"Uşaqlıq arzum arxeoloq olmaq idi"

Şahin Seyidzadə "Deputat vaxtı"nda

Şahin Seyidzadə: "Əgər övladlarıma vaxt ayırmasam, zaman gələcək və mən fərqində olacam ki, nəsə itirirəm"

İlk dəfə idi ki, mən müsahibimi yox, müsahibim məni gözləyirdi. Təyin olunan məkana deyilən vaxtdan tam 20 dəqiqə gec gedirdim. Bu müddətdə gecikməyə görə zəng edib üzrxahlıq eməyi özümə borc bilsəm də, müsahibim, Milli Məclisin deputatı Şahin Seyidzadə gərgin iş qrafikinə baxmayaraq tələsməməyi tövsiyə etdi və məni gözlədiyini bildirdi. Deyilən məkana daxil olarkən məndə yaranan gərginlik, stressi də məhz millət vəkili hal-əhval tutmaq, səmimi münasibıəti ilə aradan qaldırmağa nail oldu. Beləliklə Milli Məclisin deputatı Şahin Seyidzadə ilə "Deputat vaxtı" rubrikasında söhbətləşdik.

-Şahin müəllim, artıq bir müddətdir ki, "Deputat vaxtı" adlı rubrikada millət vəkilləri ilə müsahibələrimiz dərc edilir və növbəti qonağımız sizsiniz. Məlumdur ki, siz Milli Məclisin deputatı olana qədər uzun illər gənclər sektorunda çalışmısınız və hazırda da bu və ya digər dərəcədə bu sektora bağlı birisiniz. Maraqlıdır, Şahin Seyidzadə gənclər sektorunda çalışdığı illəri daha səmərəli və məhsuldar hesab edir, yoxsa millət vəkili kimi fəaliyyəti dövrünü?

-İlk növbədə "Deputat vaxtı" rubrikasına dəvət üçün təşəkkür edirəm. Əvvəla onu qeyd etmək istərdim ki, hər bir fəaliyyətin özünəməxsus dövr və xüsusiyyətləri mövcuddur. Bir fəaliyyətin faydası, əhəmiyyəti, marağı digəri ilə müqayisə etmək düzgün olmazdır. Bundan əvvəlki fəaliyyətdə həm bir gənc, həm müxtəlif layihələrin meneceri, təlimçisi, müəyyən dövrlərdə müxtəlif gənclər təşkilatlarının rəhbəri olaraq gənclər və, gənclər təşkilatlarının inkişafına yönəlik prosesdə iştirak edirdik. Bu fəaliyyətlər nə dərəcədə faydalı və əhəmiyyətli olub, yəqin ki, onu daha çox gənclər və onların təmsil olunduğu təşkilatlar deyə bilər. Bu gün gənclərlə bağlantılarımız, gənclər siyasəti ilə bağlıdır. Hal-hazırda Milli Məclisin Gənclər və İdman Komitəsinin üzvüyəm və gənclər və idmanla bağlı qanunların müzakirəsi zamanı Komitə üzvü kimi iştirak edirəm. Digər tərəfdən fəal gənclər və gənclər təşkilatlarının müxtəlif tədbirlərində iştirak edib, onlara dəstək olmağa çalışırıq. Birbaşa gənclərin inkişafı ilə məşğul olmasaq da, onlarla bağlantılarımız var. Ümumiyyətlə gənclərlə iş sahəsində özünəməhsus xüsusiyyətlərə mövcuddur. Əgər biz gənclərdən yenilik gözləyiriksə, o zaman ondan təcrübə toplayaraq, səhv etməyi qəbul etməliyik. Və eyni zamanda onların səhvlərini bağışlamağı bacarmalıyıq. Çünki gənclərin atdığı hər hansı bir addım hər zaman uğurlu olmaya bilər. Təcrübə və inkişaf üçün cəhd, sınaq, səhvlər vacibdir. Cəmiyyət bunu qəbul etməlidir.

-Yaş baxımından gənc sayılmasanızda, ruhən özünüzü gənc hesab edirsinizmi?

-Hələlik gənclərə məxsus olan daxili hisslər və yanaşmaları itirməmişik. Bu günə qədər özümüzü bir gənc kimi hiss edirik. Amma unutmuruq ki, artıq gənc deyilik.

-Bir az əvvəl gənclərin səhv etməsindən danışdıq. Maraqlıdır. Şahin Seyidzadə gənclər sektorundakı fəaliyyəti dövründə çoxmu səhv edib?

