Uğurlu diaspora fəaliyyəti, əldə edilən nəticələr və qarşıda duran hədəflər

Son illərdə əksər sahələrdə olduğu kimi diaspora sahəsində də müsbət tendensiya müşahidə edilir desək yanılmarıq. Xüsusilə qeyd etdiyimiz istiqamətdə müsbət dəyişikliklər bu sahəyə sorumlu olan dövlət qurumunda həyata keçirilən kadr islahatlarından sonra müşahidə edilir. Məlumat üçün qeyd edək ki Azərbaycan Respublikasının Prezidenti Cənab İlham Əliyevin sərəncamı ilə 2018-ci ilin aprel ayında Diasporla Iş üzrə Dövlət Komitəsinin rəhbərliyində dəyişiklik edildi və sabiq millət vəkili Fuad Muradov sözügedən Komitəyə rəhbər təyin olundu. Etiraf edək ki, o vaxt bir çoxları bu təyinatı heç də uğurlu hesab etmədi, buna ağız büzənlər də oldu. Təvazökarlıqdan uzaq olaraq açığını etiraf edim ki, jurnalist fəaliyyətimun mühüm bir hissəsini diaspora fəaliyyətində baş verən prosesləri işıqlandırmaq, onu çalışdığım media qurumu vasitəsilə cəmiyyətə çatdırmaq olduğundan mən özüm də yeni rəhbərliyin diasporaya bir yenilik, ən əsası canlanma gətirəcəyinə şübhə ilə yanaşırdım. Çünki cənab Fuad Muradovun diaspora sahəsinə yad bir kadr olduğu düşüncəsində idim. Ancaq.....

Diaspora həyatında yeni mərhələ

Ancaq sonradan, daha dəqiq desək Fuad Muradovun qısa bir müddət ərzində diaspora sahəsində atdığı uğurlu addımlar düşüncələrimdə yanıldığım qənaətini formalaşdırdı. Və haqlı olaraq belə bir qənaətə gəldim ki, Fuad Muradov nəinki millət vəkili, hətta bir vaxtlar ölkənin gənclər sektorunun əsas lokomotivi sayılan Gənclər Təşkilatları Milli Şurasına rəhbərlik edərkən diaspora işini mənimsəyib, bu sahənin incəlikləri, problemləri, həmin problemlərin həlli istiqamətində atılması vacib olan addımları zərgər dəqiqliyi ilə öyrənib. Ötən bir ildən artıq müddətdə Fuad Muradovun Diasporla İş üzrə Dövlət Komitəsinin rəhbəri kimi gördüyü uğurlu işlər, atdığı addımlara nəzər yetirdikdə belə qənaətə gəlmək mümkündür Hətta bir qədər də irəli gedib ötən müddət ərzində görülən işləri diaspora həyatında baş verən yeni mərhələ kimi də dəyərləndirmək olar. Bəs ötən bir ildən artıq müddət ərzində diaspora sahəsində hansı müsbət tendensiyalar baş verdi?

17 illik fəaliyyət tarixinin uğurlu addımı

Bu zaman kəsimində atılan addımlar, görülən bütün işləri bir kənara qoysaq, təkcə Ukraynada diaspor təşkilatlarının birləşməsi, uzun illər parçalanmış vəziyyətdə olan diasporumuzun bir mərkəzdə cəmləşməsi istiqamətində atılmış tarixi addımı qeyd etmək kifayət edər ki, yeni Komitə rəhbərliyinin ötən müddətdəki fəaliyyətinə müsbət qiymət verək. Məlumat üçün qeyd edək ki, nə qədər acı da olsa əvvəlki rəhbərlik Ukraynada diasporumuzun birləşməsi, güc mərkəzinə çevrilməsində maraqlı deyildi. Hətta bəzi hallarda Komitənin bilərəkdən və ya bilməyərəkdən atdığı addımlar sözügedən ölkədə təşkilatlar arasında ziddiyyət, fikir ayrılıqlarını daha da genişləndirirdi. Lakin Diasporla Iş üzrə Dövlət Komitəsinin yeni rəhbərliyi vəzifəsinin icrasına başladığı ilk gündən əsas diqqəti bu sahədə mövcud olan problemi aradan qaldırmağa, Ukraynadakı soydaşlarımız arasında birlik və bərabərliyi təmin etməyə yönəltdi Etiraf edək ki, görülən işlər də öz müsbət nəticəsini verdi və Ukraynadakı diaspor təşkilatları arasında ziddiyyət, fikir ayrılıqları aradan qalxdı. Mənim qənaətimcə, Ukraynada əldə edilən bu nailiyyət müstəqillik illərində Azərbaycanın diaspor sahəsində atmış olduğu ən uğurlu addım və nailiyyət oldu. Hətta mən Ukraynada əldə edilən nailiyyəti Diasporla İş üzrə Dövlət Komitəsinin 17 illik tarixinin ən uğurlu addımlarından biri kimi xarakterizə edərdim.

