Gənclərin vətənpərvərlik hissi artır

Azərbaycan ordusu hərbi qüdrətini artırır

Azərbaycan ordusu günü-gündən hərbi qüdrətini artırır. Məhz bu səbədən ordunun müasir hərbi texnika ilə təçhizat məsələsi diqqətdə saxlanır. Etiraf edilməlidir ki, silahlı qüvvələrimizin müasir hərbi texnika ilə təmin edilməsi gənclər arasında vətənpərvərlik hissinin yüksəlməsinə səbəb olub. Çünki, gənclərimiz artıq arxayındırlar ki, orduda silah çatışmazlığı ilə bağlı problem çoxdan həllini tapıb, üstəlik Azərbaycan silah ixrac edən ölkəyə çevrilib. Onu da xatırlatmaq yerinə düşərdi ki, Azərbaycanın təkcə orduya ayırdığı vəsait Ermənistanın dövlət bürcəsindən qat-qat artıqdır.

Məlumat üçün qeyd edək ki, bu günlərdə Müdafiə Sənayesi Nazirliyi "Şərq" İstehsalat Birliyinin "AZAD Sistemlər" müəssisəsində hazırlanan müasir kəşfiyyat element bazasına və taktiki məhvedici hücum sisteminə malik "Zərbə" pilotsuz uçuş aparatlarının təqdimatı olub. Azərbaycan Respublikasının Prezidenti, Ali Baş Komandan İlham Əliyev tədbirdə iştirak edib. Dövlət başçısı əvvəlcə müəssisənin qarşısında ümummilli lider Heydər Əliyevin abidəsinin önünə gül dəstəsi qoyub. Sonra müdafiə sənayesi naziri Yavər Camalov görülən işlərlə bağlı Prezident İlham Əliyevə məlumat verib. Dövlət başçısının diqqəti və qayğısı nəticəsində xüsusi təyinatlı avadanlıqların və texniki vasitələrin alınıb elmi-texniki işlərə tətbiqi geniş vüsət alıb. Bu, müəssisədə istehsal prosesinin daha səmərəli olmasına zəmin yaradıb. Bildirilib ki, Müdafiə Sənayesi Nazirliyinin müəssisələrində digər hərbi təyinatlı məhsulların istehsalı ilə bərabər, taktiki-texniki parametrli müxtəlif sinifli pilotsuz uçuş aparatlarının yaradılması, istehsalı, həmçinin texniki qulluq göstərilməsi istiqamətində ardıcıl planlı işlər davam etdirilir. Təcrübi-konstruktor işləri başa çatdıqdan sonra məhsulların istehsalı həyata keçirilir. O cümlədən pilotsuz uçuş aparatlarının texnoloji proseslərə uyğun istehsalı işləri də görülür. Prezident İlham Əliyev "Zərbə" pilotsuz uçuş aparatı ilə şəxsən tanış olub. Dövlət başçısı həmçinin müəssisədə istehsal edilən məhsulların nümayiş olunduğu filmə baxıb. Diqqətə çatdırılıb ki, məmulatların istehsalı üçün hissələr ilkin mərhələdə konstruksiya ölçülərinə uyğun kompozit materiallardan hazırlanır. Daha sonra xüsusi qəliblərdə hazırlanan hissələr yoxlanılaraq yığım sexinə verilir və quraşdırma prosesi aparılır. Qurğuda xüsusi izləmə mini optik kamerası yerləşdirilir. Aparat xüsusi elektron mühafizə sisteminə malik olmaqla, elektron maneə vasitələrinə qarşı dayanıqlıdır. Peyk GPS əlaqəsi itən zaman aparat sərbəst döyüş tapşırığını yerinə yetirməyə qadirdir. Məhsulun istehsalı ilə müxtəlif ixtisaslar üzrə xüsusi təlim-tədris kursu keçmiş milli kadrlar məşğul olurlar. Xüsusi test yoxlamalarından sonra pilotsuz uçuş aparatları Silahlı Qüvvələrin istifadəsinə verilir. Son illər müəssisənin mühəndisləri tam yeni sinif PUA-ların yaradılması istiqamətində elmi-texniki axtarışlar aparıblar və nəticədə daha mükəmməl məhsulların istehsalına başlanılıb. Yeni yaradılan "Zərbə" PUA gecə və gündüz, istənilən hava şəraitində sərbəst şəkildə düşməni izləmək və ona zərbə endirmək imkanına malikdir. Həmçinin partladıcı gücə malik yeni aparat qəlpəli fuqaslı piyada əleyhinə, müxtəlif texnikaya və canlı qüvvəyə qarşı effektivdir. Aparat əməliyyat baxımından xüsusi avadanlıqlarla təchiz edilmiş yüksək keçid qabiliyyətinə malik "K1-Zərbə" mobil xüsusi zirehli maşına quraşdırılıb və istənilən zaman düşmənə sarsıdıcı zərbə endirə bilər. Ötən müddətdə müəssisədə müxtəlif sinifli mini PUA-lara texniki qulluq göstərilərək saz vəziyyətə gətirilib və onlar təhvil verilməklə döyüş mövqeləri daim əməliyyat nəzarətində saxlanılır. Bildirilib ki, 2016-cı ilin aprel hadisələri zamanı müəssisə fasiləsiz iş rejiminə keçib və müxtəlif tipli PUA-lar qısa müddətdə təmir edilərək döyüş zonasına göndərilib. Dövlət başçısına müəssisədə istehsal olunacaq "Orbitr 4" və "Orbitr 3" müşahidə-kəşfiyyat xarakterli pilotsuz uçuş aparatları barədə də məlumat verilib. Prezident İlham Əliyev Müdafiə Sənayesi Nazirliyinin muzeyində saxlanmaq üçün hazırlanan pilotsuz uçuş aparatının qanadını imzalayıb. Bildirilib ki, müəssisədə təşkil edilən kurslara Müdafiə Nazirliyinin PUA üzrə hərbi qulluqçuları arasında xüsusi seçim aparılmaqla, 70-ə yaxın kursant cəlb olunub. Təlim-tədris kurslarını müvəffəqiyyətlə bitirən kursantlara müxtəlif ixtisaslar üzrə sertifikatlar verilib. Bu müdavimlər hazırda PUA-ları idarə etməklə düşmənin bütün hərəkətlərini günün istənilən vaxtında - gecə və gündüz nəzarətdə saxlayaraq, verilən tapşırıqları yerinə yetirmək məharətinə malikdirlər. Əldə olunan nəticələrlə kifayətlənməyən müəssisənin kollektivi ölkəmizin müdafiə qüdrətinin artırılması istiqamətində qarşıya qoyulan yeni vəzifələrin icrası məqsədilə elmi-texniki və konstruktor-texnoloji layihələr üzərində işləri davam etdirir. Sonda dövlətimizin başçısı müvafiq tapşırıq və tövsiyələrini verib.

