Vətən uzaqda deyil

Diaspor gənclərinin yay düşərgəsi istirahət üçündürmü?

Ikinci yazı

Düşərgə sözü həm də müəyyən mənada istirahət kimi assosiasiya olunur. Məlumat veriləndə ki, Diasporla İş üzrə Dövlət Komitəsi düşərgə təşkil edir, istər-istəməz sual yaranır. Xaricdə yaşayan gənclərin Azərbaycanda istirahətinə nə kimi ehtiyac yaranıb? Niyə Dövlət Komitəsi bu işə vəsait sərf edir? Xatırladım ki, komitənin təşkil etdiyi diaspor gənclərinin yay düşərgəsi sayca ücüncüdür. Düşərgənin məqsədi və mahiyyətilə tanış olduqda, istirahətdən çox tamam başqa və dərin məsələlər ortaya çıxır. Əslində, yay düşərgələri bizimkilərin ideyası deyil, bu böyük tarixi olan diasporların ənənəsidir. Dünyadakı məşhur və oturuşmuş diasporların belə ciddi bir layihəsinin ölkəmizə gətirilməsi çox maraqlı və son dərəcə xeyirlidir. Sual yaranır. Bəs biz bu işdən nə qazanırıq, bu layihənin əhəmiyyəti nədir? Bu suala cavab vermək üçün bir neçə amili sadalamaq istəyirəm.

Birinci və ən vacib məsələ odur ki, kök və nəsil etibarilə azərbaycanlı olan, amma ölkəmizə heç bir vaxt gəlməyən insanlar da, bu düşərgənin vasitəsilə Azərbaycana gəlir.

İkincisi, xaricdə yaşayan azərbaycanlı gənclər arasında əlaqələr formalaşır. Bunun yəqin ki, bir neçə il sonra faydasını görəcəyik.

Üçüncüsü, düşərgədə iştirak pulsuzdur. Dövlət xaricdəki soydaşlarımızın istirahətini və düşərgə çərçivəsində məlumatlandırılmasını tam öz üzərinə götürür. Başqa bir məsələyə də nəzər yetirmək yerinə düşər ki, yay düşərgəsində 18-29 yaş arasında olanlar iştirak edə bilər. Zənnimcə, bunun üstün cəhəti odur ki, Diasporla İş üzrə Dövlət Komitəsi gənclərlə işləməyə xüsusi əhəmiyyət verir.

Təbii ki, xaricdəki yaşlı nəsli də unutmaq olmaz, amma gənclər mürəkkəb Amerika və ya Avropa cəmiyyətlərilə daha asan dil tapa bilər. Onların Azərbaycanı tanıması, burdan lazımı məlumatları alması daha önəmlidir. Azərbaycan dili amilini də unutmaq olmaz. Düşərgədə iştirak üçün Azərbaycan dilində ünsiyyətin tələb olunmasına sadə bir məsələ kimi baxılmamalıdır. Bu və bunun kimi layihələr həm də diasporu “məcbur” edir ki, dilimizə biganə qalmayın, harda doğulub yaşamağınızdan asılı olmayaraq öz dilimizdə danışmağı bacarın. Diaspor gənclərinin yay düşərgəsinin könüllülərlə bağlı olması da təqdirəlayiqdir. “Könüllülər-2020” Diaspor Gənclərinin Yay Düşərgəsi həm də könüllülük mövzusunu xaricdə yaşayan azərbaycanlılara təbliğ edə bilər. Diaspor Gənclərinin Yay Düşərgəsi kimi bir tədbirin Azərbaycanda keçirilməsi Komitə sədri Fuad Muradovun gənc nəsillə işləməyə xüsusi əhəmiyyət verməsinin ən gözəl nümunəsidir və bu, Azərbaycanın diaspor siyasətinə qızıl həriflərlə yazılacaq.

Fatimə Paşayeva

Olaylar.- 2020.-10-11 fevral.- S.11.