Regional proqramlar cəbhə

bölgələrini inkişafına müsbət təsir edib

Azərbaycan Respublikasının Prezidenti cənab İlham Əliyevin rəhbərliyi ilə bu gün Azərbaycan dünyanın ən sürətlə inkişaf edən, yeniləşən, müasirləşən və demokratik dövlətinə çevrilib. Qazanılan uğurlar Azərbaycanın beynəlxalq aləmdə mövqeyini də əhəmiyyətli dərəcədə gücləndirib. Azərbaycan ötən il ərzində mövcud makroiqtisadi sabitlik, güclü iqtisadi potensial, ölkənin qlobal çağırışlara hazır olması, sistemli islahatlar, biznes və investisiya mühitinin yaxşılaşdırılması, sahibkarlığın inkişafı sayəsində iqtisadiyyatın bütün istiqamətlərində ciddi uğurlara imza atıb. Birmənalı şəkildə qeyd etmək olar ki, əldə edilən uğurlarda Regionların sosial-iqtisadi inkişafı ilə bağlı dövlət proqramları əhəmiyyətli rol oynayıb.

Azərbaycan Respublikasının Prezidenti İlham Əliyevin sədrliyi ilə keçirilən Nazirlər Kabinetinin 2018-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında və Regionların 2014-2018-ci illərdə sosial-iqtisadi inkişafı Dövlət Proqramının icrasının dördüncü ilinin yekunlarına həsr olunmuş konfransda bu barədə ətraflı danışılaraq qarşıda duran vəzifələr müəyyənləşdirilib.Yeri gəlmişkən qeyd edək ki, regional proqramlar cəbhə bölgələrinin də inkişafına müsbət təsir edib. Belə ki, cəbhə ətrafı rayonlarda inşaa edilən obyektlər, emal və istehsal müəssisələri sözügedən rayonların sosial iqtisadi inkişafının təmin olunmasında xüsusi əhəmiyyətə malik olub. Onu da bildirək ki, ayrı-ayrı dövlət orqanları cəbhə bölgələrinin inkişafında üzərlərinə düşən vəzifələri layiqincə icra ediblər. Hazırda cəbhə bölgəsində kənd təsərrüfatının inkişafı, sahibkarlığa dəstək, xüsusən yeni innfrastrukturun yaradılması diqqət mərkəzində saxlanır. Elə bu günlərdə Füzuli rayonunda fəaliyyətə başlayan "Kiçik və Orta Biznesin Dostu" ("KOB Dostu") xidməti də bu məqsdə xidmət edir. Məlumat üçün qeyd edək ki, İqtisadiyyat Nazirliyinin tabeliyində Kiçik və Orta Biznesin İnkişafı Agentliyinin "Kiçik və Orta Biznesin Dostu" ("KOB Dostu") artıq cəbhəyanı rayonlarda fəaliyyət göstərən sahibkarlara da xidmət göstərəcək. Belə ki, növbəti "KOB Dostu" martın 13-də Füzuli rayonunda fəaliyyətə başlayıb. Bu, Yuxarı Qarabağ iqtisadi rayonu üzrə ilk "KOB Dostu"dur və Füzuli rayonu ilə yanaşı, ətraf rayonlarda, o cümlədən Cəbrayıl rayonunun Cocuq Mərcanlı kəndində fəaliyyət göstərən sahibkarların da "KOB Dostu" xidmətlərindən faydalanmaq imkanı yaradır. Sözügedən "KOB Dostu" xidmətlərindən danışan iqtisadiyyat nazirinin müavini Sahib Məmmədov sahibkarlığın inkişafının Azərbaycan Respublikası Prezidentinin rəhbərliyi ilə həyata keçirilən sosial-iqtisadi siyasətin mühüm istiqamətlərindən olduğunu, özəl bölmənin inkişafı istiqamətində müxtəlif təbirlərin və islahatların aparıldığını vurğulayıb. Qeyd edib ki, kiçik və orta biznesin inkişafı sahibkarlığın mühüm istiqamətlərindəndir və Füzuli rayonunda fəaliyyətə başlayan KOB Dostu bu sahədə önəmli dəstək mexanizmlərindəndir. KOBİA-nın İdarə Heyətinin sədri Orxan Məmmədov qurumun fəaliyyəti və "KOB Dostu" mexanizmi barədə məlumat verərək vurğulayıb ki, cəbhəyanı rayonlarda sahibkarlığın inkişafına dəstək olmaq, rayonda yeni sahibkarlıq subyektlərinin yaranmasını təşviq etmək məqsədilə Füzuli rayonunda "KOB Dostu" fəliyyətə başlayıb. Bu sayca 13-cü "KOB Dostu"dur və şəbəkənin bütün ölkə ərazisini əhatə etməsi nəzərdə tutulur. "KOB Dostu" sahibkarlıq fəaliyyətinin bütün mərhələlərində KOB-lara dəstək olur, onların təşəbbüslərinin, potensial imkanlarının müəyyən edilməsi və reallaşdırılması, yeni KOB subyektlərinin yaradılması və inkişafı, eləcə də sahibkarların hüquqlarının müdafiəsi istiqamətində fəaliyyət göstərir. Füzuli Rayon İcra Hakimiyyətinin başçısı Alı Alıyev rayonda sahibkarlıq fəaliyyətinin genişləndirilməsi istiqamətində görülən işlər barədə məlumat verib, digər dövlət dəstəyi mexanizmləri kimi, "KOB Dostu"nun da rayonda sahibkarlığın inkişafında əhəmiyyətli olacağını qeyd edib.

