Şərur teatrının yeni tamaşası

Ölkəmizdə, o cümlədən Naxçıvan Muxtar Respublikasında incəsənət sahələrinin inkişafı xalqımızın ümummilli lideri Heydər Əliyevin adı ilə bağlıdır. Bununla əlaqədar sərəncamlar imzalanıb, müvafiq tədbirlər həyata keçirilib. Naxçıvan MR Ali Məclisi sədrinin muxtar respublikada mövcud xalq teatrlarının və folklor ansambllarının fəaliyyətinə hərtərəfli qayğı göstərilməsi, habelə xalq mahnı və rəqslərinin, Naxçıvanla bağlı saz havalarının tədqiqi və təbliği, eləcə də qədim çalğı alətlərinin tətbiqinə diqqətin artırılması məqsədilə 7 fevral 2009-cu il tarixdə imzaladığı «Naxçıvan Muxtar Respublikasında xalq yaradıcılığı günlərinin keçirilməsi haqqında» sərəncamı da buna bariz nümunədir.

Bugünlərdə Rza Təhmasib adına Şərur Rayon Xalq Teatrının kollektivi Azərbaycan yazıçı-dramaturqu, ictimai xadim, Azərbaycan dramaturgiyasının banisi Mirzə Fətəli Axundovun məşhur «Hekayəti-müsyo Jordan və dərviş Məstəli Şah» komediyası ilə Naxçıvan Dövlət Universitetinin qonağı olub. Tədbir Naxçıvan MR Mədəniyyət və Turizm Nazirlyi və Şərur Rayon Mədəniyyət və Turizm şöbəsi nümayəndələrinin iştirakı ilə keçirilib.Əsası 1938-ci ildə dram dərnəyinin fəaliyyəti ilə qoyulmuş Şərur teatrı 1970-ci ildən sürətli inkişaf yoluna çıxıb və o vaxtdan kəndlərdə məktəblilər və zəhmətkeşlər qarşısında Səməd Vurğunun «Vaqif», böyük ədib Cəlil Məmmədquluzadənin «Ölülər» tamaşalarını dəfələrlə uğurla səhnələşdirib. 1981-ci ildə Naxçıvan MR Mədəniyyət və Turizm Nazirliyi tərəfindən Şərur rayon dram dərnəyi kollektivinə Xalq Teatrı statusu verilib, 1981-83-cü illərdə teatr məhsuldar fəaliyyət göstərib. Belə ki, onun repertuarında Qəni Hüseynovun «Nicat», M.F.Axundovun dram əsərləri, Ü.Hacıbəyovun «Leyli və Məcnun» operasından parçalar və s. əsərlər yer alıb. 1988-1993-cü illərdə respublikamızda gedən ictimai-siyasi hadisələr bu teatrda da durğunluq yaratsa da, müəyyən vaxtdan sonra, 2002-ci ildə Şərur Rayon Xalq Teatrı özünü təsdiqləyib, tamaşaçıların sevimlisinə çevrilib. 2005-ci ildə Şərur Rayon Xalq Teatrı Rza Təhmasibin adını daşımağa başlayıb. Demək olar ki, o vaxtdan teatr böyük inkişaf yoluna qədəm qoyub, buraya yeni bacarıqlı aktyorlar cəlb edilməyə başlayıb. Teatrın fəaliyyəti muxtar respublika rəhbərliyi tərəfindən yüksək qiymətləndirilib, kollektiv 2006-cı ildə Naxçıvan MR Ali Məclisinin fəxri fərmanına layiq görülüb. Bir-birinin ardınca yeni tamaşalar hazırlayan teatr bu gün də tamaşaçılarını sevindirməkdə davam edir. U

niversitetin rektoru, akademik İsa Həbibbəyli ali məktəb universitet səhnəsinə ilk dəfə qədəm qoyan məşhur teatr kollektivini salamlayıb, bunu universitet həyatında əlamətdar hadisə kimi dəyərləndirib. Rektor həmçinin universitetin Tələbə Opera və Teatr studiyasının Azərbaycan Respublikasının Əməkdar mədəniyyət işçisi, universitet müəllimi Gülxarə Əhmədovanın rəhbərliyi altında yüksək fəaliyyətinə də toxunub, gənc və istedadlı tələbə-aktyorların ifalarında müxtəlif xarici və Azərbaycan səhnə əsərlərinin uğurlu nümayişindən, qastrol səfərlərindən söz açıb. Rektor qonaq teatrın fəaliyyəti ilə yaxından tanış olduğunu vurğulayıb və səhnələşdiriləcək əsərin bu günümüz üçün aktuallığı baxımından tamaşaçılar tərəfindən maraqla qarşılanacağına əminliyini ifadə edib.

Qeyd edək ki, tamaşanın quruluşçu rejissoru və baş rollardan birinin ifaçısı Nəsimi Əyyuboğludur. Tərtibat və rəssam işləri, Hatəmxan ağa rolunu canlandırmaq Azərbaycan Respublikasının maarif xadimi Vaqif Əsrara, musiqi tərtibatı isə Həbib İmanova aiddir. Azərbaycan Respublikasının əməkdar mədəniyyət işçiləri Elçin Arzumanlı və Kimya Babayeva da tamaşada rol alıblar. Aktyorlardan Nemət İslamoğlunun (Dərviş Məstəli şah), Pərvanə Əsgərovanın (Şəhrəbanu xanım), Səyyarə Həsənovanın (Şərəfnisə xanım) təbii, peşəkar oyunları canlılığı, rəngliliyi ilə zalda davamlı alqışlara səbəb olub.

Sonda Şərur Rayon Mədəniyyət və Turizm Şöbəsinin müdiri Rafiq Cəfərov və Şərur Rayon İcra Hakimiyyətinin nümayəndəsi Əşrəf Qasımov çıxış edib, universitet rəhbərliyinə dəvətə görə minnətdarlıqlarını bildiriblər. Teatrın quruluşçu rejissoru və Şərur Rayon Mədəniyyət və Turizm Şöbəsinin təmsilçisi univesitet televiziyasına müsahibə də veriblər.

Cəfərova Nərmin

Palitra. -2010. – 9 aprel. – S.11.