Azərbaycan gənci üçün Prezident

İlham Əliyev nümunə olmalıdır

Orxan Rüstəmov: “Vətənin keşiyinda duranların daima diqqətdə olması, onların fəaliyyətlərinin qiymətləndirilməsini görmək məndə fərəh hissi yaradır”

Gənclərin milli mənlik şüurunun inkişaf etdirilməsi, onların vətənpərvər ruhda tərbiyə olunması istiqamətində dövlətin və onun müvafiq strukturlarının gördüyü işlər, həyata keçirdiyi tədbirlər artıq öz bəhrəsini verir. Bu gün tam əminliklə deyə bilərik ki, Azərbaycan gənc vətənpərvər ruhda böyüyür. Təbii ki, qeyd olunan müsbət nəticələrin əldə olunmasında isə ölkədə uğurla həyata keçirilən dövlət gənclər siyasətinin xüsusi payı var. Əsası Ümummilli Lider Heydər Əliyev tərəfindən qoyulmuş ölkəmizdə aparılan gənclər siyasəti bu gün öz müsbət nəticələrini verməkdədir.

Ümumiyyətlə, Heydər Əliyev gənc nəslə öz qayğısını əsirgəməyib, gənclərin ictimai-siyasi həyatda fəal iştirak etməsini, onların sosial ehtiyaclarını, yüksək səviyyədə təhsil almalarını, asudə vaxtlarını səmərəli keçirmələrini, hüquqlarının müdafiəsini, ümumiyyətlə, gənclərin hərtərəfli inkişafını təmin edib. 1993-cü ilin iyununda Heydər Əliyevinm xalqın təkidi ilə hakimiyyətə qayıtdığı andan etibarən Azərbaycan gəncliyini ölkənin taleyi üçün mühüm işlər görməyə çağırdı. Məhz elə 1993-cü ildən etibarən dövlət gənclər siyasəti öz işinə başladı. Dövlət gənclər siyasəti gənclərin cəmiyyətdə layiqli yer tutmasını təmin etmək üçün yaradılmış və uğurla həyata keçirildi.

Heydər Əliyevin hakimiyyətə qayıdışından sonra gənclərlə bağlı həyata keçirilən siyasətin xronoloji ardıcıllığına nəzər salsaq, görərik ki, ötən illər ərzində istər ümummilli lider, istərsə də onun davamçısı olan cənab Prezident İlham Əliyevin rəhbərliyi və birbaşa təşəbbüsü ilə geniş miqyaslı tədbirlər həyata keçirmiş və bir sıra problemlər öz müsbət həllini tapıb. 1994-cü ildə Heydər Əliyev Gənclər və İdman Nazirliyinin yaradılması haqqında fərman imzaladı. Qısa müddət ərzində Gənclər və İdman Nazirliyi gənc nəslin inkişafı üçün mühüm işlər görmüş, gənclərin inkişafı naminə iki minə yaxın tədbirlər həyata keçirildi.

1996-cı il fevralın 2-də Azərbaycan Respublikasının Prezidenti Heydər Əliyevin Gənclərin I Forumunun keçirilməsi haqqında Sərəncam imzalaması gənclər siyasətinin həyata keçirilməsi istiqamətində çox mühüm bir addım oldu. Forum zamanı Heydər Əliyev öz çıxışında gənclər qarşısında duran əsas məqsədləri də göstərmişdir. O, ölkəmizin ərazi bütövlüyünün təmin edilməsinin Azərbaycan gəncliyinin qarşısında duran mühüm vəzifələrdən biri olduğunu qeyd etdi. "Hər bir gənc orduya səfərbər olmağa hazır olmalı və orduda xidmət etməyi özünə şərəf bilməlidir" sözləri artıq hər bir gəncin yaddaşına həkk edildi. 1999-cu ilin fevral ayının 17-də "Gənclərdə vətənpərvərlik və vətəndaşlıq hisslərinin yüksəldilməsi" proqramı, 1999-cu il 29 iyul tarixində Azərbaycan Respublikasının Prezidenti "Dövlət Gənclər Siyasəti haqqında", "Azərbaycan Respublikasında dövlət gənclər siyasətinin həyata keçirilməsi ilə bağlı tədbirlər planı" haqqında fərmanlar Ulu Öndərin öz fəaliyyətində gənclərə verdiyi yüksək diqqət və qiyməti göstərmiş oldu.