Həmçinin İqtisadiyyat Nazirliyinin və Türkiyənin Azərbaycandakı Səfirliyinin birgə həyata keçirdiyi layihələr çərçivəsində Cəbrayıl rayonunun Cocuq Mərcanlı kəndində yaradılmış arıçılıq təsərrüfatlarında istehsal edilən məhsulların emalı və qablaşdırılması üçün mobil emalatxana, kənd məhsullarının satışı üçün mobil satış məntəqəsi də istifadəyə verilib. Bununla əlaqədar, Cocuq Mərcanlıda İqtisadiyyat Nazirliyinin, Türkiyənin Azərbaycandakı Səfirliyinin, Türk Əməkdaşlıq və Koordinasiya Agentliyinin (TİKA), Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ABAD" publik hüquqi şəxsin, Türkiyə və Azərbaycan İş Adamları və Sənayeçilər İctimai Birliyinin, sahibkarların və Cocuq Mərcanlı sakinlərinin iştirakı ilə tədbir keçirilib. Tədbirdə çıxış edən iqtisadiyyat nazirinin müavini Sahib Məmmədov Azərbaycan Respublikası Prezidentinin rəhbərliyi ilə ölkədə qeyri-neft sektorunun inkişafı və iqtisadiyyatın şaxələndirilməsi, biznes mühitinin davamlı olaraq yaxşılaşdırılması və sahibkarlığın inkişafının sürətləndirilməsi istiqamətində görülən işlər barədə məlumat verib, dövlət başçısının yeni həyat bəxş etdiyi Cəbrayıl rayonunun Cocuq Mərcanlı kəndində həyata keçirilən birgə layihələrin Azərbaycan-Türkiyə dostluğunun daha bir nümunəsi olduğunu qeyd edib. Azərbaycanda regionların inkişafına böyük diqqət və qayğı göstərildiyini vurğulayan Sahib Məmmədov birgə layihələrin Cocuq Mərcanlının sosial-iqtisadi inkişafında və sakinlərin məşğulluğunun təmin olunmasında əhəmiyyətini qeyd edib. Nazir müavini arıçılıq təsərrüfatlarında istehsal olunan məhsulun bu gün istifadəyə verilən bal emalı üzrə mobil emalatxanada emal olunaraq qablaşdırılacağını və "Cocuq Mərcanlı" brendi ilə satışa çıxarılacağını, məhsulların mobil satış məntəqəsində də satışının həyata keçiriləcəyini vurğulayıb. İqtisadiyyat Nazirliyinin tabeliyində Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov kiçik və orta sahibkarlığın inkişafı istiqamətində Agentliyin gördüyü işlərdən danışıb. Kiçik və Orta Biznesin İnkişafı Agentliyinin sifarişi ilə hazırlanmış və bu gün istifadəyə verilən bal emalı üzrə mobil emalatxananın Cocuq Mərcanlıdakı və yaxın kəndlərdəki arıçılıq təsərrüfatlarına xidmət göstərəcəyini və Cocuq Mərcanlıda fəaliyyət göstərən sahibkarların bundan sonra da dəstək xidmətləri ilə tam əhatə olunacağını bildirib. Türkiyənin Azərbaycandakı fövqəladə və səlahiyyətli səfiri Erkan Özoral, Türkiyə və Azərbaycan İş Adamları və Sənayeçilər İctimai Birliyinin İdarə Heyətinin sədri Hüseyn Büyükfırat Türkiyə-Azərbaycan əlaqələrinin uğurla inkişaf etdiyini, Cocuq Mərcanlıda birgə icra olunan layihələrin bölgədə kənd təsərrüfatının inkişafında əhəmiyyətini vurğulayıblar.

