Şəhidlərin ruhuna

göstərilən yüksək ehtiram

Gənclərin vətənpərvərlik hisslərini artırır

Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması günümüzdə mühüm əhəmiyyət kəsb etdiyindən yerlərdə də bu istiqamətdə mühüm silsilə tədbirlər həyata keçirilir, mədəni kütləvi tədbirlər təşkil olunur. Bu mənada cəbhə xəttində yerləşən rayonların gəncləri də diqqətdən kənarda qalmır. Xüsusilə Qazax rayonunda müntəzəm olaraq gənclərin vətənpərvər ruhda tərbiyəsinə yönəlik tədbirlər təşkil olunur.

Torpaqlarımızın bütövlüyü uğrunda gedən döyüşlərdə şəhid olan qəhrəman oğullarımızın xatirəsinin daim uca tutulması da rayon gəncləri arasında vətənpərvərlik hisslərinin artmasına müsbət təsir göstərir. Bu günlərdə rayonda şəhid Elvin Namazovun ad günü qeyd olunub. Məlumat üçün qeyd edək ki, cari ilin aprel ayında düşmənə qarşı döyüşlərdə Qazax rayonunun verdiyi 3 şəhiddən biri də baş leytenant Namazov Elvin Məmməd oğludur. Bununla əlaqədar şəhidin uyuduğu Yuxarı Salahlı kənd qəbiristanlığında, şəhidin məzarı önündə tədbir keçirilib. Tədbirdə şəhidin doğmaları, döyüş yoldaşları, idarə, müəssisə və təşkilat rəhbərləri, kənd sakinləri, kütləvi informasiya vasitələrinin nümayəndələri iştirak edib. Qazax rayon İcra Hakimiyyətinin başçısı Rəcəb Babaşov çıxış edərək Elvinin keçdiyi şanlı döyüş yolundan, onun mübarizliyindən, Azərbaycan Silahlı Qüvvələrinin Elvin kimi igidlərin sayəsində aprel döyüşlərində düşmənə sarsıdıcı zərbələr endirməsindən danışıb. Bildirib ki, Elvinin keçdiyi döyüş yolu bir nümunədir. Onun xatirəsinə şəhərin H.Əliyev prospektində bulaq inşa olunub. Sonra rayon Ağsaqqallar Şurasının sədri Xanqulu Süleymanov, Azərbaycan Yazıçılar Birliyinin Qazax zona filialının sədri, əməkdar incəsənət xadimi, şair Barat Vüsal, polis şobəsinin rəisi, polkovnik Natiq Həsənov, Səərbərlik və Hərbi Xidmətə Çağırış üzrə Dövlət Xidmətinin rayon şöbəsinin rəisi Vüqar Mirzəyev, "Qarabağ Müharibəsi Əlilləri, Veteranları və Şəhid Ailələri" İctimai Birliyinin Qazax rayon şöbəsinin sədri Xasay Balayev, Silahlı Qüvvələrin "Ehtiyyatda olan zabitlər" Konfederasiyasının Qazax rayon şöbəsinin sədri Baxış Hüseynov, hərbiçilər və başqaları çıxış edərək bildiriblər ki, Elvinin xatirəsi həmişə əziz tutulacaq, ailə üzvləri daim dövlətin və insanlarımızın diqqətində olacaq. Daha sonra şəhidin ruhuna dualar oxunmuş, ehsan süfrəsi açılıb. Ümumilikdə, şəhid və milli qəhrəmanların xatirəsi hər zaman uca tutulur, ehtiramla yad edilir. Vətənimizin müstəqilliyi və ərazi bütövlüyü uğrunda şəhid olan oğul və qızlarımızın adı dövlətimiz tərəfindən hər zaman uca tutulub, əbədiləşdirilib. Şəhidlərin adına salınmış bulaqlar, qoyulmuş büst və xatirə lövhələri bunun bariz nümunəsidir. Rayon rəhbərliyinin diqqət və qayğısı sayəsində artıq Qazax şəhərindəki şəhidlər qəbiristanlığı, eləcə də Yuxarı Salahlı və Daş Salanlı kəndlərindəki Şəhidlər Xiyabanları əsaslı təmir edilib. Hazırda Çaylı, Xanlıqlar və İkinci Şıxlı kəndlərindəki Şəhidlər Xiyabanlarında təmir işləri davam etdirilir. Rayon rəhbərliyinin tapşırığına əsasən aprel ayında qoşunların təmas xəttində erməni işğalçıları ilə döyüşlərdə qəhrəmancasına şəhid olan Azərbaycan Respublikası