Gənclərə vətənpərvərlik

hissləri aşılanır

Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması günümüzdə aktual məsələ olduğundan dövlətlə yanaşı, qeyri-dövlət təşkilatları da qeyd edilən istiqamətə üstünlük verir, bir qayda olaraq tədbir və layihələrinin əksəriyyətini gənclərin vətənpərvər ruhda tərbiyəsinə həsr edir. Belə qeyri-hökumət təşkilatlarından biri də Azərbaycan Demokratik İslahatların İnkişafı Mərkəzi İctimai Birliyidir (ADİİM). Bu günlərdə İctimai Birlik Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Azərbaycanda yaşayan azsaylı xalqlar, milli azlıq və etnik qruplar arasında vətənpərvərlik ruhunun aşılaması məqsədilə maariflənmə kampaniyasının həyata keçirilməsi" layihəsi çərçivəsində tədbir keçirib.

Siyəzən rayon Gənclər və İdman İdarəsinin Gənclər Mərkəzində təşkil olunan tədbirdə İctimai Birliyin, Siyəzən Rayon İcra Hakimiyyətinin, rayonda fəaliyyət göstərən idarə və təşkilatların əməkdaşları ilə yanaşı, ictimai fəallar da iştirak edib. Tədbiri giriş sözü ilə açan rayon Gənclər və İdman idarəsinin rəisi Nadir Məmmədov bildirib ki, belə tədbirlər gənc nəslin həm fiziki, həm də mənəvi cəhətdən sağlam böyüməsi, vətəndaşlıq və vətənpərvərlik ruhunda tərbiyə olunması, gənclərimizin qüvvə və bacarıqlarının dövlətçiliyin möhkəmləndirilməsi və inkişafına istiqamətlənməsi baxımından mühüm əhəmiyyət daşıyır. Sonra ADİİM sədri Cavid Şahverdiyev layihə barədə məlumat verərək qeyd edib ki, tədbirin təşkilində əsas məqsəd ölkəmizdə yaşayan azsaylı xalq, milli azllıq və etnik qrupların vətənə, xalqa və dövlətə bağlılıq, məhəbbət və sədaqət ruhunda böyümələrinə, bu sahədə onların maarifləndirilməsinə kömək etməkdir. Daha sonra layihənin eksperti AMEA-nın Folklor İnstitutunun elmi işçisi Elçin İmaməliyev çıxış edib: "İndi gəncliyin qayğılarından tez-tez danışılır. Bu, bütövlükdə insanlığın problemidir. Xilas adına bu gün dünyada çoxlu ideologiyalar var. Bəşərin mənəvi durumu isə gündən-günə çətinləşir. İntiharlar daha çox gəncliyin əhvalına təsir edir, ömrünü yarıda kəsir. Yalnız ulusal (milli) ölçüyə əsaslanan fikir birliyi əsasında Azərbaycan gəncliyi çağdaş dövrün qarışıq və ziddiyyətli girdabından xilas ola bilər. Gənclik insan həyatının ən məhsuldar, enerjili, arzulu, həm də sonsuz ümidli bir çağıdır. SSRİ süqut edən zaman başqa respublikalar kimi azadlığa çıxan Azərbaycan da bu müddət ərzində gərgin həyat yaşamalı oldu. Sabahkı gəncliyin təməli olacaq çağdaş uşaqların tərbiyəsi problemə çevrilib. Çünki informasiya əsrində uşaq psixologiyasını nəzarətdə saxlamaq daha da çətinləşir. İlk növbədə isə uşaqlara və gənclərə milli-mənəvi dəyərləri aşılamaq lazımdır. Qloballaşma bəlasının artdığı bir vaxtda millətin, dövlətin inkişafı üçün yeni nəsillərin tərbiyəsinin milli prinsiplərlə aparılması gərəklidir. Əgər millətin milli dəyərləri insaniliyi ifadə edirsə, o, həm də bəşəridir. Gedişat onu göstərir ki, qarşıdakı illərdə valideynlər uşaqlarının tərbiyəsilə bağlı daha böyük problemlərlə rastlaşacaqlar. Artıq bu qayğıların artması göz qabağıdadır. Gənc nəsil əgər doğru-düzgün istiqamətləndirilmirsə, o zaman onun başqalarına, yəni özgələrə yaraması fəlakəti baş verir. Azərbaycan gəncliyi sözün böyük mənasında xəlqi təmələ, bəşəri sevgiyə malik olmalıdır. 