Masallı davamlı inkişaf yollarında

Regional proqramlar rayonun inkişafında mühüm rol oynayıb

Ölkə Prezidenti İlham Əliyev tərəfindən həiata keçirilən sosial-iqtisadi siyasət nəticəsində ölkəmiz ildən-ilə qüdrətlənir və inkişaf edir. Bu tərəqqini hər bir Azərbaycan vətəndaşı rifah halının yüksəlməsi, özünün sosial vəziyyətinin yaxşılaşması şəklində görür, yaşayır və hiss edir. Dövlət başçısı tərəfindən təsdiq edilmiş regional proqramların icrası nəticəsində bütün bölgələrdə geniş miqyaslı abadlıq və quruculuq işlərinin aparılır. İllərlə yığılıb qalmış problemlərin həll edilməsi, kəndlərimizin, şəhərlərimizin yenidən qurulması ölkəmizin sürətli inkişafına əyani sübutdur. Bu gün qətiyyətlə deyə bilərik ki, Azərbaycan regionun lider dövlətinə çevrilməklə bərabər, həm də beynəlxalq aləmdə güclü dövlət və etibarlı tərəfdaş kimi tanınmışdır.

Etiraf edilməlidir ki, bu naliyyətlərin əldə edilməsində Regionların sosial-iqtisadi inkişafı ilə bağlı Dövlət Proqramlarının xüsusi yeri var. Sözügedən regional proqramlar Masallı rayonunun inkişafına da təsirsiz ötüşməyib. Belə ki, ötən ilin əvvəlində rayonda qarşıya qoyulan bütün vəzifələr icra olunub, rayonun hərtərəfli dinamik inkişafı təmin edilib. Məlumat üçün qeyd edək ki, ötən ilin sonlarında rayona səfərindən dərhal sonra dövlət başçısı tərəfindən Masallı şəhərində abadlıq-quruculuq işlərinin davam etdirilməsi və 3230 hektar əkin sahəsinin suvarma suyu ilə təminatını yaxşılaşdırmaq məqsədilə 37 kiçik sututarda zəruri təmir-bərpa işlərinin aparılması üçün vəsait ayrılıb. Rayonda genişmiqyaslı tikinti-quruculuq işləri aparılıb və çoxsaylı inzibati idarə binası tikilərək istifadəyə verilib. Üç kənddə modul tipli məktəb binası quraşdırılıb, rayon Məhkəməsinin inzibati binasının inşası tamamlanmaq üzrədir. Viləş çayının hər iki sahilində müasir park-bulvar kompleksinin salınması uğurla davam edir. Artıq rayon üzrə 103 yaşayış məntəqəsindən 90-ı "mavi yanacaq"la təmin edilib, qalan 13 kəndə təbii qaz xəttinin çəkilməsi Dövlət Proqramına uyğun olaraq reallaşdırılır. Rayonun Boradigah qəsəbəsində uzun illər sakinləri narahat edən problemlər həll olunub. Qəsəbənin küçələrinə asfalt döşənib, 1 saylı tam orta məktəb, qəsəbə xəstəxanası əsaslı təmir edilib, Babaser məktəbinin yeni binası tikilib, bu kənddə yeni tibb məntəqəsi istifadəyə verilib. Qəsəbədə fəaliyyət göstərən xəstəxana 32 yaşayış məntəqəsinə xidmət edir. Burada 3000 metrlik suötürücü xətlər, Babaser kəndində 250 metrlik suötrücü kanal təmizlənib. Əvvəlki illərə nisbətən ərazidə əkinçiliyin müxtəlif sahələri inkişaf etməkdədir. Rayonda aqrar sahənin inkişafı üçün də mühüm işlər görülür. İstifadə olunmayan on hektarlarla torpaq sahəsində mövsümü əkinlər aparılır, baramaçılıq, tütünçülük, çəltikçilik və digər sahələr inkişaf etdirilir. Bədəlan kəndində heyvandarlıq və əkinçilik aparıcı sahələrdir. Son illərdə əkinçilikdə böyük dirçəlişə nail olunub. Qeyd edək ki, köhnə sovxoz təsərrüfatı sistemi ləğv olunduqdan sonra ilk dəfədir ki, bu qədər ərazidə torpaq sahəsi əkilir. Ötən il ərazidə xeyli noxud, lərgə, sarımsaq, kələm, buğda, arpa və sair bitkilər əkilib, onlarca sakin mövsümü iş yeri əldə edib və ailə büdcəsini artırıb. Sahibkarlar tərəfindən 130 imkansız ailəyə hazır məhsuldan pay göndərilib. Hazırda növbəti əkinlər üçün 190 hektar sahədə payız şumu vurulub və 140 hektar sahədə buğda, arpa, vələmir əkilib. 50 hektarda isə yazlıq bitkilərin əkilməsi nəzərdə tutulur. Prezident İlham Əliyevin müvafiq sərəncamı ilə ilk dəfə olaraq arı ailələrinin saxlanması üçün subsidiyaların verilməsi də kənd yerlərində rəğbətlə qarşılanmışdır. Artıq Bədəlan ərazisindən 200 arı ailəsi saxlayan 5 sahibkar hərəyə 2000 manat əlavə vəsait alıb. Baramaçılıq, çəltikçilik, çayçılıq və sitrusçuluq da inkişafdadır. Bədəlandakı uşaq-bağça kompleksində yaradılmış şərait və göstərilən xidmətin səviyyəsi kənd sakinlərini razı salır. Kənddə həkim məntəqəsi, kitabxana, klub, istirahət parkı və ağsaqqallar evi də fəaliyyət göstərir. Dəmirçilər kəndində yola asfalt döşənməsi, ara küçələrin işıqlandırılması, Çayqıraq kəndində mərasim zalının və mini-futbol meydançasının inşası, ərazidə olan 47 ədəd yararsız elektrik dirəyinin dəyişdirilməsi və Qarabağ şəhidlərinin xatirəsinə abidə ucaldılması təqdirəlayiqdir.

