Bakıda beynəlxalq təhsil sərgisi başladı

Dünəndən “Landmark” hotelinin Biznes Mərkəzində Kaspi Təhsil Mərkəzinin təşkilatçılığı ilə “Beynəlxalq Təhsil Sərgisi-2010” öz işinə başlayıb. Sərgidə Böyük Britaniya, ABŞ, İsveçrə və Türkiyənin ən nüfuzlu universitetləri və bir sıra beynəlxalq təşkilatlar iştirak edib.

Qeyd edək ki, Prezident Administrasiyasının İctimai-siyası məsələlər şöbəsinin müdiri Əli Həsənov, təhsil nazirinin müavini Elmar Qasımov və gənclər və idman nazirinin müavini İntiqam Babayevin iştirak etdiyi beynəlxalq təhsil sərgisinə Nyukasl, İst Anglia, Glion Universitetləri və digər nüfuzlu təhsil müəssisələri qatılıb. Sərginin təşkilində məqsəd tələbələrin bir sıra tanınmış xarici universitetlərlə tanışlığı, yerli ali təhsil ocaqları ilə əməkdaşlıq əlaqələrinin qurulması, səfərlərin təşkili və məlumatverici təqdimatların həyata keçirilməsidir.

Sərginin açılış mərasimində çıxış edən təhsil nazirinin müavini Elmar Qasımov vurğuladı ki, beynəlxalq təhsil sərgisi praktikasında Kaspi Təhsil Mərkəzi böyük təcrübəyə malikdir. Onun sözlərinə görə, artıq 2-ci dəfədir ki, keçirilən sərgi gənclərin böyük marağına səbəb olub. Nazir müavini əlavə edib ki, dünyanın aparıcı universitetlərinin nümayəndələrinin Azərbaycanda keçirilən sərgidə iştirakı və universitetlərini təmsil etmələri böyük uğurdur. Hazırda Azərbaycanın 500-ə yaxın tələbəsinin xaricdə təhsil aldığı da diqqətə çatdırıldı.

Prezident Administrasiyasının ictimai-siyasi məsələlər şöbəsinin müdiri Əli Həsənov bildirdi ki, Azərbaycan təhsil sahəsində də reallaşdırdığı mühüm və strateji layihələri həyata keçirir: “Azərbaycan Prezidenti İlham Əliyev dəfələrlə bəyan edib ki, biz neft kapitalını insan kapitalına çevirməliyik. Neftdən gələn gəlirləri bir tərəfdən respublikanın qeyri-neft sektorunun inkişafına, digər tərəfdən isə gənc nəslin yetişməsinə, ölkənin intellektual gələcəyinin hazırlanmasına, gənclərin xarici ölkələrin ən qabaqcıl universitetlərində təhsil almaları işinə yönəltmək lazımdır. Bu mənada dünyanın aparıcı universitetlərinin öz imkanlarını və təhsil konsepsiyalarını Azərbaycan gənclərinə təqdim etməsi müsbət haldır”.

İsveçrənin Qlion Universitetinin tələbə qəbulu komissiyasının direktoru Yuliya Tokareva bildirib ki, bu cür tədbirlər azərbaycanlı tələbələr üçün yeni imkanlar açır: “Bizim universitetdə üç azərbaycanlı tələbə təhsil alır. Onlar təhsil və davranışları ilə yaxşı mənada seçilirlər”.

Artıq dördüncü dəfə Azərbaycanda olduğunu qeyd edən Kembric təhsil qrupunun meneceri Kris Broadhörst bildirib: “Ölkənizə hər dəfə gələndə inkişafın şahidi oluram. Mən bu sərgini çox yüksək qiymətləndirirəm. Burada azərbaycanlı tələbələr üçün çox gözəl imkanlar yaradılıb. Onlar sərgidə xarici universitetlərin təmsilçiləri ilə birbaşa təmasda olurlar”.

Sərgidə tələbələrin universitetlərlə yaxından tanışlığı, video təqdimatların izlənilməsi, təklif olunan proqramlar haqda məlumatlandırılması təmin olunmuşdu. Burada müxtəlif və məşhur dünya universitetləri yaxşı təşkil olunmuş stendlərlə, zəngin vəsaitlər və məlumat kitabçaları ilə təmsil olunurdu. Sərgidə xeyli sayda tələbə, eləcə də təhsillə bağlı şəxslər iştirak edirdi.

Məlumat üçün onu da bildirək ki, bu gün Kaspi Tədris Mərkəzində universitetlərin tələbələr üçün fərdi seminarları təşkil olunacaq.

İlkin

Palitra. -2010. -7 aprel. – S.4.