Erməni təbliğat maşınına vurulan zərbə

Diasporla Iş üzrə Dövlət Komitəsinin yeni rəhbərliyinin bu sahədə atdığı daha bir uğurlu addım dünyanın müxtəlif ölkələrində fəaliyyət göstərən Azərbaycan diaspor təşkilatlarının Koordinasiya Şuraları tərkibində birləşdirilməsi oldu. Ayrı-ayrı təşkilatların müstəqilliyinə toxunmadan onların Koordinasiya Şuralarında birləşdirilməsi ümumi işin xeyrinə xidmət edən, həmçinin milli maraqlarla bağlı məsələ gündəmə gələndə səsimizin daha gur çıxmasına hesablanmış addım idi Və ötən müddət ərzində müşahidə etdiyimiz mənzərə ondan ibarətdir ki, Ukraynada olduğu kimi, ayrı-ayrı ölkələrdə Koordinasiya Şuralarının yaradılması prosesi də uğurla nəticələndi və hazırda da bu müsbət tendensiya davam etməkdədir

Günümüzdə erməni lobbisi və Ermənistan dövlətinin maksimum imkanlardan istifadə edərək Azərbaycana qarşı informasiya mübarizəsi apardığının fərqindəyik. Və onu da müşahidə edirik ki, Avropadakı uğurlu fəaliyyətlərimizdən sonra erməni lobbisi əsas diqqəti Rusiya Federasiyasına və İsrailə yönəldib. Zaman-zaman adlarını qeyd etdiyimiz ölkələrdə hansısa üçüncü qüvvələrin Azərbaycana qarşı təxribatçı addımlar atmasına nail olurlar. Bu mənada Diasporla Iş üzrə Dövlət Komitəsinin rəhbərliyinin bu günlərdə İsrail dövlətinə həyata keçirdiyi səfərə diqqət çəkməmək mümkün deyil. Rəsmi məlumatlardan da bildiyimiz kimi Komitə sədri Fuad Muradovun rəhbərlik etdiyi nümayəndə heyəti bu ölkədə bir neçə vacib görüşlər keçirib, müzakirələr aparıb Keçirilən görüşlər və əldə edilən razılaşmaları bir kənara qoyaraq deyə bilərik ki, Diasporla Iş üzrə Dövlət Komitəsinin rəhbərliyinin Israil dövlətinə səfəri həm də erməni təbliğat maşınına vurulan zərbə idi.

Qarşıdakı hədəflər

Qarşıdakı hədəflər isə daha böyük və bir qədər də vaxt tələb edəndir. Diasporla İş üzrə Dövlət Komitəsinin rəhbərliyinin açıqlamalarından aydın olur ki, növbəti hədəf Rusiyadakı Azərbaycan diaspor təşkilatları ilə işin qurulmasıdır. Əslində şimal qonşumuzda fəaliyyət göstərən ayrı-ayrı diaspor təşkilatları ilə Komitə yaxından əməkdaşlıq edir. Sadəcə Ukraynada olduğu kimi Rusiya Federasiyasında da bu sahədə mövcud olan əsas problemlərdən biri diaspor təşkilatları arasında vahid mövqe, birlik və bərabərliyin olmamasıdır. Bir sıra hallarda bir təşkilat digər təşkilata qarşı antitəbliğat, onu gözdən salmaq kimi hərəkətlərə yol verir ki, bu da ümumi işə əngəl olur. Təbii ki, belə bir vəziyyət isə şimal qonşumuzda fəaliyyət göstərən erməni lobbisinə ölkəmizə qarşı Rusiyada daha geniş spektrdə mübarizə aparmasına imkan yaradır. Ona görə də Dövlət Komitəsinin rəhbərliyinin Rusiya istiqamətinə ciddi diqqət ayırması başadüşüləndir və zamanında atılan addımdır. Bildiyim qədər yaxın vaxtlarda Komitə rəhbərliyinin Rusiya Federasiyasına səfər edərək burada fəaliyyət göstərən Azərbaycan diaspor təşkilatları ilə görüşlər keçirəcəyi nəzərdə tutulur. Ümid etmək olar ki, Ukraynada bu prosesi uğurla başa vuran Diasporla İş üzrə Dövlət Komitəsinin rəhbərliyi eyni nəticəni Rusiya Federasiyasında da əldə edəcək və nəhayət, şimal qonşumuzda fəaliyyət göstərən Azərbaycan diaspor təşkilatları da birlik, bərabərlik şəraitində fəaliyyət göstərəcəklər.

Süleyman İsmayılbəyli

Olaylar.- 2019.- 28-29 noyabr. S. 10.