Dünyanın ən qabaqcıl təcrübəsi bu gün doğma Azərbaycanımızda tətbiq edilir

Nərgiz Çıraqova: "Ölkəmizdə artıq qeyri-neft sektoru inkişaf etdirilib"

Olaylar.az Yeni Azərbaycan Partiyası Suraxanı rayon təşkilatının Baş Məsləhətçisi Nərgiz Çıraqova ilə "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı" haqqında olan müsahibəni təqdim edir.

- Nərgiz xanım, bölgələrin sosial iqtisadi inkişafı ilə bağlı Prezidentin imzaladığı Dövlət Proqramı rayonların inkişafına necə təsir edir?

- Hər birimizin xatirindədir ki, 2003-cü ildə Prezident Seçkiləri ərəfəsində namizədliyi irəli sürülən cənab ilham Əliyev çıxışı zamanı Azərbaycan xalqına belə bir söz verdi: " Əgər Azərbaycan xalqı mənə etimad göstərərsə, ilk növbədə, Azərbaycan regionlarının problemləri ilə məşğul olacağam. Söz verirəm ki, Azərbaycan regionlarında sosial-iqtisadi inkişaf sürətlə gedəcək".

Bu gün hər birimiz cənab Prezidentin ölkəmizin və xüsusi ilə də qeyd etmək istərdim ki, regionların inkişafı ilə bağlı görülən işlərin şahidi oluruq. 20 il əvvələ səyahət etsək, bu günki qüdrətli və inkişaf etmiş Azərbaycanın hansı qərinələrə bərabər şərəfli yol keçdiyinin şahidi olarıq. Hamıya məlum olduğu kimi, bu gün Azərbaycan dünyada iqtisadi artım baxımından ən sürətlə inkişaf edən ölkədir. Sevindirici haldır ki, ölkəmizin beynəlxalq nüfuzu ilbəil daha da artır, ölkəmizdə aparılan siyasi-iqtisadi islahatlar dünya birliyi tərəfindən yüksək qiymətləndirilir. Təbii olaraq, son illər ölkəmizin əldə etdiyi uğurlar dövlətimizin daha da qüdrətlənməsinə və Azərbaycan xalqının rifah halının daha da yaxşılaşmasına xidmət edir. Bu gün ölkəmizdə qazanılan bütün uğurların əsas mənbəyi mövcud olan xalq və iqtidar birliyindədir. Ölkəmizdə bir çox dünya ölkələrindən fərqli olaraq, davam edən sabitlik və əmin-amalıq dövlətimizin ən başlıca uğuru kimi qiymətləndirilir. Sabitliyin davamlı hökm sürdüyü bir yerdə iqtisadiyyatında uğurla davam etməsi labüddür. Bu gün Azərbaycan iqtisadiyyatı həqiqətən də sözün əsl mənasında bir çox dünya ölkələri ilə müqayisədə inamla irəliləyir. Ölkəmizin imza atdığı bütün beynəlxalq əhəmiyyətli layihələr bu gün Azərbaycanın təkcə regionda deyil, həm də dünya ölkələri arasında da söz sahibi olmasına səbəb olur.

Cənab Prezident hər zaman çıxışlarında qeyd edir ki, Azərbaycanın hərtərəfli yüksəlişi elə olmalıdır ki, təkcə ölkəmizin paytaxtı yox, bütün şəhərlər, bütün rayonlar inkişaf etsin. 2004-cü ildən bu zamana qədər regionların sosial-iqtisadi inkişafı Dövlət Proqramının icrası nəticəsində biz bunun şahidi oluruq. Cənab Prezident İlham Əliyev təkcə paytaxt Bakıda deyil, həm də regionlarda da sosial-iqtisadi inkişafının artması yönümündə bir çox işlərə imza atır. Qeyd etmək yerinə düşərdi ki, regionların sosial-iqtisadi inkişafı Dövlət Proqramının icrası nəticəsində yüz minlərlə yeni iş yerləri, yeni müəssələr açılmışdır ki, buda insanların həyat səviyyəsinin yaxşılaşmasına və rifah halının yüksəlməsinə yönəlmişdir. Dövlət Proqramının icrası nəticəsində regionlarda işsizlik problemi, yoxsulluğun səviyyəsi ilbəil azalmağa doğru gedir. Bu gün qeyri-neft sektorunun yüksəlişini, regionların iqtisadi inkişafının şahidiyik. Regionlarımızda yeni infrastruktur layihələrin icrası, yeni elektrik stansiyalarının tikilməsi, yolların salınması, su və qazpaylayıcı sistemlərin quraşdırılması bu gün bölgələrdə davamlı artan inkişafın göstəricisidir.

