Prezident İlham Əliyev: “Azərbaycanda internet tam azaddır”

Azərbaycanda söz azadlığı maksimum dərəcədə təmin edilir

İyunun 30-da Prezident İlham Əliyev Azərbaycan milli mətbuatının 145 illik yubileyinin keçirilməsi haqqında sərəncam imzalayıb. Azərbaycan mətbuat tarixi 145 il əvvəl- 1875 -ci ildən, "Əkinçi" qəzeti ilə başlayıb, bu günümüzə qədər davam edir. Hələ o zaman Azərbaycanın ictimai-siyasi həyatında mühüm rol oynayan "Əkinçi" qəzetinin bugünkü müasiri olan elektron və yazılı mətbuata, bu sahədə çalışan insanlara dövlətimiz tərəfindən hər zaman xüsusi diqqət göstərilib. Dövlətimizin möhkəm təmələ əsaslanan siyasətinin nəticəsi olaraq bütün sahələr inkişaf, tərəqqi dövrünü yaşayır. Bu inkişafdan geri qalmayan, cəmiyyətimizin güzgüsü kimi dəyərləndirilən, reallıqların təbliğatçısı olan mətbuatımıza dövlət dəstəyinin əsas məqsədi müstəqil, peşəkar, rəqabətədavamlı, eyni zamanda, obyektivlik, qərəzsizlik, milli şüur və vətənpərvərlik prinsiplərinə dönmədən əməl edən media resurslarının formalaşdırılmasıdır.

Ulu Öndər Heydər Əliyev siyasi kursunun layiqli davamçısı olan prezident İlham Əliyev hakimiyyətdə olduğu illər ərzində hər zaman Azərbaycan mətbuatının yüksək inkişafını nəzərdə tutan sərəncamlar imzalayıb. Məlumdur ki, cəmiyyət həyatının formalaşmasında medianın əməyi danılmazdır. Bu gün müasir dünyada hər bir ölkənin demokratik göstəricisi azad medianın səviyyəsindən asılıdır. Cənab prezident ölkədə azad, demokratik mətbuatın inkişafına hər zaman xüsusi önəm verib. Milli mətbuatın 145 illik yubileyinin xüsusi qeyd olunması ilə bağlı sərəncam imzalayan prezident İlham Əliyevin bu addımı azad mətbuatın inkişafına, jurnalist əməyinə verilən dəyər kimi qiymətləndirilir. Və bu qayğı daim media ictimaiyyəti tərəfindən yüksək dəyərləndirilir. Təsadüfü deyil ki, məhz bu qayğı nəticəsində dövlət başçısı 3 dəfə "Jurnalistlərin dostu" mükafatına layiq görülüb. Prezident İlham Əliyev mükafatın təqdim edilməsi mərasimində bildirmişdi ki, bu mükafatın verilməsi böyük məna daşıyır: "Çünki ölkə Prezidentini "Jurnalistlərin dostu" adına sizin tərəfdən layiq görməyiniz, əlbəttə ki, Azərbaycanda azad mətbuatın inkişafında görülən işlərə işarə vurur. Mən bundan sonra da çalışacağam ki, Prezident kimi Azərbaycanda azad medianın inkişafı üçün dəstəyimi verim və beləliklə, ölkəmizin sürətli və uğurlu inkişafını təmin edim."

Bu gün dünyanın inkişaf etmiş ölkələrində geniş istifadə olunan, hər bir vətəndaşa azad söz haqqı verən sosial media istifadəçilərinin azad şəkildə öz fikirlərini paylaşmaları ölkəmizdə azad sözə, demokratiyaya verilən dəyərin başlıça göstəricisidir. Bu gün hər bir vətəndaş öz sosial media hesabından prezidentə, rəhbər qurumlarda çalışan şəxslərə rahat şəkildə müraciət ünvanlaya bilir. Müasir texnoligiyanın verdiyi bu imkandan istifadə azadlığı və məmnunluğu ilk öncə ölkə başçısının azad sözə verdiyi önəm kimi qəbul olunur.

