Bu gün Azərbaycan dünyada uğurlu

inkişaf yolu ilə gedən bir ölkə kimi tanınır

Nailə İsmayılova: "Azərbaycanın qeyri-neft sektorunun inkişafında əsas prioritet sahələrdən biri də kənd təsərrüfatıdır"

"Azərbaycanın hər bir bölgəsinin sürətli inkişafı dövlətin iqtisadi siyasətində müsbət rol oynayan mühüm amillərdəndir. Dövlət proqramına uyğun olaraq regionların sosial-iqtisadi cəhətdən davamlı inkişafının əsas göstəricisi cənab prezidentin bölgələrə müntəzəm səfərlər etməsi olub. Bu səfərlər zamanı cənab prezident özünün dəyərli tapşırıq və tövsiyyələrini verib. Təbii ki, bu səfərlər regionlarda dövlət proqramı çərçivəsində tikilib istifadəyə verilən dövlət əhəmiyyətli yeni obyektlərin açılışı ilə əlaqədar olub. Cənab İlham Əliyevin prezidentliyi dövründə həyat keçirilən hər üç dövlət proqramı (2004-2008, 2009-2013, 2014-2018) məhz regionların sosial-iqtisadi cəhətdən sürətli inkişafı üçün nəzərdə tutulmuşdur və uğurla da həyat keçirilmişdir. Artıq sonuncu proqram da yekunlaşmaqdadır."

Bu haqda Olaylar.az -a "Yeni Həyat" Humanitar və Sosial Dayaq İctimai Birliyinin sədri Nailə İsmayılova məlumat verib.

Nailə İsmayılova qeyd edir ki, Azərbaycan Respublikası regionlarının sosial-iqtisadi inkişafı üzrə birinci Dövlət Proqramının (2004-2008-ci illər) icrasının yekunlarının mütəxəssislər tərəfindən təhlili göstərir ki, beş il ərzində Ümumi Daxili Məhsulun (ÜDM) real həcmi 2,6 dəfə artaraq 38 milyard manata çatmış, ÜDM-in adambaşına düşən nominal həcmi 5 dəfə artaraq 4440 manat təşkil etmişdir: "Qeyri-neft sektoru 1,8 dəfə artmış, 2008-ci ilin yekunlarına görə ÜDM-də qeyri-dövlət sektorunun payı 84,5 faiz təşkil etmişdir. Ölkə sənayesində 2,5 dəfə, kənd təsərrüfatında isə 25,2 faiz artım olmuşdur. 2003-cü illə müqayisədə 2008-ci ildə əhalinin gəlirləri 4 dəfə artmış, yoxsulluq səviyyəsi 13,2 faizədək azalmışdır. Bu dövrdə muzdla işləyənlərin orta aylıq əmək haqqı 3,5 dəfə artaraq inflyasiya səviyyəsini 1,7 dəfə üstələmiş və 268 manata çatmışdır. Sahibkarlıq fəaliyyətinin dəstəklənməsi məqsədilə Azərbaycan Respublikasının Sahibkarlığa Kömək Milli Fondunun vəsaitləri hesabına ölkədə sahibkarlıq subyektinə kredit verilmiş və çoxlu sayda yeni iş yerləri açılmışdır. Beləliklə, 2004-2008-ci illər ərzində ölkəmizdə 766 mindən çox yeni, o cümlədən 547,5 min daimi iş yeri açılmış, 27,5 mindən çox yeni müəssisə yaradılmışdır.

