KİV-in İnkişafına Dövlət Dəstəyi Fondunun fəaliyyətə başlamasından bir il ötdü...

Məlum olduğu kimi, Azərbaycan Prezidentinin 2008-ci il 31 iyul tarixli Sərəncamı ilə təsdiq edilmiş “Azərbaycan Respublikasında Kütləvi İnformasiya Vasitələrinin İnkişafına Dövlət Dəstəyi Konsepsiyası” əsasında Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu yaradıldı. Fondun fəaliyyət göstərməsinin bir ili artıq tamam oldu.

Fond ötən ildən fəaliyyət göstərməklə ölkəmizdə söz, fikir və məlumat azadlığının təmin edilməsi, mətbu orqan və agentliklərin inkişafı, jurnalist peşəkarlığının yüksəldilməsi və jurnalistlərin sosial təminatının yaxşılaşdırılması məqsədi ilə mütəmadi olaraq mətbu orqanlar və jurnalist təşkilatları arasında maliyyələşmə müsabiqələri, həmçinin jurnalistlər üçün fərdi müsabiqələr keçirməkdədir. Bu baxımdan fondun fəaliyyəti KİV sahəsində yeni bir canlanmaya səbəb olub. Belə ki, cəmiyyət üçün olduqca aktual sayılan və araşdırılması vacib olan çoxlu sahələrlə bağlı məhz fondun fəaliyyətə başlamasından sonra mətbu orqanlarda tədqiqatlar, jurnalist araşdırmaları intensivləşməyə başlayıb. Daha konkret qeyd etsək, fondun istər qəzet və təşkilatlar, istərsə jurnalistlər üçün fərdi qaydada elan etdiyi müsabiqələrin istiqamətləri, mövzuları olduqca aktuallıq kəsb edir. Ona görə də bu istiqamətlər üzrə maliyyələşən layihələrin reallaşması, jurnalist araşdırmalarının işıq üzü görməsi nəticəsində mətbu orqanlar mövzu qıtlığından, səthi yazılarla səhifələri doldurmaq məcburiyyətindən xilas olmaqdadır. Çünki müsabiqə rəqabəti şəraitində mətbu orqan və təşkilatların layihələri məsuliyyətlə icra etmələri layihələr çərçivəsində yazılan yazıların da keyfiyyətli olmasını diktə edir. Belə bir halda isə təbii ki, mətbuat nümayəndələrinin müxtəlif sahələrlə bağlı araşdırma təcrübələri də artmış olur. Eləcə də fondun maliyyələşdirdiyi layihələr çərçivəsində jurnalistlərin müxtəlif sahələr üzrə peşəkarlıq və bacarıqlarının artırılması təlimləri də keçirilir ki, bu da KİV-in ümumi inkişafı və jurnalist yazılarının səviyyəsinin yüksəlməsi üçün əlavə stimuldur.

Fondun fəaliyyətə başlamasından sonra müşahidə olunan məqamlardan biri də odur ki, müsabiqələr nəticəsində maliyyələşən və layihə həyata keçirməyə başlayan qəzetlər cəmiyyətə daha açıq oldu. Belə ki, layihələr çərçivəsində müxtəlif mövzuları işıqlandıran qəzetlər cəmiyyət üzvlərinin, ictimaiyyət nümayəndələrinin fikirlərini işıqlandırmaqla daha oxunaqlı olmaqdadır. Layihələrin ictimai inkişaf baxımından ideya axtarışı və yeni təkliflərin ortaya çıxmasını sövq etməsi isə qəzetlərin ictimai faydalılıq əmsalını daha da artırmış olur.

O da qeyd edilməlidir ki, fondun keçirdiyi müsabiqələr nəticəsində qəzetlər yeni texniki avadanlıqlar, kompyuterlərlə də təmin olunmağa başlayıblar ki, bu da KİV-lərin maddi-texniki bazasının gücləndirilməsi baxımından çox yaxşı haldır.

