Milli qəhrəmanlarımız gənclər

üçün vətənpərvərlik nümunəsidir

Azərbaycanın milli qəhrəmanları, şəhid oğul və qızlarına göstərilən yüksək ehtiram, onların adlarının əbədiləşdirilməsi gənclər arasında vətənpərvərlik hisslərini birə-beş artırır. Bu kimi tədbirlər gəncləri Vətən uğrunda canını fəda verən qəhrəman oğullarımıza oxşamağa sövq edir. Belə qəhrəman oğullardan biri də şəhid Mübariz İbrahimovdur.

Müntəzəm olaraq onun əziz xatirəsinin yad edilməsi gənclərdə yüksək ruh hissi yaradır. Bu günlərdə şəhid milli qəhrəmanımızın xatirəsi bir daha onun doğulub boya-başa çatdığı Biləsuvar rayonunda anılıb. Biləsuvar rayon Gənclər və İdman İdarəsi və YAP Gənclər Birliyi Biləsuvar rayon təşkilatının birgə təşkilatçılığı ilə Milli Qəhrəman Mübariz İbrahimov və "İgidliyə görə" medalı ilə təltif olunan Fərid Əhmədovun xatirəsinə həsr olunmuş "Qəhrəmanlar unudulmur" adlı vətənpərvərlik mövzusunda tədbir keçirilib. Tədbirdə Biləsuvar rayon İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Mirzə Cəfərov, Səfərbərlik və Hərbi Xidmətə Çağırış üzrə Dövlət Xidmətinin Biləsuvar rayon şöbəsinin rəis müavini Ramiq Sultanov, Təhsil şöbəsinin metodisti Ağamməd Caniyev və Qarabağ Müharibə Əlili Və Şəhid Ailələri İctimai Birliyinin Biləsuvar rayon şöbəsinin sədri Bəhruz Əliyev iştirak ediblər. Tədbir Milli Qəhrəman Mübariz İbrahimovun əziz xatirəsinin bir dəqiqəlik sükutla yad edilməsi ilə başlayıb. Tədbiri giriş nitqi ilə açan Biləsuvar rayon Gənclər və İdman İdarəsinin rəisi Aqşin Bağırov və digər nümayəndələr Mübariz İbrahimovun tərcümeyi-halı, keçdiyi döyüş yolu və misilsiz qəhrəmanlıq şücaəti, vətənpərvərliyi barədə gənclərə geniş məlumat veriblər. Bildiriblər ki, Mübarizin qəhrəmanlığı və əziz xatirəsi nəinki doğulub boya-başa çatdığı Biləsuvar rayonunda, eyni zamanda bütün türk dünyasında anılır. Mübariz İbrahimov1988 ci il fevralın 7 də Biləsuvar rayonu Əliabad kəndində anadan olub. 1994-cü ildə şəhid M.Piriyev adina Əliabad kənd orta məktəbinin 1-ci sinfinə daxil olub.11 il oxuduqdan sonra 2005 ci ildə orta məktəbi bitirib. Elə həmin il hərbi xidmətə cağrılıb. Xidmətinə Daxili Qoşunların N saylı hərbi hissəsinin xüsusi Təyinatlı Bölüyündə başlayıb. Xidməti zamanı çavuş rütbəsi alıb və xidmətini 2007-ci ildə bitirib. Bir müddət mülki işlərdə işlədikən sonra 2008- ci ilin yayında yenidən öz arzusu ilə hərbiyə qayıtmaq istəsə də, valideynlərinin razılığı olmayıb. Yenidən 2009-cu ilin avqust ayında valideynlərini razı salıb və hərbi xidmətə yollanıb. Bu dəfə artıq gizir kimi çalışmağa başlayıb. Çox çalışsa da əvvəl-əvvəl bir neçə ay düşmənlə sərhəd olan rayonlarda xidmət etmək nəsib olmayıb. Nəhayət 2010 cu ilin aprel ayından Tər-Tər rayonunun N saylı hərbi hissəsində xidmətinə başlayır. Çox çəkmir ki, uzun müddət düşündüyü, arzusunda olduğu şəhidlik planını həyata keçirmək və düşmənə ən sarsıdıcı zərbəni vurmağın yollarını tapır. Nəhayət ömrünün ən gənc cağında 22 yaşında, 19 iyun, 2010-cu il tarixində gecə saat 23:30- radələrində düşündüyü əməliyyata başlayır. 22 yaşlı bu mərd oğul 1 kilometrlik neytral məsafəni, minalanmış sahəni tək keçir və mənfur düşmənlərimizin ağlasığmaz sayda əsgər və zabitini elə birinci həmlədə məhv edir. Düşmənin öz silahlarını özünə istifadə edərək 5 saat tək orduya qarşı döyüşür. Düşmən postunu keçir və 6 saat döyüşdükdən sonra duşmənin çoxlu sayda əsgər və zabitini məhv edir. Qayıtmaq imkanı ola-ola geri dönməyir, daha da irəli gedir və vətən yolunda, bizlər üçün canından keçir. Məhz bundan sonra Ermənistanda 3 günlük matəm elan olunur. Beləliklə, ən böyük arzusu olan şəhidlik zirvəsinə ucalır. Mübariz İbrahimovun cəsədini Ermənistan tərəfi 141 gün saxlayır. 2010-cu il noyabrın 7-də Müdafiə Nazirliyinin Təlim-Tədris Mərkəzində keçirilən vida mərasiminə Azərbaycan Prezidenti İlham Əliyev də qatılır və nitq söyləyir. Sonra şəhid, qəhrəman İkinci Fəxri xiyabanda dəfn olunur. Mübariz İbrahimova Dövlət tərəfindən yüksək qiymət verilir. Azərbaycan Prezidenti cənab İlham Əliyev Mübariz Ağakərim oğlu İbrahimova "Azərbaycanın Milli Qəhrəmanı" adının verilməsi barədə sərəncam imzalayır. Tədbirin sonunda məktəblilər qəhrəmana həsr olunmuş şeirlər söyləyib, rəsm sərgisi nümayiş etdirilib, videofilm göstərilib.

