"Təbii gözəlliyi qorumaq

mənim üçün prioritetdir"

Ölkəmizdə estetik prosedurların olduqca yayıldığı bir dövrdə medikal estetik həkim Aygün Ay ilə işinin incəliklərini müzakirə etdik. Aygün Ay uzun illlərdir ki, Türkiyədə yaşayıb çalışır. Son illər mütəmadi Azərbaycana gələn tanınmış medikal-estetik həkim təbii gözəlliyi qorumaq, təbii formada gəncləşməklə bağlı bir sıra mətləblərə aydınlıq gətirdi.

- Aygün xanım, peşənizə necə yiyələnmisiniz?

- İlk təhsilim ginekologiya üzrə olub. Daha sonra Türkiyədə medikal estetik, dermotologiya üzrə təhsil aldım. Ancaq bir müddət sonra söz verdim ki, tibbdə əməliyyatla həyata keçirilən bir çox proseduru əməliyyatsız həyata keçirəcəyəm. Bunu bacarmaq üçün çox araşdırma apardım, oxudum, öyrəndim. Və bunu bacardım. Özünəməxsus prosedurlarım var və pasiyentlərim, mənə müraciət edənlər bundan çox məmnundur. Hazırda Türkiyədə dermotoloq və medikal estetik həkim kimi fəaliyyət göstərirəm.

- İnsanlar çox zaman kosmetoloq və dermotoloq arasında qərarsız qalır. Aralarındakı fərq nələrdir? Hansı hallarda sizə müraciət etməlidirlər?

- Əslində kosmetoloq deyiləm. Kosmetoloq sadəcə dəriyə kənardan müdaxilə edə bilən şəxsə deyilir. Ancaq həkim-kosmetoloq deyildiyi zaman dəri bütünlükdə həkimə əmanət edilə bilir. Medikal-estetik demək, mənim üçün dəyişim demək deyil. Çünki, medikal estetik etdirmək istəyən bir çox insan bir-birinə bənzəyir. Mənim buradaki fərqim pasiyentimi heç kimə bənzətmədən, daha əvvəlki-gənc halına qaytara bilməkdi. Ümumilikdə estetik həkimlər standart işlər görürlər. Dolğu, botoks və s. Standartlara alışqın olduqları üçün bənzərlik yaranır. Mən isə öz kəşfim olan kök hüceyrə metodlu PRP üsulu ilə gəncləşmə əldə edirəm. Prosedurun gedişatı PRP kimidir. Amma təsiri kök hüceyrə və daha çoxuna bənzəyir. Pasiyentdən qan alınır. Cihazda bərpaedici hüceyrə ayrılır. Daha sonra üzdə və ya bədəndə ehtiyac olan bölgələrə yeridilir. Prosedur həyata keçirilən andan etibarən dəyişim görmək mümkündür: dartınma, təravətlilik, canlanma və s. Bu proses altı ay davam edir. Hər sabah daha təmiz və rahat üzlə oyanırıq. Dərinin ehtiyacı olan hər şeyi tək prosedurla əldə edirik. Bu isə həm dəriyə əlavə müdaxilələrə, həm də zamana-vaxta qənaətdir.

- Azərbaycanda fəaliyyətə nə zaman başlamısınız?

- 30 ildir ki, Türkiyədə yaşayıram. 9 ildir ki, dermotoloq və medikal estetik həkim kimi fəaliyyət göstərirəm. Özəl xəstələrimin istəyinə, ehtiyacına uyğun olaraq vaxtaşırı Dubaya yollanıram. Bir çox ölkələrdən gələn pasiyentlərlə Dubayda görüşürəm. Ayda bir dəfə Azərbaycana gəlirəm. Çünki, müalicəsi davam edən insanlar var. Biz sadəcə gözəlləşdirməklə məşğul deyilik. Eyni zamanda müalicə edirik. Dermotologiyaya aid bir çox xəstəlik var. Bunların müalicəyə götürdüyümüz andan etibarən məsuliyyət almış oluruq. İnsanlar düşünməməlidir ki, Aygün xanım bu gün var, sabah yoxdur. İnsanlara istədikləri zaman mənimlə əlaqə yarada biləcəkləri güvəni vermişəm.

