Gənc sahibkarlar üçün yeni biznes imkanları

Bakıda «ECA 2010-da Yüksək İnnovasiya: Gənc sahibkarlar və yeni biznesin təşkili üçün investisiya hazırlığı və biznesin inkubasiya infrastrukturunun möhkəmləndirilməsi» Şərqi Avropa və Mərkəzi Asiya Biznes İnkubatorları və Texnologiya Parkları Şəbəkəsinin (ECAbit) V Beynəlxalq Konfransı başladı.

Tədbirdə çıxış edən Azərbaycanın gənclər və idman nazirinin müavini İntiqam Babayev tədbirin əhəmiyyətindən danışaraq bildirdi ki, məqsəd dünyada mövcud biznes və inkubator təcrübəsini öyrənmək, bu sahədə fəaliyyət istiqamətlərini müzakirə etməkdir. Gənc sahibkarların bu sahədə rolunun tapılmasında və istiqamətləndirilməsində nazirlik tərəfindən lazımi tədbirlərin görüldüyünü deyən İ.Babayev qeyd etdi ki, nəinki paytaxtda, həmçinin bölgələrdə müxtəlif tədbirlər keçirilir. Tədbirdə 15 ölkədən 20-yə yaxın nümayəndənin iştirak etdiyini deyən nazir müavininin sözlərinə görə, müasir dövrdə dünyada mövcud olan biznes nailiyyətlərini öyrənmək, həyata keçirmək və bu sahədə gənclərin iştirakını artırmaq çox vacib məsələlərdən biridir: “Sahibkarlıqla məşğul olmaq istəyən gənclərə dəstək verilməlidir. İnanıram ki, bu konfrans gənclərin bu sahəyə marağını daha da artıracaq və ölkələr Azərbaycanda özlərinə layiqli əməkdaşlar, tərəfdaşlar tapacaqlar”.Azərbaycanın çox dinamik inkişaf edən ölkələrdən biri olduğunu deyən Dünya Bankının (DB) “İnfoDev” (“İnformation for Development”) proqramının regional koordinatoru Ştefan Şandera bildirdi ki, Bakıda müşahidə etdikləri şərait bunun bariz nümunəsidir: “Biz Bakıda olarkən zəngin tarixin şahidi olduq. Gələcəkyönümlü atmosferin olduğunu müşahidə etdik”. “İnfoDev”in qlobal bir proqram olduğunu deyən Ş.Şandera qeyd etdi ki, məqsəd texnologiya sahəsində möhkəmliyi qoruyub saxlamaqdır. Bir çox ölkələrdə olduğu kimi DB Azərbaycanla da bu sahədə əməkdaşlıq etmək və mobil sosial şəbəkə yaratmaqda maraqlıdır.Azərbaycan Sahibkarlar Konfederasiyasının (ASK) sədri Məmməd Musayev ölkənin iqtisadi inkişafından danışaraq qeyd etdi ki, 2010-cu ilin 10 ayı ərzində ümumdaxili məhsulun artımı 45 faizi keçib və bunun da 85 faizi özəl sahibkarlığın payına düşür: “Bu il valyuta ehtiyatları 28 milyardı ötüb”. ASK-ın fəaliyyətinin prioritet sahələrindən biri də məhz gənc sahibkarlığın inkişafı ilə bağlı olduğunu deyən M.Musayev bildirdi ki, ümumiyyətlə, hazırda gənc sahibkarlığın inkişafı çox vacibdir: “İstərdik ki, gənc sahibkarlar bütün sahələrdə iştirak etsinlər. Yəqin ki, bu konfrans bir təkan olacaq. ASK bu istiqamətdə hər bir yardıma hazırdır”. Tədbirdə çıxış edən Xəzər İnvestisiya Mərkəzinin (CIC) prezidenti Elşən Musayev qeyd etdi ki, tezliklə Azərbaycanda Beynəlxalq İnnovasiya Mərkəzinin yaradılması nəzərdə tutulub. E.Musayev onu da bildirdi ki, artıq bir sıra ölkələrdə “biznes mələkləri” fəaliyyət göstərir: “Onların fəaliyyəti gənc sahibkarların səmərəli biznes-layihələri olduqda və bu layihənin icrası üçün vəsait olmadıqda maddi yardım göstərməkdən ibarətdir. Ümid edirəm ki, Azərbaycanda da analoji fəaliyyət yaradılacaq”. Qeyd edildi ki, tədbir çərçivəsində 2 treninqin keçirilməsi nəzərdə tutulub. Bu treninqləri Dünya Bankının ekspertləri keçəcəklər. Tədbirdə çıxış