Gənclərimiz qəhrəmanlarımızla fəxr edir

Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması dövlətin qarşısında duran mühüm vəzifələrdən biridir. Xüsusilə bu istiqamətdə dövlətin müvafiq qurumları qarşıya qoyulan məqsəd və vəzifələr düzgün qiymətləndirərək lazımı tədbirlər həyata keçirirlər. Bu istiqamətdə Gənclər və İdman Nazirliyinin fəaliyyətini xüsusi qeyd etmək yerinə düşər. Belə ki, nazirlik zaman-zaman gənclərin vətənpərvər ruhda tərbiyə olunması, onların milli mənlik şüurunun inkişaf etdirilməsi istiqamətində silsilə tədbirlər, layihələr həyata keçirir, hazırladığı fəaliyyət proqramları, müvafiq sənədlərdə bu məsələlərə geniş yer ayırır. İstər paytaxt, istərsə də rayon gənclər və idman idarələri il ərzində vətənpərvərlik mövzularına həsr olunmuş müxtəlif tədbirlər həyata keçirirlər. Belə tədbirlərdən biri bu günlərdə Bərdə rayonunda təşkil olunub.

Belə ki, Bərdə rayon İlqar Abbasov adına Kələntərli kənd tam orta məktəbinin idman meydançasında “Şahin” hərbi-idman oyunları üzrə Respublika birinciliyinin zona yarışları keçirilib. Yarışda respublikanın 9 şəhər və rayonunun (Naftalan,Yevlax və Şəki şəhərləri, Tərtər, Goranboy, Ağcabədi, Ağdam, Gədəbəy, Xocalı rayonları) komandaları qələbə uğrunda mübarizə aparıblar. İlk öncə torpaqlarımızın azadlığı uğrunda həlak olmuş şəhidlərimizin əziz xatirəsi bir dəqiqəlik sükutla yad edildi.Yarışd başlamazdan əvvəl yarışın təntənəli açılış mərasimi keçirilmişdir. Komandaların kapitanları yarışa hazır olmaları barədə baş hakim İsa Abbasova raport veriblər. Tədbiri giriş sözü ilə Bərdə rayon Gənclər və İdman idarəsinin rəisi Anar Şahbazov açaraq gənc “Şahin”ləri və qonaqları salamlayıb. Sonra o, son vaxtlar erməni işğalçıları ilə gedən şiddətli döyüşlərdə zabit və əgərlərimizin şücaət göstərərək düşmənə layiqli cavab verməsindən, bəzi strateji əhəmiyyətli yüksəkliklərin və yaşayış məntəqələrinin azad edilməsindən,yeniyetmə və gənclərimizdə vətənpərvərlik hisslərinin gücləndirilməsində bu oyunların vacibliyindən danışıb və qeyd etdi ki,gənclərimiz ümummilli liderimiz Heydər Əliyevin siyasi kursunu uğurla həyata keçirən Azərbaycan Respublikasının Prezidenti,Ali Baş Komandan cənab İlham Əliyevin ətrafında sıx birləşiblər. Gənclər və İdman Nazirliyinin nümayəndəsi Ramil Məmmədov və Təhsil Nazirliyinin nümayəndəsi Beyrək Həsənov çıxış edərək “Şahin” hərbi –idman oyunlarının gənclərin hərbi-vətənpərvərlik ruhunda tərbiyə olunmasında mühüm əhəmiyyətindən, dövlətimizin gənclərə göstərdiyi diqqət və qayğıdan danışıblar. Yarışda I və II yerləri tutmuş komandalara Azərbaycan Respublikası Gənclər və İdman Nazirliyinin müvafiq dərəcəli diplomları təqdim olunub və bu komandalar may ayında Bakıda keçiriləcək final yarışlarında iştirak etmək hüququ qazanıblar.