- Pandemiya işlərinizə necə təsir göstərdi?

- Əlbəttə, pandemiya bütün dünyaya təsir etdiyi kimi, bizim işlərimizə də təsirsiz ötüşmədi. Bütün çətinliklərə rəğmən sosial media üzərindən məlumatlar paylaşdıq. Davamlı canlı yayınlar etdik. Pasiyentlərimizi bizsiz buraxmadıq.

- Sizcə Azərbaycanda bu peşəyə yiyələnmək üçün yetəri qədər imkan varmı?

- Mən azərbaycanlıyam. İllər sonra ölkəmə geri dönmüşəm. Geri dönməkdə məqsədim isə insanlarımıza xidmət gösətrmək, onlara faydalı olmaqdır. Düşünürəm ki, nə üçün öz ölkəmin vətəndaşları mənim etdiyim fərqli prosedurlardan istifadə edə bilməsin? Heç bir zaman hədəfim pul qazanmaq olmayıb. İnsani dəyərləri, həkim vicdanını qorumaq və güvən qazanmaq olub. Təvazökarlıqdan uzaq da olsa, şükür ki, insanların sevginisini, hörmətini qazana bilmişəm. Bu gün Aygün Ay dediyiniz zaman heç kim mənfi fikir bildirməyəcək. Hesab edirəm ki, vətənimin insanı mənim işimdən, biliyimdən, prosedurlarımdan faydalanmalıdır. Artıq 3 ildir ki, Azərbaycana daimi gəlirəm və insanlara göstərdiyim xidmətdən zövq alıram.

-Peşənizin incəliklərini gənclərə öyrədir, kurslar təşkil edib təlimlər keçirsinizmi?

- Dərsi, təlimi sadəcə Tibb məzunu, bu işdə bacarıqlı ola biləcək şəxslərə verirəm. Bu barədə fəqrli düşünürəm. Sırf pul qazanmaq üçün istənilən şəxs bu prosedurla mə.ğul olmamlıdır. Bu baxımdan mən də gələn istənilən şəxsləri qəbul etmirəm.

- Hansı hallarda dolğuya müraciət edirsiniz?

- Ağıllı dolğu dediyimiz bir preparat var. Dolğunun tərkibi Hialuron turşusudur. Həmin turşu dərimizin altında yerləşir. Yaş irəlilədikcə, dəri altında ifrazı azalır və yer çəkiminə görə üzü aşağı enməyə başlayır. Biz bu prosesi dəstəkləmək üçün dolğuya ehtiyac duyuruq. Mən çox ehtiyac olmadığı halda, gələn pasiyentə ilk öncə dolğunu məsləhət görmürəm. Hətta bəziləri təəccüblənir. "Kimə müracət etsək dolğu məsləhət görürlər" deyir. Sizə daha faydalı olacaq alternativ prosedur varsa, mən onu edirəm. Toxuma itkisi çoxdursa, üz həddən artıq sallanırsa, dolğu mütləqdir. Dolğu ilə möcüzələr yaratmaq mümkündür. Dolğu və botoksla burunu estetik olmadan gözəl formaya sala bilirik. Üzü ideal hala gətirmək üçün dolğu istifadə edirəm. Doldurmaq üçün əsla. Pasiyentim məndən süni görünüş istəmədiyi müddətcə sünilik yaratmıram. Böyük dodaq, jewline və.s istəmədiyi müddətcə etmirəm. Xanımlarda təbii gözəlliyi qorumaq mənim üçün hər zaman prioritetdir. Mənə müraciət edən şəxslər də əsasən təbiiliyi sevirlər. Qarşılıqlı anlaşma ilə çalışmaq pasiyentə də, mənə zövq verir. Təbiiliyi pozmadan proseduru həll edirik. Estetik etmək çox asandır. Hər tərəfə dolğu vurdurub, estetik etdirdim deyə bilərsən. Mövcud olan gözlliyi, spesifikliyi qoruyub saxlamaq isə olduqca çətindir.

