Regional proqramlar

Samuxda uğurla icra edilir

Dünyada davam edən iqtisadi katakilizmlər fonunda Azərbaycan inkişaf, tərəqqi, sabitlik ölkəsi olaraq, öz müstəqil inkişaf yolu ilə uğurla irəli gedir. Məhz bu uğurun nəticəsidir ki, regionların üçüncü sosial-iqtisadi inkişafı Dövlət Proqramı uğurla başa çatıb, bölgələrdə infrastruktur layihələrinin icrası daha sürətlə həyata keçirilib, yüz minlərlə yeni iş yerləri, sənaye müəssisələri yaradılmış, kənd təsərrüfatında müsbət nəticələr əldə olunub.

Regionların sosial-iqtisadi inkişafı ilə bağlı dövlət proqramlarının icrası Samux rayonunun inkişafına səbəb olub. Sözügedən dövlət proqramlarının icrası nəticəsində Samux rayonunda da istehsal və xidmət sahələrinin genişləndirilməsi, sosial obyektlərin təmiri-tikintisi, abadlıq quruculuq işlərinin aparılması istiqamətində həyata keçirilən tədbirlər davam etdirilib, iqtisadiyyatın dinamik inkişafı təmin olunub. Ötən ildə respublikamızın ümumi inkişaf tempinə uyğun olaraq Samux rayonunun da iqtisadi göstəricilərində artım qeydə alınıb. Regionların sosial-iqtisadi inkişaf proqaramlarının icrası nəticəsibdə rayonda tikinti-quruculuq və abadlıq işləri daha da sürətləndirilib. Belə ki, "Azərbaycan Respublikasının şəhər və rayonlarında çoxmənzilli binaların dam örtüklərinin təmiri ilə bağlı əlavə tədbirlər haqqında" Azərbaycan Respublikası Prezidentinin Sərəncamına müvafiq olaraq Samux şəhərində Qarabağ müharibəsi əlilləri və şəhid ailələrinin yaşadığı 36 mənzilli 4 mərtəbəli çoxmənzilli yaşayış binasının dam örtüyü sökülərək yenidən qurulub. Eyni zamanda təmirə ehtiyacı olan 4 çoxmənzilli yaşayış binalarında təmir bərpa işləri aparılıb ki, onlardan 2 bina Cobanabdallı, 2-si isə İstixana kəndlərindədir. Çobanabdallı kəndində yataqxana tipli, ikimərtəbəli, bir bloklu, hər biri 16 mənzilli, ümumi sahəsi 2020 kv.m. olan iki binada və İstixana kəndində ikimərtəbəli, iki bloklu, hər biri 12 mənzilli, sahələri 1445 kv.m olan iki binada təmir bərpa işləri həyata keçirilmişdir. Binaların dam örtükləri yenilənib, bloklar təmir edilmiş, yeni qapı və pəncərələr quraşdırılıb. Beləliklə son üç ildə rayonda 81 coxmənzilli yaşayış binaları əsaslı təmir edilib. Həmçinin Burunqovaq kəndində inşa edilmiş modul tipli 80 şagird yerlik yeni məktəb binasının tikintisi başa çatdırılaraq istifadəyə verilib. Əhmədbəyli kəndində yeni əsaslı təmir edilmiş 80 yerlik körpələr-evi uşaq bağçasının istilik sistemi qurulub. Bundan başqa, Qarayeri qəsəbəsində ümumi sahəsi 1,5 hektar olan istirahət parkında təmir-bərpa işləri aparılaraq, sakinlərin istifadəsinə verilib. Parkın ətrafında 390 metr uzunluğunda hasarlama işləri aparılıb, gəzinti yollarının kənarına 450 p.metr bordür düzülüb, 500 kv.m üzlük daşları döşənib, hasarların üzərinə dekorativ barmaqlıqlar vurulub. Parkda 2 ədəd fəvvarə quraşdırılıb ki, onların hovuzlarının içərisinə 150 kv.metr mozayka vurulub, kənarları aqlay daşları ilə üzlənib. Əhalinin dincəlməsi üçün 2 ədəd istirahət köşkü quraşdırılıb. Parkın suvarma sistemi üçün 250 metr uzunluğunda 25 mm diametrli kapron boru ilə su xətti çəkilib. 1100 kv.metr rəngləmə işləri aparılıb. Dövlət proqramına uyğun olaraq rayon mərkəzinin Heydər Əliyev və Kolayır prospektlərində, Nəriman Nərimanov, Elçin Məmmədov, Arif Nəbiyev küçələrində, Kür yolunda aparılan yenidənqurma və bərpa işləri başa çatdırılıb. Yararsız bort daşları və tavalar sökülərək yenilənib, keyfiyyətsiz hasarlar yenidən hörülüb, suvanma və rəngləmə işləri həyata keçirilib. Heydər Əliyev prospektində və Arif Nəbiyev küçəsində hasarların "Aqlay" tava daşları ilə üzlənməsi və bərpa işləri aparılıb. Kolayır prospektində 54, Elçin Məmmədov küçəsində 27, Kür küçəsində 27, Nəriman Nərimanov küçəsində 8 ədəd olmaqla, ümumilikdə 116 ədəd, eyni zamanda Qarayeri qəsəbəsində 14 ədəd müasir işıqlandırıcı quraşdırılmış və abadlıq işləri həyata keçirilib. Şəhərin Heydər Əliyev prospektinin 300 metrlik hissəsi, Göygöl, Qalalı küçələrində əsaslı təmir işləri aparılmış və yeni asfalt örtüyü salınıb. Misginli küçəsində yenidən qurma işlərinə başlanıb, 6 ədəd dəmir boru ilə su keçidi quraşdırılıb, küçəyə balans verilərək hamarlanıb. İsmət Qayıbov küçəsində yerləşən Qarabağ müharibəsi əlilləri və şəhid ailələri üçün inşa edilib 8 mənzilli binanın ətrafında abadlıq işləri aparılmış və yeni asfalt örtüyü salınıb.

