Heydər Əliyev – mənəvi dəyərlərimizə

böyük önəm verən dahi şəxsiyyət

Azərbaycan xalqı qədim tarixə, zəngin mədəniyyətə malikdir. Milli-mənəvi və dini dəyərlərimiz bu mədəniyyətin əsasını təşkil edir. Ümummilli Lider Heydər Əliyev bütün həyatı boyu xalqımızın bu tükənməz sərvətinin qorunmasına, dünyaya layiqincə çatdırılmasına böyük önəm verib. Ölkəmizdə bu sahədə görülən ardıcıl işlər, atılan mühüm addımlar anadan olmasının 96-cı ildönümünü qeyd etməyə hazırlaşdığımız Ulu Öndər Heydər Əliyevin adı ilə sıx bağlıdır.

Milli-mənəvi dəyərlərə bağlı insan

Milli dövlətçilik tariximizdə yeri və müstəsna rolu olan Ümummilli Lider Heydər Əliyev əsl Azərbaycanlı kimi müqəddəs dinimizə, mili köklərimizə bağlı bir insan idi. Doğulub boya-başa çatdığı ailədə də bu ruhda tərbiyə almışdı. Məhz buna görə də harada yaşamasından, hansı yüksək vəzifədə çalışmasından asılı olmayaraq xalqımıza məxsus milli-mənəvi dəyərlərin yaşadılmasına ciddi fikir verirdi. Təsadüfi deyil ki, zəngin həyat təcrübəsinə, siyasi idarəçilik bacarığına malik bu dahi şəxsiyyət çıxışlarının birində deyirdi: " Hər xalqın öz adət-ənənələri var, öz milli-mənəvi və dini dəyərləri var. Biz öz milli-mənəvi dəyərlərimizlə, öz dini dəyərlərimizlə fəxr edirik".

Xalqımızın israrlı tələbi ilə yenidən siyasi hakimiyyətə qayıdan Ulu Öndər digər sahələrə olduğu kimi, milli-mənəvi dəyərlərin qorunması və təbliği məsələlərinə də xüsusi diqqət ayırdı. Müstəqilliyini yenicə bərpa edən Azərbaycan Respublikasının Prezidenti seçilən Heydər Əliyev ilk görüşlərdən birini məhz Təzəpir məscidində dindarlarla keçirdi, sonuncu Peyğəmbərin (s) Mövludu münasibəti ilə təşkil olunan mərasimə qatılaraq dini dəyərlərimizə bağlı bir ölkə rəhbəri, təcrübəli dövlət xadimi və xalqının əsl oğlu olduğunu bir daha nümayiş etdirdi. Ümummilli Liderin Mövlud günü Təzəpir məscidinə ziyarəti zamanı xalqımızı Allah yolunda, müqəddəs İslam yolunda bir olmağa səsləməsi, milli-mənəvi dəyərlərimiz haqqında dəyərli fikirlər səsləndirməsi biz dindarlar üçün heç vaxt unudulmayacaq bir tövsiyə oldu.

Azərbaycan xalqı üçün misilsiz xidmətlər göstərən Ulu Öndər Heydər Əliyevin xeyirxah əməllərindən biri də müqəddəs məkanlardan sayılan Bibiheybət məscid-ziyarətgahının təmir-bərpa etdirməsi ilə bağlıdır. Məlum olduğu kimi, XIII əsrdə Şirvanşah II Fərruxzad tərəfindən inşa edilən məscidin ərazisində İmam Museyi-Kazımın (ə) qızı Xanım Həkimənin (ə) məzarı yerləşir. Ötən əsrin 20-ci illərində Azərbaycan bolşevik Rusiyasının işğalına məruz qaldıqdan sonra bir çox dini abidələrimiz Allahsız rejimin terroru ilə üzləşdi. İslam aləmi üçün mühüm dəyəri olan Bibiheybət məscid-ziyarətgahı da 1937-ci ildə sovet ideoloqlarının göstərişi ilə partladıldı. Bu tarixi dini abidə yalnız Heydər Əliyevin diqqət və qayğısı nəticəsində bərpa edildi və 12 iyul 1998-ci ildə Ulu Öndərin iştirakı ilə açılış mərasimi keçirilərək dindarlarımızın ixtiyarına verildi. Həmin gün təşkil edilən mərasimdə Ümummilli Lider bir daha bəyan etdi ki, onun rəhbərliyi altında Azərbaycan dövləti milli-mənəvi dəyərlərimizə daim diqqət və qayğı göstərəcək, ölkə ərazisindəki bütün dini-tarixi abidələr təmir-bərpa olunacaq: "Mən həyatda olmasam da siyasi davamçılarım bu işləri sona çatdıracaqlar".

Heydər Əliyev milli-mənəvi dəyərlərimizin təbliğinə də böyük önəm verirdi: "Dünya xalqlarını həm ölkəmizdə, həm də dünyada Azərbaycanın milli, mənəvi, dini dəyərlərinə hörmət etməyə çağıracağıq və buna nail olacağıq".

