Regionlarda gənclərə vətənpərvərlik

hissləri daha çox aşılanır

Toğrul Qasımov: "Gənclərin vətənpərvərlik hisslərinin artırılması istiqamətində Rayon İcra Hakimiyyəti səviyyəsində mühüm işlər görülür"

Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması günümüzdə prioritet vəzifələrdən olduğundan istər dövlət, istərsə də qeyri-dövlət təşkilatları səviyyəsində bu istiqamətə ciddi diqqət artırılır. Təkcə paytaxtda deyil, eləcə də yerlərdə gənclərin vətənpərvərlik ruhunda tərbiyəsi istiqamətində müxtəlif tədbirlər, layihələr həyata keçirilir. Bu sırada İsmayıllı rayonunda görülən işlər, həyata keçirilən tədbirləri xüsusi olaraq qeyd etmək yerinə düşər.

Sözügedən rayonda yerli İcra Hakimiyyətinin təşkilatçılığı ilə keçirilən tədbirlər gənclərin vətənpərvərlik hissinin artırılmasına xidmət edir. Həmçinin bu kimi tədbirlər Azərbaycan Silahlı Qüvvələrində də ruh yüksəkliyi yaradır. Onu da qeyd edək ki, rayon İcra Hakimiyyəti tərəfindən ənənəvi olaraq İsmayıllıda Azərbaycan Silahlı Qüvvələri günü qeyd olunur. Bu il də Silahlı Qüvvələr günü İsmayıllıda yüksək səviyyədə qeyd edilib. Belə ki, Rayon İcra Hakimiyyətinin konfrans zalında İcra Hakimiyyətinin başçısı Mirdaməd Sadıqovun, aparat işçilərinin, Səfərbərlik və Hərbi Xidmətə Çağırış üzrə Dövlət Xidməti əməkdaşlarının, hüquq-mühafizə orqanlarının rəhbərlərinin və veteran hərbçilərin iştirakı ilə keçirilən tədbirdə Azərbaycan Silahlı Qüvvələrinin bu gün Cənubi Qafqazda müasir hərbi texnika ilə təchiz edilmiş ən güclü ordu olduğu qeyd edilib. Rayon İcra Hakimiyyətinin başçısı Mirdaməd Sadıqov bayram münasibətilə veteran hərbiçiləri, bütün Azərbaycan Ordusunu və xalqımızı təbrik edib. Mirdaməd Sadıqov ölkəmizdə aparılan ordu quruculuğu, ümummilli lider Heydər Əliyevin və Azərbaycan Respublikasının Prezidenti cənab İlham Əliyevin bu sahədəki böyük xidmətləri barədə tədbirə toplaşanlara ətraflı məlumat verib, yenilməz Azərbaycan Ordusunun torpaqlarımızı mənfur erməni işğalından xilas etmək qüdrətinə malik olduğunu diqqətə çatdırıb. İsmayıllı rayon Məhkəməsinin hakimi Azad Əliyev, "Azərbaycan Bayrağı" ordenli veteran döyüşçü Eynulla Bağırov, 30 ildən çox orduda xidmət etmiş Əlaləm Babayev və başqaları çıxış edərək Azərbaycan Ordusunun keçdiyi tarixi yol, hazırkı döyüş qabiliyyəti barədə məlumat verib, bayram münasibətilə tədbirə toplaşanları təbrik ediblər. Sonda bir qrup veteran hərbiçiyə və SHXÇDX İsmayıllı rayon şöbəsinin fəal əməkdaşlarına mükafat və Fəxri fərmanlar təqdim olunub. Bu günlər ərəfəsində həmçinin Rayon Gənclər İdman İdarəsinin və Qarabağ Müharibəsi Əlilləri, Veteranları və Şəhid Ailələri İctimai Birliyi rayon filialının birgə təşkilatçılığı ilə şəhər üç saylı məktəb-liseyin idman bazasında güllə atıcılığı üzrə rayon birinciliyi keçirilib. Yarışda 20 nəfərdən çox gənc idmançı, Qarabağ müharibəsi əlili və veteranı güllə atıcılığı üzrə