Regionların sosial-iqtisadi inkişafı ilə bağlı dövlət proqramının icrası nəticəsində rayonun uzunluğu 15,3 km olan İnstitut - Çobanabdallı - Lək - Sarıqaya və uzunluğu 12,7 km olan Yenikənd-Köbər-Qaraağaclı kəndlərarası avtomobil yollarında yenidənqurma və bərpa işlərinə başlanılıb. Həmin yollarda işlər əsasən başa çatdırılıb, yeni asfalt örtüyü salınıb. Yenikənd - Köbər -Qaraağaclı avtomobil yolu üzərindəki körpünün inşasına başlanıb. Körpü bir aşırımlı olmaqla uzunluğu 18 metr, eni 8,4 metr, hündürlüyü isə 4,5 metrdir. Texniki qurğuda avtomobillərin hərəkəti ilə yanaşı piyada zolağı da nəzərdə tutulub. Körpünün təyinatı Boz dağ silsiləsindən və Çeyrançöl ərazisindən yaz və payız aylarında gələn sel sularının Kür çayına axdılıb. Salahlı kəndində Qabırrı çayı üzərindəki körpüdə yaranmış qəza qısa müddət ərzində aradan qaldırılıb.Təkcə ötən ildə bütün istiqamətlərdə yolların çiyin hissələri avtoqreyderlə plana salınıb, torpaq yatağı maillikləri kol-kosdan təmizlənib. Gəncə - Samux, Samux - Lək, Samux - İnstitut, Qaraağaclı-Burunqovaq, Samux-Yenikənd-Poylu avtomobil yollarında və çiyin hissələrində təmir işləri aparılaraq, 156,9 min m2 sahəyə 26,3 min m3 həcmində çınqıl materialı və 20,8 min m2 sahəyə isə 3,2 min ton asfalt- beton işlədilmişdir. Qış mövsümünə hazırlıq məqsədi ilə avtomobil yollarının kənarında 300 kub metr qum, 10,5 ton texniki duz ehtiyatı yaradılıb.

