Azərbaycan gənci orduya tələsir

Torpaqlarımızı işğaldan azad etmək üçün

Aprelin 2-də gecədən başlayaraq Azərbaycan-Ermənistan cəbhə xəttində davam edən gərginlik atəşkəs razılaşması ilə baş çatdı. Azərbaycan Silahlı Qüvvələrinin həyata keçirdiyi uğurlu əməliyyatlar nəticəsində torpaqlarımızı işğal etmiş Ermənistan silahlı birləşmələri yüzlərlə insan, onlarla hərbi texnika itkisi verməyə məcbur oldular. Azərbaycan Ordusu cəbhə bölgəsində erməni hərbi birləşmələrinin təxribat əməllərinə güclü zərbə ilə cavab verərək, düşməni sarsıdıcı məğlubiyyətə uğradıb. İşğal olunmuş bir neçə yaşayış məntəqəsi və yüksəklik azad olunub.

Baxmayaraq ki, ermənilər həmişə olduğu kimi bu dəfə də vədlərinə xilaf çıxaraq atəşkəs rejimini pozmaqda davam edirlər, aparılan əməliyyatlar Azərbaycanda əhali arasında böyük ruh yüksəkliyi, döyüş əzminin və orduya inamın artması, əqidəsindən asılı olmayaraq hamının həmrəy olması ilə nəticələndi. Ermənistanın hərbi-siyasi rejimi isə Azərbaycana qarşı qazdığı quyuya özü düşdü. Ermənistan bu əməliyyatlardan həm hərbi, həm də siyasi cəhətdən məğlub ayrıldılar. Üstəlik, dünya ölkələrinin heç biri rəsmi şəkildə Azərbaycanı öz ərazisində apardığı hərbi əməliyyatlara görə qınamadı. Beynəlxalq təşkilatlar isə anladılar ki, bu münaqişə heç də donmayıb və tezliklə həll olunmalıdır. Bu arada onların yadına düşdü ki, bölgədə gərginliyin yaranmasının əsas səbəbkarı elə Ermənistanın özüdür və onlar artıq 20 ildən çoxdur ki, beynəlxalq hüquqa tüpürərək nə BMT-nin, nə də digər təşkilatların erməni ordusunun işğal etdikləri ərazilərdən çıxarılmasına dair qətnamələri yerinə yetirmir. Qısası, Ermənistan bu məsələdə hərtərəfli dalana dirənərək həm ölkə, həm də dünya ictimaiyyəti qarşısında açiz vəziyyətdə qaldı. Qətiyyətlə demək olar ki, cəbhə xəttində yerləşən, xüsusən döyüş əməliyyatlarının getdiyi rayonlarımızın sakinləri bu hadisədən daha da ruhlandılar. Ağdam rayon İcra Hakimiyyətindən bildirilib ki, rayonda vəziyyət stabildir, əhalidə yüksək əhval-ruhiyyə var. İcra hakimiyyətinin nümayəndəsi bildirib ki, hazırda əhalidə çox yük əhaval ruhiyyə var: “Hər kəs evindədir. Heç kəs köçürülməyib. İcra Hakimiyyəti tərəfindən komissiya yaradılıb. Sərhəd kəndləri müntəzəm olaraq yoxlanılır. İşıq, qaz fasiləsiz verilir. Hamıda böyük ruh yüksəkliyi var. Heç bir təşviş yoxdur. Adamlar öz evlərində gündəlik məişət qayğıları ilə məşğuldur. Heç kim evini tərk etmək barədə düşünmür. Əksinə, əhalidə ruh yüksəkliyi var. Torpaqların azad olunmasına hər an hazırıq". Ağdam rayon icra hakimiyyətinin başçısı Raqub Məmmədov deyib ki, 94 minlik rayon əhli nəinki kəndləri tərk etmək istəyir, əksinə istər gənclər, istərsə də yaşlılar müraciət edib orduya qoşulmaq istədiklərini deyirlər: "Ağdamlılar hər an Ali Baş Komandanın əmrinə hazır olduqlarını bildirirlər". Füzuli rayon İcra Hakimiyyətindən də bildiriblər ki, hazırda rayonda əhali arasında ruh yüksəkliyi müşahidə edilir: "Ordumuz tərəfindən sakinlər mühafizə edilir. İcra hakimiyyətinin nümayəndələri sakinlərlə görüş keçirib. Sakinlərdə yüksək ruh yüksəkliyi var. Hətta bir çoxu könüllü şəkildə döyüşmək istədiklərini deyirlər". Tərtər Rayon İcra Hakimiyyətinin başçısı Müstəqim Məmmədov da deyib ki, rayonda hər şey normaldır: "Rayonda vəziyyət sabitdir, panikaya əsas yoxdur. İnsanlar adi qaydada işləyir, sakinlər hamısı yerindədir, vəziyyətə nəzarət olunur". Hər üç rayonun icra başçıları cəbhə