İlhan Aşkının AŞKI

İlhan Aşkın. 2000-ci ilin əvvəllərində jurnalistikaya gəldiyim zaman eşitmişdim bu adı. Tomris Azəri, Ayhan Dəmirçi, Mustafa Əlincə, Bilal Dündar kimi diasporun ağır toplarından sayılırdı. Əslində indi də elədir.

Sonradan diaspora mövzusunda cızma-qara edəndə Onun fəaliyyəti ilə daha yaxından tanış oldum. Niderland Krallığında Azərbaycanın haqq səsinin Avropaya, dünyaya çatdırılmasındakı fəaliyyətindən tutmuş, bu ölkədə Xocalı soyqırımı qurbanlarının xatirəsinə abidənin ucaldılmasına, Niderlandda Qarabağ uğrunda haqq davasına qədər, bütün proseslərdə İlhan Aşkının misilsiz xidmətlərinin olduğunu gördüm. Hətta bütün bu fəaliyyətlərə görə, İlhan Aşkın erməni lobbisinin hədəfinə də tuş gəldi. Uzun illər Niderlandın məhkəmə qapılarında qaldı. Ancaq yenilmədi, başladığı haqq yoldan dönmədi. Baxmayaraq ki, O erməni lobbisi ilə mübarizədə meydanda tək buraxıldı, ən primitiv dəstəkdən belə məhrum oldu. Ən çox mənəvi dəstək umduğu müvafiq dövlət qurumu belə erməni lobbisi ilə mübarizədə, Niderlandın məhkəmə salonlarında İlhan Aşkına dəstək olmadı. Bir sözlə ürəyi Vətən eşqi, Azərbaycan - Türkiyə birlik və bərabərliyi, qardaşlığı üçün döyünən bir insanı ermənilər qarşısında mənən sındırmaq istədilər.

Bir daha qeyd edirəm, nə erməni lobbisinin hücumları, nə də üzləşdiyi haqsızlıqlara baxmayaraq, İlhan Aşkın yenilmədi, üzülmədi, mübarizəni yarı yolda dayandırmadı. Nədən? Çünki yazının başlığında da vurğuladığım kimi İlhan Aşkını yenilməyə, mübarizəni yarı yolda dayandırmağa qoymayan Vətən eşqi idi.

Elə bu Vətən eşqidir ki, İlhan Aşkın uzun illərdir gözəlim Azərbaycan, onun qardaşı Türkiyə üçün əlindən gələni əsirgəmir, bütün mümkün vasitə və imkanlardan istifadə edətək öz xeyirxahııq missiyasını davam etdirir. Elə bu günlər də İlhan Aşkın eyni missiya ilə Vətəndə, Azərbaycan eşqi ilə ölkədədir. Necə ki, koronavirus pandemiyasının birinci dalğasının geniş yayıldığı vaxtlarda öz xeyirxahlıq missiyasını həyata keçirərək kimsəsiz, çarəsiz insanların yanında oldu, onlara zəruri ərzaq və digər yardımlar etdi, Necə ki, İkinici Qarabağ savaşında ürəyi burada, gözləri və qulağı cəbhədən gələn xəbərlər də oldu, əlinə silah alıb torpaqlarımızı düşməndən azad etmək kimi tarixi missiyada iştirak etməyə həvəsləndi, eləcə də indi İlhan Aşkın eyni missiya ilə buradadır, respublikanı qarış - qarış gəzir, onlarla, yüzlərlə insanda, ailədə yaşamaq ümidini yenidən alovlandırır, onlarda sabaha inam hissi formalaşdırır. Məlumat üçün qeyd edim ki, artıq bir neçə həftədir ki, İlhan Aşkın rəhbərlik etdiyi Niderland Azərbaycan Türk Mədəniyyət Dərnəyi, eləcə də Niderlandda fəaliyyət göstərən digər diaspor təşkilatlarının dəstəyi ilə adıçəkilən ölkədən Azərbaycana gətirilən əlil arabalarının sahiblərinə paylanmasında iştirak edir. Xüsusilə, qeyd etmək lazımdır ki, fiziki qüsurlu şəxslər üçün nəzərdə tutulan həmin əlil arabalarının mütləq əksəriyyəti Qarabağ savaşında iştirak etmiş qazilərimizə, eyni zamanda şəhid ailələrinə paylanıb. Hansı ki həmin ailələrdə də fiziki cəhətdən məhdudiyyəti olan insanlar yaşayır. Təqdiredici hal ondan ibarətdir ki, bu nəcib missiya respublikanın hər bir bölgəsini əhatə edir və hər rayonda ən azı 1-2 fiziki qüsurlu vətəndaşımız bu sevinci yaşayır. Müxtəlif fiziki qüsurlu insanlara həmin əlil arabaları təqdim edilərkən onların gözlərində olan sevinc, həyat eşqi İlhan Aşkına bu dünyada cənnəti qazandırmış olur.

