Prezident yanında müşavirənin bir sıra mühüm məqamları

Güclü dövlət və demokratik cəmiyyət quruculuğunda

Azərbaycan Respublikasının prezidenti yanında keçirilən son müşavirə çox mühüm məqamlara aydınlıq gətirdi. Müşavirədə ölkə başçısının çıxışı isə dövlətimizin həyata keçirdiyi sosial-iqtisadi, mədəni və siyasi islahatların ümumi mahiyyətinin açılmasında olduqca maraqlı cəhətləri ifadə etdi. Bu baxımdan prezidentin ekologiya, maliyyə xərcləri və başqa önəmli amillər haqqında söylədikləri ayrıca təhlillər tələb edir. Prezidentin təhlilləri və məmurlara tutduğu iradlar, onun hər bir problemə vaxtında reaksiya verdiyini, idarəetmədə demokratikliklə məsuliyyəti uyğunlaşdırdığını göstərdi. Öncə prezidentin son 5 ildə həyata keçirdiyi proqramlar və müşavirədə yer alan bir sıra məqamlar üzərində dayanmaq yaxşı olardı.

2003-2008-ci illərdə Azərbaycanda nəhəng dəyişikliklər baş verdi. Bunu sosial həyatın bütün sahələrində, siyasi islahatlarda, demokratik cəmiyyət quruculuğunda görmək mümkündür. Bu dəyişiklikləri ifadə edən rəqəmləri prezident müşavirədə bir daha dedi. Həmin rəqəmlərin təhlili göstərir ki, Azərbaycan dövlət və cəmiyyət olaraq keyfiyyətcə yeni mərhələyə qədəm qoymuşdur. Enerji sahəsində ölkənin əldə etdiyi nəticələr diqqətləri çox çəkmişdir. Azərbaycan bu müddətdə həm bölgənin enerji təhlükəsizliyi sisteminin formalaşmasında, həm də bütövlükdə iqtisadi sistemin modernləşməsində ciddi nailiyyətlərə imza atmışdır. Enerji layihələrinin həyata keçməsi bütün bölgə üçün yeni imkanlar açmışdır. Azərbaycanın dövlət olaraq qüdrəti özünü göstərmişdir. Enerji ilə təminat məsələsi yeni səviyyəyə qalxmışdır. O baxımdan Azərbaycanın enerji idxal edən ölkədən enerji ixrac edən ölkəyə çevrilməsi əlamətdar hadisədir. Əslində bu dəyişiklik strateji baxımdan prinsipial əhəmiyyət daşıyır. Çünki bu, faktiki olaraq dövlətçiliyin inkişafı dinamikasının əsas göstəricilərindən biridir. Azərbaycanın enerji ixrac edən ölkə kimi geosiyasi çəkisi bir neçə dəfə artmışdır. Xarici sərmayələrin ölkəyə axınının güclənməsi onun əlamətlərindən biridir. Prezident qeyd etdi ki, burada önəm daşıyan amillərdən biri sərmayə axınının dünyanı maliyyə böhranı bürüdüyü bir zamanda da davam etməsidir. Bu, faktiki olaraq Cənubi Qafqazda “kimin kim olduğunu ortaya qoyur”. Dünyanın ən qabaqcıl dövlətləri belə maliyyə böhranından əziyyət çəkdiyi bir vaxtda Azərbaycanda inkişafın davam etməsi dövlət quruculuğunun ciddi göstəricisidir. Keçən müddətdə Azərbaycanın bu yolu qət etməsi faktiki olaraq onun Cənubi Qafqazın lideri olaraq özünü tam təsdiq etməsidir. Məsələnin bu tərəfi daha önəmlidir. Çünki Cənubi Qafqazın lideri ola bilmək dünyanın böyük dövlətlərinin bu bölgədə kimlərlə hesablaşmalı olduğunu nümayiş etdirir. Belə ki, Azərbaycanın dünya miqyasına yeri və rolu ilə əlaqəli konkret mövqe formalaşıb. Bu, məhz prezident İlham Əliyevin rəhbərliyi dövründə özünü daha qabarıq göstərməkdədir. Demək olar ki, bu məsələ digər önəmli dəyişikliklər üçün stimulverici rol oynamışdır. Azərbaycan vətəndaşlarının həyat səviyyəsinin müntəzəm olaraq artmasına daha ciddi əsaslar yaratmışdır. Bu da özlüyündə demokratiyanın möhkəm təməlinin formalaşmasına yardım etmişdir. Zəngin vətəndaşların azad olmaq şansları çoxdur. Bununla bağlı dünyanın aparıcı tədqiqatçıları dərin araşdırmalar aparıblar.

Son 5 ildə Azərbaycanda həyata keçirilən sosial-iqtisadi proqramların ümumi mahiyyəti güclü dövlət qurulması istiqamətində ciddi addımlar atıldığını nümayiş etdirir. Güclü dövlət quruculuğu demokratik cəmiyyət quruculuğu ilə paralel aparılır. Ona görə də bu müddətdə vətəndaş cəmiyyətinin formalaşması istiqamətində də vacib proqramların həyata keçirildiyini demək lazımdır. Vətəndaş cəmiyyəti quruculuğu hər bir dövlət üçün yaradıcı prosesdir. Onun reallaşması üçün tam elmi əsaslandırılmış strateji formalaşdırmaq lazımdır. Bu illərdə həm də bu istiqamətdə Azərbaycan tarixi işlər görmüşdür. Belə demək mümkündürsə, sosial, iqtisadi, mədəni və başqa sahələr üzrə bir-biri ilə uyğunlaşmış tədbirlər həyata keçirilmişdir. O baxımdan Azərbaycan prezidentinin müşavirənin yekununda bir sıra iradlar bildirməsi, konkret vəzifələr müəyyənləşdirməsi həm də gələcək baxımından əhəmiyyət daşıyır. O məqamların təhlili artıq başqa yazıların mövzusudur.

Şahin Məhəmmədoğlu

Olaylar.- 2009.- 24 aprel.- S. 7.