edən ECAbit-in koordinatoru Todor Yalamov bildirdi ki, iki gün davam edəcək konfransda gələcəkdə sahibkarlıqla məşğul olmaq istəyən gənclər üçün müxtəlif təlimlər keçiriləcək: “2008-ci ildə adıçəkilən mövzuda Bolqarıstanda tədbir keçirilib və bu istiqamətdə irəliləyişlər var. İnanırıq ki, Azərbaycanda da bu istiqamətdə nailiyyətlər əldə olunacaq. Bu tədbirin də məqsədi keçmişə yox, gələcəyə baxmaqdır”. Millət vəkili “İrəli” İctimai Birliyinin sədri Ceyhun Osmanlı bildirdi ki, yeni biznes inkubator və texnologiyalarının yaradılması ideyası bizə çox yaxındır: “Biznes üçün ilkin şərt ideyadır. İstərdik ki, gənclərimiz ənənəvi biznes sahələri ilə yanaşı yeni ideyaların daşıyıcıları olsun. Son 10 il ərzində ölkənin ən uğurlu cəhəti inkişaf etməkdə olan ölkəyə çevrilməsidir. İqtisadiyyatımız üç dəfə artdı. Azərbaycanın növbəti hədəfi inkişaf etmiş ölkə olmaqdır ki, burada insan kapitalı ön plandadır. Bu bir faktdır ki, vaxtilə taxta ixracı ilə tanınan Finlandiya hazırda “Nokia” istehsalçısı kimi tanınır”. Ölkəmizdə də elmə bağlı gənclərin sayının çox olduğunu deyən millət vəkilinin sözlərinə görə, ölkədə gənclərin sahibkarlıq, biznes fəaliyyəti üçün imkanlar var: “Ölkə başçısı da bugünlərdə Milli Məclisdə çıxışında gənclərin insan kapitalı kimi formalaşmasına bir daha toxundu. Hazırda xaricdə təhsil alan çoxsaylı gənclərimiz var. Sahibkarlıq istiqamətində də gənclərimiz öz bacarıqlarını daha da genişləndirməlidirlər. Bu gün “İrəli” İctimai Birliyində gənclərin Biznes Klubu fəaliyyət göstərir ki, məqsəd gənc sahibkarlar yetişdirməkdir”. Tədbirdə həmçinin bildirildi ki, 3-7 dekabr 2010-cu il tarixində Azərbaycan Tələbə Gənclər Təşkilatları İttifaqının (ATGTİ) qərargahında gənclərin iş hüquqları mövzusunda seminar təşkil ediləcək. “Gənclərin məşğulluğunda istismar halları ilə mübarizə” adlanan seminar “Gənclik Təşəbbüsləri” İctimai Birliyi Avropa Gənclər Fondu və Azərbaycan Respublikası Gənclər və İdman Nazirliyinin dəstəyi ilə həyata keçiriləcək.Bu layihənin məqsədi gənclərin əmək hüquqlarının qorunmasında gənclər təşkilatlarını mübarizəyə qaldırmaq, onları beynəlxalq əmək standartları ilə yaxından tanış etmək, gənclərin əmək münasibətlərində hüquqlarının pozulmasının və belə halların qarşısının alınmasının gənclik təşkilatlarının əsas gündəlik məsələsi kimi təmin olunmasına nail olmaqdır.Gənclərin işlədikləri bir çox müəssisələrdə onların əmək qabiliyyətlərini məhdudlaşdıran bədbəxt hadisələr baş verir. Belə hadisələr işəgötürənlə işçi arasında fərdi qaydada bağlanan əmək müqaviləsi olmadıqda istehsalatda baş verən bədbəxt hadisələr kimi rəsmiləşdirilmir. Əmək qabiliyyəti məhdudlaşan belə gənclər sosial müdafiəyə ehtiyacı olanlar sırasına daxil olurlar. Təlimin proqramında gənclərin əmək hüquqlarının pozulmasının araşdırılması, məşğulluğun əsas aspektləri, müqavilələr, iş vaxtının düzgün qurulması kimi mövzular yer alacaq. Təlimdə gənclər təşkilatlarının üzvləri və gələcəkdə gənclərin məşğulluq problemləri sahəsində fəaliyyət göstərmək istəyən şəxslər iştirak edə bilərlər.Qeyd edək ki, konfrans Azərbaycan Gənclər və İdman Nazirliyi, CIC, ASK və «InfoDev»in təşkilatçılığı ilə keçirilir.

Nigar

Palitra.- 2010.- 3 dekabr.- S. 10.