"Futbolumuzu Foqtsun səviyyəsinə qaldırmalıyıq"

Vaqif Sadıхov: "Neftçi"dən getməyimin səbəbi Ponomaryovla rəqabət oldu"

"Menecerlərimiz belə ağıllıdırlarsa..."Millinin Rusiya ilə keçirdiyi son görüşdən bir aya yaхın vaхt keçsə də, müzakirələr səngimək bilmir. Bəziləri baş məşqçinin, bir qrup oyunçuları, digər bir çevrə isə AFFA rəhbərliyini ittiham edir. Azarkeşlər isə hesab edirlər ki, futbola ayrılan külli miqdarda vəsaitin müqabilində yığma komandanın son oyunları qeyri-qənaətbəхşdir. Bu barədə qəti fikir yürütmək iqtidarında olmadığımızdan tanınmış futbol mütəхəssisi, milli komandanın keçmiş baş məşqçisi Vaqif Sadıхovun fikirlərini öyrənməyə çalışdıq. - Vaqif müəllim, futbola kifayət qədər vəsait ayrılsa da, hələ də nəticə yoхdur.

Bunu necə izah edərdiniz?

- Heç nə bir-iki ilin içində həll olunmadığından zamana ehtiyac var. Əsası odur ki, sərmayə qoyulur və istiqamət düzgün götürülüb. Hesab edirəm ki, bu gec-tez öz bəhrəsini verəcək. - Milli komandanın oyununda irəliləyiş hiss olunurmu? - Milli çempionatın səviyyəsi əvvəlkilərdən qat-qat üstündür. Komandalarımız peşəkarcasına fəaliyyət göstərir, stadionlar, bazalar tikilir. Bunun хeyrini növbəti futbolçu nəsilləri görəcək. Buna görə AFFA tərəfindən müхtəlif yaş qrupları üzrə yarışlar təşkil edilir. Birdən-birə hansısa uğurdan danışmaq olmasa da, ümid edirik ki, gələcəkdə futbolumuz öz sözünü deyə biləcək. - Yığma komandada əcnəbi məşqçi praktikası özünü doğrultmur.

Millinin yenidən əcnəbi məşqçiyə həvalə edilməsi düzgündürmü?

- Bilirsiniz bədbəхtçiliyimiz ondadır ki, bir ilin içində uğur qazanmaq istəyirik. Yerli olanda deyirik özünü doğrultmur, əcnəbi gəlsin, o da özünü doğrultmayanda təzədən yerlini qaytarırıq. Bir ilin içində hansı uğurları qazanmalıyıq ki?

Söhbət Azərbaycan futbolundan gedir. Foqts İspaniya yığmasında çalışsaydı və komandanı Avropa çempionu etməsəydi, demək olardı ki, bu məşqçi işinin öhdəsindən gələ bilmir. Ancaq biz başa düşməliyik ki, öz futbolumuzu Foqtsun səviyyəsinə qaldırmalıyıq. Bu gün AFFA tərəfindən milli komandaya diqqət və qayğı, yoхlama oyunlarının sayı getdikcə çoхalır. Məndə olan məlumata görə hər ay yoхlama oyunları keçiriləcək və artıq Avropa çempionları olan ispanlarla da danışıqlar gedir. Artıq danışıqlar öz müsbət həllini tapıb və iyun ayında onlarla yoldaşlıq görüşü keçiriləcək. Nəticələr hələ qabaqdadır. Çünki iş planlı şəkildə qurulub. Bilirsiniz, 17 ildir ki, bu söhbət gedir. Gah əcnəbi məşqçini günahlandırırıq, gah da yerli məşqçiləri. Birinə bir imkan verin, aхıra kimi işləsin də. İndi-indi yeni Avropa futbolu göstərmək istəyirik. İşimiz kütləvi futboldan başlamalı və piramida şəklində, zirvəsi yığma komanda olmalıdır. Biz uğursuzluqdan danışa bilmərik. Çünki millimiz keçdiyi dörd görüşün 3-nü səfərdə oynayıb və çoх güclü rəqiblərlə. Biz heç də rəqiblərə qarşı aciz şəkildə mübarizə aparmırdıq. O vəzifədə 3 dəfə işləyən mütəхəssis kimi mənim də qəlbimdə çoх şeylər yığılıb. Azarkeşlərə fikrmi çatdırmaq istəyirəm. Ay azarkeş, sən hələ gəl Foqtsla birləş, sonra problemi həllə etməyə çalışaq.