Regionların sosial iqtisadi inkişafı ilə bağlı dövlət proqramı cari ildə də icra olunmaqdadır. Belə ki, bu il rayonun Çaxırlı kəndində "Cənub" Qadın İnkişaf Qrupunun təndir evinin açılışı baş tutub. Məlumat üçün qeyd edək ki, Azərbaycanda kənd təsərrüfatı sahəsində məşğul əhalinin 55,8 %-ni qadınlar təşkil edir. Bu gün dövlətimiz tərəfindən bütün istehsal sahələri üzrə qadınların təşəbbüsləri dəstəklənir. 2018-ci ilin martından əsası qoyulan qadın qruplarının sayının indi 14 rayonda 28-ə çatıb və 335 qadını birləşdirib. Bu qruplardakı qadınların fəaliyyəti AMAL-ın (Aqrar Məşğulluğun Artırılması Layihəsinin) ideyasının yaranmasında xüsusi rol oynayıb. Qısa müddət ərzində, planlı şəkildə özlərinə 17 biznes qurmuş bu kənd qadınlarının nümunəsindən AMAL layihəsinə qoşulan gənclər faydalanacaq. Onu da bildirək ki, "Cənub" Qadın İnkişaf Qrupu 11 kənd qadınının bir araya gəlməsi ilə yaranıb. Qrup üzvlərinə Aqrar Kredit və İnkişaf Agentliyinin həyata keçirdiyi Kənd İnvestisiya Layihəsi çərçivəsində "Biznesin inkişafı və idarə edilməsi", "Qadın İnkişaf Qrupları üçün mikro müəssisənin təşkili və idarə edilməsi" və tibbi mövzularda təlimlər verilib. Hazırda qrup öz biznes müəssisəsini 4 təndir, 1 kürə və şirniyyat bişirmək üçün aldığı avadanlıqlarla genişləndirərək, cənub çörəyi, ləvəngi və cənub zonasına xas olan müxtəlif milli şirniyyatların hazırlanması və satışı ilə məşğuldur. Onların bişirdiyi çörək, ləvəngi və digər şirniyyatlar şadlıq saraylarına, marketlərə, məktəbə və kənd sakinlərinə satılır.