70 illik əsarət dövrünü yaşayan Azərbaycanda müstəqillikdən sonrakı dövr sözün böyük mənasında milli-mənəvi dəyərlərə qayıdış üçün geniş imkanlar açdığı dərəcədə bu, başqa, daha doğrusu yad, özgə təsəvvürlərin, baxışların yurdumuza ayaq açması, cövlan etməsi ilə müşahidə olundu. İstər-istəməz Qərb dəyərlərinin soydaşlarımızın ağlına, ruhuna işləməsi, gündən-günə daxilləri çulğaması, qarışdırması problemi daha da çıxılmazlığa salır. Başqa tərəfdən də Şərq aləminin qarışıqlığı, halsızlığı bu gərginliyi artırır. Bir sözlə, Azərbaycan gəncliyi özünü davamlı şəkildə qorumalı və yaratmalıdır. Milli dəyər - millətin ruhundan yaranır. Milli dəyərlərə yiyəlik eləmək onu yaratmaq qədər çətindir. Milli dəyəri elə ucalıqda yaşatmağımız gərəkdir ki, onunla fədakar ömürlər yarada bilək. Yoxsa xəlqi dəyərlərimiz ömürləşməyəcək. Gənclərimizin dövlətçilik, təhsil, iqtisadiyyat və başqa yönlərdə ardıcıl qayğılanmaları çağımız üçün son dərəcə qaçılmaz və gərəklidir. Dövlət amili ciddi hadisədir. Soydaşlarımızın ağlında davamlı şəkildə xalq, dövlət sevgisinin yaradılması gərəkdir. Azərbaycana gələn yad baxışlar ilk növbədə dövlət amilinə hücumda özünü göstərir. Gənclik həm də dil qoruyucusu deməkdir. Dilimiz - mühitdən, zamandan ötədir, güclüdür. Bu, əslində milli ruhumuzun ölməməsi deməkdir. Bu gün xalqların özünəməxsus ənənəsi itməkdə, yoxa çıxmaqdadır. Bu ənənəni təməl üzərində inkişaf etdirmək insani hünər istəyir. Sözüm gənc yazarlaradır: Milli dəyər ölçüsü olmayan, həmin dəyər əsasında yaşamayan yaradıcının əsəri də milliliyə qarşı çevrilir. Yazıçı xalqının adından danışdığına, yazdığına əmin olmalıdır. Ana dilinin qorunması, inkişaf etdirilməsi dövlətin varlığının davamlı təsdiqi demək olur. Bu yerdə gənc yazarlarımıza ciddi özünəməxsusluq diləyirəm. Qoy onlar bilsinlər ki, fərdilik - özünə bənzəməkdir. Bu gün Azərbaycan gəncliyi erməni vəhşiliyi ilə üz-üzə, göz-gözədir. Dünya ermənilərə qucaq açdığı dərəcədə xəyanətkarlığa, bicliyə, insansızlığa meydan verir. Arxayınlıq - məsuliyyətsizlikdən yaranır. Məsuliyyətsizlik isə fərdin örnəyində xalqın məqsədsizliyi, xalq kimi var olmaq istəməməsi, bu haqda düşünməməsidir. Məsuliyyət fərddən başlayır, xalqda təsdiqini tapır, bəşəriliyə layiq olur. Azərbaycan gəncliyi ruhən güclü olmağımız üçün daim çalışmalıdır. Xalq olaraq dərdi dərindən duymağımız, inamla, idrakla yaşamağımız gərəkdir. Azərbaycan gəncliyinin davamlı var olmasında təhsilin rolu danılmazdır. Düzgün, doğruçu təhsil insanın mənəvi varlığının yaradıcısı, təminatçısıdır. Məktəb bilik verdiyi dərəcədə də insan yetişdirməyi bacarmalıdır. İnsan ömründə, yaşamında yaradıcı şəkildə gerçəkliyini tapmayan təhsil - sadəcə, mexaniki bir proses olur. Demək, bilik insanı daha çox zahirən dəyişdirir, onun insanı içəridən tam dəyişdirməyə gücü çatmır. İnsanı içəridən dəyişdirmək üçün bilikdən artıq olan gərəkdir". Daha sonra rayon Təhsil şöbəsinin nümayəndəsi Gündüz Səmədli və Gənclər və İdman İdarəsinin rəis müavini Vüsal Alışov çıxış edərək mövzu ilə bağlı fikirlərini səsləndiriblər. Çıxışlarda bildirilib ki, bu gün milli dövlətçiliyimizin formalaşması, milli mənlik şüurunun inkişaf etdirilməsi, vətənpərvərlik ruhunun yüksəldilməsi kimi qlobal proseslərdə gənclərin üzərinə böyük məsuliyyət düşür. Bizim gənclərimizin vətənpərvər ruhda yetişmələri xüsusilə vacibdir. Tədbirin sonunda iştirakçıların fikir və təklifləri dinlənilib, iştirakçılara ADİİM tərəfindən çap edilən layihə ilə bağlı maarifləndirmə məqsədi daşıyan bukletlər paylanılıb.