Astara şəhər 3 saylı tam orta məktəbdə isə çağırışçı gəncləri vətənin müdafiəsinə mənəvi və fiziki cəhətdən hazırlamaq, gənclərdə vətənə məhəbbət və vətənpərvərlik hissini artırmaq, müxtəlif növlər üzrə ən güclüləri təyin etmək və rayonun yığma komandasını təsis etmək məqsədilə “Vətənin müdafiəsinə hazıram” poliatlon çoxnövçülüyü üzrə Astara rayon çempionatı keçirilib. Tədbirin açılışını edən rayon Gənclər və İdman İdarəsinin rəisi Ərçə Əliyev tədbir iştirakçılarını salamlayıb, 2-5 aprel tarixlərdə Azərbaycan- Ermənistan sərhədində düşmənin törətdiyi təxribatdan geniş çıxış etmiş, şəhidlərin ruhu 1 dəqiqəlik sükutla yad edilib. Çempionatda 9 məktəbin komandası 4 növ üzrə (100m məsafədən qaçış, 2000m mıəsafədən kross qaçışı, turnikdən dartınma və qumbara atma) güclərini sınayıb. Gərgin keçən mübarizə nəticəsində 1016 xalla Suparibağ kənd tam orta məktəbin komandası I yerə, 1002 xalla Astara şəhər 2 saylı tam orta məktəbin komandası II yerə və 972 xalla Təngərüd kənd tam orta məktəbin komandası III yerə layiq görülmüşdür. İlk 3 yeri qazanan komanda rayon Gənclər və İdman İdarəsinin və rayon Təhsil Şöbəsinin diplom və hədiyyələri ilə mükafatlandırılıb.

Gənclər və İdman Nazirliyi 2 aprel 2016-cı il tarixdə Azərbaycan Ermənistan sərhədində baş verən hadisələrdən sonra respublikamızda silsilə şəkildə hərbi- vətənpərvərlik tədbirləri keçirməkdədir. Belə ki, Astara rayon Gənclər və İdman İdarəsi rayon İcra Hakimiyyəti, Təhsil Şöbəsi, Mədəniyyət və Turizm Şöbəsi, YAP Gənclər Birliyi ilə birgə sözügedən mövzuda genişmiqyaslı tədbirlər keçirir. Ermənilərin atəşkəsi pozması nəticəsində şəhid olan əskər və zabitlərimizin, o cümlədən astaralı şəhid Pəncəli Nurməmməd oğlu Teymurovun xatirəsinin yad edilməsi məqsədilə Gənclər Mərkəzinin foyesində Pəncəli Teymurovun güşəsi yaradılıb. Gənclər Mərkəzində isə “Təki Vətən sağ olsun” adlı seminar-müşavirə keçirilib. Müşavirədə Astara rayon Gənclər və İdman İdarəsinin, rayon Mədəniyyət və Turizm Şöbəsinin nümayəndələri, YAP Gənclər Birliyinin sədri, müəllimlər, könüllü gənclər və tələbələr iştirak ediblər. İlk olaraq tədbir iştirakçılarını salamlayan Astara rayon Gənclər və İdman İdarəsinin rəisi Ərçə Əliyev tədbiri açıq elan etmiş və torpaqlarımızın müdafiəsi uğrunda canlarından keçən bütün şəhidlərin ruhu bir dəqiqəlik sükutla yad edilib. Müşavirədə şəhid Pəncəli Nurməmməd oğlu Teymurovun keçdiyi şərəfli həyat yolu, vətəninə,torpağına, milli-mənəvi dəyərlərimizə bağlılığı, döyüş yolu, müqəddəs şəhidlik zirvəsinə ucalması haqqında məruzə və çıxışlar edilmiş, gənclər qarşısında videoçarxlar nümayiş etdirilib. Keçirilən tədbirin davamı kimi İdarənin təşkilatçılığı ilə 14 aprel 2016-cı il tarixdə 700 nəfərə yaxın gəncin iştirakı ilə “Bayrağımız qürur mənbəyimizdir” adlı kütəvi aksiya keçirilib. Gənclər və İdman İdarəsinin rəisi Ərçə Əliyev aksiyada iştirak edən rəsmi qonaqları və gəncləri salamlayıb, şəhidlərin xatirəsi bir dəqiqəlik sükutla yad edilib.. Ərçə Əliyev hər bir gəncə qəhrəman oğullarımızdan örnək almağı tövsiyyə edib. O bildirib ki, Pəncəli kimi qəhrəman, cəsur oğullarımız nə qədər çox olarsa torpaqlarımız mənfur düşməndən o qədər tez alınar. 2 aprel tarixində baş verən hadisələr zamanı Azərbaycan oğulları necə mərd, qəhrəman, döyüşkən oğullar olduğunu və ordumuzun nələrə qadir olduğunu sübut etdilər. Aksiyada iştirak edən məktəbli və tələbələr –hər zaman vətənimizi müdafiə etməyə hazır olduqlarını bildiriblər. Gənclər Mərkəzində həmçinin şəhidlərimizin ruhunun yad edilməsi məqsədilə “Torpaq uğrunda ölən varsa vətəndir” adlı anım mərasimi də keçirilib. Anım mərasimində Astara rayonunun müxtəlif kənd ərazilərindən olan məktəblilərin iştirakı təmin edilib. Anım mərasimində iştirak edən Suparibağ kənd orta məktəbinin müəllimi Kamalə Nəsirova, rayon Mədəniyyət və Turizm Şöbəsinin məsləhətçisi Vüsal Babayev, şəhər 4 saylı tam orta məktəbin tarix müəllimi Mircəfər Babazadə çıxış edərək gənclərimizi vətənpərvər oğullarımızdan nümunə götürməyə, vətənpərvər olmağa, milli-mənəvi dəyərlərimizə, dövlət rəmzlərinə, ana dilimizə sevgi ilə, hörmət ilə yanaşmağa səsləyiblər. 2 aprel tarixində şəhid olan Astara sakini Pəncəli Teymurovun şərəfli həyat və döyüş yolu haqqında geniş çıxışlar edilib. Tədbirdə çıxış edən bir qisim gənc Pəncəli Teymurovun Milli Qəhrəman adına layiq olduğunu bildirib. Pəncəli Teymurovun vətənpərvərliyini əks etdirən videoçarxlar gənclər qarşısında nümayiş etdirilib.

