“Vətənparvərlik hissinin nə dərəcədə məhsuliyyətli

bir anlam olduğunu düzgün aşılamaq lazımdır”

Adil Kəimov: “Bu iş davamlı şəkildə aparılmalıdır”

Gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması tarixin bütün dövrlərində qarşıda duran mühüm vəzifələrdən olub. Düzdür, müəyyən zaman kəsimində bu işə bir qədər az və ya çox diqqət ayrılsa da, ancaq ümumilikdə vətənpərvərlik hissi hər zaman azərbaycanlılarda yüksək səviyyədə olub, gənclərə hər zaman bu hisslər aşılanıb.

Qeyd edilən istiqamətlərdə ən ciddi işlər isə Azərbaycan tarixində ikinci dəfə müstəqillik əldə etdikdən sonra daha sürətli xarakter aldı. Xüsusilə, ümummilli lider Heydər Əliyevin ikinci dəfə hakimiyyətə qayıdışından sonra gənclərlə iş, onların problemlərinin həlli, gənc nəslin milli mənəvi ruhda tərbiyəsi, onlara vətənpərvərlik hisslərinin aşılanması məsələlərinə daha çox diqqət ayrıldı. Qısa zamanda bu məqsədlə bir neçə dövlət proqramları hazırlandı, müvafiq sənədlər imzalandı. Heydər Əliyevin müvafiq sərəncamı ilə yaradılan Gənclər və İdman Nazirliyi isə bütün bu işlərin bir mərkəzdən, kordinasiya edilmiş şəkildə icrası üçün əlverişli şərait yaratdı. Ümummilli lider gənclərlə keçirdiyi bütün görüşlərdə onlara vətənə məhəbbət hissində böyüməyi, vətənpərvər olmağı tövsiyyə edirdi. Xüsusilə ordu quruculuğu məsələsinə diqqət çəkən Heydər Əliyev deyirdi: “Məlumdur ki, ordu gənclərdən ibarətdir. İndi ordunun 90 faizini gənclər təşkil edir. Gənclər təşkilatının, gənclərin ən əsas vəzifəsi hər bir gənci, hər bir Azərbaycan övladını orduya xidmətə hazırlamaqdan ibarət olmalıdır. Ordu mövzusu, ordunun yaranması, formalaşması bizim bütün həyatımızda əsas mövzulardan biri olmalıdır, gənclərin orduda xidmət etmək üçün tərbiyələndirilməsi bizim əsas vəzifələrimizdən biri olmalıdır və bu vəzifələri biz ardıcıl surətdə həyata keçirməliyik. Ona görə də mən bunu gənclər təşkilatlarının əsas vəzifəsi hesab edirəm. Hər bir Azərbaycan gəncinə isə gənclik vaxtına qədər özünü orduda xidmət etmək üçün hazırlamağı tövsiyə edirəm”.

Hazırda da gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılması məqsədilə istər dövlət, istərsə də qeyri-dövlət təşkilatları səviyyəsində uğurlu işlər görülür, müvafiq addımlar atılır. Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu, eləcə də Azərbaycan Gənclər Fondunun maliyyələşdirdiyi layihələr sırasında vətənpərvərlik mövzularına həsr edilmiş laihələr daha çox üstünlük təşkil edir. Heç şübhəsiz ki, istər gənclər və qeyri-hökumət təşkilatları, istərsə də kütləvi informasiya vasitələrinin həyata keçirdiyi həmin layihələr gənclərin milli mənlik şüurunun inkişaf etdirilməsi, onlarda vətənpərvərlik hisslərinin artırılmasına müsbət təkan verir.