Regional proqramlar çərçivəsində rayonda modul tipli məktəblərin inşaası reallaşdırılıb. 13 fevral 2019-cu il tarixdə Masallı rayonunun Qarğalıq ərazisində şəhid Elşən Qarayev adına Xallıcalı kənd ümumi orta məktəbi üçün tikilmiş modul tipli məktəb binasının açılışı mərasimi olub. Bu münasibətlə keçirilən tədbiri giriş sözü ilə Masallı rayon Təhsil Şöbəsinin müdiri Tariyel Əkbərov açaraq qeyd edib ki, yeni məktəb tədrisin səviyyəsini daha da yüksəldəcək, dərs şəraitini xeyli yaxşılaşdıracaq. Kənd ağsaqqalı, şəhid atası Rəhman Qarayev və valideyn Nurəddin Əliyev həmkəndlilərini, müəllim və şagird kollektivini təbrik edib yeni məktəb binasına görə ölkə başçısına və onun xanımına dərin minnətdarlıq bildirib. Masallı Rayon İcra Hakimiyyətinin başçısı Rafil Hüseynov diqqətə çatdırıb ki, rayonda məktəb tikintisinə son illər xüsusi diqqət var. Xallıcalıda layihənin həyata keçirilməsi sevindirci haldır. Bundan əvvəl də rayonun bir neçə kəndində belə tədbirin reallaşğını açıqlayan sözçü hamının adından Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya və layihənin icraçıları olan inşaatçılara minnətdarlıq ünvanlayıb. Qeyd edək ki, 96 yerlik Xallıcalı kənd ümumi orta məktəbində 103 şagird təhsil alacaq. Məktəbdə 9 sinif otağı, direktor və müəllimlər otağı mövcuddur. Məktəb istilik sistemi, su xətləri və sanitar qovşaqları ilə təchiz olunub. Həmin gün rayonun Həsənli ərazisində Təkdam kənd ümumi orta məktəbi üçün tikilmiş modul tipli məktəb binasının açılışı mərasimi olub. Etiraf edilməlidir ki, belə layihələrin uğurlu həlli dövlət başçısının təhsilimizə daimi qayğısından, rayon rəhbərinin əhali ilə əməli vəhdətindən qaynaqlanır. Qeyd edək ki, regional proqramlar çərçivəsində rayonda məktəb tikintisinə xüsusi diqqət var. Son illərdə Masallıda 50 məktəb tikilib və ya əsaslı təmir olunub. Bu da Azərbaycan Respublikasının Prezidenti möhtərəm cənab İlham Əliyevin, Birinci vitse-prezident Mehriban xanım Əliyevanın ölkə təhsilinə, o cümlədən Masallıya olan qayğısından irəli gəlir. Təkdamda da layihənin həyata keçirilməsi sevindirci haldır. Xatırladaq ki, 80 yerlik Xallıcalı kənd ümumi orta məktəbində 74 şagird təhsil alacaq. Məktəbdə 9 sinif otağı, direktor və müəllimlər otağı mövcuddur. Məktəb istilik sistemi, su xətləri və sanitar qovşaqları ilə təchiz olunub.

Qeyd edək ki, rayonda mövcud olan icra nümayəndəlikləri bələdiyyələrlə qarşılıqlı fəaliyyət göstərirlər. Həmçinin iş adamları və xeyriyyəçilərlərin dəstəyi ilə ərazilərin abadlaşdırılmasına, sosial problemlərin həllinə nail olunur. Məhz bunun nəticəsidir ki, Xıl inzibati ərazi dairəsində ötən il 10 ailə özünə yeni ev tikib. Bu, əlbəttə, əhalinin sosial rifahının yaxşılaşması ilə əlaqədardır. Ərazidə 1 Milli qəhrəman ailəsi, 1 BVM-si veteranı, 1 Əfqanıstan müharibəsi iştirakçısı, 2 nəfər Çernobl iştirakçısı və 1 nəfər 1-ci qrup Çernobl əlili, 2 nəfər Qarabağ əlili yaşayır. Ərazi nümayəndəliyi bu ailələrlə müntəzəm əlaqələr saxlayır və onların qayğılarını həll etməyə çalışır. Kəndin mərkəzi yolunun suaparıcı kanalı olmadığı üçün 1 kilometrə yaxın kanal qazılıb və vətəndaşların darvazalarının qarşısına çuqun borular qoyulub ki, bu da payız-qış mövsümündə intensiv yağıntıların yarada biləcəyi çətinliyin qarşısının alınmasına xidmət edir. O cümlədən vətəndaşların pay torpaqlarının ətrafında olan suaparıcı kanallar Viləşçay Su İstismarı İdarəsinin köməkliyi ilə 5 min metrə qədər təmizlənib. Təzə Alvadı kəndində sağlamlıq mərkəzi fəaliyyət göstərir. Kənddə SİB kabelləşmə başa çatdırılıb, əraziyə 24 saat dayanıqlı enerji verilməsi təmin edilib. Ümumiyyətlə rayonda vətəndaş müraciətlərinə həssaslıqla yanaşılır. Dövlət qayğısı əhalinin kənd təsərrüfatı məhsulları istehsalına marağını artırıb. Əhaliyə dövlət vəsaiti hesabına verilən yardımlar vaxtında çatdırılır. Bunun nəticəsidir ki, ərazidə 260 hektar sahədə buğda, 470 hektarda vələmir, 185 hektarda kartof, 45 hektarda çiyələk, xeyli arpa, noxud, pomidor, xiyar, tütün və kələm əkilib. Bu il üçün əkin sahələri daha da genişləndirilib. Kəndlilər razılıqla qeyd edirlər ki, bölgələrdə vətəndaşlardan kənd təsərrüfatı məhsullarını tədarük edən Ərzaq Təhcizatı və Tədarükü ASC-lər yaradılıb və cənub regionunda belə bir mərkəz məhz Masallı rayonunda yerləşir. Ərazinin özəl obyektlərində 376 nəfərdən çox işçi çalışır. Burada məskunlaşmış 5 məcburi köçkün ailəsi də qayğı ilə əhatə olunub. Sadalanan faktlar deməyə əsas verir ki, regionların sosial-iqtisadi inkişagı ilə bağlı dövlət proqramları Masallı rayonunun inkişafında əhəmiyyətli rol oynayıb.

Olaylar.- 2019.- 16-18 fevral.- S.15.