Silahlı Qüvvələrinin hərbi qulluqçuları - kapitan Orucov Mühüd Qurban oğlu, baş leytenant Namazov Elvin Məmməd oğlu və Əliyev Orxan Məhəmməd oğlunun xatirəsini yad etmək, onların adını əbədiləşdirmək üçün bulaqların tikintisinə başlanılıb. Qoşunların təmas xəttində erməni işğalçıları ilə döyüşlərdə şəhid olmuş Azərbaycan Respublikası Silahlı Qüvvələrinin hərbi qulluqçusu Əliyev Orxan Məhəmməd oğlunun Aslanbəyli kəndində doğum günü qeyd olunub. Tədbirdə Rayon İcra Hakimiyyətinin başçısı cənab Rəcəb Babaşov, Aparatın məsul işçiləri, şəhidin ailə üzvləri və doğmaları, hərbi hissənin və SHXÇDX Rayon şöbəsinin əsgər və zabitləri, idarə, müəssisə, təşkilat rəhbərləri, Qarabağ Müharibəsi əlilləri, veteranları, şəhid ailələri, ictimaiyyət və KİV nümayəndələri iştirak ediblər. Əvvəlcə, Vətən uğrunda canından keçmiş şəhidlərin əziz xatirəsi bir dəqiqəlik sükutla yad edilib və şəhidin məzarı önünə gül-çiçək dəstələri qoyulub. Tədbiri Qazax rayonu İcra Hakimiyyətinin başçısı cənab Rəcəb Babaşov açaraq şəhidin həyatı və keçdiyi döyüş yolundan, göstərdiyi qəhrəmanlıqlardan danışıb. Qeyd edib ki, Azərbaycan Ordusunun qüdrəti, gənclərimizin Vətən sevgisi, əsgərlərimizin döyüşlərdəki şücaəti, Silahlı Qüvvələrimizin gücü, xalq ilə ordunun birliyi sayəsində işğal altındakı bütün torpaqlarımız azad olunacaqdır. Ali baş komandan İlham Əliyevin əmri ilə döyüşə hər an hazır olan silahlı qüvvələrimizin ölkəmizin ərazi bütövlüyünü təmin edəcəyi günün çox da uzaqda olmadığını və Orxan kimi şəhid hərbiçilərimizin qanının yerdə qalmayacağını bildirib. Tədbirdə şəhidin döyüş yoluna nəzər salanlar onun əsl vətənpərvər, qorxmaz, cəsur və yüksək nizam-intizamlı hərbiçi olduğunu söyləyiblər. Bildirilib ki, Əliyev Orxan Məhəmməd oğlu 11 avqust 1995-cı ildə Qazax rayonunun Aslanbəyli kəndində anadan olub. 2011-ci ildə Bakıda Texniki Kollecinə "Avtomobil nəqliyyatı" şöbəsinin "Yol hərəkətinin təşkili" ixtisası üzrə daxil olub, 2015-ci ildə həmin kolleci bitirib. Əliyev Orxan kollecdə oxuduğu müddətdə çalışqan, tərbiyəli, nizamlı-intizamlı və məsuliyyətli tələbə olub. Ona dərs deyən müəllimlərin rəğbətini qazanıb. Kollecdə təhsil aldığı müddətdə müəllimlərin yaddaşında nümünəvi tələbə kimi qalıb. O, yaxşı insan olmaqla yanaşı, həmdə çalışqan, tələbə yoldaşlarına qarşı mehriban olub. Orxan Əliyev hərbi dərslərdə həmişə fəal iştirak edib. Onda vətənpərvərlik ruhu hələ tələbəlik illərindən formalaşıb. Hər an torpaqlarımızın erməni işğalçılarından azad olunmasını düşünürdü. Orxan Əliyev 02.04.2016-cı il tarixdə Tərtər istiqamətində gedən döyüşlərdə şəhid olub. "Hərbi xidmətdə fərqləndiyinə görə" 3-cü dərəcəli medalı ilə təltif edilib. Daha sonra qeyd olunub ki, torpaqlarımızın ərazi bütövlüyü uğrunda canından keçən bütün şəhidlərimiz kimi, Orxan Əliyev də heç zaman unudulmayacaq və onun əziz xatirəsi qəlbimizdə əbədi yaşayacaqdır. Sonda orta məktəb şagirdlərinin ifasında şəhidlərimizə həsr olunmuş şerlər səsləndirilmiş və kompozisiya göstərilib. Ümumiyyətlə, bu gün Qazaxda heç kimə sirr deyil ki, Rayon İcra Hakimiyyətinin başçısı cənab Rəcəb Babaşov fəaliyyətə başladığı ilk gündən şəhidlərimizə, onların ailə üzvlərinə, xüsusi