Sevindirici hal ondan ibarətdir ki, həyata keçirilən bu və ya digər layihələr sırasında tarixi sərkərdələrimiz, milli qəhrəmanlarımız, qazilərimizin tanıdılması, onların təbliğ edilməsinə xüsusi önəm verilir. Çünki bu bir danılmaz faktdır ki, öz tarixi qəhrəmanlarını, sərkərdələrini tanımayan, onların nümayiş etdirdikləri qəhrəmanlıqlar barədə ətraflı məlumata malik olmayan gənc heç bir halda vətənpərvər ruhda böyüyə bilməz. Xüsusilə nəzərə alsaq ki, bu gün müharibə vəziyyətində yaşayırıq və torpaqlarımızın 20 faizə yaxını ermənilər tərəfindən işğala məruz qalıb, o halda biz daha çox vətənpərvər olmağa məcburuq. Bəs görəsən hazırda bu istiqamətdə daha hansı addımların atılmasına, işlərin görülməsinə ehtiyac var? Bu və ya digər məsələlərlə bağlı Qarabağ qazisi Adil Kərimovla söhbətləşdik.

-Adil müəllim, bu gün Azərbaycan gənci nə dərəcədə vətənpərvərdi?

-Vətənpərvərlik bir anlayış kimi bu gün çox səslənir və ona çox müraciət olunur. Bunun da əsas səbəbi ölkəmizin hələ də müharibə şəraitində olmasıdır. Bununla yanaşı unutmamalıyıq ki, hər birimiz hər zaman bir vətəndaş kimi vətən qarşısında məhsuliyyət daşıyırıq və bu tək torpaqların azad olunması istəyi ilə məhdudlaşmamalıdır. İlk növbədə hər birimiz öz gündəlik icra etdiyimiz işdə, bir-birimizə olan münasibətdə məhsuliyyətli olmalıyıq və çətin anlarda bir vətəndaş cəmiyyəti kimi həmrəylik göstərməliyik. Və gənclərə də məhz bunu doğru-dürüst çatdırmaq lazımdır. Başqa sözlə, vətənpərvərlik vətən uğrunda ölmək deyil, öncə vətən naminə yaşamaq deməkdir. Fikrimcə, bu istiqamətdə maarifləndirici tədbirlər daim görülməlidir. Gənclərimiz keyfiyyətli təhsil almalı, hərtərəfli savad və biliklər qazanmalıdır ki, dünya baxışları geniş və dolğun olsun. Bir sözlə, gənclərimizin kifayət qədər vətənpərvər ruhda böyüməsinə şübhəm yoxdur. Amma vətənparvərlik hissinin nə dərəcədə məhsuliyyətli bir anlam olduğunu düzgün aşılamaq lazımdır və bu iş davamlı şəkildə aparılmalıdır.

-Sizcə gənclərin milli mənlik şüurunun inkişaf etdirilməsi, onlarda vətənpərvərlik ruhunun artırılması üçün daha hansı tədbirlərin görülməsinə ehtiyac var?

-İlk növbədə keyfiyyətli təhsil çox əhəmiyyətlidir. Əgər biz bir müasir müstəqil cəmiyyət kimi formalaşmaq istəyiriksə, gənclərin düşüncə və şüurunu erkən yaşlardan formalaşdırmalıyıq və buna da yalnız orta məktəbdən və hətta məktəbəqədər müəssisələrdə təhsil və maarifləndirmə yolu ilə nail olmaq olar. Sonra isə artıq düzgün aparılan təbliğat xarakterli tədbirlərin görülməsi ilə bu şüuru istiqamətləndirmək lazımdır. Bunlara misal kimi, bizim ədiblərimizin, drammaturqlarımızın əsərləri əsasında və yaxud yeni tariximizə həsr olunmuş müasir filmlərin çəkilməsini göstərmək olardı. Və çox vacibdir ki, bu təbliğat vasitəsilə tək məğlubiyyətlərimizlər və faciəli tarixi hadisələr qabardılmamalıdır, kiçik də olsa uğur və qələbələrə həsr olunmuş əsərlər olmalıdır.

-Ölkədə fəaliyyət göstərən QHT-lər və gənclər təşkilatları vətənpərvərlik mövzusuna kifayət qədər diqqət ayırırlarmı?