-Dünyanın innovasiya baxımından öndə gedən şəxslərinin belə bir fikri var ki, nəticə əldə etmək istəyirsənsə səhv et. Bu gün misal üçün startuplara daha çox səhv edən şəxsləri işə götürürlər. Çünki bir dəfə səhv edən, ikinci dəfə onu təkrarlamır. Ancaq onu da qeyd etmək lazımdır ki, bizim cəmiyyətimizdə hələlik gənclərə səhv etmək imkanı vermək və bunu sağlam qəbul etmək yanaşması özünü çox büruzə vermir. Bir daha qeyd edim ki, səhv etmək təbiidir və deyərdim ki, o birtəcrübədir. Hər bir şəxsin özünün təcrübəsi olmalıdır və təcrübə də çox bir zaman səhv etməklə qazanılır.

-Deputatların vaxtının kifayət qədər gərgin olduğunu deyə bilərik və həmkarlarınızla görüşlərimiz zamanı bunun şahidinə çevrilmişik. Bu qədər gərgin iş rejimi, görüşləri keçirmək üçün əvvəlcədən bir plan, qrafik müəyyən edirsiniz, yoxsa vaxt axarına uyğun olaraq ardıcıl şəkildə görüşlər keçirirsiniz?

-İdarəetmədə bununla bağlı 3 yanaşma var. Uzunmüddətli hədəflər, qısa müddətli vəzifə və planlar, və gözlənilməyən halda əmələ gələn işlər. Uzunmüddətli fəaliyyətlər daha çox risklərin ölçülməsi və hədəfə çatmaq üçün düzgün yolun müəyyən olunmasıdır. Burada düzgün planın qurulması və hazırlıq işlərin aparılması vacibdir. Qısamüddətli işlər gündəlik planımıza daxil olan fəaliyyətlərdir. Köməkçiimlə birlikdə gündəlik planımızı müəyyən edirik. Çünki elə işlər var ki, həmin işlər köməkçi səviyyəsində də görülə bilər. Ancaq gözlənilməz və anidən baş vermiş işləri əvvəlcədən proqnozlaşdırmaq çox çətindir. Elə vaxtlar olur ki, bəzən günün yarıdan çoxu həmin gözlənilməz işlərə sərf olunur və əvvəlcədən nəzərdə tutduğumuz planımız kənarda qalır. Amma bütün bunlara baxmayaraq "ən pis plan plansızlıqdan yaxşıdır".

-Bəs, seçici daha çox sizə zəng edir, yoxsa köməkçiniz vasitəsilə öz problemini sizə bildirir?

-Parlament iclaslarında, toplantılarda olan zaman telefona köməkçim cavab verir. Facebook profilimi özüm idarə edirəm. Seçici birbaşa facebook vasitəsilə problemini mənə yaza bilir. Bəzən seçici facebook profilimi özümün idarə etdiyimə inanmır. Düzdür, bunu kiməsə, eləcə də seçiciyə sübut etmək çox çətindir. Çünki telefonla danışanda səsi eşidərək, buna əmin olur. Ümumiyyətlə, biz seçicilərlə ünsiyyətdə olmaq üçün bütün sosial şəbəkə və kommunikasiya vasitələrindən istifadə edirik. Əsas müraciətlər isə bir qayda olaraq telefon vasitəsilə edilir. Eyni zamanda email ünvanına da yazan seçicilərimiz olur. Hədəfimiz odur ki, elə bir seçici olmasın ki, "qapımızı döyüb, lakin qapı açılmayıb". Və bu halda vacib deyil, həmin qapını bir başa millət vəkili açıb, yoxsa köməkçi. Hər iki halda burada millət vəkilinin nüfuzundan söz gedir.

-Bu qədər gərgin işin qarşılığında özünüzə, ailənizə vaxt ayıra bilirsinizmi?

- 6 yaşlı bir qızım və 13 yaşlı oğlum var. Onlarla yaş və özünəməxsus xüsusiyyətlərinə görə ünsiyyət qururam. Övladlara vaxtın ayrılması kəmiyyət əmsalı deyil. Əgər övladlarımla münasibət və ünsiyyətə "zaman investisiyası" ayırmasam, zaman keçdikdə onun itkisi görmək mümkün olacaq

-Bir sıra həmkarlarınızla görüşdə onların maraqlı tərəfləri üzə çıxıb. Məsələn, Azər Badamov qış aylarında xizək sürməyi, Nəsib Məhəməliyev idmanla məşğul olmağı sevir. Bəs, Şahin Seyidzadə nəylə maraqlanır və hansısa idman növüylə məşğul olurmu?