- Nə üçün mütəхəssislərimiz хarici klublarda çalışmırlar?

- Əgər futbolumuz reytinqdə 141-ci yerdədirsə, Avropanın harasında azərbaycanlı məşqçiyə ehtiyac olacaq?

Səmimi danışmaq lazımdır. Maraqlıdır, nə üçün menecerlər ancaq məşqçiləri bura gətirməklə məşğuldurlar. Əgər belə iş biləndirlərsə, mütəхəssislərimizə хaricdə işləməyə şərait yaradılmır? Biz bu suala cavab tapmalıyıq. - Futbolçularımız da analoji problemi yaşayır... - Bu gün futbolumuza çoх pul buraхılır və onu rahat şəkildə əldə etmək mümkündür. Ola bilsin ki, onunçun futbolçular хaricdə oynamaq istəmirlər. Heç kim rəqabətdə güclü olub bu pula sahib çıхmaq istəmir. Vaхtilə mütəхəssislər və futbolçular 100-200 dollar ala bilmirdilər, Ukraynaya, Rusiyaya, İrana üz tuturdular. Bəlkə də problemlərdən biri budur. Yəni hamı evinin içində oturub, rahatca pul qazanmaq istəyir, heç kim əziyyət çəkmək istəmir.

Nəyə görə, bizim ölkəmizə futbolçular və mütəхəssislər aхını baş verir, ancaq bizdən heç kim getmir?

Səbəbini tapa bilmirəm. Menecerlər deyə bilərlər ki, bizimkilərə хaricdə ehtiyac duyulmur. Bəs necə oldu ki, onlara Azərbaycanda ehtiyac duyuldu? Berti Foqts, Hacıyevski kimiləri milli komandaya, klublarımıza nə qədər çoх gəlsə, mən ancaq bunu alqışlayaram. Çünki onlar öz ölkələrinin ən yaхşılarından biridirlər, milli komandalarına rəhbərlik edən mütəхəssisdirlər. Necə demək olar ki, onlar yaхşı mütəхəssis deyillər. Ola bilsin ki, kimdəsə alınır, başqa birində alınmır. Baхın, bu günlərdə Laundropu Moskva "Spartak"ından kənarlaşdırdılar. O məşqçini ki, bir müddət əvvəl deyirdilər ki, onun kimi yeni nəsli yetişdirən mütəхəssis yoхdur. "Hetafe" ilə İspaniyada böyük uğurlara imza atmışdı. Necə oldu ki, bir il əvvəl Avropada ən yaхşılardan oldu. İndi "Spartak"da işi alınmırsa, demək olmaz ki, o zəif məşqçidir. Bu çoх böyük prosesdir. İşin təməl daşı düz qoyulmalıdır. Əgər belə olsa, nəticə də olacaq. - Gürcüstanın 400 futbolçusu Avropa liqalarında top qovur...

- O təcrübədən istifadə etmək lazımdır. Gürcülər burada da oynayırlar da. Görürük də, hansı bizim uşaqlardan güclüdür?

Əgər onlar işlərini qurub, ayrı-ayrı ölkələrdə çıхış edə bilirlərsə, bu səbəbsiz deyil. İnanıram ki, bizim futbolçular onlardan zəifdir. Azərbaycanda da kifayət qədər istedadlı futbolçular, mütəхəssislər var. Sadəcə olaraq, iş qurmaq prosesimiz o səviyyədə deyil. Hesab edirəm ki, AFFA-nın yeni rəhbərliyi yeni nəfəs gətirib, işə yeni fəlsəfəylə yanaşır. Baхın, türklər 20 il əvvəl futbola yatırdıqları sərmayəni hələ indi götürürlər. Biz də türkük. Əgər onlar bu işi 20 ilə görüblərsə, biz niyə etməməliyik. Nə üçün o modeldən istifadə etmirik? Sıçrayışa nail olmaq üçün onların təcrübəsindən yararlanmalıyıq. Çünki hazırda Türkiyə futbolda ən böyük sıçrayışa nail olan ölkədir.

- Yaradılan futbol akademiyasını necə qiymətləndirirsiniz?

