“Azərbaycan hazırda regionda ən

böyük hərbi potensialı olan ölkədir”

Azərbaycanda ordu quruculuğu davam edir. Artıq ölkəmizin hərbi potensialı beynəlxaql təşkilatların, eləcə də xarici dövlətlərin diqqətini cəlb edib. Məhz bu səbəbdən Azərbaycanla hərbi əməkdaşlıq sahəsində əməkdaşlığa üstünlük verilir.

Məlum olduğu kimi hazırda Azərbaycanın istehsal etdiyi hərbi təyinatlı məhsullar mötəbər beynəlxalq sərgilərdə təqdim olunur. Bu dəfə isə beynəlxalq müdafiə sərgisi ölkəmizdə təşkil olunub. Belə ki, sentyabrın 27-də Bakı Ekspo Mərkəzində "ADEX 2016" İkinci Azərbaycan beynəlxalq müdafiə sərgisi açılıb. Mərasimdə dövlət və hökumət rəsmiləri, Azərbaycanda akkreditə olunan diplomatik korpusun, beynəlxalq təşkilatların nümayəndələri, bir neçə ölkənin müdafiə naziri və müxtəlif ölkələrin nazirliklərinin təmsilçiləri iştirak ediblər. Tədbirdə Azərbaycanın Baş nazirinin birinci müavini Yaqub Eyyubov Prezident İlham Əliyevin sərgi iştirakçılarına təbrik məktubunu oxuyub. Dövlət başçısının müraciətində deyilir: "Sizi "ADEX 2016" İkinci Azərbaycan beynəlxalq müdafiə sərgisinin açılışı münasibətilə ölkəmizin paytaxtı Bakı şəhərində səmimi-qəlbdən salamlayıram. Qloballaşma prosesinin geniş vüsət aldığı daim dəyişən dünyamızda dövlətlər intensiv şəkildə təhlükəsizlik çağırışları ilə üzləşirlər. Bu istiqamətdə həyata keçirilən tədbirlər sırasında hərbi-texniki əməkdaşlıq, müasir texnologiyaların və təhlükəsizlik vasitələrinin mübadiləsi məsələlərinin aktuallığı durmadan artmaqdadır. Ölkəmizin ərazi bütövlüyünə qarşı yönəlmiş xarici təcavüz və terrorizmin nəticəsi olaraq, Azərbaycan dövləti təhlükəsizlik sisteminin möhkəmləndirilməsini və dövlətlərarası əməkdaşlığın inkişaf etdirilməsini daim diqqət mərkəzində saxlayır. Qəbul edilmiş Hərbi Doktrina beynəlxalq müstəvidə ümumbəşəri prinsip və normaları rəhbər tutan Azərbaycanın həm müdafiə potensialını, həm də dost və tərəfdaş dövlətlərlə əlaqələrini gücləndirmişdir. Azərbaycan hazırda regionda ən böyük hərbi potensialı olan ölkədir. Bölgədə ilk mötəbər beynəlxalq müdafiə sərgisi də məhz Bakı şəhərində keçirilmişdir. İnanıram ki, iştirakçısı olduğunuz sərgi hərbi-texniki əməkdaşlıq məsələlərinin müzakirə edildiyi nüfuzlu məkan kimi müasir təhlükəsizlik çağırışlarına cavab verən yeni yanaşmalara, xüsusilə müdafiə sənayesi sahəsində mühüm təşəbbüslərə yol açacaq və yeni imkanlar üzə çıxaracaqdır. Hər birinizə gələcək işlərinizdə uğurlar, ölkələrinizə sülh və əmin-amanlıq arzulayıram". Sərgidə həmçinin Müdafiə sənayesi naziri Yavər Camalov çıxış edərək ölkəmizdə və regionda ikinci dəfə keçirilən Azərbaycan beynəlxalq müdafiə sərgisi - "ADEX 2016"nın açılması münasibətilə nümayəndə heyətlərini, şirkətlərin təmsilçilərini və ziyarətçiləri təbrik edib. Artıq ölkəmizdə müasir texnologiyalara əsaslanan müdafiə sənayesi müəssisələrinin fəaliyyətə başladığını deyən Y.Camalov bildirib ki, Azərbaycanın hərbi qüdrəti durmadan artır. Ölkəmizin müdafiə sənayesinin uğurla inkişaf etdiyini xüsusi vurğulayan nazir diqqətə çatdırıb ki, son illərdə müdafiə sənayesi müəssisələri tərəfindən buraxılan hərbi təyinatlı məhsulların çeşidi artıb. Nazir deyib ki, Azərbaycan Müdafiə Sənayesi Nazirliyi bir çox sərgilərin iştirakçısı olub. Nazirlik bu sərgilərlə