Multikulturalizmin uğurlu

və örnək Azərbaycan modeli

Son illər Azərbaycan Respublikasının Prezidenti, cənab İlham Əliyevin yürütdüyü istər daxili, istərsə də xarici siyasəti, respublikada baş verən iqtisadi yüksəliş, elmi-texniki tərəqqi, tolerantlıq haqqında nəinki ölkəmizdə, hətta xaricdə də ağızdolusu danışılır. Hətta bəzi ölkələr iqtisadiyyatın və xidmətin Azərbaycan modelinə istinad edirlər.

Bu günlərdə dövlət xidmətlərinin göstərilməsinin mütərəqqi mexanizminin yaradılmasına dair əməkdaşlıq haqqında Azərbaycan Respublikasının Prezidenti yanında vətəndaşlara Xidmət və Sosial İnnovasiyalar üzrə Dövlət Agentliyi ilə Monteneqronun Dövlət idarəçiliyi arasında anlaşma memorandumunun ölkə prezidenti tərəfindən təsdiq edilməsi haqqında verdiyi fərman deyilənlərə bir daha sübutdur.

Yaxın günlərdə ideya müəllifi Azərbaycan Respublikasının Prezidenti Administrasiyasının rəhbəri akademik Ramiz Mehdiyevin, məsləhətçi Azərbaycan Respublikası Prezidentinin ictimai-siyasi məsələlər üzrə köməkçisi - şöbə müdiri, tarix elmləri üzrə doktoru, professor Əli Həsənovun, tərtib edənləri Azərbaycan Respublikası Prezidenti Administrasiyasının millətlərarası münasibətlər, multikulturalizm və dini məsələlər şöbəsinin müdiri Etibar Nəcəfovun, Bakı Beynəlxaq Multikulturalizm Mərkəzinin sədri, Azərbaycan Dillər Universitetinin rektoru akademik Kamal Abdullayevin, Azərtacın baş redaktoru, siyasi elmlər üzrə fəlsəfə doktoru Cavid Bədəlovun, Bakı Beynəlxalq Multikulturalizm mərkəzinin şöbə müdiri Sərxanbəy Xuduyevin ərsəyə gətirdikləri "Azərbaycan Respublikasının Prezidenti İlham Əliyev Multikulturalizmin Azərbaycan modeli haqqında" seçilmiş fikirlər adlı üç dildə: Azərbaycan, rus, ingilis dillərində çapdan çıxmış kitab təqdirəlayiq olmaqla yanaşı, bu sahədə atılmış ən böyük addım və doğru təbliğatdır. Bu gün ölkəmiz haqqında anti-təbliğat aparanlar bu kitabdan bəhrələnməklə yanlış düşüncə xülyasından ayıla bilərlər. Kitabın üç dildə - Azərbaycan, rus, ingilis dillərində çap edilməsi onun xaricdə yayılması üçün ən böyük faktordur. Hər bir xaricə səfərə gedən vətəndaş həmin kitabı özü ilə aparıb getdiyi ölkədə təbliğ etsə, onda Azərbaycanın nə qədər tolerant, multikultural dəyərlərə qiymət verən ölkə olduğunu bir daha sübut etmiş olar.

Kitab geniş oxucu kütləsi üçün nəzərdə tutulmuş cənab prezidentin nitqlərindən, çıxışlarından, müsahibələrindən ibarətdir. Burada cənab prezident İlham Əliyevin 2003-cü ildən bəri müsahibə və çıxışlarında multikulturalizmin Azərbaycan modeli haqqında dəyərli fikirləri toplanmışdır.

Cənab prezidentin təşəbbüsü və bilavasitə rəhbərliyilə ölkəmizdə multikulturalizm, mədəniyyətlərarası və dinlərarası dialoqun inkişaf etdirilməsi sahəsində həyata keçirdiyi layihələrdən, bu sahədə həm ölkə daxilində, həm də beynəlxalq aləmdə əldə edilən nailiyytətlərdən bəhs olunur. Bir daha sübut olunur ki, Azərbaycan dünyanın aparıcı multikulturalizm mərkəzlərindən biridir.

