İnsan özünə təlqin etdiyi fikirlərin əsiridir

Şahsəddin İmanlı: "Kiməsə vergi verilmsi məsələsi boş şeydir"

İnsanın yaradılışı elədir ki, o özünə təlqin etdiyi fikirlərin məhsulunu ortaya qoyur. Belə ki, insan həyatda nəyisə yeniləmək, nəyəsə nail olmaq istəyirsə, çalışıb əvvəlcə bu inqilabı öz düşüncəsində etməlidir. Bundan sonra həyatda olan sıxıntıların öhdəsindən gəlmək üçün falçılara müraciət etməyə ehtiyac da qalmayacaq. Mövzunu beynəlxalq səviyyəli mütəxəssis, parapsixoloq, ekstrasens Şahsəddin İmanlı ilə davam etdiririk.

-Şahsəddin müəllim, parapsixologiya ilə psixologiyanı fərqləndirən xüsusiyyətlər hansılardır?

-Məlum olduğu kimi psixologiya ruh haqqında elmdir. Bu elm yalnız görünən məqamları izah edir. Parapsixologiya elmi də dünya yaranandan yaranıb. Amma zaman-zaman bu sahə müxtəlif adlar altında təqdim olunub. Belələrinə gah şaman deyiblər, gah onları baxıcı kimi tanıyıblar. Amma dünya yaranandan-nurdan çıxan zərrələr bölünəndən sonra parapsixologiya da yaranmağa başlayıb. Parapsixologiya isə insan ruhunun ətrafında qaranlıq nə varsa, gözlə-görünən və görünməyən, onların hamısı ilə məşğul olur.

-Yaşınızın hansı çağında özünüzdə qeyri-adi güc olduğunu hiss etdiniz Sizcə, öz gücünüzlə digər insanlardan fərqlənirsiniz, yoxsa istənilən adamın parapsixoloq ola biləcəyini iddia edirsiniz?

-Nurdan çıxan zərrələr hamısı bərabərdirsə, deməli bütün canlı varlıqların hamısı bərabərdir. Hər bir insan öz üzərində işləyərsə, mənəvi yollarla bu elmi tapa bilər. Təəssüflər olsun ki, indi Azərbaycanda olan ekstrasenslərin 99 faizi elmi yöndən yox, ağacdan yıxılmaqla, ruhu zədələnməklə və digər problemlərdən sonra fəaliyyətə başlayıb.

Vergi verilməsi söhbəti hamısı boş şeydir. Sadəcə insanlara psixoloji təsir edirlər ki, bir insanı o birisindən fərqləndirsinlər. Allah vergini bütün insanlar arasında bərabər bölüb. Yenə qeyd edim ki, hər bir insan öz üzərində işləməklə nəyəsə nail ola bilir. Məndə 9-10 yaşından öncəgörümlük var idi. Bir şeyi hiss edirdim, amma onu deməyə qorxurdum. Sovet dövrü olduğu üçün fikirləşirdim ki, aparıb məni dəlixanaya qoyarlar. Məsələn, uşaq vaxtı müəllimin fikrini oxuya bilirdim. Bu qabiliyyətimi yavaş-yavaş inkişaf etdirməyə başladım. Özüm mühəndisəm. Bu elmlə sonradan məşğul olmağa başladım. İslamı, Şərq dinlərini, yəhudiliyi və xristianlığı araşdırmışam. Bunların hamısı eyni qoldur, sadəcə olaraq onların metodları fərqlidir. Bunu bütün çayların okena axması ilə müqayisə etmək olar. Mən hipnoz etməyi də bacarıram, amma bununla məşğul olmuram. Hipnoz, özünühipnoz və sair hamısı parapsixologiyanın bir qoludur. Sovet hakimiyyəti illərində parapsixologiya konservasiya olunmuşdu. Bu elmin istifadəsinə icazə verilmirdi. Halbuki bu elm hazırda Almaniyada, ABŞ-da, Yeni Zellandiyada, Yaponiyada alternativ təbabət kimi geniş istifadə olunur.

-Siz parapsixologiya ilə müalicəni həmin ölkələrdə istifadə olunan vasitələrdən istifadə etməklə mənimsəmisiniz?

-Mən Moskvada oxumuşam. Yaponiyada bu elmlə bağlı sistemləri öyrənmişəm. Yoqa sistemini öyrənmişəm. Parapsixologiya kurslarını bitirmişəm.

-Hazırda kifayət qədər insan var ki, ekstrasensliklə məşğul olur. Təbii ki, onların fəaliyyətindən istifadə edən insanlar da çoxdur.