və bazara çıxardığı məhsullarla özünü təsdiqləyib. Nazirliyin müəssisələrində istehsal olunan və sayı artan məhsullar xaricdə keçirilən beynəlxalq müdafiə sənayesi sərgilərində də nümayiş etdirilir. Naziri Yavər Camalov deyib Azərbaycan Müdafiə Sənayesi Nazirliyi 45 ölkənin hərbi sənaye kompleksi ilə əməkdaşlıq edir. Bunun nəticəsidir ki, ölkəmizdəki müəssisələr yenidən qurulur və dünyanın aparıcı şirkətlərinin texnologiyası Azərbaycana gətirilir. Həmin texnologiyalar əsasında ölkəmizdə müdafiə təyinatlı məhsullar istehsal olunur. Yavər Camalov bildirib ki, Müdafiə Sənayesi Nazirliyi ölkəmizin müdafiə qüdrətinin artırılması istiqamətində qarşıya qoyulan yeni vəzifələrin icrası məqsədilə elmi-texniki və konstruktor-texnoloji layihələr üzərində işləri davam etdirir. 2009-cu ildə nazirlik Türkiyədə iştirak etdiyi ilk beynəlxalq sərgidə 27 adda, 2014-cü ildə Bakıda keçirilən "ADEX 2014" sərgisində 168 adda məhsul nümayiş etdirirdisə, bu sərgiyə isə 260 addan çox müdafiə təyinatlı məmulat çıxarılıb. Artıq 2018-ci ildə keçiriləcək sərgiyə hazırlıq gedir, 125 məmulatın üzərində təcrübi-konstruktor işləri aparılır. Prioritet layihələrə hava-yer, hava-hava, yer-yer raketləri daxildir. Eyni zamanda, dünyanın bir neçə aparıcı şirkəti ilə 280 kilometr məsafəlik ballistik raketlərin texnologiyasının Azərbaycana gətirilməsi ilə bağlı danışıqlar davam edir. Nazir qeyd edib ki, ölkəmizdə istehsal olunan "Zərbə" pilotsuz uçuş aparatı Ermənistan ordusunun ölüm kabusuna çevrilən silahdır. Hazırda Müdafiə Nazirliyi ilə danışıqlar gedir. Yüzlərlə pilotsuz uçuş aparatları sifariş verilib. Bununla bağlı müqavilə imzalanacaq. Ermənistan ordusunun paradında "İsgəndər" raket kompleksinin nümayiş etdirilməsinə də toxunan Yavər Camalov bildirib ki, Ermənistan müstəqil dövlət olmadığı üçün onun keçirdiyi paradın heç bir mənası yoxdur. Ermənistana verilmiş "İsgəndər E" istismar müddətini başa vurmuş ballistik raketlərdir. Qeyd edilib ki, bu sərgi ikinci dəfə keçirilsə də, artıq regionun ən genişmiqyaslı sərgisinə çevrilib. "ADEX-2016"da 34 ölkədən 216 şirkət, 19 ölkədən 25 rəsmi nümayəndə heyəti iştirak edir. Pavilyonlarda müasir silah və texnikalar nümayiş olunur."ADEX 2016" sərgisi iştirakçılar arasında yeni əməkdaşlıq sahələrini müəyyən edəcək. Sonra tədbir iştirakçıları sərgi ilə tanış olublar. Sərgidə Belarus, İsrail, Çin, Pakistan, Rusiya, Serbiya, Türkiyə, Fransa və Çexiya milli qrupları öz ekspozisiyalarının miqyası ilə fərqlənirlər. Şirkətlərin sayına görə ən böyük pavilyonlar Türkiyəyə (42 şirkət), İsrailə (14 şirkət) və Rusiyaya (14 şirkət) məxsusdur. "ADEX 2016" sərgisində Azərbaycanın Müdafiə Sənayesi Nazirliyinin müəssisələrində yaradılan və istehsal olunan müdafiə təyinatlı məmulatlar da nümayiş etdirilir. Nazirlik "ADEX-2016" sərgisinə 260 addan çox müdafiə təyinatlı məmulat çıxarıb. Burada Azərbaycan Müdafiə Sənayesi Nazirliyinin müəssisələri müdafiə və xüsusi təyinatlı məhsulları, hərbi nəqliyyat vasitələri və texnika, eləcə də silah-sursat nümunələrini nümayiş etdirir. Sərgi çərçivəsində Azərbaycanın müdafiə sənayesinin bir sıra yeni məhsullarının təqdimatı nəzərdə tutulur. Sentyabrın 30-dək davam edəcək sərgi çərçivəsində seminar, təqdimat, ikitərəfli görüşlər də keçiriləcək.

