Qəhrəman və vətənpərvər şəhidlərimiz

Aprelin ilk günlərində təmas xəttində qeydə alınan erməni təxribatında sonra başlanan aktiv hərbi əməliyyatlarda Azərbaycan Silahlı Qüvvələrinin də bir neçə əsgər və zabiti böyük qəhrəmanlıq göstərərək şəhid oldu. Torpaqlarımızın bütövlüyü uğrunda gedən döyüşlərdə yüksək qəhrəmanlıq göstərərək şəhid olmuş Vətən oğulları sırasında aprelin 2-də Mi-24 helikopterinin vurulması nəticəsində şəhid olmuş cəsur pilotlarımız da vardı. Onlardan biri də mayor Təbriz Musazadə idi. Məlumat üçün qeyd edək ki, Təbriz Musazadənin də olduğu Mi-24 helikopteri aprelin 2-də təmas xəttində gedən döyüşlər zamanı ermənilər tərəfindən vurulub. Helikopter quyruğundan vurulduğu üçün Təbriz və onun pilot dostları döyüş meydanından sağ çıxmaq imkanına malik olublar. Lakin onlar havadan düşmənin qərargahını görüb və helikopteri erməni qərargahı üzərinə yendirərək canları bahasına onlarla ermənini məhv etməyə müvəffəq olublar.

Mayor Təbriz Musazadə 1981-ci ildə Gürcüstanın Dmanisi rayonunun Yaqublu kəndində anadan olub. O, 4-cü sinfi bitirənə qədər rayondakı rusdilli məktəbdə təhsil alıb. Daha sonra isə Bakıya gəlib və orta məktəbi burada bitirib. Təbriz Musazadə hələ orta məktəb illərindən hərbi sahəyə böyük maraq göstərib. Təbriz uşaqlıqdan fərqli olub. Yaşıdlarında vətənə olan hədsiz sevgisiylə seçilərmiş. Məhz bu maraq Təbrizi hərbi təhsil almağa meyilləndirir. Təbriz Musazadə1996-1999-cu illərdə C.Naxçıvanski adına hərbi liseydə təhsil alır. Liseyi bitirdikdən sonra Təbriz hərbi təhsilini davam etdirməyi qərarlaşdırır və 1999-2003-cü illərdə o, H.Əliyev adına Ali Hərbi Təyyarəçilik Məktəbində təhsil alır. Təbriz 2003-cü ildə həmin məktəbi təyyarəçi pilot ixtisası ilə bitirir. O, qısa müddət ərzində mayor rütbəsinədək yüksəlir. Təbriz hələ hərbi məktəbdə oxuduğu illərdə torpaqlarımızın ermənilər tərəfindən işğal olunması ilə barışmır, torpaqlarımızın azad edilməsi istiqamətində mübarizə aparılmasını zəruri sayırdı. Hərbi məktəbdə oxuduğu illərdə yay tətilində doğulub boya başa çatdığı Dmanisiyə gedən Təbriz yaşıdları, kənd camaatı ilə görüşlərdə Azərbaycan torpaqlarının düşmən tapdağından azad edilməsi uğrunda mübarizədən danışır, hərbçi kimi Vətən uğrunda döyüşə hazır olduğunu bildirir və gəncləri bu mübarizəyə səsləyirdi. Əsl vətənpərvər olan Təbriz Musazadə övladlarını da vətənpərvər böyüdürdü.. Hər işdən gələndə övladları Təıbrizi hərbi salamla qarşılayarmışlar. “Sən düz salam vermədin, qəbul etmirəm” deyərmiş. Uşaqlar təzədən salamlayarmışlar onu. Şəhidin iki oğlu var: Tayfun və Onur.