Vətəndaş olaraq hər birimiz ölkə iqtisadiyyatının yeni inkişafı dövrünün, yəni 2004-2008-ci illərdə dövlət investisiyalarının həcminin artmasının, regionlarda infrastrukturun, sosial xidmət obyektlərinin tikintisinin bir neçə dəfə artmasının və digər xidmət sektorlarında keyfiyyətli yüksəlişin şahidi olmuşuq. Belə ki, yaşanmış 5 il ərzində 9 elektrik stansiyası tikilib istifadəyə verilmişdir, Naxçıvan Muxtar Respublikasına təbii qazın verilməsi 13 illik fasilədən sonra bərpa olunmuş, eyni zamanda bir çox rayonlar ilk dəfə olaraq təbii qazla təmin edilmişdir. Oğuz-Qəbələ-Bakı su kəmərinin tikintisi, Gəncə, Şəki, Ağdaş və Göyçay şəhərlərinin, habelə ölkədəki kiçik şəhərlərin su təchizatı və kanalizasiya sistemlərinin yenidən qurulması ilə bağlı işlərə başlanılması, regionlarda 1000 km-dən çox magistral yol çəkilişi və ya əsaslı təmir edilməsi, 600 km respublika əhəmiyyətli və 2700 km yerli əhəmiyyətli yollarda təmir işləri aparılması, 69 yeni körpü tikilişi, 34 körpünün təmiri dövlət proqramı çərçivəsində görülən işlərin əsas hissəsini təşkil edir. Eyni zamanda müxtəlif bölgələrdə (Naxçıvan, Gəncə, Lənkəran və Zaqatala) müasir standartlara uyğun tikilərək istifadəyə verilən yeni hava limanları, metro nəqliyyatı sahəsində Bakıda "Nəsimi" stansiyası inşa olunmuş, "İçərişəhər" və "28 may" stansiyaları yenidən qurulması ölkənin strateji öbyektləri sərasındadır. Dövlət Proqramı çərçivəsində regionlarda əlillər və şəhid ailələri üçüntikilən yaşayış binaları, əlillər üçün bərpa mərkəzlərinin inşa sı, səhiyyə sahəsində yeni müasir müalicə-diaqnostika mərkəzləri fəaliyyətə başlaması xalqın xidmətinə verilmişdir. Ölkənin regionlarında 18 müasir olimpiya kompleksi tikilmişdir."

"Yeni Həyat" Humanitar və Dosial Dayaq İctimai Birliyinin sədri bildirir ki, keçən əsrin 90-cı illərində ulu öndərimiz Heydər Əliyevin təşəbbüsü ilə həyata keçirilmiş aqrar islahatların aparılması oilə bağlı torpaqlar xüsusi mülkiyyətə verilmişdir və beləliklə ölkədə fermer təsərrüfatları yaradılaraq kənddə yeni iqtisadi münasibətlərin təməli qoyulmuşdur.

"Azərbaycanın qeyri-neft sektorunun inkişafında əsas prioritet sahələrdən biri də kənd təsərrüfatının inkişafıdır. Bu sahə üzrə aparılan ardıcıl islahatlar və yeni texnologiyaların cəlb edilməsi davam etməkdədir. 12 yanvar 2015-ci ildə Prezident İlham Əliyev Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, kənd təsərrüfatının inkişafına yeni təkan vermək və onun modernləşdirilməsini sürətləndirmək, aqrar sektorda mövcud problemlərin həllinə sistemli və kompleks yanaşmanı təmin etmək, bu sahəyə dövlətin inzibati və maliyyə resurslarını səmərəli şəkildə cəlb etmək, ölkəmizin aqrar potensialını geniş təbliğ etmək məqsədi ilə 2015-ci ili Azərbaycan Respublikasında "Kənd təsərrüfatı ili" elan etmişdir. Məhz dövlətin kənd təsərrüfatına ayırdığı diqqət və qayğıdan irəli gələrək fermerlərin birləşməsi və kooperativlərin yaradılması aqrar sektorda gəlirlərin və kənd təsərrüfatı məhsullarının rəqabət qabiliyyətliliyinin daha da artırılmasına və beynəlxalq standartlara uyğunlaşmasına təkan vermişdir. Bu günə qədər regionların sosial-iqtisadi inkişafının davamlılığının təmin olunması məqsədilə aqrar sektorun inkişafı və əhalinin ərzaq təhlükəsizliyinin təmin edilməsi Dövlət Proqramında əsas istiqamətlərdən biri kimi nəzərdə tutulmuşdur. Aqrar sahənin inkişafı üzrə prioritet istiqamətlər üzrə mühüm tədbirlər həyata keçirilərsə, kənd təsərrüfatının inkişafında böyük nailiyyətlər əldə olunar."

