Türkiyəli millət vəkili: “Xocalı Soyqırımı ilə bağlı Məclisimizdə qərar qəbul etməliyik”

"İlk öncə Xocalı qətliamında həyatını itirən bütün şəhidlərimizi rəhmətlə və minnətlə anıram. Körpə, uşaq demədən qardaşlarımızı, soydaşlarımızı qətl edən zalımları şiddətlə qınayıram. Şəhidlərimizi unutmadıq". Bu sözləri Türkiyənin AK Partiyasından olan millət vəkili Hasan Turan açıqlamasında bildirib. Türkiyəli millət vəkili törədilən cinayətin cəzasız qalmayacağını deyib:"Bir gün mütləq bu cinayətin cəzası sorulacaq. Biz bu yolda hər cür bədəli ödəsək də, əsla davamızdan, vətənimizdən və inanclarımızdan vaz keçməyəcəyik. Nə edirlərsə, etsinlər, istər ermənilər, istərsə də onların arxalarında dayanan güclər, biz iki dövlət, bir millət kimi hər zaman soydaşlarımzın, qardaşlarımızın dərdlərini öz dərdimiz, sıxıntılarını öz sıxıntımız, acılarını öz acımız olaraq görürük. Tarixdə uğradığımız zülmləri əsla unutmarıq. Unutmanın tora düşmək anlamında olduğunu bilirik. Bu səbəbdən təkrar zalimlərin toruna düşməmək üçün hər zaman bu cür olayları anmağa, xatırlamağa, şəhidlərimizin bizə buraxdığı əmanəti ən müqəddəs varlığımız olaraq görüb, yüksəkdə tutmağa davam edəcəyik. Beləliklə Xocalı qətliamı başda olmaqla, tarix boyunca Azərbaycan xalqı və türk millətinə yönələn, işlənən cinayətləri, törədilən qətliamları unutmadıq, unutmayacağıq".

Millət vəkili Türkiyən Böyük Millət Məclisində Xocalı Soyqırımı ilə bağlı qərar qəbul edilməsinin vacibliyini vurğulayıb: "Həm Xocalı qətliamı, həm də bunun şəxsində bizim millətimizə qarşı baş verən cinayətlərin dünyaya çatdırmaq baxımından bu tip qərarların alınmasının anlamlı olduğunu düşünürəm. Necə ki, keçmişdə millətimizə arxadan xəncər vurmaqla, bizə qarşı çalışırlarsa, bizlər də bu iddialarda bulunanların zülmlərini dünyaya çatdırmalı və Məclisimizdə qərar altına almalıyıq. Bir daha qeyd edim ki, Cümhur başqanımız başda olmaqla dövlət rəsmilərimiz, AK Parti və digər partiyaların rəhbərləri Xocalı Soyqırımını, bu zülmləri, cinayətləri şiddətlə qınayır, gündəmdə tutur və tutmağa da davam edəcəyik. Lakin bütün bunları dünyaya çatdırmaq üçün Məclisdə qərar qəbul edilməsinin gərəkliyini vurğulayır və şəxsən Türkiyə millət vəkili kimi öz adımdan hər zaman dəstəkləyirəm və bu haqda üzərimizə düşən nə lazımdırsa görəcəyik".

Olaylar.-2018.- 27 fevral.-S.2.