Müdafiə Nazirliyi və Bərdə rayon İcra Hakimiyyətinin birgə təşkilatçılığı ilə isə Bərdə rayon Mədəniyyət Mərkəzində "Xalqımıza qələbə sevinci yaşadanlar" silsiləsindən aprel ayında cəbhə xəttində ermənilərin törətdikləri təxribatın qarşısını alarkən şəhid olmuş Azərbaycan Ordusunun baş leytenantı Ziya Həsənovun xatirə mərasimi keçirilib. Tədbirdən öncə rayon ictimaiyyətinin nümayəndələri, Ziya Həsənovun xidmət etdiyi hərbi hissənin komandanlığı, döyüşçü dostları Bərdə şəhidlər xiyabanına gedərək şəhidin məzarını ziyarət ediblər. Mədəniyyət Mərkəzində Əməkdar İncəsənət Xadimi Abdulla Qurbaninin ssenarisi və rejissorluğu ilə Z.Həsənovun xatirəsinə həsr olunmuş "Ruhumuzun qələbəsi naminə" adlı kompozisiya təqdim edilib. Kompozisiyada Silahlı Qüvvələrin mahnı və rəqs ansamblı, Gəncə qarnizonu zabitlər evinin kollektivi, eləcə də Bərdə hərbi birliyinin hərbi özfəaliyyət kollektivinin üzvləri iştirak ediblər. Tədbirdə Ziya Həsənovun həyat və döyüş yoluna işıq salınıb, qəhrəmanlığı təbliğ olunub. Təqdim edilən vətənpərvərlik mahnıları və hərbi marşlar tamaşaçıları Qarabağ uğrunda mübarizəyə səsləyib. Tədbirin sonunda Bərdə rayon İcra Hakimiyyəti başçısının müavini Fəqət Şadlinskaya çıxış edərək ölkəmizdə şəhid ailələrinə göstərilən diqqət və qayğıdan danışıb, xalqımızın şəhidlərə yüksək ehtiram göstərdiyini və Prezident, Ali Baş Komandan İlham Əliyevin əmri ilə hər an torpaqlarımızın azadlığı uğrunda döyüşə hazır olduğunu bildirib. Tədbirdə iştirak edən Azərbaycan Əfqanıstan Veteranları İctimai Birliyinin sədri Məhəmməd Vəliyev, Cəmşid Naxçıvanski adına hərbi liseydə Ziya Həsənovun müəllimi olmuş Şakir Əhmədov, şəhid zabitin xidmət etdiyi hərbi birləşmənin komandiri Eldəniz İmaməliyev, Tərtər rayonundan gəlmiş Qarabağ müharibəsi veteranları çıxış edərək şəhidlərimizə Allahdan rəhmət diləyib, onların qanlarının yerdə qalmayacağına, işğal altında olan torpaqlarımızın tezliklə azad ediləcəyinə əminliklərini bildiriblər. Şəhidin atası Niyazi Həsənov göstərilən diqqət və qayğıya görə ölkə Prezidenti cənab İlham Əliyevə minnətdarlığını bildirib.

