Azərbaycan-Türkiyə

Tükənməyən güc, qüvvət,

İki dövlət, bir millət.

Qazancı zəfər, şöhrət,

Layiqdir hər sevgiyə

Azərbaycan-Türkiyə.

Qara dəniz, göy Xəzər,

Odu ölkələr gəzər.

Atatürk, Ulu Heydər,

Haqdan bizə hədiyyə

Azərbaycan-Türkiyə.

Sarsılmazdır dostluğu,

Ən şirin, ən xoş duyğu,

Millətin mutluluğu,

Dönüb nəğmə, türküyə

Azərbaycan-Türkiyə.

Dünya olubdur heyran,

Qovuşub Bakı-Ceyhan.

Mayak kimi Naxçıvan,

Sevinir "vüsal" deyə

Azəbaycan-Türkiyə.

MUSTAFA KAMAL PAŞA

Qarlı zirvədir başın,

Dastandır hər savaşın,

Əsgərdir qayan, daşın,

Dayanıblar baş-başa

Mustafa Kamal Paşa.

Bayrağın şəhid qanı,

Vətənin qızıl danı,

Türklərin şöhrət, şanı,

Al günəşsən yurddaşa

Mustafa Kamal Paşa.

Yurda, xalqa bağlısan,

Həm zəka, həm ağılsan.

Türkə örnək, nağılsan,

Zəfərsən başdan-başa

Mustafa Kamal Paşa.

Cihaddır türk savaşı,

Çalınsın "mehtər" marşı,

Kəsin, doğrayın nəşi,

Əlində silah qoşa

Mustafa Kamal Paşa.

HƏSRƏT KÖRPÜSÜ

Həsrətin bağrı yarıldı,

Ümüddən körpü quruldu,

Zülmün zənciri qırıldı,

Salam türklər, salam türklər.

Ömür uca pilləkəndi,

Könlümüzə nur ələndi,

Göz yaşlarım gilələndi,

Salam türklər, salam türklər.

Boğduq düşmənin selini,

Qurduq dostluq heykəlini,

Kəsdik fələyin əlini,

Salam türklər, salam türklər.

Müqəddəsdir iki rəhbər,

Süleyman bəy, Ulu Heydər,

Qanlı döyüşdə müzəffər,

Salam türklər, salam türklər.

Alqışlayaq biz İlhami,

Türk elinin ehtişamı,

Qalxın söyləyin-Siz hamı:

Salam türklər, salam türklər.

Ağrı dağ

Ey türk torpağının qüdrət simvolu,

Varlığın düşməni əzir, ağrıdır.

Zirvəndən başlanır kəhkəşan yolu,

Yurdun qeyrətisən adın Ağrıdır.

Sıldırım qayalar nəhəngdən nəhəng,

İgid babaların başda börküdür.

Mərd oğlun, mərd qızın qəzəbli pələng,

Qartal avazları mahnı, türküdür.

Köksündə neçə min düyünlü sirr var,

Laçınlar, şahinlər qıyya çəkərlər.

Parlayan ulduzlar qəndil, çıraqlar,

Buludlar çiçəyi şehə bükərlər.

Haçadağ bir ömür qəmini çəkdi,

Külək gətirərdi sənə xəbəri.

Qardaşsız qəlbinə qaranlıq çökdü,

Səndən böyük idi onun kədəri.

Sənə qovuşalı bilmirəm nədən,

Türkün zəfərinə ellər əl çalır.

Sevincdən yatmıram gecə sübhəcən,

Zirvən ucaldıqca düşmən alçalır.

Ağrı, Haçadağa sarılıb deyə,

Dövranam, zamanı alqışlayıram.

Həsrət buxovları qırılıb deyə

Tarixin səhvini bağışlayıram.

Türküm deyənə

Daşın, torpağın ulu,

Tarixin zəfər dolu.

Yolun Oğuz, Hun yolu,

Türk adlı millətin var.

Təkbir, duan dilində,

Doğuldun at belində.

Akınların selində,

Danılmaz qüvvətin var.

Oxudun "Mehtər marşı",

Silkələdin dağ, daşı.

Qazandın hər savaşı,

Yenilməz qüdrətin var.

İnancın Quran, azan,

Həm qəhrəman, həm ozan.

Qılıncla tarix yazan,

Müqəddəs Hicrətin var.

Yaraşır hər təntənə,

"...Mutlü türküm deyəmə!"

Dövran valehdir sənə-

Dünyaca şöhrətin var.

Rahilə Dövran,

Şairə-jurnalist-publisist

Azərbaycan Yazıçılar Birliyinin üzvü,

"Qızıl qələm" media mükafatı laureatı,

Olaylar.- 2017.- 14 aprel.- S.11.