-Camaatı aldadanlar falçılar və cadugərlərdir. Ekstrasensura parapsixologiyanın bir qoludur. Mən dindarlara toxunmaq istəmirəm. Təəssüflər olsun ki, bəzi mollalar, hətta özünü seyid, hacı kimi qələmə verən, quran oxuyan, insanlara taleyini deyənlər meydana gəlib və onlar adlarını ekstrasens qoyublar. Bundan başqa falçı, cadugər adını ekstrasens qoyub. Halbuki onların ekstrasenslik elmləri ilə heç bir əlaqəsi yoxdur. Qeyd etdiyim həmin seyidlər, mollalar Quranın 114, 113 və 141-cü ayələrinə əməl etməyərək, quran açır və insanları proqramlaşdırır, özləri cadugərlik və falçılıqla məşğul olurlar.

- Bəs, öncəgörümlə məşğul olmaq günah deyil?

-Bu günah deyil. Bu da parapsixologiyanın qollarından biridir. Ancaq bu elmdən istifadə etmək, insanları proqramlaşdırmaq doğru deyil. Bundan müalicə məqsədilə, faydalı qazıntıların tapılması, insanların psixikasını müəyyənləşdirmək üçün istifadə olunmalıdır. Öncəgörümlüyün heç bir falçılıqla, cadugərliklə əlaqəsi yoxdur.

Heç bir normal parapsixoloq insanın şəxsi işinə qarışmır və onun gələcəyi haqqında heç bir məlumat vermir. Əgər biz kiminsə gələcəyini görür və onu deyiriksə, bununla ilahi qayda-qanunları pozuruq. İnsan bu dünyaya nə üçün gəldiyinin səbəblərini bilməlidir. Çünki insan bu dünyaya təkamül prosesini keçməyə gəlib. O, təkamül prosesində hər bir insanın öz sınağı var. Əgər biz kiməsə öz gələcəyi barədə nə isə deyiriksə, biz onun sınağını dayandırır və onu zombiləşdirməyə başlayırıq. Ona görə də bizim gələcəklə bağlı nə isə deməyə ixtiyarımız yoxdur.

- Sizcə, psixoloji problemi olan insan kimin yanına getməlidir. Parapsixoloqun, yoxsa psixoloqun?

-Psixologiyanın 42 hissəsi var. Psixologiya bayaq dediyim kimi insanı cəmiyyət üçün formalaşdırır. Parapsixologiyanın isə bizə məlum olan 4 mindən çox qolları var. Burda bütün elmlər əhatə olunub. Parapsixologiya insanın ailə vəziyyətini, qonşularla münasibətini və digər məsələləri əhatə edir. Bu dəqiqə mən sizin auranızı görürəm və sizə elə bir dioqnoz qoya bilərəm ki, bu sizin psixkanıza təsir etsin. Dioqnoz qoymaqla insanda olan mənfi qüvvələr barədə məlumat verirəm. İnsanlara yuyunmaq, məşq eləmək kimi tövsiyələr edirəm. Amma həmin mənfi qüvvələri olan insan cadugərin yanına getsə, o bunun əməl olduğunu deyəcək. O bu sözləri ilə sizi proqramlaşdıracaq və psixologiyanızı zədələyəcək. Parapsixoloqa müraciət etməklə insanlar özlərinin psixi durumunu və özlərinə necə kömək etməyi öyrənir. Hər bir parapsixoloq qarşısındankı insandan bir parapsixoloq yaradır.

Parapsixoloq yaradır ki, həmin insan özünün yiyəsi olsun. İçindəki Allahı görsün və gəldiyi bu dünyada sınaqdan keçə bilsin. Falçılar sadəcə olaraq insanları aldadırlar. Onlara yaxınlaşmaq doğru deyil.

-Astrologiya barədə nə deyə bilərsiniz?

-Astrologiya da parapsixologiyanın 4000 mindən çox olan qollarından biridir.

-Televiziya proqramlarına qonaq olmaqla bir anda məşhur olan Zirəddinin fəaliyyəti barədə nə deyə bilərsiniz? Hətta onu satanistlikdə də günahlandıranlar oldu?

-O satanist deyil. Onda öncəgörmə çox güclüdür. Onun həm keçmişi, həm də gələcəyi görmə qabiliyyəti var. Azərbaycana gəldikdən sonra Zirəddinə kənardan çox psixi təsirlər oldu. Onu bəzi sirləri açıb deməyə məcbur etdilər. Falçı səviyyəsinə endirdilər. Amma həmin sirrləri açmaq lazım deyildi. İnsan psixologiyası həmin informasiyaları qəbul etməyə hazır deyil. Bu elmin elə qolları var ki, hər şeyi demək olmaz. Zirəddin parapsixologiyanın bir neçə qolu ilə birlikdə işləməyi bacarır. Əgər mən burda oturub ABŞ-da yaşayan birinin həyatı haqqında məlumat verirəmsə, din xadimləri üçün bu artıq küfürdür.

