Duyğusal sətirlər

Şəfa NUR (Piriyeva Şəfa Söhbət qızı) 1991-ci ildə Masallı rayonunda anadan olub. İxtisasca tibb bacısıdır. Hal-hazırda Bakı Slavyan Universiteti Yaradıcılıq fakültəsinin tələbə -dinləyicisidir. İngilis, rus, ərəb, türk dillərini bilir. “Həyat”, “İnsanoğlu axtarışda”, “Bir Yudum Vicdan”, “Mərifət bucağı”, “Xoşbəxt və Bədbəxt damlalar” adlı şeir və esselərin müəllifidir. Şeir, esse, bayatılar yazır. “Gənc Ədiblər Məktəbi”nin, Dünya Gənc Türk Yazarlar Birliyinin üzvüdür. Azərbaycan Jurnalistlər Birliyi Sumqayıt şəhər təşkilatının elektron orqanları Gündəlik İnformasiya Agentliyinin və Azərbaycanın Mədəniyyət və Ədəbiyyat Portalının Baş redaktor müavinidir.

Zaman axıb gedir, mən qocalıram

Ruhumun yolundan aza bilmirəm,

Ürəyin dərdini yoza bilmirəm,

Duyğular süzülüb dolur içimə,

Heyf hər birini yaza bilmirəm.

Uzaqdan duyulur şeirin ətri,

Hecalar yazdırır gedən sətiri,

Kəsib doğrayıram itməsin məna,

Heyf sonda qalır sözün kəsiri.

Axşamdan səhərə qonaq oluram,

Yaşaya-yaşaya seyrə dalıram,

Hecaya bölünür beləcə ömrüm,

Zaman axıb gedir, mən qocalıram.

Bir ovuc ömür

Həyatdır…

Yaşayırıq…

Yalançı dünyanın doğru zamanında,

Tanrıdan aldığımız bir ovuc ömrün oğru zamanında,

Hərdən yolda qalır gözümüz…

Özümüzü tapana qədər…

Uşaq vaxtı o qədər yalanlara inanmışıq

Səhərdən axşama…

Axşamdan yatana qədər…

İndi daha doğru olan zamana da inanmaq istəmirik.

Gözümüz içinə qədər yalanı gətirib

Günahı zamanın çiyinlərində görmək istəyirik…

Və bəzən də bacarıqda.

Daha bilmirik ki,

Həyatdır..

Yaşayırıq…

Yalançı dünyanın doğru zamanında.

Tanrıdan aldığımız bir ovuc ömrün oğru zamanında…

Həyat

İndi vaxtın keçdiyindən

Xoşbəxtliyin damla-damla əriyib getdiyindən xəbərsizəm doğrusu..

Zaman səssizcə alıb aparar hər şeyi..

İşıqlı görünən dünya elə qaranlığın gözündən keçir.

Səssiz şütüyən zamanın içində surət

Damla-damla əridər ömür şamını…

Bu sənin qismətindir,

Bu sənin tale yolun…

Bu yolların bəziləri uzun, bəziləri qısadır..

Hər iki yolun bir adı var- HƏYAT !

Bəzən bir səhvin bütün doğrularını məhv etdiyi bir səhnədir həyat..

Elə səhnə demişkən, yenə orada bir neçə saatlıq roluna görə, müxtəlif personajlarda yaşaya bilirsən…

Ancaq həyat səhnəsində bir ömür rola girməlisən…

Həyat- yaşamadığımız bəlkələr, yaşadığımız kaşkilər, ürəyimizin ən dibində tutduğumuz nəisələrdən ibarət bəlkələrdir bəlkə də…

Həyat- bir nöqtənin qoyulduğu yerdən bir vergülün başlanğıc götürdüyü cümlələrdir bəlkə də…

Piyada kimi şahın əsarətində qaldığın bir şahmat oyunudur həyat!

Cavab bəndləri olan, lakin içində yalnız bir doğru bəndi olan test imtahanıdır həyat.

Ağlayaraq beşiyə qoyulub, gözüyumulu tabutda getdiyin ikimərtəbəli binanın 0–cı mərtəbəsidir Həyat…

Əlini karta uzatdığın andan ya bütün dünyanı dəyişdirdiyin, ya da bütün həyatını uduzduğun bir qumardır həyat…

Pulla dəyərə belə gəlməyən dostluq, azadlıq, düşüncə və sevgi kimi gözəlliklərdir həyat…

Kimsənin yardımına ehtiyacın olmadan yaşam dağına dırmanmaqdır əslində, həyat…

Qocalma surətimizin çox olduğu, ağılllanma surətinin az olduğu yaşam tunelidir həyat..

Təkcə yeni ildə deyil, bizə ilin istədiyimiz bütün günlərində yuxu, ümid və gülüş kimi hədiyyəsi olan bir “Qar adamı”dır Həyat…

Bizə rəngarəng xəyallarımızla yaşama eşqi verən bir “Göyqurşağı”dır Həyat…

Əslində, rolu əlimizdə olan yeganə “Yaşam nəqliyyatı”mızdır Həyat…

Bu sənin qismətindir,

Bu sənin tale yolundur..

Bu yoların bəziləri uzun,

Bəziləri qısadır…

Hər iki yolun yalnız bir adı var –HƏYAT !…

Olaylar.- 2016.- 26 yanvar.- S.12.