Azərbaycan və Litva arasında memorandum imzalanıb

İki ölkə arasında siyasi dialoqun genişləndirilməsi davam etdiriləcək

Azərbaycana ikigünlük rəsmi səfərə gələn Litvanın xarici işlər naziri Viqaudas Uşatskası dünən azərbaycanlı həmkarı Elmar Məmmədyarovla görüşüb. Azərbaycan və Litvanın xarici işlər nazirləri əvvəlcə təkbətək, sonra isə geniş tərkibdə müzakirələr aparıblar.

Müzakirələrin nəticəsi olaraq Azərbaycan və Litva xarici işlər nazirlikləri arasında siyasi dialoqun genişləndirilməsini nəzərdə tutan memorandum imzalanıb. Sonra nazir Elmar Məmmədyarov və onun litvalı həmkarı V. Uşatskas jurnalistlər üçün birgə mətbuat konfransı keçiriblər. Litvalı həmkarı ilə keçirdiyi görüşdə müzakirə olunan məsələlər barəsində məlumat verən Azərbaycanın xarici siyasət idarəsinin başçısı Elmar Məmmədyarov bildirib ki, görüşdə iki ölkə arasındakı siyasi əməkdaşlıq məsələləri müzakirə olunub. Son illər Litva prezidenti Adamkusun Azərbaycana, prezident İlham Əliyevin Litvaya reallaşdırdığı səfərlərə toxunan nazir Elmar Məmmədyarov iki ölkə arasında siyasi dialoqun genişləndirilməsi məqsədi ilə litvalı həmkarı ilə apardığı müzakirələrdən sonra birgə memorandum imzaladıqlarını deyib. Onun sözlərinə görə, həmin sənəddə Litvanın Dağlıq Qarabağ münaqişəsinin nizamlanması ilə bağlı tutduğu mövqe də daxil olmaqla bir sıra məsələlər yer alıb. Azərbaycanın xarici siyasət idarəsinin rəhbəri danışıqların detallarına toxunarkən bildirib ki, müzakirələr zamanı regiondakı vəziyyət, "Şərq tərəfdaşlığı" proqramı və Dağlıq Qarabağ münaqişəsinin nizamlanması məsələləri müzakirə edilib. DQ münaqişəsinin həlli istiqamətdə aparılan proses barədə qonağı məlumatlandıran Azərbaycanın xarici siyasət idarəsinin rəhbəri Litvanın münaqişənin Azərbaycanın ərazi bütövlüyü çərçivəsində həllini dəstəklədiyini bildirib. Nazir bildirib ki, bu mövqe litvalı həmkarı ilə imzaladıqları memorandumda da əksini tapıb. Nazir Elmar Məmmədyarov Litva ilə Azərbaycan arasında ikitərəfli əlaqələrin bundan sonra daha da dərinləşəcəyinə əmin olduğunu bildirib.

Bakıya birinci dəfə rəsmi səfər etdiyini bildirən Litvanın xarici işlər naziri Viqaudas Uşatskas isə bildirib ki, Cənubi Qafqazda Azərbaycan Litvanın ən yaxın ticarət partnyorudur. Bakıya iş adamları ilə birlikdə gəldiyini vurğulayan nazir dünən səhər Azərbaycan-Litva biznes-forumunda iştirak etdiyini bildirib. V. Uşatskas səfəri çərçivəsində Bakıda Litva Ticarət Evinin açılacağını da bildirib. Onun sözlərinə görə, bu Evin fəaliyyətindən iş adamları və turistlər yararlana biləcəklər. Azərbaycanla Litva arasındakı hazırkı əlaqələri yüksək qiymətləndirən qonaq Azərbaycanın "Şərq tərəfdaşlığı" proqramını dəstəkləməsini də müsbət qiymətləndirib. O, Azərbaycanın enerji təhlükəsizliyi sahəsində etibarlı tərəfdaş olduğunu deyib. V.Uşatskas bildirib ki, Azərbaycan Avropa üçün yalnız enerji təchizatçısı kimi deyil, həm də regionun siyasi və mədəni mərkəzi kimi önəmlidir. İki ölkə arasında əlaqələrin genişləndirilməsindən danışarkən nazir bildirib ki, bu il Litva ilə Azərbaycan arasında iki layihə həyata keçiriləcək. Bunlardan biri parlamentlərarası əməkdaşlıq, digəri isə korrupsiya ilə mübarizə sahəsində olacaq. Qonaq həmçinin 2009-cu ildə Bakının İslam Mədəniyyətinin paytaxtı elan edilməsinə də toxunub. O bildirib ki, belə bir ildə Bakıya səfərə gəlməsindən məmnundur. "Mən çox şadam ki, sizin ölkəyə Bakının İslam Mədəniyyətinin paytaxtı elan edildiyi ildə gəlmişəm. Vülnüs də bu il Avropanın Mədəniyyət paytaxtı elan edilib"- deyən qonaq ölkəsinin Azərbaycanla həm siyasi, həm iqtisadi, həm də mədəni sahədə əlaqələrini dərinləşdirməyə maraqlı olduğunun bildirib. Mətbuat konfransında qonaq iki ölkə arasındakı dostluğun simvolu olaraq "Ağ mələk" mükafatını azərbaycanlı həmkarı Elmar Məmmədyarova təqdim edib.

Vüsalə Rafiqqızı.

Şərq.- 2009.- 8 aprel.- S. 2.