Bakı Atatürk Liseyinin 25 illiyi qeyd edildi

Közhan Yazqan: "Türk Dünyası Araşdırmalar Vəqfi Bakı Atatürk Liseyi mərhum Turan Yazqanın bizlərə əmanətidir"

Türk Dünyası Araşdırmalar Vəqfi Bakı Atatürk Liseyinin 25 illiyi, eləcə də məzun günü ilə əlaqədar tədbir keçirilib. Azərbaycan Dövlət Dram Teatrında baş tutan tədbirdə Türkiyənin Azərbaycandakı səfiri Erkan Özoral, millət vəkili Qənirə Paşayeva, Dünyası Araşdırmaları Vəqfinin başqanı Közhan Yazqan, TDAV-ın qurucusu Turan Yazqanın ailəsi, VHP sədri Sabir Rüstəmxanlı, keçmiş təhsil naziri Firudun Cəlilov, eləcə də təhsil ocağının müəllim və şagird heyəti iştirak edib. Azərbaycan və Türkiyənin dövlət himnlərinin səslənməsi ilə başlayan mərasimdə əvvəlcə Bakı Atatürk Liseyinin 25 illik fəaliyyətinə həsr olunmuş video çarx nümayiş olunub.

Mərasimdə çıxış edən Türkiyənin Azərbaycandakı səfiri Erkan Özoral Bakı Atatürk Liseyi ilə hər zaman fəxr etdiklərini vurğulayıb. Liseyin 25 illik fəaliyyəti dövründə bu təhsil ocağında millətini sevən, savadlı, qabiliyyətli, zəngin dünya görüşünə mənsub gənclərin yetişdiyini deyən səfir məzun gəncləri təbrik edib. Onların gələcək fəaliyyətləri ilə həm Azərbaycan, həm də Türkiyə dövləti üçün faydalı olacaqlarını bildirib. Millət vəkili Qənirə Paşayeva da Atatürk Liseyinin uğurlarından, onun türk milləti üçün dəyərli gənclər yetişdirdiyindən danışıb. Qeyd edib ki, Bakı Atatürk Liseyi hər zaman Mustafa Kamal Atatürkün "Azərbaycanın sevinci sevincimiz, kədəri kədərimizdir" və ümummilli lider Heydər Əliyevin "Bir millət, iki dövlət" prinsipini əsas götürərək əzmlə, uğurla fəaliyyət göstərib. Millət vəkili Liseyin bundan sonra da uğurlara imza atacağından əminliyini ifadə edib: "Bir millətin gələcəyi onun gənclərindən asılıdır. Bu səbəbdən Türk Dünyası Araşdırmalar Vəqfi Bakı Atatürk Liseyinin üzərinə böyük məsuliyyət düşür. Əminəm ki, onlar bu məsuliyyəti anlayır və layiqincə yerinə yetirirlər. Mən inanıram ki, Atatürk liseyi daha da böyüyəcək. Lisey daha çox parlaq gənclər yetişdirəcək. Türk dünyasının böyüməsini istəməyənlər çoxdur. Bununla mübarizə aparmaq üçün biz bir olmalıyıq. Mən bir daha məzun gənclərimizi təbrik edirəm. Allah hər zaman yolunuzu açıq eləsin. Uğurlarınız hər iki dövlətin başını uca etsin". Millət vəkili onu da diqqətə çatdırıb ki, mərhum Turan Yazqan səhhəti imkan verdiyi müddətə qədər hər il Bakı Atatürk Liseyinin məzun törəninə qatılar, bundan böyük bir sevinc hissi keçirərdi. Türk Dünyası Araşdırmalar Vəqfinin başqanı Közhan Yazqan çıxışında Atatürk Liseyinin Turan Yazqanın bizlərə əmanəti olduğunu vurğulayıb. Bildirib ki, Turan Yazqan Bakı Atatürk Liseyini göz bəbəyi hesab edirdi və bizlər də ona sahib çıxmalı, yaşatmalıyıq. Közhan Yazqan Turan Yazqanın əmanəti olan Bakı Atatürk Liseyinin yaşadılacağını və qarşıdakı illərdə neçə-neçə uğurlara imza atacağını deyib: "Türk Dünyası Araşdırmalar Vəqfi Bakı Atatürk Liseyi mərhum Turan Yazqanın bizlərə əmanətidir. Bizlər var olduqca bu əmanəti qoruyacaq, onu yaşadacağıq". Sonda Türk Dünyası Araşdırmalar Vəqfinin başqanı məzunları təbrik edərək onlara təhsil həyatında uğurlar arzulayıb. VHP sədri Sabir Rüstəmxanlı və sabiq təhsil naziri Firudin Cəlilov Turan Yazqanla olan dostluğundan danışıblar. Qeyd olunub ki, həmin dövrdə Bakıda belə bir təhsil ocağı açmaq o qədər də asan deyildi və müəyyən çətinliklərə baxmayaraq Turan Yazqan buna nail ola bildi. Çıxışlarda bildirilib ki, lisey həm Atatürkün liseyidir, həm də Turan Yazqanın. Çünki Turan Yazqan hər zaman Atatürk idealları ilə uşaqları yetişdirirdi. Valideynlər adından TDAV-a təşəkkür edən Oqtay Qasımov məktəbin yetişdirdiyi tələbələrin türk dünyasına böyük xidmət verəcəyinə əmin olduğunu bildirib. Tədbirin rəsmi hissəsindən sonra lisey məzunlarının ifasında bədii hissə keçirilib. Məzunlar maraqlı çıxışları ilə gecəyə rəng qatıblar. Məzunların hər çıxışı iştirakçılar tərəfindən maraqla qarşılanıb. Sonda Lisey adından Turan Yazqanın xanımına, həmçinin TDAV-ın təmsilçisi Səadət Pinar Yıldırıma plaket təqdim edilib. Eyni zamanda Türk Dünyası Araşdırmalar Vəqfi rəhbərliyi tərəfindən liseyin müəllimlərinə 25 illiklə bağlı hazırlanmış döş nişanı təqdim olunub, bir sıra müəllim heyətinə plaketlər verilib.

Süleyman

Olaylar.- 2017.- 6 iyun.- S.12.