Qeyd edək ki, Azərbaycan hökuməti təkcə ordu quruculuğuna deyil, eləcə də əsgər və zabitlərin sosial-məişət şəraitinin yaxşılaşdırılmasına xüsusi diqqət yetirir. Belə ki, Əmək və Əhalinin Sosial Müdafiəsi Nazirliyi tərəfindən Qax rayonunda inşa etdirilmiş 3 ədəd fərdi yaşayış evi Qarabağ müharibəsi əlillərinin istifadəsinə verilib. Məlumata görə, evlərin təqdim olunması tədbirində Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun direktor müavini Səfər Mehdiyev Azərbaycan Prezidenti cənab İlham Əliyevin sosial inkişaf kursunun hər bir ölkə vətəndaşının, o cümlədən Qarabağ müharibəsi əlilləri və şəhid ailələrinin rifah halının yaxşılaşmasına xidmət etdiyini vurğulayıb. Bildirilib ki, bu təbəqələrdən olan insanların maddi təminatlarının gücləndirilməsi istiqamətində mühüm addımlar atılmaqla yanaşı, onların mənzil-məişət şəraitlərinin yaxşılaşdırılması, yeni mənzillərlə təminatı sahəsində də məqsədyönlü işlər aparılır. Azərbaycan Prezidentinin 2014-cü il 20 iyun tarixli Sərəncamının icrası işlərinin davamı olaraq, cari ildə 30-a yaxın rayonda 119 fərdi yaşayış evi, Beyləqan rayonunda 54 mənzilli yaşayış binası və Abşeron rayonunda hazır yaşayış binalarından alınaraq təmir etdirilmiş 64 mənzil Qarabağ müharibəsi əlillərinə və şəhid ailələrinə təqdim edilib. Bununla da Əmək və Əhalinin Sosial Müdafiəsi Nazirliyi tərəfindən cari ilin ötən dövründə 152 nəfəri Qarabağ müharibəsi əlili, 85-i isə şəhid ailəsi olmaqla, ümumilikdə 237 nəfərin yeni mənzillərlə təminatı həyata keçirilib. Qarabağ müharibəsi əlilləri və şəhid ailələrinin mənzil təminatı işləri qarşıdakı dövrdə də uğurla davam etdiriləcək. Hazırda Qax rayonunda 3 fərdi yaşayış evi istifadəyə verilməklə yanaşı, bu rayonda qeyd olunan təbəqələrə aid vətəndaşlar üçün daha 2 fərdi yaşayış evinin tikintisi də planlaşdırılır. Tədbirdə çıxış edənlər ölkəmizdə dayanıqlı iqtisadi inkişafın təmin olunması yönündə aparılan uğurlu islahatların eyni zamanda sosial müdafiə tədbirlərinin ildən-ilə güclənməsi ilə müşahidə edildiyini diqqətə çatdırıblar. Vurğulanıb ki, ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslərin və şəhid ailələrinin sosial-məişət şəraitlərinin yaxşılaşdırılması istiqamətində aparılan işlər ümumən ictimaiyyət tərəfindən rəğbətlə qarşılanır. Yeni evlərlə təmin olunan Qarabağ müharibəsi əlilləri və onların doğmaları ölkə əhalisinin sosial müdafiəsinin gücləndirilməsi, müharibə əlillərinin və şəhid ailələrinin yeni mənzillərlə təmin olunması üçün görülən işlərdən razılıqla bəhs ediblər. Onlar göstərilən yüksək diqqət və qayğıya görə Azərbaycan Prezidenti cənab İlham Əliyevə dərin minnətdarlıqlarını ifadə ediblər. Daha sonra yeni istifadəyə verilən evlərə baxış olub. Mənzillərdə müasir tələblərə uyğun yaşayış şəraiti yaradılıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 28 sentyabr.- S.15.