- Artıq uzun müddətdir dayvinqlə məşğulam və bununla bağlı bir imtahanı verərək, beynəlxalq sertifikat əldə etmişəm. İndi isə növbəti imtahanın ərəfəsindəyəm. Həmçinin alpinizmlə məşğulam. 2 dəfə Heydər, 1 dəfə isə Şahdağ zirvələri fəth etmişəm. Həmçinin 2013-cü ildən yoqa ilə məşğulam. Hindistanda yerləşən dünyanın ən böyük yoqa mərkəzlərdən birini ziyarət etmişəm. Zəngin və geniş zınqırov kolleksiyam var. Hər şey 1999-cu ildə baş tutan bir səfərdən sonra başladı və həmin səfərdən etibarən hansı ölkəyə getsəm, mütləq özümlə zınqırov gətirirəm. Kitab oxumağı hobbi hesab etmirəm. Düşünürəm ki, bu gün kitab oxumamaq mümkün deyil. Eyni zamanda Azərbaycanın kəndlərini kəşf etməyi xoşlayıram. Bu bir hobbidir. Rayona gedəndə müxtəlif yerləri kəşf etməyi xoşlayıram. Çaylar, dağlar, göllər, kəndlərin adət-ənənələri, insanların həyat, yaşam tərzini öyrənməyi sevirəm. İki dəfə oğlumla Azərbaycan böyunca bir həftəyə yaxın müddətdə avtotur keçirmişəm. Təxminən 2 min kilometr məsafə qət etmişik. Bu oğlum üçün çox maraqlı bir təcrübəidir. Çalışıram ki, hava şəraiti, zamanıma uyğun olaraq buna vaxt ayırım.

-1999-cu ildə baş tutan və sizdə zınqırov kolleksiyası yaratmaq həvəsi yaradan səfər hansı idi?

-Xorvatiyada mənim də iştirak etdiyim ilk Dünya Natiqlik Debat Çempionatı idi. Həmin çempionat Xorvatiyanın Velo Loşiç adalarında baş tuturdu. Həmin ada Adriatik dənizində, Xorvatiya ilə İtaliya arasında yerləşir. 14 günlük səfər zamanı Azərbaycan yığma komandasına rəhbərlik edirdim. Həmin səfərdən sonra da hər şey başladı. Afrikanın kəndlərindən tutmuş Nepalın buddist monastrına qədər kolleksiyamda müxtəlif növ zınqırovlar var.

-Yuxarıda qeyd etdiniz ki, bir həftə boyunca övladınızla rayonları gəzmisiniz. Belə hallarda adətən avtomobili özünüz idarə edirsiniz, yoxsa sürücü? Ümumiyyətlə, sürücünüz var?

-İş şəraitində sürücüm var. Ancaq rayona səfərlər zamanı daha çox avtomobili özüm idarə edirəm. Təbii ki, işlə bağlı səfər olarsa, o zaman avtomobili sürücü idarə edir.

-Bəs, avtomobil idarə edərkən musiqi dinləməyi sevirsiniz?

-Yox. Adətən avtomobildə övladlarımla söhbət etməyə üstünlük verirəm. Musiqiyə qulaq asmaq istəyəndə isə hər bir şəxsin zövqeni nəzərə alıb növbə ilə müsiqiyə qulaq asırıq.

-Tənqid olunursunuzmu? Ümumiyyətlə, tənqidə münasibətiniz necədir?

-Mən mövqelərin müxtəlifliyinin tərəfdarıyam. Tənqidin arxasında obyektivlik həqiqət durmalıdır.

-Hər bir şəxsin uşaqlıq arzuları olur. Bəs, Şahin Seyidzadənin uşaqlıq arzuları nə olub və həmin arzularınız reallaşıbmı?

-Uşaqlıq arzum arxeoloq olmaq idi. Vaxtilə İstiqlaliyyət küçəsində yerləşən Elmlər Akademiyasının kitab mağazasında olan arxeologiya üzrə bütün kitabları alıb, oxumuşdum.

-Adətən bəziləri vəzifəyə təyinatdan, yaxud deputat seçildikdən sonra dükan-bazara, marketə getmir, özünü cəımiyyətdən uzaq tutur. Bəs, siz necə, bazarlığı özünüz edirsiniz?

- Zamanın idarəedilməsi ilə bağlı seçkilərdən sonra yanaşmalar dəyişilə bilər. Lakin ailə və dostlar üçün sən deputat deyilsən. Ona görə ev üçün bazarlığı özüm, bəzən isə ailəlımlə birlikdə edirəm.

Süleyman İsmayılbəyli

Olaylar.-2021.-25 iyun-1 iyul.-S.9.