Ulu Öndərin ölkəmizə rəhbərlik etdiyi illərdə din-dövlət münasibətlərinin inkişaf mərhələsinin əsası qoyuldu, hər bir vətəndaşın dini etiqad və vicdan azadlığı təmin edildi, bununla bağlı qanunvericilik bazası yaradıldı, mütərəqqi qanunlar hazırlanıb qəbul olundu. Azərbaycanda dini etiqad azadlığı sahəsində vahid dövlət siyasətini formalaşdırmaq, din-dövlət münasibətlərinin tətbiqini və inkişafını təmin etmək məqsədi ilə dövlət komitəsinin yaradılması da Ulu Öndərimizin adı ilə bağlıdır. Məhz Ulu Öndərin 21 iyun 2001-ci il tarixli fərmanı ilə Azərbaycan Respublikasının Dini Qurumlarla İş üzrə Dövlət Komitəsi fəaliyyətə başladı.

Ulu Öndərin yolu uğurla davam edir

Xalqımızın Ümummilli Lideri Heydər Əliyevin Bibiheybət məscid-ziyarətgahının açılış mərasimində qeyd etdiyi kimi, başlanan müqəddəs missiyanın onun siyasi davamçıları böyük uğurla davam etməkdədir. Azərbaycan Respublikasının Prezidenti İlham Əliyev cənabları milli-mənəvi dəyərlərimizin qorunması, tarixi köklərə malik multikultural mühitimizin dünyada təbliği ilə bağlı mühüm addımlar atmaqdadır. Qədim məscid və ziyarətgahlarımız təmir-bərpa olunaraq yenidən qapılarını inanclı insanların üzünə açır. Son illər ölkəmizdə "Multikulturalizm İli", "İslam Həmrəyliyi İli" təntənə ilə qeyd olunub, paytaxtımız Bakı İslam Həmrəyliyi Oyunlarına ev sahibliyi edib. Dini Qurumlarla İş üzrə Dövlət Komitəsinin nəzdində Mənəvi Dəyərlərin Təbliği Fondu yaradılıb və din xadimlərimiz bu fond vasitəsi ilə maddi yardım alır.

Birinci vitse-prezidentimiz, Ulu Öndərin adını əbədiləşdirən Heydər Əliyev Fondunun prezidenti Mehriban xanım Əliyevanın bu sahədə gördüyü böyük işlər də təkcə dindarlarımız deyil, bütün xalqımız tərəfindən rəğbətlə qarşılanır.

Bu gün dünyanın müxtəlif ölkələrində Azərbaycandakı din-dövlət münasibətləri, multikultural mühit öyrənilir və ali məktəblərdə tədris olunur.

Ölkə başçımız, İlham Əliyev cənablarının dəfələrlə qeyd etdiyi kimi, dini sahədə və milli-mənəvi dəyərlərin qorunması sahəsində Azərbaycanda həyata keçirilən dövlət siyasəti zəngin tarixi köklərə və Ümummilli Lider Heydər Əliyevin əsasını qoyduğu prinsiplərə söykənir. Sivilizasiyalar arası və dinlərarası dialoqa töhfə verən ən nüfuzlu tədbirlər, sammitlər Bakıda təşkil edilir, dünyanı narahat edən aktual humanitar problemlər "Bakı prosesi" çərçivəsində müzakirəyə çıxarılır və mühüm çağırışlar səsləndirilir.

Prezidentin bu günlərdə imzaladığı Sərəncamla bu il noyabrın 14-15-də Azərbaycan paytaxtında "Dünya Dini Liderlərinin II Bakı Sammiti" keçiriləcək.

Bütün sahələrdə uğurlara imza atan Azərbaycan Ulu Öndərimiz Heydər Əliyevin milli-mənəvi dəyərlərimizin qorunması ilə bağlı həyata keçirdiyi nailiyyətləri davam etdirməkdədir. Ölkə Prezidenti İlham Əliyevin qeyd etdiyi kimi, bu Azərbaycan dövləti üçün prioritet məsələlərdən biridir: "Bizi xalq kimi qoruyub saxlayan milli-mənəvi dəyərlərimizdir, İslami dəyərlərimizdir, dilimizdir, ədəbiyyatımızdır. Əgər biz bundan sonra da ölkəmizin uğurlu inkişafını istəyiriksə, bu sahələrə mütləq diqqət göstərilməlidir".

Ölkəmizdə yaşayan hər bir dindar əmindir ki, Ulu Öndərin başladığı bu iş Prezident İlham Əliyevin yürütdüyü siyasət nəticəsində uğurla davam edəcək.

Rövşən Mustafayev

Gədəbəy şəhər "Cümə" məscidinin imamı,

"Cümə" məscidi dini icmasının sədri

Olaylar.- 2019.- 18-19 aprel.- S.6.