Azərbaycan Demokratik İslahatların İnkişafı Mərkəzi (ADİİM) İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyilə vətənpərvərlik mövzusunda növbəti tədbirini Siyəzən rayonundakı 2 saylı Uşaq Bağçasında keçirilib. Tədbiri açan ADİİM sədri Cavid Şahverdiyev layihə barədə qısa məlumat verib. O, bildirib ki, Vətən üçün gözümüzü belə qırpmadan ölümə getməyə hər an, hər dəqiqə hazır olmağı da uşaqlara öyrətmək lazımdır. Amma burada uşaqlara qəhrəmancasına ölümün nə olduğunu savadlı, şüurlu şəkildə başa salmaq lazımdır ki, "ucuz qəhrəmanlıqlar" etməsinlər. Biz uşaqlarımıza başa salmalıyıq ki, vətənə xidmət yalnız cəbhədə olmur. Savadlı bir həkim, mühəndis və ya siyasətçi olmaq və vətən uğrunda işlər görmək, arxa cəbhədə vətən üçün çalışmaq da vətənpərvərlikdir. Vətən olmadan bir millətin ayaqda dayanması mümkün deyil. Bir millətin var olması, həyatını davam etdirə bilməsi ancaq vətəninə sahib olmasıyla mümkündür. Uşaqların vətəndaşlıq tərbiyəsi dedikdə, yüksək əxlaqi-mənəvi keyfiyyətlərə yiyələnmə və şəxsiyyət kimi yetişmə nəzərdə tutulur. Onlar davranış qaydalarını, nizam-intizamı, savadlı olmağı, vətəninin tarixini, coğrafiyasını, mədəniyyətini, milli adət-ənənələrini bilməli, vətəni sevməlidirlər. Uşaqlar ideyaca savadlı olmalı, işə şüurlu yanaşmalı, məsuliyyətli, vicdanlı, mübariz olmalı, pis niyyətlə, əliəyriliklərlə barışmamalıdır. Mənəviyyat tərbiyəsini qiymətləndirmək üçün uşaqlarda yaxşını pisdən ayırmaq, həqiqətə, ədalətə, insanlara-böyüklərə, ailə üzvlərinə hörmət etmək kimi insani keyfiyyətlər aşılanmalıdır. Onların davranış xüsusiyyətlərini uyğun qiymətləndirməli, yaxşı davranış və qarşılıqlı əlaqə təmin olunmalıdır. Ona görə də tədbirlərimizin uşaq bağçaları və məktəblərdə həyata keçirməyi, onları vətənpərvərlik hissini aşılayan təbliğat xarakterli məlumatlarla təmin etməyi düşünürük. Layihənin eksperti AMEA-nın Folklor İnstitutunun elmi işçisi ekspert Elçin İmaməliyev isə çıxışında vurğulayıb ki, hər bir cəmiyyətin gələcəyi onun yetişməkdə olan gənc nəslidir. Gənc nəslə qayğı isə hər bir dövlətin siyasətinin aparıcı istiqamətlərindən biridir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 17-19 sentyabr.- S.15.