Məlumat üçün qeyd edək ki, Azərbaycan özü silah istehsal etsə də dövlət təhlükəsiliyini daha etibarlı təmin etmək üçün yeni silahlar almaq zorundadır. Ən azından Azərbaycanı buna Ermənistanın hələ də təcavüzkar siyasətindən əl çəkməməsi vadar edir. Çox təəssüf ki, bəzi hallarda Ermənistan da daxil olmaqla bəzi beynəlxalq təşkilatlar bunu irad tuturlar. Azərbaycanın Çindəki keçmiş hərbi attaşesi, ehtiyatda olan general-leytenant Yaşar Aydəmirov deyib ki, Azərbaycan qoşulduğu beynəlxalq konvensiyaların prinsiplərinə uyğun olaraq özünü müdafiə məqsədi ilə silahlar ala bilər. Y.Aydəmirov bildirib ki, Rusiyanın Ermənistana satdığı raket yaxın məsafəli əməliyyat-taktiki silahdır. General vurğulayıb ki, Azərbaycan "İsgəndər" raketindən də güclü silahlar ala bilər: " Rusiyanın Ermənistana satdığı "İsgəndər-E" raketi yaxın məsafələri vurmaq üçün nəzərdə tutulmuş əməliyyat-taktiki raketdir. Təbii ki, əgər Rusiya Ermənistana "İsgəndər-E" raketini sata bilirsə, Azərbaycan da belə tip silahları ala bilər. Hətta Azərbaycan imzaladığı beynəlxalq konvensiyaların prinsiplərinə uyğun olaraq "İsgəndər-E raketindən də güclü silah ala bilər. Azərbaycan bu gün istənilən növ silahı almağa qadirdir və buna hər cür imkanı da çatır". Yaşar Aydəmirov söyləyib ki, Azərbaycan öz raketləri ilə Ermənistandakı istənilən obyekti məhv edər: "Əslində bu gün həmin o "İsgəndər-E" raketi elə də qorxulu silah deyil. Biz raketlərimizi tuşlasaq, Ermənistandakı istənilən hərbi və digər strateji obyektləri məhv edərik. Heç bir narahatçılığa əsas yoxdur. Hələ onu bilmək olmaz ki, həmin "İsgəndər-E" raketlərinin quruluşu necədir. Bəlkə də elə onların içi heç əsl "İsgəndər" quruluşu deyil.Sadəcə olaraq, Serj Sarkisyan hakimiyyəti bu gün Ermənistanda mövcud olan inamsızlığı aradan qaldırmaq üçün mediaya bu cür məlumatları buraxırlar".