Aprelin 2-də gedən döyüşlərdə şəhid olan pilotlarımızdan biri də Urfan Vəlizadədir. Ürfan da uşaqlıqdan vətənpərvər ruhda böyüyüb. O, həmişə deyərdi ki, biz torpaqlarımızı mütləq azad etməliyik, Dağlıq Qarabağ problemini bizdən sonrakı nəsillər üçün saxlaya bilmərik. Necə olursa-olsun, canımız, qanımız bahasına olsa belə, torpaqlarımızı azad etməliyik. Biz öz torpaqlarımızı heç kəsə verməyəcəyik. Urfan Vəlizadə hətta toy gününü də vaxtı ilə iyunun 26-sı, Azərbaycan Silahlı Qüvvələri Gününə salıbmış Bu ilin 26-da isə Urfanın ailə həyatı qurmasının 10 ili tamam olacaqdı. Urfanən əsgər və hərbiçi dostlarının qəhrəman şəhidimiz haqqında söylədikləri də təsdiq edir ki, şəhid Vətən oğlumuz əsl qəhrəman olub. Onlar könüllərdə taxt qurduqları kimi Vətənin tarixinə də adlarını qızıl hərflərlə yazdılar. İnşallah bütün torpaqlarımız işğaldan azad olunacaq, onların xatirəsinə o gözəl torpaqlarımızda abidələr qoyulacaq və o gün şəhidlərimizin ruhu şad olacaq. Baş leytenant Bəkir İsmayılov da aprelin 2-də gedən döyüşlərdə Mi-24 helikopterində həlak olub. Kürdəmir rayonunda dünyaya göz açan şəhid İsmayılov da gənc yaşlarından hərbi sahəyə yiyələnərək Heydər Əliyev adına Ali Təyyarəçilik Məktəbibi bitirib. Torpaqlarımız uğrunda gedən döyüşlərdə şəhid olan Bəkir İsmayılovla anadan olduğu Kürdəmir rayonunda böyük xalq izdihamı və sevgisi ilə vida mərasimi keçirilib.

Erməni təxribatı nəticəsində düşmən gülləsinə tuş gələn Vətən oğullarından biri də şəhidimiz Orxan Həmidovdur. Orxan Lələ Təpə uğrunda gedən ağır döyüşlərdə qəhrəmancasına vuruşaraq şəhid olub. Orxan torpaqlarımızı azad etmək uğrunda vuruşarkən hər an şəhid ola biləcəyinin fərqindəydi. Məhz, buna görə də ala biləcəkləri ağır xəbərdən ailəsinin sarsılmasını istəmirdi. Orxan Həmidov işğal altında olan torpaqlarımız uğrunda qəhrəmanlıqla döyüşür, düşmənə layiqli cavab verir və şəhidlik zirvəsinə ucalır. Əlvan Hüseynov da aprelin əvvəllərində qəhrəmanlıq göstərərək şəhid olan oğullarımızdandır. Əlvanın ən böyük arzusu torpaqlarımızı işğaldan azad etmək olub. Əlvan hər zaman bundan danışarmış. Əlvanla eyni rayondan olan şəhidlərimizdən biri də Səyyar Quliyevdir.

Mirsalam Cəfərov da ermənilərlə döyüşlərdə qəhrəmanlıq göstərən şəhidlərimizdəndir. Onun ən böyük arzusu Şuşanı azad edib, ən hündür qalasna Azərbaycan bayrağını sancmaq idi. Mirsalam da uşaq yaşlarından hərbi sahəyə diqqət ayırır bu sahə ilə maraqlanır. Hərb sənətinin dərinliklərini öyrənmək üçün yorulmadan oxuyur, öyrənir, çalışırdı. Qısa zamanda qeyrət göstərb, öz üzərində çalışaraq, hərb sahəsində peşəkar kimi tanınmağa başlamışdı. Mirsalam Cəfərov Tovuzun Ermənistana çox yaxın kəndlərindən sayılan Bayramlıda doğulmuşdu. Hərbiçi olub ön cəbhədə xidmət etməyi məktəb yaşlarından qarşısına məqsəd qoymuşdu. Məktədəki şəhidlər lövhəsinə diqqətlə baxdığını görən müəlliminin “Mirsalam, nə fikrə getmisən?” sualına “Müəllim, şəhidlərimizin qanını almalıyıq. Mən onların qanını almaq üçün yaşayacam, döyüşəcəm!” -, cavabını verəndə o hələ azyaşlı uşaq idi. Sonra hərb sənətinn sirlərini öyrənməyə yollandı, arzusunun ardınca. Arzusundan isə nəinki heç vaxt vaz keçmədi, əksinə, bu arzu onun ən böyük xəyalına və amalına çevrildi. Mirsalam tələbəlik illərində yazırdı ki, hər kəsin içində ən böyük saydığı bir arzusu olur. Mənim də ən böyük arzum torpaqlarımızı işğaldan azad etməkdir. Bunun üçün yaşayacam və bu yolda şəhid olsam, özümü ən xoşbəxt insanı hesab edərəm. Ailəsinə də hər zaman “Mənimlə qürur duyacaqsınız!” -,deyirmiş. Ömrünün 4 ilini - 1992-96-cı illərdə döyüş bölgələrində keçirən atasına “Mən sizdən daha yaxşı döyüşəcəm, torpaqlarımızı işğaldan azad edib, geri alacağıq”, deyərmiş. Sonuncu dəfə martin 21-i danışıb ailəsiylə. Qismət olsa, aprelin 7-də ad günümə gələcəm, görüşərik deyib. Amma özü gələ bilməsə də onun şəhidlik, qəhrəmanlıq məqamına çatması xəbəri gəldi. Şəhid Mirsalam elinə-obasına doğum günündən düz 4 gün sonra gəldi. Bütün el-oba qarşıladı şəhidini o gün. Xəbəri eşidən hər kəs “Halal olsun sənə, övlad!” -, dedilər. Onu son mənzilə yola salmağa gələnlərin sayı-hesabi yox idi. Mirsalamın valideynləri Vətən qarşısında ailəsinin başını uca etdyi üçün oğulları ilə qürur duyur, fəxr edirlər. Təki Vətən sağ olsun. Mirsalamın igidliklərindən ağızdolusu, fəxrlə danışdı döyüş yoldaşları. Böyük qəhrəmanlıqlar göstərib, düşmənə necə layiqli cavab verib Mirsalam. O, müasir dövrün qəhrəmanlarındandır. Vətəni necə sevmək nümunəsi, örnəyidir onlar. Qəhrəman bir oğul olmaqla yanaşı, həm də gözəl insan idi Mirsalam.