diqqət və qayğı göstərir, problemləri ilə yaxından maraqlanır. Bu mənada ilk olaraq şəhidlərimizin uyuduğu qəbiristanlıqlar, onların xatirəsnə ucaldılmış abidələr, parklar və xiyabanlar ziyarət olunmuşdur və onların abadlaşdırılması üçün lazımi tapşırıqlar verilib. Son zamanlar Qazax şəhərindəki, Daş Salahlı kəndindəki şəhid qəbiristanlıqları, Yuxarı Salahlı kəndindəki Şəhidlər Xiyabanı heç də ürək açan vəziyyətdə deyildi. Göstərilən laqeyd münasibətdən, baxımsızlıq ucbatından hər üç ünvanda pis vəziyyət yaranıb. Bu isə şəhidlərimizin doğmalarını, ailə üzvlərini haqlı olaraq narahat edirdi. Verilən tapşırıqlar nəticəsində hər üç ünvanda dərhal tikinti-bərpa və abadlıq işlərinə başlanıldı. Şəhidlərimizin adına layiq məqsədyönlü işlər aparılıb. Görülmüş işlər cənab Rəcəb Babaşovun şəhidlərimizə və onların ailələrinə göstərdiyi diqqət və qayğının əyani təzahürü idi. Bu günlərdə aparılmış tikinti, abadlıq və yenidənqurma işlərindən sonra Qazax rayon İcra Hakimiyyətinin başçısı cənab Rəcəb Babaşovun, Aparatın məsul işçilərinin, hüquq mühafizə orqanlarının, SHXÇDX Qazax rayon şöbəsinin əməkdaşlarının, idarə, müəssisə və təşkilat rəhbərlərinin, şəhid ailələrinin, müharibə veteranlarının, əlillərin, gənclərin, ictimaiyyət və KİV nümayəndələrinin iştirakı ilə Yuxarı Salahlı kəndindəki Şəhidlər Xiyabanı və Daş Salahlı kəndindəki şəhidlər qəbiristanlığı əsaslı təmirdən sonra ziyarət olunub. Əvvəlcə, hər iki kənddə şəhidlərin əziz xatirəsi anılmış və abidələri önünə tər qərənfil dəstələri qoyulub. Şəhidlərin ruhuna dualar oxunub. Daş Salahlı kəndində şəhid bacıları Hicranə Məmmədova, Pəri Pənahova, şəhid anası Sürəyya Cəbiyeva, kənd ağsaqqalı Mustafa Mahmudov, Yuxarı Salahlı kəndində isə şəhid anası Sona Kazımova və kənd ağsaqqalı Abdulla Məmmədov çıxış ediblər. Hər iki kənddə çıxış edənlər şəhidlərə, onların ailə üvzlərinə göstərilən diqqət və qayğıya görə dövlət başçısı İlham Əliyev cənablarına dərin minnətdarlıqlarını bildiriblər. Rayon İcra Hakimiyyətinin başçısı təyin olunan gündən şəhidlərimizə, onların ailə üzvlərinə göstərdiyi səmimi və doğma münasibətə, hərtərəfli köməyə və yardıma görə cənab Rəcəb Babaşova səmimi razılıqlarını ifadə ediblər. Rayon İcra Hakimiyyətinin başçısı Rəcəb Babaşov hər iki mərasimdə çıxış edərək bildirib ki, ölkəmizdə şəhidlərimizin əziz xatirəsi həmişə uca tutulur, daim yad olunur. Onlar həmişə qəlblərdə yaşayırlar. Şəhidlik ən yüksək zirvədir. Bu zirvəyə yalnız vətənini canından artıq sevənlər yüksələ bilirlər. Bu gün əlkəmizdə şəhidlərimizə dövlət səviyyəsində xüsusi diqqət və qayğı göstərilir. Onların adı, xatirələri əbədiləşdirilir. Şəhid ailələrinə dövlətimizin köməyi və yardımı getdikcə daha da artır. Bu gün biz əminliklə deyə bilərik ki, şəhid ailələri dövlətimizin qayğısını hər an öz üzərlərində hiss edirlər. Şəhid adlarının əbədiləşdirilməsi, Şəhid ailələrinin, Milli Qəhrəmanların, müharibə əlillərinin və veteranlarının sosial təminatının yaxşılaşdırılması məqsədilə dövlətimiz tərəfindən ardıcıl tədbirlər həyata keçirilir. Bu, həmişə belə olacaqdır. Şəhidlər ölmürlər, əbədi yaşayırlar.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 1-3 oktyabr.- S.15.