- Müqayisə etdiyimiz zaman digər ölkələrlə Azərbaycan arasında qiymət fərqi varmı?

- Ölkədən kənar qiymətlərlə müqayisədə Azərbaycanda qiymətlər çox uyğundur. Digər ölkələrdə estetik etdirmək olduqca bahalıdır. Mən burda pula önəm vermirəm. Ölkəmdəki insanların büdcəsini nəzərə alıram. Məsələn, digər yerlərdə 2000-3000 dollar arasında dəyişən prosedurun qiyməti Azərbaycanda 500 manatdır. Bu qiymətə digər yerlərdə 2 dəfə dolğu etdirmək belə mümkün deyil. Ancaq Azərbaycanda bu ödənişlə gəncləşmək mümkündür.

- Pasiyentlərinizin geri dönüşləri necə olur?

- Bir neçə müddət öncə bir məclisdə idim. Qadınların hamısı bir-birinə bənzəyirdi. Üzləri düşmüş formada idi. Bir zamanlar istifadə edilən süni dolğular öz işini görüb. Süni dolğuya müdaxilə etmək də mümkün olmur. Mən həmin pasiyentlərə az da olsa yardım edə bilirəm. Ancaq, dolğunu ordan tamamilə çıxara bilmək mümkün deyil. Mütəxəssis gözü ilə baxıram qadınlara. Onların adına məyus oluram. Cizgiləri çox qəşəngdir, amma təəssüf ki, bəzən özlərini heyif edirlər. Mənim pasiyentlərim isə seçilir. Mənə müraciət edən xanımları digərlərindən rahatlıqla ayırd etmək olur. Üzdə dolğuluq və böyüklük hiss edilmir. Daha gənc görünürlər. Bu da qadını xoşbəxt edir. Qadın özünü gözəl hiss etdiyi zaman xoşbəxtdir. Ona görə hər bir qadın özünü hər zaman gözəl hiss etməlidir.

- Uğursuz prosedur keçirən şəxsi əvvəlki görüntüsünə qaytarmaq mümkündürmü?

- Bayaq qeyd etdiyim kimi medikal estetik fərqli anlayışdır. Azərbaycanda buna kosmetoloq adı verilib. Kosmetoloq adı altında tibblə əlaqəsi olmayan insanlar var. Ancaq biz dərialtı ilə, bədənlə işləyirik. Çoxları dərinin altında nələr olduğundan bixəbərdir. Biz buna dəli cəsarəti deyirik. Onlar bilsə ki, etdikləri xırda xətaya görə nələr ola bilər, bu işi görməzlər. Mənə ağzı, burunu əyilən, göz qapağı düşən çox xəstə müraciət edib. Pandemiya dövründə Azərbaycana səfər edə bilmədiyim üçün məcburən başqa həkimə müraciət edən şəxslər sonradan yenidən mənə müraciət ediblər. Xəyanəti sevmirəm. Pasiyentim başqasına müraciət etdikdə onunla yollarımı ayırıram. Qeydlər tuturam. Nəyi, necə, nə zaman etdiyimi qeyd edirəm. Üzdə bir həkimin əl işi olmalıdır. Həmin qeydlərə əsasən nəyə ehtiyacı olduğunu bilirəm. Hər kəsin tanışları arasında kosmetoloq var. Və xanımları ətrafları öz tanıdıqlarına getməyə məcbur edirlər. Təbii ki, qarşı cins qadınlarda süni görünüşü sevmir. Bəzən "ərim başa düşməsin", "qayınanam başa düşməsin" modeli istəyirlər. Hazırda bu işlə məşğul olan çox sayda insan var. Ona görə də axtarıb, yaxşı şəkildə araşdırıb qərar vermək lazımdır. Mənim üçün reklam yox, keyfiyyət önəmlidir.