2005-ci ildən Prezident tərəfindən mətbuatın yubiley ildönümlərinin bayram əhvalında qeyd edilməsi ənənə halını halıb. 2010-cu ildə mətbuat işçilərinin mənzil-məişət şəraitinin yaxşılaşdırılması ilə bağlı ilk Sərəncamın imzalanması da deyilənlərin bariz nümunəsidir. Jurnalistlərin mənzil problemlərinin aradan qalxması, rahat fəaliyyətləri üçün nəzərdə tutulan bu təşəbbüsün dünya praktikasında ilk dəfə olaraq ölkəmizdə həyata keçirilməsi Azərbaycan dövlətinin dördüncü hakimiyyətə olan hörmətinin əyani göstəricisidir. Və 2013-cü ildə ilk bina tikilib istifadəyə verildi. İkinci binanın təməli qoyuldu. Ənənəvi hal alan bu sərəncamlar 2013 və 2017-ci illərdə imzalandı. Artıq üçüncü binanın tikintisi başa çatıb. Möhtərəm Prezidentimizin bu mühüm addımı dünyada analoqu olmayan hadisə kimi dəyərləndirilir. Bu il də yüzlərlə media işçisinin mənzil problemi cənab Prezident İlham Əliyevin səyi və dəstəyi nəticəsində öz həllini tapacaq. Burada qazanan tərəf isə təbii ki, azad Azərbaycan mediası olacaq.

Dünyanı bu gün cənginə alan pandemiya dövründə belə ölkə Prezidentinin Milli Mətbuatın 145 illiyini diqqətdə saxlamsı, jurnalistləri düşünməsi onların fəaliyyətinə göstərilən hörmətin bariz nümunəsidir. Prezidentin 30 iyun 2020-ci il tarixli "Azərbaycan milli mətbuatının 145 illik yubileyinin keçirilməsi haqqında" Sərəncamında xüsusi bir bənd isə jurnalist təşkilatlarının və redaksiyaların təklifləri əsasında Azərbaycan milli mətbuatının inkişafında xüsusi xidmətləri olan jurnalistlərin mükafatlandırılması haqqında təkliflərin bir ay müddətində Azərbaycan Respublikasının Prezidentinə təqdim edilməsidir. Hər bir jurnalistə fərdi qayğı göstərən cənab Prezident onların bu çətin əməklərini hər an qiymətləndirir.

Hələ 2013-cü ildə jurnalistlər üçün tikilmiş ilk binada Milli Mətbuat Günü münasibətilə mənzillərin paylanması mərasimində çıxış edən prezident İlham Əliyev bildirmişdi ki, jurnalistlərin peşəsi çox ağırdır, məsuliyyətlidir: "Jurnalistlərin əksəriyyəti aldıqları maaşla bu cür evdə mənzil ala bilməzdi. Bu məqsədlə və eyni zamanda, öz sahəsində peşəkarlıq göstərmiş, uzun illər mətbuatda çalışmış jurnalistləri mükafatlandırmaq üçün hesab edirəm ki, bu təşəbbüs ən məqbul yol idi. Mətbuat işçiləri ilə görüşlərimin birində jurnalistlər tərəfindən irəli sürülmüş bu təşəbbüsə dərhal dəstək verildi və qısa müddət ərzində belə gözəl, yaraşıqlı bina tikilmişdir. Əminəm ki, bu binanın ətrafında gələcəkdə böyük bir kompleks yaranacaqdır. Çünki binanın yerləşməsi də çox gözəldir, buradan Dövlət Bayrağına gözəl mənzərə açılır, bütün bu sahələr abadlaşacaq və burada yeni infrastruktur obyektlərin yaradılması nəzərdə tutulur. Bakı Art City, yəni, incəsənət şəhərciyi yaradılacaqdır. Böyük Su İdmanı Sarayı tikilir. Yəni, bu zonada bu binadan sonra tikinti-quruculuq işləri sürətlə gedəcək və əminəm ki, biz gələcəkdə belə mərasimlərdə sizinlə yenə görüşəcəyik.