Cəbhədə baş verən erməni təxribatı nəticəsində şəhid olan oğlullarımızdan biri də qəhrəman hərbçi, dəyərli Vətən övladı Elnur Əliyevdir. Elnur Əliyev 10 il əvvəl Tovuz istiqamətində ön cəbhədə xidmət edirdi. O, dəyərli hərbiçi olmaqla bərabər, eyni zamanda gözəl insan idi. Elnur Vətənini dəlicəsinə sevən bir vətəndaş idi. Həyatını hərbi sahəyə bağlayan Elnur Əliyev bu sistemdə mayor rütbəsinə qədər yüksəlmişdi. Elnurun ən ümdə arzusu işğal altında olan torpaqları azad etmək idi. Elə bu vəzifə, məqsəd üçün də qulluq edirdi. Əvvəllər Tovuz istiqamətində xidmət çəkən Elnur Əliyev sonradan xidmət yerinin Fizuli istiqamətinə dəyişmişdi. Yenə də ön cəbhədə Vətənini qoruyur, torpaqlarımızın işğaldan edilməsi arzusu ilə yaşayırdı. İnsanlarımız Enur Əliyevi daha çox əsgərlərini xilas etmək üçün özünü qumbaranın üstünə ataraq şəhid olan dəyərli bir hərbiçimiz kimi daha yaxından tanıdı. Qəhrəman bir hərbçi, gözəl insan əziz şəhidmiz mayor Elnur Əliyev. Elnurla bir yerdə döyüşən əsgər və hərbiçilərin hamısı qəhrəman şəhidimizin necə mərd, qəhrəman bir hərbiçi, gözəl insan olduğunu qeyd edir. Onun Vətənini dəlicəsinə sevən bir oğul olduğunu vurğulayırdılar, onu necə qəhrəmanlıq örnəyi qoyduğundan ürək dolusu danışırdılar. Elə bu səbədən digər şəhid oğullarımız kimi Elnur Əliyevin də qəhrəmanlığı uşaqlarımız, gənc nəslimizə öyrədilməli, kütləvi informasiya vasitələri onun haqqında, qəhrəmanlığı haqqında daha çox yazılar hazırlamalı, sənədli filmlər çəkilməlidir. Çünki o qəhrəmanlığı ilə örnək bir Vətən övladıdır. Elnur Əliyevin ömrü demək olar ki, ön cəbhədə keçmişdi. Vətən üçün hər an şəhid olmağa hazır bir insan idi. Hələ 1993-cü ildə yaşadığı ərazi ermənilər tərəfindən işğal olunanda Elnur bu itki ilə barışmırdı. O, bu səbəbdən həyatını hərbi ilə bağlamaq qərarı vermişdi. Çünki ən böyük arzusu Vətən torpaqlaırını, ata yurdunu, evini düşməndən azad etmək idi. İllər əvvəl Tovuzda ön cəbhədə xidmət etdiyi zaman da Elnur bu hisslərlə yaşayırdı. Elnurun vətənpərvərliyi qardaşı Amidi də hərbiçi olmağa meyilləndirmişdi. Qardaşının ardınca Elnur Əliyevin bacısının həyat yoldaşı da hərb peşəsinə yiyələnmişdi. Vətəni işğaldan azad etmək üçün.şəhid Elnur Əliyev Lələ Təpədə qəhrəmanlıqla döyüşüb və əsgərlərini xilas etmək üçün canını qurban verib. Onunla bütün millətimiz qürur duyur. İnşallah qanları yerdı qalmayacaq və inanırıq ki, torpaqlarımız tamamilə işğaldan azad olunanda onların ruhu da sevinəcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 20 aprel.- S.15.