Regionların sosial iqtisadi inkişaf proqramları Ağdam rayonunda da uğrla icra edilməkdədir. Belə ki, rayonun Quzanlı qəsəbəsində və rayonun kəndlərində abadlıq-quruculuq işləri davam etdirilməkdədir. Hazırda Əfətli-Hacıturalı-Həsənxanlı avtomobil yolunun və İmamqulubəyli kəndində yeni tibb məntəqəsinin tikintisi başa çatdırılaraq istifadəyə verilib, Quzanlı qəsəbəsində ruhi əsəb dispanseri əsaslı təmir edilib. Mirzələr qış yatağı və Ergi adlanan ərazilərdə məcburi köçkünlərin məskunlaşdığı iki qəsəbəyə təbii qaz verilərək, rayonun qazlaşdırılması tam başa çatdırılıb. Quzanlı qəsəbəsi ərazisində 85 nömrəli tam orta məktəb üçün 96 şagird yerlik modul tipli bina quraşdırılıb. Boks və taekvando məktəbləri, polis şöbəsi, prokurorluq və elektrik şəbəkəsi üçün binaların tikintisi məqsədilə torpaq sahələri ayrılıb. Kolqışlaq-Mirəşəlli-Çıraqlı avtomobil yolunun tikintisinə başlanılıb. Hazırda Prezident İlham Əliyevin Sərəncamına uyğun olaraq, Birinci Yüzbaşılı kəndində yeni ümumtəhsil məktəbi binasının tikintisi, təmas xəttinə yaxın olan yaşayış məntəqələrində erməni silahlı birləşmələrinin iriçaplı silahlardan və artilleriya qurğularından intensiv atəşə məruz qoyması nəticəsində zərər dəymiş 121 evin bərpası davam etdirilir, əkin sahələrinin suvarma suyu ilə təminatının yaxşılaşdırılması üçün yeni subartezian quyuları qazılır. Rayonda "Ağdam Nəqliyyat" MMC-nin yaradılması və bütün yaşayış məntəqələrinə marşrut xətlərinin açılması sakinlərin razılığına səbəb olub. Nəticədə əhalinin kənd və qəsəbələrdən rayonun inzibati mərkəzi olan Quzanlı qəsəbəsinə, eləcə də ayrı-ayrı yaşayış məntəqələrinə gediş-gəlişi asanlaşıb, eyni zamanda, 48 nəfər işlə təmin olunub.

Rayonda aqrar sahədə görülən işlər səmərəli olub. Belə ki, 2018-ci ildə 14 min 55 hektar taxıl sahəsindən 44 min 655 ton buğda, 7505 ton arpa tədarük olunub. 98 min 469 ton tərəvəz, 5923 ton kartof, 20 min 204,5 ton şəkər çuğunduru, 5822,2 ton pambıq, 17,1 ton barama istehsal edilib. Rayonda heyvandarlığın, xüsusilə cins mal-qaranın inkişaf etdirilməsi məqsədilə 2851 baş heyvan süni yolla mayalandırılıb, 1581 baş sağlam bala alınıb. Yığıncaqda əhalinin təbii qaz, elektrik enerjisi, rabitə və digər xidmətlərlə təminatının yaxşılaşdırılması, təhsil, mədəniyyət, səhiyyə və digər sahələrdə görülən işlərdən də müsbət naliyyətlər əldə edilib. Konkret olaraq Üçoğlan kəndi-Səfərli qəsəbə, Ağcabədi rayonu Muğanlı kəndi-Ergi qəsəbə avtomobil yollarının yenidən qurulması, əhalinin içməli və suvarma suyuna olan tələbatının ödənilməsi üçün yeni subartezian quyularının qazılması və sənaye məhəlləsinin tikintisinə başlanılması qarşıda duran əsas vəzifələrdir. Xatırladaq ki, ötən il cənab Prezident Azərbaycanın bölgələrinə 24 səfər edib. Bu səfərlər zamanı ölkə başçısı həm yerlərdə görülən işlərə nəzarət edib, həm də yerlərdə vətəndaşlarla görüşərək onları narahat edən problemlərin həlli istiqamətində əlavə göstərişlər verib. Paralel olaraq cəbhəyanı rayonların sosial-iqtisadi vəziyyətinin yaxşılaşdırılması, o cümlədən infrastruktur layihələri ilə bağlı bir çox sərəncamlar imzalanıb. Şübhəsiz ki, həmin sənədlər cəbhə bölgəsinin inkişafına təkan verəcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2019.- 19 mart.- S.15.