Cənab prezident həmişə qeyd edib ki, "Leksikonumuzda nisbətən yeni söz olan multikulturalizm ənənələri Azərbaycanda əsrlər boyu həmişə mövcud olub. Sadəcə müxtəlif cür adlanıb, lakin mahiyyəti dəyişməyib". Azərbaycanın tarixini varaqlasaq görərik ki, onun ərazisində müxtəlif xalqların, etnik qrupların və dini sektanın nümayəndələri birgə əmin-amanlıq şəraitində yaşamışlar.

Azərbaycanın multikulturalizm siyasətinin əsasını ümummilli lider Heydər Əliyev qoymuşdur. Müasir dövrdə bu siyasət ulu öndərin layiqli davamçısı, cənab prezident İlham Əliyev tərəfindən uğurla davam etdirilir.

Qeyd etmək lazımdır ki, Bakı Beynəlxalq Multikulturalizm Mərkəzində və Azərbaycan Dillər Universitetində kitabın geniş miqyaslı təqdimatı keçirilib. Xüsusi olaraq vurğulamaq lazımdır ki, dövlətimizin başçısının kitabda yer almış bu fikirlərinin məcmusu bütövlükdə Azərbaycan multikulturalizmi haqqında tam təsəvvür formalaşdırmaqla yanaşı, həm də praktik əhəmiyyət daşıyır. Belə ki, universitetimizin xüsusilə Filologiya və Jurnalistika fakultəsinin tələbələri kitabın əldə olunmağında və onunla bağlı müxtəlif layihələrin həyata keçirilməsində xüsusi can-fəşanlıq göstərdilər. Tələbələrin marağını nəzərə alaraq, universitetimizdə fəaliyyət göstərən, Filologiya və Jurnalistika fakultəsinin III kurs tələbəsinin rəhbərlik etdiyi "Yazarlar klubunun" aktiv üzvlərinin kitaba münasibəti haqqında yazılı fikirlərindən ibarət divar qəzetinin hazırlanmasını nəzərdə tuturuq. Bundan başqa, qeyd etdiyimiz kitab fakultə üzrə tədris olunan "Multikulturalizm" dərslərində, o cümələdən IV kurs tələbələrinin müvafiq buraxılış işləri mövzularında istinad obyekti olaraq seçilib. Dil dərslərində, xüsusilə də, Azərbaycan, ingilis, rus dili dərslərində təhlil mətnlərinin kitabda qeyd olunan nitqlərdən seçilməsi nəzərdə tutulur. Bu, həm gələcəyimizin təmsilçisi olan tələbələrimizdə vətənpərvərlik ruhunun aşılanmasında, möhkəmləndirilməsində, həm multikultural dəyərlərin, tolerantlığın öyrənilməsində, xalqımızın milli-mənəvi dəyərlərinin, adət-ənənələrimizin qorunub saxlanılmasında mühüm rol oynayır. Bundan başqa, tələbələr bu kitabı təhlil etməklə tarixi idealogiyamızı, öz siyasətimizin dünya birliyinə inteqrasiyasını, iqtisadiyyatımızın inkişaf sferalarını, xalqımızın bəşəriyyətə verdiyi tövhələri, ümumbəşəri dəyərləri dərindən öyrənə bilərlər.

Doğurdan da, dünyada gedən müharibələri, tez-tez baş verən terror hadisələrini də nəzərə alsaq, görərik ki, hal-hazırda bizim ölkəmiz təhlükəsizlik, sabitlik və normal inkişafı təcəssüm etdirən bir ölkədir. Bu baxımdan da, bu kitabı ərsəyə gətirənlərə böyük təşəkkür edirik. Sağ olsunlar ki, ölkəmizin simasına maraqlı prizmadan yanaşaraq onun tolerant, milli dəyərlərə qiymət verən ölkə olduğunu bir daha sübut ediblər. Belə əsərlərin təbliği daim diqqət mərkəzində olmalıdır.

Azərbaycan Dillər Universitetinin Filologiya və Jurnalistika

fakultəsinin dekanı, filologiya üzrə fəlsəfə doktoru,dosent

Vüsalə Elxan qızı Ağabəyli

Olaylar.- 2018.- 26 yanvar.- S.10.