Davamlı inkişafının əsas hissələrindən biri olan turizmin inkişafına dövlətimiz tərəfindən xüsusi diqqət və qayğı göstərildiyini xüsusi olaraq vurğulayan Nailə İsmayılova bildirdi ki, ölkə başçısı cənab İlham Əliyevin turizmin inkişafı etdirilməsi ilə bağlı imzaladığı hüquqi sənədlər turizm sahəsinin inkişafına böyük dəstək vermiş olur.

"Son illərdə turizm sektorunun inkişafı istiqamətində bir sıra məqsədyönlü tədbirlərin həyata keçirilməsi bu sektorun davamlı inkişafına səbəb olmuşdur. Azərbaycan Respublikası Prezidentinin 2002-ci il 27 avqust tarixli 1029 nömrəli Sərəncamı ilə "Azərbaycan Respublikasında 2002-2005-ci illərdə turizmin inkişafına dair Dövlət Proqramı"nın həyata keçirilməsi nəticəsində turizmin inkişafı üçün münbit şərait yaradılmış və ölkəmizin beynəlxalq turizm bazarına inteqrasiyasının əsası qoyulmuşdur. Bu siyasətin davamı olaraq Azərbaycanda yüksək iqtisadi, sosial və ekoloji tələblərə cavab verən müasir turizm sahəsinin formalaşdırılması və onun ölkə iqtisadiyyatının əsas inkişaf dayaqlarından birinə çevrilməsinin təmin edilməsi məqsədilə Azərbaycan Respublikası Prezidentinin 2010-cu il 6 aprel tarixli 838 nömrəli Sərəncamı ilə "Azərbaycan Respublikasında 2010-2014-cü illərdə turizmin inkişafına dair Dövlət Proqramı" təsdiq edilmişdir. Azərbaycan Respublikasında turizm sektorunun daha da inkişaf etdirilməsi və turizm fəaliyyəti üçün əlverişli şəraitin yaradılması zərurətini nəzərə alaraq, turizm ehtiyatlarından daha səmərəli istifadə olunmaqla zəngin coğrafi landşafta malik ölkəmizin təbiət abidələrinin, eləcə də xalqımızın qədim mədəni-tarixi irsinin geniş miqyasda tanıdılmasını təmin etmək məqsədilə Azərbaycan Respublikası Prezidentinin 2011-ci il 15 fevral tarixli 1320 nömrəli Sərəncamı ilə Azərbaycan Respublikasında 2011-ci il "Turizm ili" elan edilmişdir."

İctimai Birliyinin sədri bu gün Azərbaycanın dünyada uğurlu inkişaf yolu ilə gedən bir ölkə kimi tanındığını qeyd edir: "İstər neft, istərsə də qeyri-neft sektorunda, həm ölkədə, həm də xaricdə mühüm, böyük obyektlərin açılması, islahatların aparılması və digərlərini söyləmək olar. Təbii ki, bütün bunlar Azərbaycan vətəndaşlarının rifah halının yaxşılaşdırılmasına istiqamətlənib. 2018-ci ildə həm ölkəmizin təhlükəsizliyi, eyni zamanda vətəndaşlarımızın rifah halının yaxşılaşdırılması istiqamətində mühüm addımlar atılıb. İcraedici orqanlarda müəyyən dəyişikliklərin olması, bunun həm regional, həm də qlobal layihələrin inkişafına gətirib çıxarması Azərbaycan 2018-ci ildə dünyanın geosiyasi xəritəsində dəyişiklik edən ölkəyə çevrildi."

Bir anlıq ölkəmizin uğurlarına nəzər salsaq, görərik ki, bütün sahələrdə böyük uğurlara imza atmışıq. Belə ki, istər beynəlxalq aləmdə, istərsə də aparılan siyasi-iqtisadi islahatlar dünya birliyi tərəfindən yüksək qiymətlərək ölkəmizi böyük nüfuz sahibi etmişdir. Demək olar ki, bütün sahələr üzrə Azərbaycan ön sıralarda bərqərar olur. Bu da ölkəmizdəki sabitlik və təhlükəsizliyin təminatından xəbər verir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2019.- 8 yanvar.- S.15.