Bir ömrün 65 ili

Kəngərli ziyalılarından olan Məhəmməd Əliyev haqqında bu məqaləni əslində çoxdan qələmə almaq istəyirdim.Nəsib bu günə idi.

Məhəmməd müəllimin 65 illik yubileyinə təsadüf etməsi daha da qürurvericidir. Məhəmməd Ələkbər oğlu Əliyev 04 sentyabr 1955-ci ildə Naxçıvan Muxtar Respublikası Şərur rayonunun (indiki Kəngərli rayonu) Qıvraq kəndində anadan olmuşdur. 1962-1972-ci illərdə orta təhsilini Qıvraq kənd orta məktəbində almış, 1973-1975-ci illərdə Sovet Ordusu sıralarında hərbi xidmətdə olmuşdur. 1976-cı ildə D.Bünyadzadə adına Azərbaycan Xalq Təsərrüfatı İnstitutuna (indiki Azərbaycan Dövlət İqtisad Universiteti -UNEC) daxil olmuşdur.1980-ci ildə institutu fərqlənmə diplomu ilə bitirmiş və təyinatla Azərbaycan SSR Neft Emalı və Neft Kimya Sənayesi Nazirliyinə göndərilmişdi.

Bakı Neftayırma Zavodunda mühəndis-iqtisadçı, 1 May adına Bakı Metal Qablar zavodunda böyük iqtisadçı, sex rəisi, İstehsal-Əmtəə Kontorunda Həmkarlar Komitəsinin sədri, Bakı Tara Zavodunda baş mühəndis vəzifələrində çalışmışdır.1991-2001-ci illərdə Dabbax KİM-nin direktoru və təsisçisi olmuşdur. 2001-ci ildən Azərbaycan Dövlət İqtisad Universitetinin "İdarəetmənin təşkili" kafedrasında baş müəllim, 2002-ci ildə ADİU-nun dissertantı olmuşdur. 25 fevral 2005-ci ildə AMEA-nın İqtisadiyyat İnstitutunun D.01.181- Dissertasiya Şurasının geniş iclasında 08.00.05 "Xalq təsərrüfatının iqtisadiyyatı və idarə edilməsi (komplekslərin, sahələrin və müəssisələrin iqtisadiyyatı, təşkili və idarə edilməsi) ixtisası üzrə "Azərbaycan neftinin dünya bazarlarına çıxarılmasının strateji problemləri" mövzusunda iqtisad elmləri namizədi alimlik dərəcəsi almaq üçün dissertasiya işini müdafiə etmişdir. 2002-ci ildən 2005-ci ilədək "Biznes inzibatçılığı" fakültəsi Elmi Şurasının katibi olmuşdur. 2005-ci ildən İqtisad Elmləri Namizədi, 2008-ci ildən isə Dosentdir. 2006-2011-ci illərdə "Biznes inzibatçılığı" fakültəsinin dekan müavini, 2011-ci ildən bu günə qədər "Biznesin idarə edilməsi" kafedrasının müdiridir. "İnsan resurslarının idarə edilməsi" dərs vəsaitinin, Bakı-2002; "Korporativ idarəetmə" dərsliyinin, Bakı-2011; "Biznesdə insan resurslarının idarə edilməsi" dərsliyinin, Bakı-2013 müəllifi, "Biznesin təşkili və idarə edilməsi"dərsliyinin Bakı-2008 həmmüəlliflərindəndir. "Azərbaycan neftinin dünya bazarlarına çıxarılmasının strateji problemləri" monoqrafiyasının , Bakı-2005 müəllifidir. 50-dən çox elmi məqaləsi işıq üzü görmüşdür. Son dövrlərdə çap olunan "Sosial biznes ideyası: Azərbaycan üçün önəmi", "Subsidiya: aqrar sektora dəstəyin təşviq aləti kimi", "Azərbaycanda innovasiya proseslərinin tədqiqi və formalaşması xüsusiyyətləri", "İnvestisiya layihələrində risklərin kəmiyyət təhlili", "Müasir dövrdə Azərbaycanın sosial-iqtisadi inkişafında neft sənayesinin yeri, "Davamlı sosial-iqtisadi inkişafın təmin edilməsində biznesin rolu" elmi əsərləri xüsusi əhəmiyyət kəsb edir. M.Ə.Əliyev işlədiyi dövrdə müxtəlif nazirlik və təşkilatların mükafatlarını almışdır.2015-ci ildə Azərbaycan Respublikası Təhsil Nazirliyinin, Azərbaycan Respublikası Həmkarlar İttifaqları Konfederasiyasının və Azərbaycan Dövlət İqtisad Universitetinin fəxri fərmanları ilə mükafatlandırılmışdır.2016-cı ildə "Avropa Nəşr Mətbu Evi" mükafat komissiyasının qərarı ilə "Ən yaxşı vətənpərvər tədqiqatçı alim" qızıl medalına layiq görülmüşdür.2018-ci ildə AR Təhsil Nazirliyinin müvafiq əmri ilə "Qabaqcıl Təhsil İşçisi" döş nişanı ilə təltif edilmişdir.Dosent M.Ə.Əliyev hal-hazırda "Biznesin idarə edilməsi" kafedrasının müdiri kimi gənclərə vətənpərvərlik hisslərini və iqtisad elminin inkişaf tarixini böyük ruh yüksəkliyi ilə aşılayır.

Evlidir, üç övladı və üç nəvəsi var.

Məhəmməd müəllim haqqında yuxarıda qeyd etdiklərim onun sadəcə olaraq rəsmi bilinən iş həyatıdır.Məhəmməd müəllim eyni zamanda "Kəngərli-Qıvraq" Xeyriyyə Cəmiyyətinin sədridi. Kəngərlilər,qıvraqlılar onu təkcə alim kimi deyil,eyni zamanda el ağsaqqalı olaraq qəbul edib.Məhəmməd müəllim paytaxt Bakıda yaşayan Kəngərli-Qıvraq camaatının ağsaqqalı olaraq,hər zaman onlara məsləhətlərini verir,gənclərimizin milli və mədəni dəyərlərimizin öyrənilməsi,onun cəmiyyətimizdə tətbiqi yönündə daima maarifləndirir.Uşaqdan-böyüyə hər bir kəs üçün Məhəmməd müəllimin məsləhətləri daima gərəkli olub.Mənim üçün Məhəmməd Əliyev bir alim olmaqla bərabər,eyni zamanda da bir Ağabəyimdi.Yəni yol göstərənim,böyüyümdü. Bu gün ömrünün 65-ci baharını başa vuran görkəmli alimim üçün ən gözəl günlərdən biridir. 2020-ci il sentyabrın 4-də dosent Məhəmməd Əliyevin 65 yaşı tamam olur. Bu münasibətilə onu təbrik edir, ona möhkəm can sağlığı, uzun ömür, elmi pedaqoji fəaliyyətində yeni-yeni nailiyyətlər arzulayıram. Bir ömürə 65 ili sığdırmaq məncə azdı və inşallah Məhəmməd müəllimin 75,85,95,105 illik yubileylərin keçirmək,onun əsərlərinin təqdimatını keçirmək də nəsib olar.

65 illik yubleyin mübarək böyük insan

Nahid Canbaxışlı

"Vətəninfo.az" İnformasiya Agentliyinin rəhbəri

Olaylar.- 2020.- 4-10 sentyabr.- S.16.