Qeyd edildiyi kimi, fondun fəaliyyət istiqamətlərindən biri fərdi jurnalist yazıları ilə bağlı müsabiqələr keçirilməsidir. Fondun jurnalistlərin sosial təminatının yaxşılaşdırılması, yazıları ilə fərqlənən jurnalistlərin mükafatlandırılması ilə bağlı həyata keçirdiyi bu cür müsabiqələr mütəmadi hal alıb. Qeyd edək ki, bu müsabiqələrdə elan edilən istiqamətlər və mövzular Konsepsiyada irəli sürülmüş istiqamətlər əsasında müəyyənləşir və Fondun Müşahidə Şurası tərəfindən təsdiq edilir. Fond artıq növbəti belə müsabiqəni elan etməyə hazırlaşır. Fond müsabiqələrin effektli, ictimai aktual mövzular üzrə aparılması və cəmiyyətimizi narahat edən məsələlərin geniş ictimai müzakirəyə çıxarılmasını təmin etmək üçün növbəti müsabiqəni elan etməzdən əvvəl qəzet redaksiyalarının, təcrübəli redaktorların və qabaqcıl jurnalistlərin fikrini öyrənməyi məqsədəuyğun hesab edir. Bu isə mətbu orqanların sözügedən sahədə təşəbbüskarlıqlarının artırılması, təkliflərlə çıxış etməsi baxımından çox müsbət məqam hesab edilməlidir. Məlumat üçün qeyd edək ki, Konsepsiyada nəzərdə tutulan istiqamətlər bunlardır: vətəndaş cəmiyyəti, hüquqi dövlət quruculuğu; fikir, söz və məlumat azadlığının, plüralizmin inkişaf etdirilməsi; insan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması; ictimai və dövlət maraqlarının müdafiəsi;

- Ermənistan-Azərbaycan, Dağlıq Qarabağ münaqişəsi haqqında həqiqətlərin dünya ictimaiyyətinə çatdırılması, Azərbaycanın ədalətli mövqeyinin müdafiə edilməsi; Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi; qaçqın və məcburi köçkünlərin, əhalinin sosial cəhətdən qayğıya ehtiyacı olan təbəqələrinin problemlərinin işıqlandırılması; Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği; azərbaycançılıq ideyasının təbliği; gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi; regionların sosial-iqtisadi inkişafının təşviq edilməsi; azad sahibkarlığın və liberal iqtisadiyyatın təşviqi; informasiya və kommunikasiya texnologiyalarının inkişaf etdirilməsi; diaspor quruculuğu, lobbiçilik və dünya azərbaycanlılarının həmrəyliyi; dini və milli tolerantlıq, millətlərarası münasibətlərin inkişaf etdirilməsi; elmi-kütləvi, mədəni-maarif, təhsil proqramlarının hazırlanması; ekologiya və ətraf mühitin mühafizəsi; gender, ailə və demoqrafiya məsələlərinin işıqlandırılması; uşaq və gənclərin fiziki və mənəvi inkişafı.

Qeyd edilən istiqamətlər üzrə müsabiqəyə çıxarılacaq mövzular haqqında isə KİV-lər fikir və təkliflərinizi 10 aprel 2010-cu il tarixədək fonda yazılı şəkildə təqdim edə bilər.

Əlavə edək ki, “Palitra” qəzeti olaraq yuxarıda qeyd edilən istiqamətlər üzrə bəzi mövzuların da müsabiqə mövzuları arasında yer tapması üçün təklif verməyi borc bildik. Ona görə də bir sıra vacib amilləri nəzərə alıb müvafiq istiqamətlər üzrə bu mövzuları təklif edirik: təhsil haqları ilə bağlı olaraq maarifləndirmə işinin təşkili, Ermənistana qarşı informasiya savaşında maaarifləndirmənin həyata keçirilməsi, biomüxtəlifliyin qorunması ilə bağlı əhalinin maarifləndirilməsi, sudan istifadə ilə bağlı əhalinin maarifləndirilməsi.

Ümid edirik ki, təkliflərimizdən hər hansı biri fondun elan etdiyi müsabiqə mövzularında əksini tapacaq.

İlkin AĞAYEV

Palitra. -2010. – 7 aprel. – S.5.