SAHİBİNİ GÖZLƏYƏN EV

Oğul da, qız da övladdır. Hər ikisi candan bir parçadır, əzizdir. Qız gözəllikdir, zəriflikdir, oğul arxadır, dayaqdır.

Mənsur kişi də bəxtli insanlardan olub. Bir qızı və iki oğlu ilə. Yaşadıqları Xanabad kəndində hamı onun ailəsini gözütox, mehriban, halal adam kimi tanıyır. Ailəsini, balalarını gücü çatdığı qədər yaxşı yaşatmağa çalışıb, zəhmətdən qorxmayıb, amma...

Şəkərli diabet işləmək gücünü əlindən aldığından, xeyli vaxtdır bir yerdə çalışa bilmir Mənsur kişi. Bu isə onu çox üzür. Ailəyə elə bir köməyi dəyməməsinin üzüntüsünü və xəcalətini yaşayır. İndi durumu bir qədər də pisdir. Çünki ümid yeri olan oğlu Kənanını müharibə əlindən alıb.

Ata oğullu günlərinin həsrəti ilə Kənandan danışır:

-Xəstəlik məni ailə, oğul-uşaq yanında xəcalətli edib, işləyə bilmirəm. Amma şikayətçi deyildim, Allah mənə Kənan kimi oğul vermişdi. Hələ yeniyetmə çağlarından çiyinlərini ailənin yükü altına vermişdi. Tikinti ustalarının yanında fəhləlik edə-edə özü də bənnalığı öyrənmişdi. İşləyib evin ehtiyaclarını ödəyirdi. Ata kimi bundan qürurlansam da, onun yaxşı təhsil almasını istəyirdim.

Şəhid İsmayılov Kənan Mənsur oğlu haqqında danışırıq. O, 1994-cü il oktyabrın 28-də Xanabad kəndində anadan olub. Burda çox da fərəhli olmayan bir uşaqlıq keçirib. Ağlı söz kəsəndən bilib ki, müharibə vəziyyətində olan bir vətənin övladıdır. İşğalın, torpaq əsirliyinin, qaçqın və məcburi köçkünün nə demək olduğunu anladıqca kiçicik qəlbində mənfur ermənilərə qarşı nifrət hissi baş qaldırıb. Torpağa məhəbbəti, vətənə sevgisi, hərbçi peşəsinə sonsuz marağı da kiçik yaşlarından qəlbində yuva salıb.

Həyat belədir, bəzən arzularınla imkanların tərs mütənasib olur. Kənan da həyatın bu üzünü gördü. Amma dərd etmədi, zaman gözlədi. Bu gözləmə müddətində isə boş dayanmadı. Vətən qarşısında hərbi xidmət borcunu yerinə yetirdi, sonra bənnalıqla halal çörəyini qazandı.

-Olduqca qeyrətli bir uşaq idi. - Mənsur kişi danışır. - Gücü çatdığı qədər ailəyə kömək edirdi, bizi fikir çəkməyə qoymurdu. Mənim üçün Kənanın yoxluğu həyatımın bitməsi deməkdir. Mən yaşamıram ki, sadəcə nəfəs alıram. Balamın nə arzuları vardı, hamısı gözündə qaldı.

...Kənanın sevincinin həddi-hüdudu olmayıb, biləndə ki, müddətdən artıq həqiqi hərbi xidmət qulluqçusu olmaq üçün müraciəti müsbət cavablandırılıb. Sıravi əsgər kimi xidmət edəcəkdi. Hərbi formanı geyinəndə qüruru yerə-göyə sığmırdı.

-Özünə öz əlləri ilə həyətimizdə bir ev tikmişdi. Hazır idi. Düşünəndə ki, günlərin birində o evdə Kənanımın ailəsi, dünyaya gələcək övladları ilə yaşayacaq, elə bu düşüncənin özü məni xoşbəxt edirdi,- deyir dərdli ata. - Amma indi o ev mənim üçün göz dağına çevrilib.

Müharibə Mənsur kişinin də ocağını qaraltdı, övladını əlindən almaqla həyatını zindana döndərdi.

Füzuli bölgəsində döyüşən oğlu Sənandan, Suqovuşan istiqamətində vuruşan Kənandan çox narahat idi valideyinləri.

Sentyabrın 27-də başlayan müharibə İsmayılovlar ailəsinin dincliyini əlindən aldı. Kənan döyüşlərdə idi, hər an nə isə ola bilər düşüncəsi doğmalarını üzürdü. Gözlənilən baş verdi. Döyüşlərin başlamasının on birinci günündə, oktyabrın 8-də dizindən və boyun nahiyəsindən güllə yarası alan sıravi əsgər Kənan Mənsur oğlu İsmayılov haqqın dərgahına qovuşdu, şəhid kimi.

Dəfnində iştirak edən hərbçi dostları onun haqqında danışarkən necə cəsur, qorxmaz biri olduğunu söylədilər, belə oğul böyütdüyü üçün ataya, ailəyə minnətdarlıqlarını bildirdilər. Dedilər ki, qardaşı isə Füzuli bölgəsində vuruşub. Qismən Səfərbərliklə cəlb olunub.

Şəhla xanım heç vaxt işləməyib. İndi Şirvan Meşə Meliorasiya idarəsində işləyir. İki aydır işə başladığı.

Xanabad kənd qəbristanlığında uyuyur şəhidimiz. Onu hələ divarlarının nəmi qurumayan evi gözləyirdi, amma uşaqlığının və ilk gəncliyinin ən əziz günlərinin şahidi və məkanı olan doğma kəndinin torpağına qovuşdu.

...Kənandan sonra evin Sənan adlı bir oğlu da var. Amma Kənan ölümü ilə atasına övlad itkisi acısı, ona isə əziz qardaş itkisi dərdi yaşadır.

...Xanabad kəndində işığını sahibi yandırmayacaq bir ev var. Sahibini gözləyən ev...Lənət sənə, müharibə!

İsmayılov Kənan Mənsur oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin sərəncamı ilə "Vətən uğrunda", "Suqovuşanın azad olunmasına görə" və "Cəsur döyüşçü" medalları ilə təltif olunmuşdur. Sonsuzadək ürəyimizdə yaşayacaqdır!

Əminə YUSİFQIZI,

Respublikanın əməkdar jurnalisti

Olaylar.- 2021.- 30 iyul-5 avqust.- S.18.