-Ölkəmizdə qadınlar estetik prosedurlara olduqca maraqlıdır. Çoxları isə tələyə düşərək ucuza qaçırlar. Ucuz prosedurlar sonradan hansı problemlər yarada bilər?

- Mən bura gələndən sonra demək olar ki, hər gün müxtəlif firmalar qapımızı döyür. İşi bilməyən kosmetoloqlar həmin firmaları qəbul edib, məhsullarını istifadə edirlər. Məsələn, firma iddia edir ki, "X" adlı məhsul ləkələri müalicə edir. Əvvəla məhsulun tərkibini bilmək əsasdır. İkincisi ləkə tək səbəbdən əmələ gəlmir. Ləkənin müxtəlif səbəbləri olur. Əvvəlcə ləkənin səbəbi müayinə edilməli, araşdırmlı, sonra məhsuldan istifadə etmək lazımdır. Ləkəli pasiyent demək müalicəyə götürmək lazımdır deməkdir. Bu səbəbdən ləkə kosmetologiyaya aid deyil. Sonra istifadə olunan məhsul başqa fəsad yaradır. Fəsad yaranandan sonra da başqa kosmetoloqun qapısını döyürlər. Üst-üstə edilən səhvlərdən sonra çirkin bir hal alınır. Qaş düzəltmək istəyərkən, vurub göz çıxarırlar. Ödəniş edərək çirkinləşirsən. Buna görə yaxşı həkim seçimi şərtdir, mütləqdir. Kosmetoloqa isə təmizlik və s. üçün getmək olar. Bu müsahibəni oxuyanlara məsləhət görərdim ki, İynəli prosedurlar üçün mütləq həkimə müraciət etsinlər.

- Hansı yaşdan etibarən estetik müdaxilələri doğru hesab edirsiniz?

- Bu məsələ problemə görə dəyişir. Sadəcə estetik prosedurdursa, 28 yaşdan tez məsləhət görmürəm. Az yaşda dolğu istifadə edənlər getdikcə daha çox prosedur istəməyə məcbur olurlar. Ona görə də gəncləşmək üçün 28 yaşdan sonra müdaxiləyə məsləhət görülür.

- Dolğunun qalıcılıq müddətinin orqanizmlə əlaqəsi varmı?

- Təcrübəyə dayanaraq danışmaq istəyirəm. İki rəfiqə mənə müraciət etmişdi. Hər ikisinə eyni prosedur və dolğunu istifadə edirəm. Birində olduğu kimi qalır, digərində isə heç nə qalmır. Pandmeiya dövründə bu problemlə çox rastlaşdıq. Sonra Türkiyə Səhiyyə Nazirliyinin bir açıqlamasından anladıq ki, koronavirus keçirən şəxslərdə dolğu qalmır. Səbəbi isə koronavirusa yoluxan insanların qansulandırıcı dərmanlar çox istifadə etməsidir. Qan durulduğu üçün təsir azalır. Hilauron turşusu su tərkiblidir. Suyu gün ərzində normadan az qəbul etdikdə bədəndə harada nəmlik varsa, oradan su çəkməyə başlayır. "Dolğum 1 ildən az qaldı" deyənlərə, ilk sualım "su içirsən?" olur. Cavab isə əsasən "yox" alıram. Gündəlik su ehtiyacını qəbul etdikdən sonra dolğunun ömrü uzanır. Gün ərzində hər 20 kiloya 1 litr su qəbul etmək lazımdır. Unutmayaq ki, su həyatdır, gözəllikdir, gənclikdir... İnsan bədəni üçün çox lazımlı maddədir. Əskik edildiyi zaman ciddi problemlər yaranır.

Əfsanə Kamal

Olaylar.- 2022.- 2-8 sentyabr.- S.18.