-Mövcud olan bütün QHT-lərin və gənclər təşkilatlarının birmənalı şəkildə fəaliyyətini qiymətləndirmək zənnimcə düzgün olmazdı. Hər halda bu mövzunu diqqət mərkəzində saxlamaq lazımdır. Müxtəlif maraq dairələrindən olan gənclərlə ölkəmizin hər hansısa bir əlamətdar gününə və ya ictimai xadimin həyat və yaradıcılığına həsr olunmuş görüşlər keçirmək və bu görüşlərdə səmimi söhbətlər vasitəsilə gənclərimizə vətənə, ölkəyə sevginin və layiqli xidmətin nə olduğunu nümayiş etdirmək lazımdır. Lakin bununla yanaşı, əvvəlcə gənclərin problemləri ilə maraqlanıb, onlara həmin təşkilatların imkanları dairəsində çalışıb yardım göstərmək və onların rəğbətini qazanmaq çox vacibdir. Onu da qeyd edim ki, bu tək QHT-lərin öhdəsinə düşməməlidir. Sözsüz ki, ilk növbədə bu qayğı diqqət dövlət səviyyəsində göstərilməlidir və bir çox layihələr vasitəsilə bu iş həyata keçirilir. Gənc yaşlı insanların həyata olan münasibətləri çox həssas olur. Onlar hər hansısa bir çətinlik və ya həyat sınağı qarşısında aciz qalıb məyusluq hissi keçirə bilər və bunun da nəticəsi olaraq aqressiya, üsyançılıq kimi qeyri adekvat cavablar da verə bilərlər. Yaxud müxtəlif destruktiv elementlərin təsiri altına düşərək öz həyatlarını məhv edə bilərlər. Belə halların yaşanmasına yol verməmək üçün fəal sürətdə həm dövlət, həm QHT səviyyələrində gənclərlə sıx əlaqə saxlamaq, onların problemləri ilə məşğul olmaq lazımdır. Başqa sözlə gənclərin nəbzini duymaq lazımdır. Əgər onlar bu qayğını daim hiss etsələr, müzakirə etdiyimiz vətənpərvərlik mövzusunda da aparılan söhbətlər öz nəticəsini mütləq verəcəkdir və əminəm ki, verir.

-Bəs TV və radiolar, KİV-lər bu məsələyə nə dərəcədə həssas yanaşır?

-Açıq etiraf etməliyəm ki, bir iki veriliş istisna olmaqla televiziya və radio verilişlərimiz öz fəaliyyətlərini, yəni tərtib etdikləri verilişlər proqramlarını diqqətlə nəzərdən keçirib bir çox düzəlişlər etməlidirlər. Sözsüz ki, yaşadığımız bazar iqtisadiyyatı dövründə fəaliyyəti kommersiya xarakteri daşıyan özəl bir şirkətdən bunu tələb etmək çətin bir məsələdi. Lakin yenə də fikrimi bildirməyi özümə borc bilirəm. Məlumdur ki, TV və radio vasitələri müasir dövrümüzdə insanların şüur və düşüncələrinə ən güclü təsir edən amillərdən biridir və təəssüflər olsun ki, bizim TV kanallarımız nə müasir dünyanın inkişafı ilə ayaqlaşa bilir, nə də müvafiq olaraq gənclərimizin tələblərinə cavab verə bilirlər. Yenə də qayıdıram təhsil və maarifləndirmə işlərinin əhəmiyyətinə. Arzu edərdim ki, bizim televiziya və radio verilişləri bayağı əyləncə xarakterli yox, yenilik daşıyan məlumat xarakterli olsun. Yalnız bu şəraitdə vətənpərvərlik ruhunda da hazırlanmış verilişlər münbit yerə düşüb öz bəhrəsini verə biləcək.

-Ali Baş Komandanın müntəzəm olaraq cəbhə xəttinə səfər etməsi, hərbi təlimləri izləməsi gənclərin vətənpərvər ruhda tərbiyəsinə hansı müsbət təsiri göstərir?

-Sərhəd bölgələrində yaşayan soydaşlarımızın bu qayğı və diqqətə daha çox ehtiyacı var. Buna görə də Ali Baş Komandanın bu bölgələrə səfəri ilk növbədə gənclərə müsbət təsir edir. Onların dövlətə və dövlət başçısına rəğbət və inam hisslərinin daha da güclənməsinə imkan yaradır.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2016.- 8 yanvar.- S.15.