdür. Düşünürəm ki, televiziyalarda vətənpərvərlik ruhunda verilişlərin sayı nə qədər çox olarsa, bu, bir o qədər gənc nəslin milli mənlik şüurunun inkişafında müstəsna əhəmiyyətə malik olacaq. Ümumilikdə isə qeyd edim ki, bu gün cənab Prezident İlham Əliyevin gənclər siyasəti ilə bağlı apardığı uğurlu siyasət həm gənclərimizin milli-vətənpərvərlik ruhunda tərbiyə almasında, həm də onların ölkəmizə yararlı övlad kimi xidmət etmələrində müstəsna rola malik olacaq”.

Oral Mədənçi (“ATV Xeber”in redaktoru): “Mənim fikrimcə torpaqlarının 20 faizi işğal altında olan, illərdir müharibə şəraitində yaşayan bir ölkədə gənclərə vətənpərvərlik hissinin aşılanması vacibdir. Bu isə ilk növbədə təhsillə bağlı məsələdir. Vətənpərvər insan yetişdirmək üçün ilk növbədə savadlı insan yetişdirmək lazımdır. Azərbaycanın tarixini, mədəniyyətini yaxşı bilən insan sizcə, bu vətəni sevməyə bilərmi? Məncə yox, çünki onun ölkəsinin şanlı tarixi var, min illərdir formalaşan zəngin mədəniyyəti var. Amma ümumi mənzərəyə baxanda mən deyərdim ki, Azərbaycan gəncliyi bu gün vətənpərvərdir. Bilirsiniz ki, bütün dünyada demokratik iqtidarlar hər zaman öz siyasi projelərini gəncliyin üzərində qururlar. Gəncliyin düzgün istiqamətə yönəldilməsinə çalışırlar. Bizim ölkəmizdə də gənclərlə bağlı bir çox dövlət proqramları həyata keçirilib, keçirilir. Gənclərin problemləri daim diqqət mərkəzində saxlanılır dövlətimiz tərəfindən. Hesab edirəm ki, məhz dövlətin gənclərə bu diqqət və qayğısının nəticəsidir ki, ölkə gəncliyi Ali baş komandan, prezident İlham Əliyevin ətrafında sıx birləşib. Bax bu vətənpərvərlikdir! Bəzən Azərbaycanın inkişafını istəməyən qüvvələr çalışırlar Azərbaycan gəncliyindən istifadə etsinlər, gəncliyi o əyri yola çəkməyə çalışırlar. Amma biz görük ki, gənclərimizin buna reaksiyası necə olur. İndi də bunun daha sivil yolunu tapıblar, Azərbaycan gəncliyini milli ruhdan, vətənpərvərlikdən uzaqlaşdırmaq üçün Azərbaycan tarixinə, tarixi şəxsiyyətlərinə sanki bir qarayaxma kompaniyası başladıblar. Bunu Babək, Şah İsmayıl Xətayi, Səfəvilər dövləti ilə bağlı polemikalarda aydın gördük. Amma mənim fikrimcə gəncliyimiz yenə öz sözünü dedi, bu adamları elə tarixi faktlarla susdurdular. Gənclik vətənpərvər olmalıdır, öz xalqının, ölkəsinin tarixinə hər zaman sahib çıxmalıdır. Biz avropalı deyilik, biz şərqlidə deyilik, biz elə bizik, özümüzük. Özümüz kimi də olmalıyıq hər zaman”.

Azərbaycan Respublikası Prezidenti yanında KİV-in İnkişafına Dövlət

Dəstəyi Fondunun maliyyə dəstəyilə çap edilmişdir

Olaylar.- 2015.- 28 yanvar.- S.15.