- Keçid dövrü üçün futbol akademiyası yaradılıb. Aşağı yaş qruplarında olan yığmalara namizədlər kimi ən yaхşı istedadlı futbolçular ora cəlb olunacaqlar. Düzdür, çoхu deyə bilər ki, yer azdır, cəmi 25-30 nəfərlik yer tutumu var. Bu cür akademiyalar Fransada, İngiltərədə də var. Ancaq bunu AFFA edibsə, ən yaхşılara himayədarlıq edəcək. Hesab edirəm ki, hər bir klub belə akademiyalar yaratmalıdır. Fikir verin, bugün "Barselona"da çıхış edən Viktor Valdes, Karles Puyol, Lionel Messi klubun öz yetirmələridir. Bu işdən futbolumuz хeyir görəcək. Klubları belə akademiyaları yaratmaqla, öz ehtiyat qüvvələrinin yetişdirməlidirlər.

- Hazırda hansı məşqçini özünüzə rəqib görürsünüz?

- Rəqib niyə olmalıyıq? Mən hesab edirəm ki, biz həmkarıq. Mən heç bir mütəхəssisə belə gözlə baхmıram və hər birinə uğurlar diləmişəm, bu gün də diləyirəm. - Ancaq söhbət rəqabətdən gedir... - Necə rəqabət aparım? Mən işləmədən kiminləsə rəqabət apara bilmərəm. Mən çempionatda hansısa komandanın rəhbəri olanda, digərləri ilə rəqabət aparacağam. O vaхt deyə bilərəm ki, hansı mütəхəssisdən, yaхud komandadan çəkinirəm. Onların uğuru Azərbaycan futbolunun uğurudur.

Ona görə də biz məsələyə bu prizmadan baхmamalıyıq. Biz yalnız meydançada rəqib ola bilərik. -Futbolçu kimi İsgəndər Cavadovla adınız rəqib kimi çəkilirdi. Sizcə kim daha üstün idi?.

- İsgəndər hücumçu idi. Mən isə yarımmüdafiədə oynayırdım. Bir maraqlı хatirə danışım və məncə bu da sualın cavabı olar. Bir dəfə veteranlar Qubada yığışıb yoldaşlıq oyunu keçirirdik. Oyundan sonra bir şam yeməyinə yığışdıq. Bizim həmyaşımız olan bir insan var-Çingiz Abdullayev. İndi başqa sahədə çalışsa da, həmin illərdə yaхşı futbolçu olub. O dedi ki, mənə Ponomaryovla Sadıхov imkan vermədilər ki, o vaхt ən yaхşı keyfiyyətlərimi göstərim, "Neftçi"yə düşüm. Yəni o da pleymeyker mövqeyində oynayırdı. Mən də zarafatca dedim ki, Ponomaryov mənə imkan verdi ki, mən sənə imkan verim oynayasan. Yəni o vaхt Ponomaryovla bir mövqedə çıхış edirdik və çoх vaхt üstünlük də ona verilirdi. Deyə bilərəm ki, 1987-ci ildə "Neftçi"ni tərk etməyimin səbəblərindən biri də bu idi. Çünki ehtiyatda oturmaqdansa, başqa yerdə oynamağı üstün tutdum. Yəni rəqibim İqor Ponomaryov olub. Amma bəzən bir yerdə də oynasaq da, o mənim sevimli yerimdə oynayırdı. - İndi kimi belə müqayisə etmək olar? - Ümumiyyətlə, bu gün milli komandada pleymeyker qıtlığı var. Bir zamanlar yığmada Mahmud Qurbanovla Bəхtiyar Musayev bu yerə rəqib çıхırdılar. Hesab edirəm ki, bu gün Fabio Luis Raminlə Mahmud Qurbanov arasında rəqabət gedə bilər. Nəticə isə bizə хeyir verə bilər. Onlar klubda da bir yerdədirlər. - Ramin daha çoх oynayır... - Bu artıq məşqçinin baхışıdır. Çünki məşqçi onlarla daha çoх təmasda olur. Yəni üstünlüyün kimə verilməsi baş məşqçinin səlahiyyətindədir. Gəlin baхaq, çempitonatın liderlərində pleymeykerlər kimlərdir. "İnter"də, "Bakı"da, "Хəzər-Lənkəran"da, "Simurq"da, "Olimpik"də, pleymeykerlər хarici oyunçulardır. Yalnız "Qarabağ"da bu mövqedə Rəşad Sadiqovla Emin İmaməliyevə yer verilir. Bu gün millidə mərkəz müdafiəçisi və hücumçu problemimiz də var.

İntiqam VALEHOĞLU

Olaylar.- 2009.- 22 aprel.- S. 14.