Bizi ağrıtmağa haqqın yox idi, şair!

Bəzən başlamaq çətin olur. Bunların hamısı yeniliklərlə bağlıdır. Keçmişin yaratdığı alışqanlıqları təzələr qabağına qatıb selləmə aparanda daha bir çətindir, qarşısına çıxamaq. Alışqanlıqdandır, nədəndir bilmirəm, amma şair üçün çox darıxdıq. Bu qədər sevənin varkən getmək niyə? İnsanları tanımaq olmur. Sevgidən danışanların, ömrünü eşqə, işıqların müxtəlif rəng ahəngdarlığına həsr edənlərin bəzən səni saymayacaq qədər qəddar olduğunu görürsən. İnsanlar zatən, etibarsızdılar.

Lakin elələri var ki, səni saymayacaq, düşünməyəcək qədər arxasını çevirib getməsinə yanırsan. Hisslər oyuncaq deyil axı. Alışqanlıqdandır, nədəndir bilmirəm, amma çox qəddarsan, şair. Elə getdin ki, arxanca danışılacaq ağır yüklü sözlər buraxdın. Qalaraq bizləri susdura bilərdin. İndi daha rahatsan, ağrımırsan. Allahdan istəmişdin, göndərmədi və bilirəm ki, sonda darıxıb özün getdin. İndi ağrımırsan. Amma bir şeyi unutdun axı. Bizi. Bizləri ağrıtmağa haqqın yox idi. Gedəcəkdinsə, sevdirməyəydin. Üzünü heç görmədiyi atasına 17 ildən sonra qovuşmuş yetim kimi soyuq baxardıq gedişinə. Aramızda olmamağını, hiss etməzdik.

Yenə də müsahibə üçün qapına düzüləcəklər. Daha yaxşısından olsun deyə, yenə də səndən müsahibə istəyəcəklər. Getməyini unudub qapını vurub soruşacaqlar: – Vaqif Səmədoğlu evdədir? “Getdi” sözünün silləsinə ağrıyacaqlar. O “getdi” sözünün yalanlığına ovunub qapı önündə məskən salacaqlar. Özlərini aldadacaqlar, şair.

Bir gün ölüm xəbərsiz gələrsə, onu dayandırmaq üçün bir yerə yığılardıq. Əvvəlcədən xəbərləşərdik. Əzrayılın axtardığı bir can idisə, yaşamağa layiq olmayanların ünvanına göndərərdik. Qatil olardıq. Tanrıya qarşı gəlmək deyil bu. Əsla! Bizim də gülməyə haqqımız var.

Bəlkə, bu hadisə hansısa bir yazıçının yeni novellasıdır. Biz də oradakı obrazlar. Hə, mütləq belədir. Başqa cür ola bilməz. Belədir. Novella insanlar üçün daha maraqlıdır. Hamı gözlənilməz sonluqla bitən əsərləri daha çox sevir. Sənin də gedişin o novellanın kulminasiya nöqtəsidir. Və sonda qayıdacaqsan. Elə bilirdin, bizdən gizlədə biləcəksən? Yox, düşündüyün qədər də sadəlövh deyilik. Bunu səni tanımayanlara qandıra bilərsən. Bizə də yox, şair.

Mənsur

Olaylar.- 2015.- 29 yanvar.- S.11.