Vətənpərvərliyin Heydər Əliyev nümunəsi

Azərbaycan vətəndaşının qürur mənbəyinə çevrilib

Azərbaycan Silahlı Qüvvələrinin müxtəlif bölmələrində vətənpərvərlik tədbirləri davam etdirilir. Dövlət Sərhəd Xidmətinin Akademiyasında müstəqil Azərbaycan dövlətinin banisi Ulu Öndər Heydər Əliyevin anım mərasimi keçirilib. Tədbir Ulu Öndərin əziz xatirəsinin bir dəqiqəlik sükutla yad edilməsi ilə başlamışdır.

Tədbirdə çıxış edən millət vəkili Aydın Mirzəzadə, akademiyanın rəisi general-mayor Elşən Verdiyev Ulu Öndər Heydər Əliyevin Azərbaycan xalqı və dövləti qarşısında misilsiz xidmətlərindən söz açmış, tarixə öz adını əbədi həkk etmiş nadir şəxsiyyətin, hər bir Azərbaycan vətəndaşının qürur mənbəyinə çevrilmiş, Vətəninə hədsiz məhəbbət, xalqının tarixinə, mədəniyyətinə, milli-mənəvi dəyərlərinə böyük sevgi nümunəsi olan qüdrətli siyasi xadimin həyat və fəaliyyətindən danışmışlar. Dahi Öndərin ölkəmizə rəhbərlik etdiyi illərin intibah, milli tərəqqi, müstəqil dövlət quruculuğu dövrü olduğu qeyd edilən tədbirdə böyük dövlət xadiminin müstəqil Azərbaycanın Sərhəd Mühafizəsinin inkişafındakı misilsiz xidmətləri, milli hərbçi kadrların, xüsusən də sərhədçi zabitlərin hazırlanmasına göstərdiyi diqqət və qayğı minnətdarlıq hissi ilə xatırlanmışdır. Ulu Öndərin müəyyənləşdirdiyi siyasi kursu uğurla davam etdirən Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin sərhədçi kadrların yetişdirilməsinə böyük qayğı göstərərək imzaladığı tarixi sərəncamla yaradılan Dövlət Sərhəd Xidməti Akademiyasının qısa müddət ərzində ölkəmizin qabaqcıl ali təhsil müəssisələrindən birinə çevrildiyi, ölkəmizdə xüsusi ixtisaslı ali təhsilli sərhədçi zabitlərin hazırlanması, hərbi qulluqçuların peşə hazırlığının təkmilləşdirilməsi, elmi-tədqiqat işlərinin aparılması sahəsində yüksək nəticələr əldə etdiyi iftixar hissi ilə vurğulanmışdır. Bu gün Azərbaycan Respublikasının Prezidenti, Silаhlı Qüvvələrinin Аli Bаş Komаndаnı cənаb İlhаm Əliyevin rəhbərliyi ilə istər dахili, istərsə də хаrici siyаsət sahəsində əldə edilən uğurların Ulu Öndərin zəkаsının təcəssümü, əmаnət qoyub getdiyi ideyаlаrının təntənəsi olduğu minnətdarlıq hissi ilə qeyd edilmişdir. Tədbirin sonunda Ulu Öndərin həyatından bəhs edən sənədli film nümayiş etdirilmişdir. Yeri gəlmişkən qeyd edək ki, Dövlət Sərhəd Xidmətinin Akademiyasında hərbi bilik və vərdişlərin, sərhədçi peşəsinin sirlərinin dərindən öyrədilməsi ilə yanaşı, kursantların Vətənə hədsiz məhəbbət, xalqımızın tarixinə, mədəniyyətinə, milli-mənəvi dəyərlərinə hörmət ruhunda tərbiyə edilməsi xüsusi diqqət mərkəzində saxlanılır. Ulu Öndər Heydər Əliyevin dediyi "Mən arzu еdirəm ki, hər bir sərhədçi yüksək mənəviyyatlı bir insan olsun" sözlərinin tərbiyə prosesinin əsas vəzifəsi kimi qəbul edildiyi akademiyada mütəmadi olaraq müxtəlif tədbirlər keçirilir, ölkəmizin tanınmış ziyalıları ilə görüşlər təşkil edilir, kursantlar muzeyləri, müxtəlif mədəniyyət ocaqlarını ziyarət edir, teatr tamaşalarına, sərgi və konsertlərə aparılırlar. Belə tədbirlər kursantların dünyagörüşünün genişlənməsində, onların estetik zövqünün formalaş-masında, azərbaycançılıq ideyalarına sadiq, mədəniyyət və incəsənətimizə bələd olan yüksək mənəviyyatlı zabitlər kimi yetişməsində mühüm rol oynayır. Xalq şairi Nəriman Həsənzadə ilə keçirilən