Təbii ki, bu uğurların, Azərbaycan gənclərinin günümüzün müasir, inkişaf etmiş, yüksək intellektli aparıcı qüvvə kimi formalaşmasında, birmənalı olaraq, dövlətimizin apardığı gənclər siyasətinin mühüm rolu olub. Ümummilli Lider həmişə gənclərimizə böyük ümidlər bəsləyir, dəfələrlə qeyd edirdi ki, Azərbaycanın gələcəyi gənclərin əlindədir. Həyatı boyu, respublikaya rəhbərliyinin bütün dövrlərində Ulu Öndər sağlam, normal gəncliyin, bu dövlətə sahib dura biləcək bir nəslin yetişməsinə xidmət edirdi. Ulu Öndərin ən böyük xidmətlərindən biri də o idi ki, gənclərlə bağlı məsələləri həmişə öz siyasətinin əsas tərkib hissələrindən biri hesab edir, gənclərin imkan və bacarıqlarını yüksək qiymətləndirir, onların problemlərinin həlli istiqamətində həyata keçirilən tədbirlərə xüsusi önəm verir, bu siyasəti müstəqil Azərbaycan dövlətinin ən mühüm fəaliyyət istiqamətlərindən biri kimi dəyərləndirirdi.

Sevindirici haldır ki, bu gün ölkədə mövcud olan əksəriyyət gənclər təşkilatları öz fəaliyyətlərini ümummilli lider Heydər Əliyevin əsasını qoyduğu dövlət gənclər siyasəti əsasında qurur, bu siyasətin davam etdirilməsi istiqamətində çalışır. Həmçinin gənclər təşkilatları ümummilli lider Heydər Əliyevin zamanında gənclərin vətənpərvər ruhda böyüməsi, tərbiyə alması istiqamətindəki tapşırıq və tövsiyyələrinə də əməl edirlər. Günümüzdə bu istiqamətdə uğurlu fəaliyyət göstərən gənclər təşkilatlarından biri də “İRƏLİ” İctimai Birliyidir. İctimai Birliyin müşaviri Orxan Rüstəmovla söhbətimizdə təmsil etdiyi təşkilatın gənclərin vətənpərvər ruhda tərbiyə olunması istiqamətində gördüyü işlər, bu sahədə mövcud olan əziyyət və qarşıda duran vəzifələr barədə danışdıq.

-Orxan müəllim, bu gün Azərbaycan gənclərinin milli mənlik şüuru, vətənpərvərlik tərbiyəsi bir gənclər təşkilatının rəsmisi kimi sizi qane edirmi?

-Mən düşünürəm ki, hazırki Azərbaycan gəncliyi dünya arenasında rəqabətədavamlı formada yetişib. Eyni zamanda vətənə sadiq və həmrəy olaraq Azərbaycanın inkişafı üçün əlindən gələni etməkdədir. Təbii ki, bu prosesin formalaşması öncə yaradılmış infrastruktur, şəraitlə bağlıdır ki, buna görə cənab Prezident İlham Əliyevə dərin təşəkkürümü bildirirəm. Gənclərin bütün sferalarda təmsil olunması üçün bu gün bütün standartlar işə salınmışdır və bu da öz növbəsində qısa zamanda çox müsbət nəticələrini verəcəkdir.

-Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması istiqamətində gənclər təşkilatlarının rolunu, fəaliyyətini qaneedici hesab etmək olarmı?

-Əvvəla vurğulamaq istərdim ki, təbii olaraq hər hansı bir prosesi həyata keçirmək üçün ona yardımçı mexanizmlər öz əhəmiyyətini proses müddətində ifadə edir. Əgər araşdırma aparsaq görərik ki, müxtəlif səpkidə, əsas məqsədi gənclərin inkişafı, formalaşması, vətənə-millətə sadiq formada yetişdirmək olan gənclər təşkilatlarının reallaşdırdıqları təlim, seminar, forum və digər bu kimi istiqamətlərdə tədbirlərdə gənclər həvəslə iştirak edir və bu say durmadan artır. Düşünürəm ki, gənclər təşkilatlarının əhəmiyyəti bu gün aydın şəkildə nəzərə çarpır.