öz qüvvəsini sınayıb. Yarışı giriş sözü ilə Rayon Gənclər İdman İdarəsinin rəisi Taleh Salehov açıb. Sonra RİH-nin İctimai-siyasi və humanitar məsələlər şöbəsi müdirinin müavini Murad Məhərrəmov yarış iştirakçılarını Silahlı Qüvvələr Günü münasibətilə RİH-nin başçısı adından təbrik edib, iştirakçılara uğurlar arzulayıb. Yarışda Sübhan Mürşüdov birinci, İlham Şərifov ikinci və Azər Şahalıyev isə üçüncü yeri tutub. İdmançılara medallar və RGİİ-nin fəxri fərmanları təqdim olunub. İsmayıllı rayonunda gənclərin hərbi vətənpərvərlik hisslərinib artırılmasına yönəlik daha bir tədbir 10 rayonunun-Hacıqabul, Kürdəmir, Zərdab, Ucar, Bərdə, Göyçay, Ağdaş, Qobustan, Şamaxı və Ağsu rayonlarının "Şahin" hərbi-idman oyunu komandalarının zona yarışının keçirilməsi olub. Yarışın açılışından əvvəl yarış iştirakçıları və qonaqlar 3 saylı tam orta məktəbin ərazisindəki "Şəhidlər" kompleksini ziyarət edib, önünə gül dəstələri qoyublar. Tədbiri giriş sözü ilə İsmayıllı rayon Gənclər və İdman İdarəsinin rəisi Taleh Salehov açaraq yarışın məqsəd və şərtlərindən, qaydalarından danışıb, komandaları İsmayıllı gəncləri adından salamlayıb. İşğalçıya layiq olduğu cavabı verərkən şəhid olan Vətən övladlarının əziz xatirəsi bir dəqiqəlik sükutla yad edilib. Rayon İcra hakimiyyəti başçısının müavini, ictimai-siyasi və humanitar məsələlər şöbəsinin müdiri Sevil Əhmədova çıxış edərək RİH başçısı adından komandaların üzvləri və rəhbərlərini salamlayıb, yarış iştirakçılarına uğurlar arzulayıb, rayonun sosial-iqtisadi inkişafı və təhsil sahəsində İsmayıllının nailiyyətləri barədə məlumat verib. Hərbi Xidmətə Çağırış və Səfərbərlik Xidməti rayon şöbəsinin rəisi, polkovnik-leytenant Xamis Bədəlov gənclər qarşısında çıxış edərək onları hərbi işi daha müəkəmməl öyrənməyə orduya məktəb illərindən hərtərəfli hazırlaşmağa səsləyib. İsmayıllı rayon təhsil şöbəsinin müdiri Rasim Orucov və Azərbaycan Respublikası Gənclər və İdman Nazirliyinin nümayəndəsi Altay Paşayev tədbirdə iştirak edib. Qalib "Şahinlərə" Gənclər və İdman Nazirliyinin diplomları, İsmayıllı rayon Gİİ-nin diplomları və hədiyyələri verilib. "Həmrəy" Gənclərin Maarifləndirilməsinə Dəstək İctimai Birliyi və Rayon İicra Hakimiyyətinin birgə təşkilatçılığı ilə Peşə Tədris Mərkəzində "Vətən üçün nə etməli?" mövzusunda keçirdiyi elmi-praktik konfrans da məhz gənclərin vətənpərvərlik hisslərinin artırılmasına xidmət edib. Tədbirdə İsmayıllı RİH-nin əməkdaşı, layihə rəhbəri Yəhya Babanlı, Peşə Tədris Mərkəzinin pedoqoji kollektivi və tələbələri iştirak ediblər. Tədbirin əsas mahiyyəti gənclərin vətənpərvərlik hissinin aşılanması, milli-mənəvi dəyərlərimizin, tarixi-mədəni sərvətlərimizin qorunması və gələcək nəsillərə ötürülməsi məqsədini daşıyırıb. Təlimçi Telman Niftiyev mövzu ilə əlaqədar məruzə edib. Konfrans mövzu ətrafında maraqlı və qarşılıqlı diskusiya səraitində başa çatıb.