Şəhid Ziya Həsənovun ölümündən sonra layiq görüldüyü "Cəmşid Naxçıvanskinin yubiley medalı" onun ailəsinə təqdim olunub. Beyləqan rayon Mədəniyyət Sarayında isə Müdafiə Nazirliyi və Beyləqan Rayon İcra Hakimiyyətinin birgə təşkilatçılığı ilə Azərbaycanın dövlət müstəqilliyinin bərpasının 25-ci ildönümü münasibətilə "Vətənə, dövlətə canımız fəda!" devizi altında hərbi vətənpərvərlik mərasimi keçirilib. Beyləqan rayon mədəniyyət sarayında keçirilən tədbirdə Füzuli, Ağcabədi, Xocavənd və Beyləqan rayonları ərazisindəki hərbi hissələrin əsgər və zabitləri, eləcə də ictimaiyyət nümayəndələri iştirak ediblər. Müdafiə Nazirliyinin rəsmiləri və rayon icra hakimiyyətinin rəhbərliyi əvvəlcə xalqımızın ümummilli lideri Heydər Əliyevin abidəsini ziyarət edərək Ulu Öndərə hörmət və ehtiramlarını bildiriblər.

Mərasimdə Azərbaycan Respublikasının ərazi bütövlüyü, müstəqilliyi və suverenliyi uğrunda şəhid olanların xatirəsi bir dəqiqəlik sükutla yad edilib. Əməkdar İncəsənət Xadimi polkovnik Abdulla Qurbaninin ssenarisi və rejissorluğu ilə hazırlanmış ədəbi-musiqili-xoreoqrafik kompozisiya tamaşaçılarda böyük maraq doğurub. Aparıcılar Azərbaycan Respublikasının dövlət müstəqilliyinin bərpasına gedən yolların hələ 1970-ci illərdə ölkəmizə rəhbərlik etmiş dünya şöhrətli siyasətçi Heydər Əliyevlə başlandığını və bu istiqamətdə uzaqgörənliklə mühüm addımlar atıldığını qeyd ediblər. Mərasimdə müstəqilliyin qazanılmasından daha çox onun qorunması, əbədi, dönməz və sarsılmaz olması naminə mübarizə aparmağın daha çətin və şərəfli olduğu vurğulanıb. Dövlət müstəqilliyimizin və milli təhlükəsizliyimizin qarantı olan Silahlı Qüvvələrimizin yaranması, formalaşması və Qafqazda ən güclü orduya çevrilməsi barədə ətraflı məlumat verilib. Ulu öndər Heydər Əliyevin və Prezident, Ali Baş Komandan İlham Əliyevin mütəşəkkil, qarşıya qoyulmuş döyüş tapşırıqlarını yerinə yetirməyə hər an hazır və qadir olan ordunun yaranmasında müstəsna xidmətləri nəzərə çatdırılıb. Tədbirdə xalqımıza qələbə sevinci yaşadan aprel döyüşlərinin qəhrəmanları xatırlanıb. Bu döyüşlərin dövlətimizin və ordumuzun gücünü, xalqımızın həmrəyliyini, vətənpərvərliyini bir daha nümayiş etdirdiyi bildirilib. Silahlı Qüvvələrin Mahnı və Rəqs Ansamblı, Gəncə Qarnizonu Zabitlər Evinin yaradıcı kollektivi və hərbi birliyin birləşmiş özfəaliyyət kollektivlərinin ifa etdikləri hərbi marşlar, şeirlər, vətənpərvərlik mahnı və rəqsləri tamaşaçılarda xoş duyğular oyadaraq, onları Azərbaycanın ərazi bütövlüyünün təmin olunması, işğal altındakı torpaqlarımızın azadlığı uğrunda mübarizəyə ruhlandırıb. Beyləqan rayon icra hakimiyyətinin başçısı Vaqif Abdullayev, Müdafiə Nazirliyi Mənəvi-Psixoloji Hazırlıq və İctimaiyyətlə Əlaqələr İdarəsinin rəisi general-mayor Rasim Əliyev, general-mayor Mais Bərxudarov, Azərbaycanın Milli Qəhrəmanı polkovnik Şükür Həmidov tədbir iştirakçılarını əlamətdar, tarixi gün münasibətilə təbrik edib, Azərbaycanın Dövlət bayrağının etibarlı əldə olduğunu və dövlət müstəqilliyimizin bundan sonra da inamla qorunacağına əminliklərini bildiriblər. Hərbi vətənpərvərlik mərasimi Azərbaycanın Dövlət himninin oxunması ilə başa çatıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 17 noyabr.- S.15.