bölgəsində Azərbaycan əsgərlərinin qəhrəmanlığını xalqımızın böyük sevinclə qarşıladığını vurğulayaraq, yaxın vaxtlarda düşmən tapdağı altında qalan torpaqlarımızın tamamilə azad olunacağına, qaçqın və məcburi köçkünlərin doğma yurd-yuvalarına qayıdacaqlarına əminliyini ifadə ediblər. Onlar hər an Ali Baş Komandanın əmri ilə Vətən yolunda canlarından keçməyə hazır olduqlarını qeyd edərək, bütün dünya azərbaycanlılarını Prezident İlham Əliyevin ətrafında sıx birləşməyə, dünya ictimaiyyətini isə Azərbaycan xalqına qarşı törədilən ədalətsizliklərə göz yummamağa çağırıblar. Təmas xəttində yerləşən hər üç rayondan gələn xəbərlər deməyə əsas verir ki, ordumuzun qələbəsi əhalidə ruh yüksəkliyi yaradıb. Cəbhəyanı bölgələrdən fərqli olaraq Azərbaycan-Ermənistan qoşunlarının təmas xəttində hərbi əməliyyatların dayandırılması barədə tərəflərin əldə etdiyi razılaşmadan dərhal sonra Azərbaycan-Ermənistan dövlət sərhədində Silahlı Qüvvələrimizin Naxçıvan Muxtar Respublikasının Ordubad, Şahbuz və Babək rayonlarında yerləşən mövqeləri düşmən tərəfindən atəşə tutulub. Aprelin 5-də saat 12.10-dan başlayaraq aprelin 6-sı saat 12.56-dək sutka ərzində bu rayonlardakı mövqelərimiz Ermənistan Respublikasının Mehri, Sisian və Cermuk rayonları ərazisindəki mövqelərdən iriçaplı silahlar və qumbaraatanlardan atəşə məruz qalıb. Əlahiddə Ümumqoşun Ordusunun həmin istiqamətlərdə yerləşən bölmələrinin dəqiq cavab atəşi ilə düşmən susdurulub. Ordubad rayonu istiqamətində yerləşən bölmələrimizin cavab tədbirləri nəticəsində düşmənin qarşı tərəfdəki atəş nöqtəsi və mühəndis-istehkam qurğusu dağıdılıb. Ancaq Azərbaycan ordusunun qələbəsi deməyə əsas verir ki, düşmən qüvvələri bu ərazimizdə də öz layiqli cavablarını alacaqlar. Millət vəkili Kamaləddin Qafarov deyib ki, ermənilərin təxribatı nəticəsində cəbhədə gərginliyin artması Ermənistanın növbəti dəfə münaqişəni sülh yolu ilə həll etməyə hazır olmadığı göstərdi. Lakin düşmənin təxribatı cavabsız qalmadı: “Düşmənə layiqli cavab verildi. Ordumuzun bir neçə vacib yüksəklik və yaşayış məntəqəsini ermənilərdən azad etməsi onlara Azərbaycan ordusunun real gücünü göstərdi. Cənab prezidentin də bəyan etdiyi kimi vacib hərbi qələbə qazanılıb”. Millət vəkili deyib ki, bu günlərdə cəbhə bölgəsində müşahidə olunan gərginlik də Azərbaycanın diplomatik uğurları və Ermənistan rəhbərliyinin mürəkkəb vəziyyətə düşməsi ilə əlaqədardır: “Prezident İlham Əliyev Vaşinqtonda Nüvə Sammitində iştirakı çərçivəsində ABŞ dövlət katibi Con Kerri, vitse-prezident Co Baydenlə Ermənistan-Azərbaycan, Dağlıq Qarabağ münaqişəsinin həllinə dair danışıqlar aparıb. ABŞ qəti şəkildə münaqişənin tezliklə həllinə tərəfdar olduğunu bəyan etmiş, həmçinin Azərbaycanın haqlı mövqeyinə dəstək ifadə olunub”. K.Qafarov vurğulayıb ki, son günlərin hadisələri göstərir ki, Azərbaycan xalqında ruh yüksəkliyi var, düşməndən qisas alma arzusu böyükdür və hər zaman Ali Baş Komandanın, ölkə prezidenti İlham Əliyevin əmrini gözləyir. Məhz bu ruh yüksəkliyinin nəticəsidir ki, artıq gənclərimiz ordu sıralarında xidmət etmək üçün sıraya düzülüblər. Belə ki, “Azərbaycan Respublikası vətəndaşlarının 2016-cı il aprelin 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında” prezidentin sərəncamının icrası ilə bağlı Ağstafa rayonunda gənclərin hərbi xidmətə yola salınması münasibəti ilə geniş tədbir keçirilib. Ağstafa rayon İcra hakimiyyətinin başçısı Məhərrəm Quliyevin