Yeniyetmələrin və gənclərin hərbi vətənpərvərlik tərbiyəsində əhəmiyyətli rol oynayan poliatlon çoxnövçülüyü üzrə yarışın zona birinciliyi də İsmayıllı rayonunda keçirilib. Yarışlarda 10 komanda mübarizə aparıb. Yarışa toplaşan komandaları rayon gənclər və idman idarəsinin rəisi Taleh Salehov giriş nitqi ilə salamlayıb. Bildirib ki, bir çox zona və Respublika yarışları İsmayıllıda o səbəbdən keçirilir ki, rayon icra hakimiyyətinin rəhbərliyi bu sahəyə xüsusi diqqətlə yanaşır, idmançıların uğurlarını təqdir edir, qalib olmaları üçün şərait yaradır,Olimpiya idman kompleksinin səmərəli və fasiləsiz işləməsi üçün ardıcıl köməklik göstərir. Azərbaycan Respublikası Gənclər və İdman Nazirliyinin nümayəndəsi Fərid Qasımzadə və İsmayıllı rayon İcra Hakimiyyətinin əməkdaşı Nəsimi Teymurov yarış iştirakçıları qarşısında çıxış edib, onlara uğurlar arzulayıblar. Gərgin keçən yarışların son nəticəsi olaraq İsmayıllı komandası birinci, Qax rayon komandası ikinci və Şəki komandası üçüncü yeri tutub. Qalib komandalara Gənclər və İdman Nazirliyinin diplomları təqdim edilib. Hər üç komanda Qaxda keçiriləcək Respublika yarışında iştirak etmək hüququ qazanıb. O da qeyd edilməlidir ki, yarışların təşkilində üzərinə düşən vəzifəni hər bir təşkilat məsuliyyətlə yerinə yetirib. İsmayıllı rayonunda gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılmasına xidmət edən tədbirlər, layihələrin həyata keçirilməsi rayon gəncləri tərəfindən də təqdir edilir, alqışlanır. Ümumiyyətlə, rayon gəncləri ölkədə, o cüçlədən İsmayıllı rayonunda həyata keçirilən dövlət gənclər siyasətindən razılıq ifadə edirlər. İsmayıllı rayonundan olan fəal gənc Toğrul Qasımov deyir ki, gənclər siyasəti Azərbaycanda uğurla icra olunur. Onun sözlərinə görə, paytaxt Bakı ilə yanaşı tegionlarda, eləcə də yaşadığı İsmayıllı rayonunda da dövlət gənclər siyasəti çərçivəsində məqsədyönlü tədbirlər həyata keçirilir. Toğrul Qasımov bildirib ki, bu günkü gənclərə ilk olaraq Ölkə başçısı İlham Əliyev dəstəkdir: "Və bu dəstək əlbəttə ki, göz önündədir. İstər gənclərlə bağlı tədbirlər, istərsə də maarifləndirmə aksiyaları gəncləri dövlətə, dövlətçilik prinsiplərinə sadiqliyə daha da sövq edir". Toğrul Qasımovun sözlərinə görə, region gəncləri ilə bu istiqamətdə səmərəli iş aparılır. O, qeyri-hökumət təşkilatları və ictimai birliklərin fəaliyyətini bu mənada təqdir edib: "Mən öz adımdan söyləyim ki, qeyri-hökumət təşkilatları və bir çox İctimai Birliklər sayəsində regıonlarda gənclərə vətənpərvərlik hissləri, bu kimi vacib nüanslar daha çox aşılanır. Bu doğurdan da təqdirəlayiq bir haldır. Yaxın keçmişdə İsmayıllı rayonunda Regıonal İnkişaf İctimai Birliyinın yaradılması da bunun bariz nümunəsidir. Onu da qeyd edim ki, gənclik də öz növbəsində bu