-“İRƏLI” İctimai Birliyi olaraq gənclərin vətənpərvərlik ruhunda tərbiyə olunması, onlarda bu hisslərin artırılması məqsədilə hansı addımlar atır, layihələr həyata keçirirsiniz?

-Öncə onu qeyd edim ki, “İRƏLİ” İctimai Birliyi artıq 7 ildir ki, fəaliyyət göstərir və bu zaman çərçivəsində bir çox dövlət qurumları, qeyri-hökumət təşkilatları, gənclər təşkilatları eyni zamanda beynəlxalq təşkilatlarla əlaqələr qurmuş və birgə əməkdaşlıq çərçivəsində gənclər siyasətinin inkişafında öz töhfəsini vermişdir. Gənclərin maraqlarını nəzərə alaraq müxtılif səpkidə, tələb olan sahələrlə bağlı keçirdiyimiz layihələrdən minlərlə gənc faydalanmışdır. Düşünürəm ki, bu illər ərzində “İRƏLI” İctimai Birliyinin gördüyü işlər sağlam Gənclər Şəbəkəsinin inkişafına öz töhfəsini vermişdir və verməkdə davam edəcəkdir.

-Bu istiqamətdə televiziya və KİV-lərin rolu nə dərəcədədir və həmin vasitələrdə vətənpərvərlik mövzularına kifayət qədər yer ayrılırmı?

-Ümumiyyətlə, maarifləndirmə çox güclü təsir vasitəsidir. Bildiyiniz kimi Azərbaycan son 10 ildə çox yüksək inkişaf etmiş lkələr siyahısına daxil olmuş və bu proses daxilində vətəndaş cəmiyyətinin formalaşması ilə bağlı bir çox nailiyyətlər də qazanmışdır. Bu sahədə kütləvi informasiya vasitələrinin də çox böyük rolu olmuşdur. Buna görə düşünürəm ki, vətənpərvərlik, milli şüur barədə veriliş və xəbərlərin genişlənməsinə ehtiyac vardır. Xüsusilə gənclərə hədəflənən televiziya verilişlərin çoxaldılması məqsədəuyğun olar.

-Ali Baş Komandan, Azərbaycan Respublikasının Prezidenti cənab İlham Əliyevin tez-tez cəbhə xəttinə getməsi, hərbi təlimləri izləməsi, əsgər və zabitləri təltif etməsi gənclərdə vətənpərvərlik hisslərinin artırılmasına hansı müsbət təsirlər göstərir?

-Hər bir sağlam Azərbaycan gənci üçün cənab Prezident İlham Əliyev nümunə olmalıdır. Şəxsən bir vətəndaş kimi vətənin keşiyinda duranların daima diqqətdə olması, onların fəaliyyətlərinin qiymətləndirilməsini görmək məndə fərəh hissi yaradır. Yalnız əsgər və zabitlər deyil, elm xadimləri, idmançılar və dünya arenasında Azərbaycanın adını yüksəldən və Azərbaycanın milli-mənəvi dəyərlərinin, ərazi bütövlüyünün qorunması, Azərbaycan həqiqətlərinin dünyaya çatdırılmasında əməyi olan şəxslərin zəhmətinin qiymətləndirilməsi vətənpərvərlik hisslərinin artırılmasına ən böyük dəstək və örnəkdir.

-Gənclərin yad təsirlərdən uzaq olub vətənpərvər ruhda tərbiyə olunması üçün hansı zəruri addımlar atmaq lazımdır?

-Sağlam Azərbaycan gəncinin vətənpərvər ruhda böyüməsi ilk öncə məktəbdən başlayır. Bu prosesə düzgün nəzarət və düzgün sistemin tətbiq edilməsi ən mühüm şərtlərdəndir. Bu prosesə yadımçı mexanizmlər kütləvi informasiya vasitələri, televiziyalar və qeyri-hökumət təşkilatlarıdır. Ölkəmiz tərəfindən hər bir sahədə sağlam inkişaf üçün şərait yaradılıb və hər birimiz bu sahədə əməyimizi əsirgəməməliyik.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 5-7 mart.-S.15.