iştirakı ilə keçirilən toplantıda rayon İcra hakimiyyəti başçısının müavinləri, şöbə müdirləri, rayon hüquq-mühafizə orqanlarının rəhbərləri, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəhbərliyi və zabitləri, Böyük Vətən müharibəsi veteranları, rayon ağsaqqalları və Qarabağ müharibəsi əlliləri, ictimai təşkilatların nümayəndələri, yerli icra nümayəndələri və bələdiyyə sədrləri, çağırışçı gənclər və rayon ictimaiyyətinin nümayəndələri iştirak edib. Tədbir iştirakçıları ilk öncə Ümummilli lider Heydər Əliyevin abidəsini ziyarət edibər, abidənin önünə gül dəstləri qoyublar, Ulu öndərə hörmət və ehtiramlarını bildiriblər. Ağstafa rayon İcra hakimiyyətinin başçısı cənab Məhərrəm Quliyev çıxış edərək hərbi xidmətə yola salınan gəncləri təbrik edib və onları Vətənin müdafiəsi kimi müqəddəs işdə ayıq sayıq olmağa çağırıb, hərbi nizamnamələrin və komandirlərin tələblərinə əməl etməyi tövsiyə edib. Qeyd olunub ki, əsası ulu öndərimiz Heydər Əliyev tərəfindən qoyulan və cənab İlham Əliyev tərəfindən uğurla davam etdirilən ordu quruculuğu sayəsində ölkəmizdə güclü, müasir hərbi texnika və silahla təchiz edilmiş Silahlı Qüvvələr vardır və Azərbaycan Ordusu Cənubi Qafqazda ən güclü Ordudur. Azərbaycan Silahlı Qüvvələrində xidmət keçən hərbi qulluqçuların, əsgər və zabitlərin sosial müdafiəsi istiqamətində Azərbaycan dövləti tərəfindən zəruri tədbirlər görülür, onlar dövlət tərəfindən hər cür qayğı ilə əhatə edilir. Ordumuzun son günlərdə düşmən üzərində qazandığı qələbələrdən bəhs edən natiq ümid etdiyini bildirdi ki, çox tezliklə Qarabağ erməni işğalından azad ediləcək və Azərbaycan bayrağı Şuşada dalğalanacaq. Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəis müavini Füzuli Əliyev məruzə edərək bildirib ki, cənab Prezidentin Sərəncamına uyğun olaraq vətəndaşların həqiqi hərbi xidmətə çağırışı ilə əlaqədar olaraq təşkilati tədbirlər həyat keçirilir, çağırışçıların hər biri artıq hansı hərbi hissədə qulluq keçəcəklərini qabaqcadan bilirlər. Yola salınan gənclərə tövsiyələrini bildirərək onlara uğurlu xidmət arzulayıb. Çıxış edən valideynlər M.Kərimov, A.Ləzgiyeva, Qarabağ əlili Z.Hacıyev, QMƏVŞA İB-nin rayon şöbəsinin sədri Y.İsmayılov həqiqi xidmətə yola salınan gənclərə arzu və istəklərini bildiriblər. Çağırışçıların adından çıxış edən B.Bəxtiyarov şərəflə xidmət edəcəklərini qeyd edərək, torpaqlarımızın azad olunması uğurunda müharibəyə hər zaman hazır olduqlarını bildirib. Tədbir Ağstafa rayon mədəniyyət evinin musiqi kollektivlərin konsert proqramı ilə müşayiət olunub. Sonda çağırışçılar müqəddəs Quran kitabının altından keçərək dövlət bayrağını öpüb hərbi hissələrə yola salınıb.

Məlumat üçün qeyd edək ki, işğal altında olan torpaqlarımızın azad edilməsi məqsədilə bölmələrimizin son günlərdə keçirdiyi hərbi əməliyyatlarda iştirak etmək üçün Azərbaycanın minlərlə vətənpərvər oğul və qızları, hətta əsgəri xidmətə yaşı çatmayan 15-17 yaşlı gəncləri, xaricdə yaşayan soydaşlarımız, ehtiyatda olan hərbi qulluqçular, müharibə əlilləri və veteranları müraciət ünvanlayaraq Silahlı Qüvvələrə səfərbər olunmağa hazır olduqlarını bildirirlər.Müdafiə Nazirliyinin rəhbərliyi Azərbaycanda, eyni zamanda respublikadan kənarda yaşayan vətənpərvər oğul və qızlarımızla qürur duyduğunu bildirib və əsgərlərimizə göstərilən mənəvi dəstəyə görə minnətdarlığını ifadə edib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 8 aprel.- S.15.