görüş gələcəyin sərhədçi zabitləri tərəfindən maraqla qarşılanmışdır. Şairin anadan olmasının 85 illiyi münasibəti ilə keçirilən tədbirdə akademiyanın rəisi general-mayor Elşən Verdiyev, Azərbaycan Respublikasının Prezidenti yanında Dövlət İdarəçiliyi Akademiyasının prorektoru, tarix elmləri doktoru, professor Musa Quluzadə çıxış edərək şairin həyat və yaradıcılığı barədə geniş məlumat vermişlər. Vaxtı ilə şairin tələbəsi olmuş, hazırda akademiyada tarix müəllimi işləyən Tahir Bayramov N.Həsənzadənin pedaqoji fəaliyyəti barədə danışmış, şairə həsr etdiyi şeirini söyləmişdir. Akademiyanın kursantları şairin şeirlərindən nümunələr səsləndirmişlər. Görüşdə xalq şairi Nəriman Həsənzadə çıxış edərək Vətən sərhədlərinin keşiyində durmağın hər bir Azərbaycan övladının ən ümdə vəzifəsi olduğunu bildirmiş, gənclərə tövsiyələr vermiş, akademiyanın müəllim və kursant heyətinə təhsildə və şəxsi həyatda uğurlar arzulamışdır. Etiraf edilməlidir ki, orduda vətənpərvərlik hissinin artırılması, gənc əsgərlərin ruh yüksəkliyinin təmi edilməsi daim ölkə prezidenti, Ali Baş Komandan İlham Əliyevin diqqət mərkəzində olmmuşdur. Məhz bu məqsədlə dövlət başçısı mütəmadi olaraq cəbhənin ön xəttinə gedir, əsgər və zabitlərin vəziyyəti ilə şəxsən tanış olur. Bir müddət öncə ön xətdə yerləşən komanda idarəetmə məntəqəsində əməliyyat şəraiti ilə tanışlıq zamanı İlham Əliyev bildirib ki, bu ilin aprel ayında Ermənistan dövlətimizə, xalqımıza qarşı növbəti silahlı təxribat törətmişdir. Qəhrəman Azərbaycan Ordusu - xalqımızın əsgər və zabitləri bu təxribata layiqli cavab vermişdir. Uğurlu əks-hücum əməliyyatı keçirərək düşmənə sarsıdıcı zərbələr vurmuşdur və Azərbaycanın işğal altında olan torpaqlarının bir hissəsi azad edilmişdir: "Bu gün biz Lələtəpə ərazisindəyik. Hələ bir neçə ay bundan əvvəl bu ərazi işğal altında idi. Biz bu işğala son qoyduq. Füzuli, Cəbrayıl və Ağdərə rayonlarının ərazilərində işğal altında olan 2000 hektardan çox torpaq uğurlu əks-hücum əməliyyatı nəticəsində işğalçılardan azad edilmişdir. Minlərlə hektar torpağa bu gün Azərbaycan Ordusu tam nəzarət edir. Onu da qeyd etməliyəm ki, əks-hücum əməliyyatımız əlverişsiz mövqelərdən başlamışdır. Biz yüksəklikləri, təpələri işğalçılardan azad etmişik və böyük qəhrəmanlıq göstərmişik. Aprel döyüşləri hərbi dərsliklərə salınmalıdır. Azərbaycan Ordusu bu döyüşlərdə peşəkarlıq, qəhrəmanlıq, məharət göstərmişdir. Biz şəhidlər verdik, Allah bütün şəhidlərimizə rəhmət eləsin. Yaralı əsgərlərimiz, zabitlərimiz olubdur. Mən Hərbi Hospitalda yaralı əsgər və zabitlərimizlə görüş zamanı onlarda ruh yüksəkliyi gördüm. Onların bir arzusu var idi - tezliklə sağalmaq və döyüş bölgələrinə qayıtmaq. Bu, bir daha onu göstərir ki, Azərbaycan xalqı böyük xalqdır, Azərbaycan vətəndaşları vətənpərvər vətəndaşlardır. Bizim əsgərlərimiz, zabitlərimiz Vətən uğrunda, torpaq uğrunda ölümə getməyə hazırdırlar. Aprel döyüşləri bizim şanlı qələbəmizdir. Azərbaycan Ordusu öz gücünü göstərdi. Ermənistan uzun illər öz ordusu haqqında yalanlar, miflər uydururdu. Guya onların yenilməz ordusu var. Aprel döyüşləri göstərdi ki, hansı ordu yenilməzdir. Azərbaycan Ordusu yenilməz ordudur. Azərbaycan Ordusu istənilən vəzifəni icra etməyə qadirdir. İşğal edilmiş torpaqlarda, Dağlıq Qarabağda elə bir hərbi hədəf