-Falçılara inam meylinin güclü olması bizim insanların psixoloji səviyyəsi ilə bağlı ola bilərmi?

-20 il Rusiyada yaşamışam. Moskvada bu elmlə bağlı çox araşdırmalar aparmışam. Moskvanın özündə bu elmlə təmiz məşğul olan yoxdur. Hamısı insanların başını aldatmaqla məşğul olan sektalardır ki, falçılıq edirlər. Bütün dünya ölkələrində bu cür falçılar var. Bu təkcə Azərbaycanda deyil. Baxmayaraq ki, Hindistan yoqanın mərkəzidir orda da falçılıq var.

-Azərbaycanda parapsixologiya sahəsində özünüzə müəllim bildiyiniz bir insan var?

- Yox, mən yoqa sistemi ilə fəaliyyətə başlamışam. Bu elmlə məndən əvvəl məşğul olan Etibar Erkin olub. Çox az zamandır ki, o insan haqqında məlumat almışam. Bu dəqiqə Azərbaycanda parapsixologiya elmi demək olar ki, yoxdur.

-Fikrimcə, parapsixologiya, ekstarsens və daha bu kimi peşəsi olanların fəaliyyətinə həkim-yəni elm tərəfindən yoxlanıldıqdan sonra icazə verilməlidir. Siz bu fikirlə razısınız?

-Psixiatriya parapsixologiyanın bir qoludur. Siz cüzi bir psixoloji problemlə psixoterapevtə müraciət etsəniz onlar sizi xəstə kimi qəbul edəcək. Halbuki parapsixologiya vasitəsilə cüzi bir təsirlə həmin probloemi aradan qaldırmaq olar. Ancaq psixoterapiyada elə bir sistem yaradıblar ki, adi insanları da əsəb xəstəsi kimi qəbul edirlər. Normal insanları narkotik maddələrdən istifadə etməklə keyləşdirirlər. Ona görə də bizim kimi adamı onlar yoxlaya bilməz. Psixoterapevtin parapsixoloqa dioqnoz qoymağa, lisenziya verməyə ixtiyarı yoxdur. Deyək ki, psixoterapevt hansısa başqa bir ölkədə yaşayan insana dioqnoz qoya bilməyəcək. Çünki bu para, yəni görünməyən tərəfdir. Psixoterapiya yalnız görünən hissələri deyə bilir.

Məsələn, qarabasmaları tomaqrafiya edirlər orda heç nə görünmür. Amma mən tomoqrafiyasız sizin başınızda hansı proseslərin getdiyini açıqlaya bilərəm. Psixologiya ilə məşğul olan heç bir mütəxəssis qarabasmaya diaqnoz qoya bilmir. Psixoterapiya ilə məşğul olanlar ancaq materiyanı görürlər. Parapsixologiya elminin əsas fundamenti kvant fizikasıdır. Biz eyni vaxtda həm hissə, həm də dalğayıq. Yəni biz eyni vaxtda həm burda, həm də deyək ki, Yupiterdəyik. Bunu sübut etmək üçün biz fizikanın adi qayda-qanununa baxa bilərik. İşığın surəti saniyədə 300 min kilometrdir, burdan da bizə ayın radiusuna 450 min kilometrdir. Burdan fikrimizi aya çatdırmaq üçün bizə saniyə yarım vaxt lazımdır. Amma biz batilə getsək görəcəyik ki, orda heç bir məsafə söhbəti yoxdur.

-Bəs, parapsixologiya, ekstrasenslik adı altında insanların aldadılmasını necə nəzarətdə saxlamaq olar?

-Mən dəfələrlə dövlətin rəsmi orqanlarına müraciət etmişəm ki, parapsixologiya elmi dövlət səviyyəsində tanınsın. Biz bir institut yaradaq və bu elmdən sui-istifadə etməyə çalışanların hamısını nəzarətdə saxlayaq. Hazırlaşıram ki, Heydər Əliyev Fondunun rəhbəri Mehriban Əliyevaya da müraciət edəm. Ondan xahiş edəcəyik bizə klinika ayırsın. Parapsixologiyanın inkişafı ilə bağlı qəti tədbirlər görülməlidir. Bu yolla saxta falçıları, ekstrasensləri də ifşa etmək mümkündür.

Aygün

Olaylar.- 2009.- 16 aprel.- S. 6.