baxımdan çox böyük rol oynayır. Əgər bu gün bir qeyri-hökumət təşkilatı İsmayıllıya gəlir, rayonda təlim keçirir və buradakı auditoriyanı bəyənir, gənclərin aktivliyini görürsə, əmin olun həmin QHT, bir daha İsmayıllıda layihə, yaxud tədbir keçirməyə maraqlı olacaq. Çünki İsmayıllı gəncləri aktiv, ınnovativ gənclərdəndir. Bütün bunlarla yanaşı onu qeyd etməliyəm ki, regionun irəli getməsini istəyən gənclər də boş durmamalı, öz üzərində işləməli, rayonunu tanıtmaq, önə çıxmaq yolunda addımlar atmalıdır". Toğrul Qasımov region, xüsusilə İsmayıllı gənclərinin vətənpərvərlik hisslərinin də üstün olduğunu diqqətə çatdırıb: "Region gənclərinin vətənpərvərlik hissləri düşünürəm ki, yüksək səviyyədədir. Bu sıraya İsmayıllı rayonunu da daxil etmək lazımdır. Bu gün rayon gənclərinin milli mənlik şüurunun inkişaf etdirilməsi, onlarda vətənpərvərlik hisslərinin artırılması istiqamətində Rayon İcra Hakimiyyəti səviyyəsində mühüm işlər görülür, müntəzəm olaraq tədbirlər təşkil olunur. Əgər bizlər, İsmayıllı gəncləri vətənpərvər gənclər olmasaydı, İsmayıllıni gənclər paytaxtı edə bilməzdik . Bırlık olduq, rayonumuz naminə biz bunu etdik, bacardıq. İsmayıllı rayonunda ilk növbədə gənclərə böyük dəstək var. Bu dəstək sayəsində də bizim gəncliyin səsi daim yüksəklərdən gəlir. Hesab edirəm ki, bu gələcəkdə də belə olacaq. Nə xoş bizə ki, istənilən bir gənc öz ideyasını yerlı qurumlarla birlikdə rahatlıqla həyata keçirir. Məsələn ötən aylarda mən bir ictimai fəal olaraq Rayon İcra Hakimiyyətinin Təhsil şöbəsinin , Gənclər və idman ıdarəsinin dəstəyi ilə rahatlıqla öz ideyamı həyat keçirdim və məktəblərarası esse müsabiqəsini uğurla yekunlaşdırdım". Toğrul Qasımov QHT-lərin regionlarda, eləcə də İsmayıllı rayonunda keçirdikləri tədbirlərin əksəriyyətinin də məhz bu məqsədə xidmət etdiyini söyləyib: "Gənclərin maarifləndirilməsi, onların sağlam, tərbiyəvi ruhda böyüməsi yönündə Gənclər Fondu, NAYORA , Bilik Fondu və digər aktiv QHT-lər müxtəlif layihələr həyata keçirir, gəncləri aydınlığı çəkirlər. Bu baxımdan nə xoş bu gəncliyin halına və nə xoş bizlərə. Bütün bunları nəzərə alaraq qeyd edərdim ki, ölkədə gənclərlə aparılan işdən razıyam. Sadəcə fərdi şəxslərin layihələrinin qəbulunda daha şəffaflıq qorunarsa və daha da çox gənclərin layihəsi dəstəklənərsə gözəl olar. Bundan başqa bəzi məqamlar var ki, doğurdan da gənclər üçün lazımı imkanlar yaradılmalıdır. Hesab edirəm ki, bu da zamanla düzələcək. Ona görə də bugünkü gənclərə öz üzərilərində daha çox işləməyi, istedadlarını formalaşdırıb daha böyük mərhələləri qət etmələrini, gənclər siyasətinə sadiq olduqlarını itirməmələrini məsləhət edırəm. Çünki uğurlu gələcək məhz sizlərlə gələcək".

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 9 sentyabr.- S.15.