Biləsuvar rayon Gənclər və İdman İdarəsinin təşkilatçılığı ilə isə Heydər Əliyev Mərkəzində “Milli Qəhrəmanlarımızı tanıyaq və tanıdaq” mövzusunda gənclərlə maarifləndirmə tədbiri keçirilib. Tədbiri giriş sözü ilə açan Biləsuvar rayon Gənclər və İdman İdarəsinin rəisi Aqşin Bağırov bildirib ki, “Milli Qəhrəmanlarımızı tanıyaq və tanıdaq” mövzusunda tədbirin keçirilməsində əsas məqsəd Vətənimizin ərazi bütövlüyü uğrunda döyüşlərdə şücaət göstərmiş Azərbaycanın Milli Qəhrəmanlarının tanıdılması və gənclərə bu uca ada layiq olan hər bir Milli Qəhrəmanlarımız, onların həyatı, keçdiyi böyük və şərəfli döyüş yolları, göstərdiyi igidliklər haqqında tam ətraflı məlumat verməkdən ibarətdir: “Hazırda Azərbaycanın 211 Milli Qəhrəmanı var və onlardan yalnız 17 nəfəri sağdır. Bildiyiniz kimi Biləsuvar rayonundan da adını öz qanı və canı ilə qəhrəmanlar sırasına yazmış qəhrəmanımız var. Mübariz İbrahimovla biz hamımız fəxr edirik. Biz qəhrəmanlarımızı tanımalı, onlar haqqında məlumatları gələcək nəsillərə ötürməliyik Əminik ki, işğal altında olan torpaqlarımızın düşmən tapdağından azad olunmasında gənclərimiz sona qədər mübarizə aparacaqlar. Onlar hər an Ali Baş Komandanımız cənab İlham Əliyevin əmrini gözləyirlər”. Tədbirdə çıxış edən Biləsuvar rayon İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Mirzə Cəfərov tədbirin gənclərin vətənpərvərlik tərbiyəsində müstəsna əhəmiyyətindən danışıb. Bildirib ki, Biləsuvar gənclərində vətənpərvərlik hissi həmişə yüksək olub.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 22 dekabr.- S.15