Ancaq təəssüf hissi ilə onu da qeyd edərdim ki, diaspor fəalımızın bu nəcib, nümunəvi və xeyirxah missiyasına da bir qısqanclıq hissinin olduğu müşahidə edilməkdədir. Xüsusilə də bütün diaspor təşkilatları kimi Niderland Türk-Azərbaycan Dərnəyi ilə yaxından əməkdaşlıq etməli olan müvafiq dövlət qurumundan. İlhan Aşkının Azərbaycanda olduğu müddət ərzində Diasporla İş üzrə Dövlət Komitəsinin saytında gündəlik yer alan xəbərlərə nəzər yetirdikdə də bu qısqanclıq hissinin mövcudluğu açıq şəkildə özünü büruzə verir. Təsəvvür edin, diaspor fəalı, bu sahədə sözü və nüfuzu olan biri on min kilometrlərlə məsafə qət edib Azərbaycana gəlir, burada 1 ay müddətində xeyirxah işlə məşğul olub, insanları sevindirir, ən əsası Vətən müharibəsi qazilərinin müəyyən bir qismini əlil arabaları ilə təmin edir, lakin sözügedən dövlət qurumunun saytında bu nəcib missiya barədə 1 cümlə belə məlumat verilmir. Həmçinin, dövlət qurumunun rəhbərliyi də Onunla görüşməyə lüzum görmür. Hər halda belə bir görüş olubsa da, mətbuat xidməti bu barədə məlumat yaymayıb. Səbəb? Təbii ki, yuxarıda qeyd etdiyim kimi qısqanclıq.

İlhan Aşkına olan qısqanc, biganə münasibət mənə Rusiya Azərbaycanlıları İttifaqının prezidenti, məşhur iş adamı Fizuli Məmmədovu xatırlatdı. Eynilə Fizuli Məmmədov da bir neçə il əvvəl İlhan Aşkın kimi biganəlik, qısqanclıqla qarşılaşdı. Adam Rusiya Federasiyasına səs salan, şimal qonşumuzdakı erməni lobbisində təşviş yaradan təşkilat təsis etdi, Vətən müharibəsindən əvvəl onlarla müharibə iştirakçısı, şəhid ailəsinə öz şəxsi hesabına mənzil hədiyyə etdi, lakin adına çıxarılmayan söz olmadı. Əksinə dediyim kimi Rusiyadakı erməni lobbisini təşvişə salan Rusiya Azərbaycanlıları İttifaqında parçalanma yaratmaq üçün dəridən-qabıqdan çıxıldı, min oyun oynanıldı. Bütün bunlar azmış kimi Onun guya prezident seçkilərində Cənab İlham Əliyevə alternativ olacağı barədə absurd fikirlər dövriyyəyə gətirildi, gözdən salınmağa cəhd edildi. Ancaq bütün bunlara baxmayaraq Fizuli Məmmədov da İlhan Aşkın kimi edilən haqısızlıqlara rəğmən Vətən müharibəsi zamanında da Ordumuza öz əlindən gələn köməkliyi göstərdi. Bu gün Fizuli Məmmədov işğaldan azad edilən ərazilərə sərmayə qoyub orada onlarla infrastruktur layihələri həyata keçirməyə potensialı, maddi imkanı olan biridir. Lakin müəyyən insanlar onun Azərbaycana yoluna əngəl olub, bu yoıu bağıayıblar. Bu baxımdan ehtiyyat edirəm ki, İlhan Aşkın da eyni aqibəti yaşaya və hətta onun da növbəti prezident seçkilərində iştirak edəcəyi barədə cəfəng, absurd fikirlər dövriyyəyə buraxıla. Səbəb?

Səbəb dediyim kimi, İlhan Aşkın, Fizuli Məmmədov, Ayhan Dəmirçi kimi diasporamızın ağır toplarının sözün həqiqi mənasında bu sahədə iş görmələridir. Adlarını çəkdiyim şəxslər kafe, restoran, otel diasporu ilə məşğul olmadığı və real iş gördükləri üçün bəzilərinin içində bir qorxu var. Postlarını itirmək qorxusu. Aşkınlar, məmmədovlar, dəmirçilər fəaliyyətləri ilə daha çox etimad qazanıb birilərinin yerini dar edər, kreslolarını laxladar. Ona görə də bütün mümkün vasitələrdən istifadə edib Azərbaycan adına iş görən diaspora fəallarını ləkələmək, onlara biganə münasibət bəsləmək, lazım gələrsə gözdən salmaq lazımdır. Nə yazıq ki, reallıq bundan ibarətdir.

Süleyman İsmayılbəyli

Olaylar.- 2022.- 4-10 fevral.- S.22.