yoxdur ki, bu gün biz onu məhv edə bilməyək. Bu gün Azərbaycan Ordusu güclü ordular sırasındadır. Bunu biz bilirik, Azərbaycan xalqı bilir və bütün dünya bilir. Güclü orduların reytinqlərində Azərbaycan Ordusunun çox yüksək yeri vardır. Ordumuzun döyüş qabiliyyəti yüksək səviyyədədir, günbəgün artır". Dövlət başçısı bəyan edib ki, ordumuzda nizam-intizam hökm sürür. Ordumuzun maddi-texniki təminatı ən yüksək səviyyədədir. Biz son illər ərzində milyardlarla dollar dəyərində ən müasir silah-sursat, hərbi texnika almışıq. O texnikalar ən son texnologiyaya malikdir. Aprel döyüşləri bunu bir daha göstərdi. Aprel döyüşlərindən sonra ordumuzun maddi-texniki təminatı ilə bağlı əlavə tədbirlər görülür, vəsait ayrılıb, ən müasir, yüksək dağıdıcı qüvvəyə və dəqiqliyə malik olan silahlar, texnika alınır və artıq bizim sərəncamımızdadır: "Ordumuzun döyüş qabiliyyəti ilə bərabər, vətənpərvərlik ruhu da yüksəkdir. Biz öz torpağımızdayıq, bura Azərbaycandır. Lələtəpə də Azərbaycandır, Şuşa da Azərbaycandır, Xankəndi də Azərbaycandır. Biz öz torpağımızdayıq. Heç bir ölkənin torpağında gözümüz yoxdur. Ancaq biz öz torpağımızda ikinci erməni dövlətinin yaranmasına heç vaxt imkan verməyəcəyik. Aprel döyüşləri bunu bir daha sübut etdi. 1994-cü ilin yanvar ayında Füzuli rayonunda uğurlu əməliyyat keçirilmişdir, 22 kənd işğalçılardan azad edilmişdir. Bu, böyük tarixi qələbə idi. Aprel döyüşləri növbəti tarixi qələbədir. Dünya bir daha gördü ki, Azərbaycan Ermənistanın işğalçılıq siyasəti ilə heç vaxt barışmayacaq. Biz öz ərazi bütövlüyümüzü bərpa etməliyik və edəcəyik. Bu, bizim əzəli torpağımızdır, tarixi torpağımızdır və biz bu gün hələ də işğal altında olan bütün torpaqlarımıza qayıdacağıq. Lələtəpə əməliyyatı bizim qəhrəmanlıq rəmzimizdir. Lələtəpə tarixə düşdü. Əgər erməni silahlı qüvvələri aprel döyüşlərindən düzgün nəticə çıxarmasalar, gələcəkdə Lələtəpə əməliyyatı kimi bir çox uğurlu əməliyyatlar olacaqdır. Ermənistanın siyasi rəhbərliyi, nəhayət, dərk etməlidir ki, işğalçılıq hərəkətləri onları uçuruma aparır. Azərbaycan gündən-günə güclənir, möhkəmlənir. Bizim güclü potensialımız və güclü Ordumuz var. Biz Ordumuzla, əsgər və zabitlərimizlə, sizinlə - bax, burada düşmənlə üz-üzə dayanan oğullarımızla fəxr edirik. Sizə eşq olsun! Azərbaycan inkişaf edəcək və biz ərazi bütövlüyümüzü bərpa edəcəyik!" Etiraf edilməlidir ki, dövlət başçısının mütəmadi olaraq ön xəttə səfər etməsi hərbçilərlə yanaşı, orduya hazırlaşan gənclər arasındada da vətənpərvərlik hissini artırmış olur. Çünki, Azərbaycan gəncliyi dərk edir ki, onun arxasında hər zaman güvənə bildiyi dövlət başçısı var, bu torpaq, bu Vətən uğrunda can verməyə dəyər. Onu da qeyd edək ki, son illər ərzində orduda fərarilik halları tamamilə aradan qaldırılıb. Gənclər nəinki orduda xidmət etməyi özlərinə şərəf bilirlər, hətta bu yolda şəhid olmaqdan belə çəkinmirlər. Onu da qeyd edək ki, prezident İlham Əliyev Azərbaycan Respublikası vətəndaşlarının 2017-ci il yanvarın 1-dən 30-dək müddətli həqiqi hərbi xidmətə çağırılması və müddətli həqiqi hərbi xidmət hərbi qulluqçularının ehtiyata buraxılması haqqında Sərəncam imzalayıb. Artıq gənclərimiz hərbi xidmətə yola düşəcəkləri günü səbirsizliklə gözləyirlər.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 14 dekabr.- S.15.