Samuxda rayon iqtisadiyyatının inkişafında da mühüm rol oynayan sahibkarlığın inkişafına rayonda xüsusi diqqət verilir və təsadüfi deyildir ki, il ərzində 155 yeni sahibkarlıq subyekti fəaliyyətə başlayıb ki, onlardan da 30-u hüquqi şəxsdir. Hazırda rayonda 1930 sahibkarlıq subyekti fəaliyyət göstərir ki, onlardan da 78-i hüquqi şəxslərdir. Azərbaycan Respublikasının Prezidenti İlham Əliyevin ölkədə kənd təsərrüfatının inkişaf etdirilməsi, ərzaq təhlükəsizliyinin təmin edilməsi məqsədilə verdiyi müvafiq tapşırığa əsasən rayon ərazisində iri təsərrüfatların yaradılması istiqamətində işlər davam etdirilib. Hazırda rayonda "AQRO DAİRY" Məhdud Məsuliyyətli Cəmiyyət, "Boz dağ" heyvandarlıq kompleksi, "Ulduz 2011" MMC, "Qarabağ Region MKT" MMC , "Vest Milk" MMC, Murovdağ Kəndli fermer təsərrüfatı, Heyvandarlıq və Yemçilik müəssisəsi, "Region Aqro" MMC kimi iri sahibkar təsərrüfatları fəaliyyət göstərir. Eyni zamanda rayonda 200-ə yaxın müasir istixana fəaliyyət göstərir ki, onların da ümumi sahəsi 80,0 hektar təşkil edir. Bu istixanalarda il ərzində 8000 tondan çox faraş tərəvəz - pomidor, xiyar yetişdirilir. Bu məhsulların çox hissəsi MDB ölkələrinə ixrac olunur. 5000 ha ərazidə yaradılmış "AQRO DAİRY" Məhdud Məsuliyyətli Cəmiyyət 2018-ci ilin məhsulu üçün müəssisə tərəfindən 3000 ha sahədə əkilmiş buğda sahəsindən 10328 ton məhsul əldə olunmuşdur ki, məhsuldarlıq 39,2 sentner təşkil edir. Təkrar əkinlə 2662 payızlıq qarğıdalı əkilərək 9175 ton məhsul əldə edilib. "Region Agro" MMC tərəfindən 2018-ci ilin məhsulu üçün 262 ha buğda sahəsindən 1048 ton, (məhsuldarlıq 40,0 sent/ha), 336 ha arpa sahəsindən 1411 ton, (məhsuldarlıq 41,9 sent/ha) , 64 ha kartof sahəsindən 640 ton (məhsuldarlıq 100 sent/ha) məhsul yığılmışdır. 598 ha təkrar əkin aparılmışdır ki, buradan 2202 ton payızlıq qarğıdalı əldə edilib. Məlumat üçün qeyd edək ki, rayon üzrə istehsal olunan taxıl məhsulunun 35 faizi, qarğıdalının 95 faizi məhz bu təsərrüfatların payına düşür. Bu da iri təsərrüfatların nə qədər effektli olmasının göstəricisidir.

Regionların sosial-iqtisadi inkişaf proqramları çərçivəsində Azərbaycanda alternativ enerji mənbələrindən istifadəyə xüsusi diqqətin göstərilməsi, bu sahədə yeni və səmərəli layihələrin icrası ilə yadda qalır. Bu layihələrdən biri də Samux Aqroenerji Yaşayış Kompleksidir. Hazırda Aqroenerji Yaşayış Kompleksində birinci mərhələ üzrə işlər başa çatdırılıb, dövlət hesabına 3,8 MVt-lıq günəş - bioenerji elektrik stansiyası, 1,1 MVt-lıq istilik stansiyası, 10/0,4 kV-luq yarımstansiya quraşdırılıb. Həmçinin rezidentlərin iştirakı hesabına Aqroenerji Yaşayış Kompleksinin üçmərtəbəli inzibati binası, heyvandarlıq kompleksi inşa edilib, əkinçilik, bağçılıq, arıçılıq və istixana təsərrüfatları, maşın-mexanizm parkı yaradılıb. Bu layihə çərçivəsində Samux Aqroenerji Yaşayış Kompleksində "Azguntex" zavodunda hazırlanan meyvə quruducuları, soyuducu kameralar və səyyar rejimdə fəaliyyət göstərən günəş işıqlanması ilə təmin olunmuş turist çadırları, günəş əsaslı yol işıqlanma sistemləri tətbiq edilib. Ötən il ərzində Sahibkarlığa Kömək Milli Fondunun xətti ilə rayon sahibkarlarına 25 layihə üzrə 279,0 min manat güzəştli kredit verilmiş və bunun hesabına 26 yeni iş yeri yaradılıb. 2002-2017-ci illər ərzində Sahibkarlığa Kömək Milli Fondu tərəfindən rayon sahibkarlarına 740 layihə üzrə 29,0 milyon manat güzəştli kredit verilib ki, bu da öz növbəsində 1937 yeni iş yerinin açılmasına imkan verib. Azərbaycan Respublikasının Prezidenti cənab İlham Əliyevin respublikamızda kənd təsərrüfatının inkişaf etdirilməsinin daha da sürətləndirilməsi ilə bağlı tapşırıq və tövsiyələrinin, imzaladığı sərəncamlardan irəli gələn vəzifələrin icrasını təmin etmək məqsədi ilə, iqtisadiyyatının əsasını aqrar sektor təşkil edən Samux rayonunda cari ildə də sahələrdən yüksək məhsul əldə etmək üçün lazımi tədbirlər həyata keçirilib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2019.- 30 mart-5 aprel.- S.15.