Bildiyiniz kimi, bu evdə mənzil alan jurnalistlərin arasında müxtəlif mətbu orqanların nümayəndələri, müxtəlif siyasi baxışlara malik olan insanlar vardır. Bu da təbiidir və bu təşəbbüs, burada aparılan bölgü bir daha göstərir ki, Azərbaycanda heç bir sahədə ayrı-seçkiliyə yol verilmir və yol verilməməlidir. Məhz buna görə hesab edirəm ki, cəmiyyətdə çox sağlam mühit, sağlam ab-hava vardır. Əlbəttə ki, jurnalistlərin peşəkarlığı, onların ictimai rəydəki fəaliyyəti bu sağlam ab-havanı daha da sağlam edəcəkdir.

Azərbaycanda söz azadlığı tam şəkildə təmin edilibdir. Bildiyiniz kimi, ulu öndər Heydər Əliyev tərəfindən senzuranı ləğv etməklə bağlı irəli sürülmüş təşəbbüs azad mətbuata təkan verdi. Çünki senzura olan bir ölkədə azad mətbuatdan söhbət gedə bilməzdi. Hesab edirəm ki, məhz o gündən başlayaraq Azərbaycanda azad mətbuatın tam formalaşması başlamışdır və bu gün Azərbaycanda söz azadlığı tam şəkildə təmin edilir. Yüzlərlə mətbu orqan sərbəst fəaliyyət göstərir, əlbəttə ki, senzuradan söhbət gedə bilməz. Azərbaycan, eyni zamanda, müasir texnologiyaların tətbiqində də öz sözünü deyir.

Bildiyiniz kimi, bu gün internet jurnalistikası da çox sürətlə inkişaf edir, o cümlədən Azərbaycanda. Azərbaycanda internet tam azaddır.

İnternetin yayılması sürətlə gedir, dövlət proqramları icra edilir, o cümlədən Dövlət Neft Fondu tərəfindən genişzolaqlı internet xətlərinin hər bir şəhərə gətirilib çıxarılması layihəsi də icra ediləcəkdir. İnternet istifadəçilərinin sayı 70 faizdən çoxdur.

Belə olan halda əlbəttə, biz tam əminliklə deyə bilərik ki, Azərbaycanda söz azadlığı maksimum dərəcədə təmin edilir. Bu, belə də olmalıdır. Çünki biz müasir dövlət qururuq, biz inkişaf etmiş ölkəyə çevrilməliyik və belə olan halda bütün meyarlar Azərbaycanda yüksək səviyyədə olmalıdır. İqtisadi, sosial və eyni zamanda, ictimai proseslərin gedişatı da mütərəqqi meyarlar üzərində qurulmalıdır.

Azərbaycanda azad jurnalistikanın rolu çox böyükdür. Ölkəmizdə demokratik cəmiyyətin formalaşmasında jurnalistikanın çox böyük rolu vardır və bu rolu mən yüksək qiymətləndirirəm. Əminəm ki, gələcəkdə də Azərbaycanda söz azadlığı və bütün başqa azadlıqlar təmin ediləcəkdir. Azərbaycanda demokratiyanın inkişafında böyük addımlar atılır, bütün azadlıqlar vardır - söz azadlığı, sərbəst toplaşmaq azadlığı. Bax bu yaxınlarda icazəli mitinqlərin keçirilməsi üçün yer nəzərdə tutulubdur və gələcəkdə jurnalistlərin bu mitinqləri işıqlandırması üçün böyük problem olmaz, balkondan müşahidə etmək olar.

Azərbaycanda bütün digər azadlıqlar - vicdan azadlığı, din azadlığı tam təmin edilibdir. Beynəlxalq təşkilatlar Azərbaycanda bu sahədəki işlərə yüksək qiymət verirlər. Yəni, müasir dövlət prinsipləri elə olmalıdır ki, biz hər bir sahədə qabağa gedək, ən mütərəqqi təcrübəni Azərbaycanda tətbiq edək və ölkəmizi inkişaf etdirək. Bu gün müstəqil Azərbaycan dövləti, sözün əsl mənasında hərtərəfli inkişaf edir və ictimai proseslərin müsbət istiqamətdə getməsi əlbəttə ki, bizim gücümüzü artırır."

Azərbaycan Respublikasının Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir.

Olaylar.- 2020.- 2-3 iyul.- S.15.