Məlumdur ki, Azərbaycanda həm yerli, həm də xaricdən alınan müasir silahları idarə etməyi bacaran üçün kifayət qədər peşəkar hərbçi kadrlar var. Bunu aprel hadisələrində Azərbaycan hərbçilərinin apardıqları döyüş taktikası bir daha sübut edir. Hərbi ekspert Emin Həsənli bildirib ki, Ermənistanın hərbi durumu ağır vəziyyətdədir. Aprel ayına qədər bu ölkə bir mif yaratmışdı ki, onlar güclüdürlər və keçilməz xəttə malikdirlər. Lakin Azərbaycan o xətti alt-üst etdi. Onun sözlərinə görə, aprel ayındakı vəziyyət həm Azərbaycan, həm də Ermənistan silahlı qüvvələrinin döyüş hazırlığını, dünya ictimaiyyətinin bu məsələyə münasibətini göstərdi: "Aprel döyüşləri Azərbaycan ordusunun gücünü, Ermənistan ordusunun mif olaraq yaradıldığını sübut etdi. Rusiyanın Ermənistanda daimi marağı var və onu saxlamaq üçün müəyyən addımlar atır. Lakin hər kəs başa düşür ki, münaqişə həll edilməlidir, bu cür addımlarla Ermənistanın mövqeyini uzatmaq olmaz". Ekspert deyib ki, Azərbaycan ordusu Ermənistan ordusundan qat-qat güclüdür, müasir silahları var: "Həmçinin, Azərbaycan iqtisadiyyatı Ermənistan iqtisadiyyatından ilə müqayisəedilməz dərəcədə güclüdür, xarici siyasəti, insan resursları da onun kimi. Rusiyanın və digər iri dövlətlərin Cənubi Qafqazda maraqları var. Məlumdur ki, münaqişənin uzanması bəzi böyük dövlətlərə sərf edir. Ermənistandakı aprel ayından sonrakı hadisələr, mitinqlər, hakimiyyət böhranı, hökumətin istefası, iqtisadi böhranın ardınca silahları müasirləşdirmək cəhdi əslində əhalini sakitləşdirməyə yönəlmiş addım idi". Ancaq ekspert hesab edir ki, ən müasir silahları gətirib nümayiş etdirsələr belə Ermənistanda onu istifadə edəcək nə müasir ordu, nə dövlət, nə də iqtisadi imkanlar var: "Eyni zamanda paralel Ağdamda təlimlər keçirdilər. Ermənistanda təlimlər keçməyə güclü ordu yoxdur. Kiçik bölmələr səviyyəsində olan təlimlər heç bir effekt verməyib. İndiyə kimi olan təlimlər də bunu göstərdi. Yaxşı olar ki, Ermənistanı müdafiə edən güclər, Qarabağa yardım ayıran həmsədr dövlətlər Fransa, ABŞ işğalçının başına ağıl qoysunlar və onun torpaqlarımızdan çıxmasını təmin etsdinlər. Yoxsa status kvonu uzatmaqla heç nəyə nail ola bilməyəcəklər". Onu da qeyd edək ki, Müdafiə naziri Zakir Həsənov prezidentin tapşırığına əsasən, Müdafiə Nazirliyinin rəhbər heyətinin iştirakı ilə müşavirə keçirib. Müdafiə nazirinin müşavirədə səsləndirdiyi əsas fikir bu olub: "Azərbaycan üçün yarana biləcək istənilən hərbi təhdid ehtimalını nəzərə alaraq düşmənin bütün ərazisindəki strateji və hərbi təyinatlı obyektlərə nəzarətin gücləndirilməsi, zərurət yaranarsa, onların əhəmiyyətinə görə dərhal məhv edilməsinə hazır olmalıyıq".

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 24-26 sentyabr.- S.15.