- Dövlət proqramı sayəsində kənd təsərrüfatı sahəsində aparılan dəyişiklik və inkişaf haqqında fikirlərinizi bilmək maraqlı olardı.

- Cənab Prezidentin bir fikrini xatırlatmaq yerinə düşərdi: "Mən həmişə deyirəm, əgər hər bir kəndin problemi həll edilərsə, deməli, ölkədə bütün problemlər həll olunar". Son 14 il ərzində regionlarımızda aparılan yenidənqurma işləri, müxtəlifyönümlü layihələrin icrası ölkənin inkişafını kəndlinin inkişafı ilə bilavasitə bağlı olduğunu, kəndlinin maraqlarının hər zaman müdafiə edildiyini, onların üzləşdiyi bütün sosial yönümlü məsələlərin aradan qaldırılmasının vacibliyini ortaya qoyur. 2004-cü ildən start verilən regionların sosial-iqtisadi inkişafı Dövlət Proqramının nəticələrinin bu gün hər birimiz şahidi oluruq. Beləki, 14 il ərzində ölkəmizdə 30 elektrik stansiyası tikilmişdir. Bunun nəticəsi olaraq bu gün ölkəmiz elektrik enerjisini nəinki idxal etmir, hətta elektrik enerjisinin ixracına başlanılmışdır. Bu gün ölkəmizdə bütün şəhərlər qazla təmin edilib, yalnız bir neçə ucqar kəndlərimiz vardır ki, orada hələ də qazla bağlı problemlər var ki, bunun da həlli istiqamətində işlər görülməkdədir. Ümid edirik ki, yaxın zamanlarda ölkəmizdə bu məsələ bütünlüklə öz həllini tapacaqdır.

Regionlarımızda kənd təsərrüfatının inkişafında ən problemli məsələ su sisteminin olmaması və ya su ilə bağlı çətinliklərin yaranması idi. Son 14 il ərzində regionlarımızda kənd təsərrüfatının inkişaf etdirilməsində mühüm rol oynayan 4 su anbarı tikilib-istifadəyə verilmişdir. Bu özlüyündə tarixi hadisə kimi qeyd edilməlidir, belə ki, istifadəyə verilmiş kanallar vasitəsilə on minlərlə hektar əkin sahəsini suvarmaq mümkün olur. Bunlar bilavasitə kənd təsərrüfatının inkişafına müsbət təsir göstərəcək infrasturuktur layihələr hesab edilir.

- Bölgələrdə aparılan yenidənqurma işləri turizmin inkişafına hansı dəstəyi verdi?

Bu gün hər birimiz Odlar Yurdu Azərbaycanın vətəndaşı olmağımızla fəxr edirik. Bildiyimiz kimi son zamanlar ölkəmiz də dünyada elə bu adla "Land of fire Azərbaijan" adı ilə tanınır. Qədim tarixi keçmişi olan ölkəmiz özünəməxsus gözəl iqlimi, əsrarəngiz təbiəti, əlverişli coğrafi mövqeyi, təbii ehtiyyatları ilə zəngindir. Belə olan təqdirdə müstəqil Azərbaycanımız qüdrətli və zəngin bir dövlətə çevrilməklə yanaşı, hər sahənin inkişaf etdirilməsində maraqlıdır. Son zamanlar ölkəmizdə turizm sahəsi də inkişaf etdirilir. Bu sahənin inkişaf etdirilməsinə ayrılan vəsait bu gün öz nəticələri ilə göz qabağındadır. Son illər ölkəmizə gələn turist axınları bunun əyani sübutudur. Ölkəmiz hər sahə də uğurlara imza atdığı kimi turizm sahəsində də uğurlar qazanmağa nail olmuşdur. Turizmin inkişafı ilə bağlı atılan addımlar, xüsusilə də bölgələrimizdə hər bir şəraiti olan, dünya standartlarına cavab verə bilən yeni otellərin tikilib-istifadəyə verilməsi, yeni turizm mərkəzlərinin açılması Azərbaycanın zəngin turizm potensialı ölkənin inkişafına, xalqın rifah halının daha da yaxşılaşdırılmasına xidmət edir. Son illərin məhsulu olan Qusarda "Şahdağ" Qış-Yay Turizm Kompleksinin, Qəbələdə "Tufandağ" Dağ-Xizək Mərkəzinin yaradılması turizmin inkişafı üçün mövcud imkanlardan istifadə edildiyini bir daha sübuta yetirdi. Zəngin təbiəti olan ölkəmizdə regionlarda turizm təkcə istirahət nöqteyi nəzərdən deyil, həmdə sağlamlıq baxımından da inkişaf etdirilir. Beləki, son illər Naxçıvan, Naftalan, Lənkəran, Qax və digər regionlarımızda inşa edilmiş möhtəşəm otel kompleksləri bu regionları turizm və sağlamlıq mərkəzi kimi daha da cəlbedici etmişdir.

Regionlarımızda turizm sahəsinin inkişaf etdirilməsinə yaradılan şərait təkcə maddi baxımdan deyil, həm də əhalinin işsizlik probleminin həll edilməsində yardımçı olan sahə kimi hesab edilir. Yeni açılan Komplekslərdə işçi qüvvəsinin tələb edilməsi əhalinin bu işə olan marağının artmasına və bir növ işsizlik probleminin həll olunmasına köməklik göstərir.

- Nərgiz xanım, Azərbaycan iqtisadiyyatının bu inkişafı onu dünya ölkələrinə necə tanıdır?

- Azərbaycan yüksək sürətlə inkişaf edir. Bunu hər bir vətəndaş gündəlik həyat tərzində görür və inkişafı hamılıqla hiss edirik. Bu gün Azərbaycanımız hər sahə də inkişafa, tərəqqiyə nail olur. Bu gün bölgələrimiz inkişaf edir, bölgələrdə yaradılan yeni sənaye, təhsil ocaqları, səhiyyə müəssisələri, İdman Komplekslərinin inşasının və inkişafının şahidi oluruq. Ölkə də ilbəil artan iqtisadi inkişaf regionlarımızın inkişafına şərait yaradır. Prezident İlham Əliyevin çıxışı zamanı qeyd etdiyi kimi " Biz regionların sosial-iqtisadi inkişafının bütün istiqamətlərində istədiyimizə nail ola bilmişik. Bu gün regionların siması dəyişir, şəhərlərimiz öz qədim simasını saxlamaqla müasirləşir, gözəlləşir, abadlaşır. Bölgələr də iri infrasturuktur layihələri icra edilir, sosial obyektlərin tikintisi həyata keçirilir".

Dünyanın ən qabaqcıl təcrübəsi bu gün doğma Azərbaycanımızda tətbiq edilir, hər sahəyə uyğun texnalogiyalar ölkəmizə gətirilir, ölkəmiz müasirləşir, inkişaf edir. Hamıya məlum olduğu kimi, bir zamanlar ölkəmiz dünyada neft hasil edən ölkə kimi tanınırdı. Yalnız indi bu baryeri keçə bilmişik. Ölkəmizdə artıq qeyri-neft sektoru inkişaf etdirilib. Bu yolda səmərəli işlər icra edilib ki, buda iqtisadiyyatımızın daha da gücləndirilməsinə, insanların yaşayış səviyyəsinin qalxmasına, yoxsulluğun aradan qaldırılmasına yönələn addımlardır.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2018.- 28 noyabr.- S.15.