Bibiheybət buxtasında 55 minə yaxın ağac və kol əkilib

Beş il ərzində Bakıda açılan daimi iş yerlərinin 18,3%-i Səbail rayonunun payına düşür

Səbail rayonu Bakı şəhərinin Xəzər dənizi sahili boyunca yerləşən mərkəzi rayonudur. Rayonun ərazisi 29 kvadrat kilometr, əhalisinin sayı 98042 nəfərdir ki, onların 51,5 faizini kişilər, 48,5 faizini qadınlar təşkil edir. Rayonda 2 ərazi nümayəndəliyi və 3 bələdiyyə fəaliyyət göstərir. Səbail rayonu Bakı şəhərinin ən qədim rayonu olaraq ötən əsrin 20-ci illərindən inzibati ərazi vahidi kimi formalaşıb. Rayon əvvəlcə Bibiheybət, 1931-ci ildən Stalin, 1960-cı ildən 26 Bakı Komissarları adını daşıyıb, 1992-ci ildən isə Səbail rayonu adlandırılıb.

Qədim əsrlərin yadigarı olan Qız qalası Səbail rayonunun rəmzidir. Bakılıların və şəhərimizin çoxsaylı qonaqlarının əsas ziyarət yeri olan Şəhidlər xiyabanı və Fəxri xiyaban, Heydər Əliyev Fondu, UNESKO-nun "Dünya İrs siyahısı"na salınmış İçərişəhər Dövlət Tarix-Memarlıq Qoruğu, unikal mədəniyyət incisi olan Muğam Mərkəzi və "Üns" Yaradıcılıq Mərkəzi, habelə bir sıra istirahət və gəzinti obyektləri rayonun ərazisindədir. Bundan başqa Səbail rayonu ərazisində 5 ali, 2 orta ixtisas, 1 peşə məktəbi, 18 orta təhsil müəssisəsi, 18 məktəbəqədər müəssisə, 3 uşaq yaradıcılıq mərkəzi, 3 uşaq-gənclər idman məktəbi, 3 musiqi məktəbi, 22 səhiyyə müəssisəsi yerləşir. Şəhərimizin və eləcə də ölkənin əsas mədəniyyət mərkəzləri, o cümlədən 12 teatr, 2 kinoteatr, 6 kitabxana, 15 muzey, 5 mədəniyyət evi fəaliyyət göstərir. Ərazidə müxtəlif elm, incəsənət korifeyləri, müharibə və ədəbi qəhrəmanların şərəfinə heykəl və büstlər ucaldılmış 10 istirahət parkı və bağ var. Səbail rayonunda müvafiq dövlət və dini qurumun rəsmi qeydiyyatından keçmiş 7 icma, o cümlədən 5 məscid və 1 mədrəsə fəaliyyət göstərir. Onlar arasında böyüklüyü və əhəmiyyətinə görə seçilən Bibiheybət qəsəbəsindəki Bibiheybət məscidi ümummilli lider Heydər Əliyevin göstərişi ilə yenidən tikilərək 1998-ci il iyulun 12-də istifadəyə verilib, 2008-ci il iyulun 12-də ziyarətgah kompleksinin rəsmi açılışı olub. İçərişəhərdəki Cümə məscidi də dövlət tərəfindən əsaslı təmir olunaraq dindarların istifadəsinə verilib. Rayon ərazisində iqtisadiyyat sahəsi üzrə çox sayda dövlət və qeyri-dövlət müəssisələri, o cümlədən xarici şirkətlər fəaliyyət göstərir ki, onlar da rayonun sənaye potensialının əsasını təşkil edir.

Səbail rayonunda sosial-iqtisadi inkişafla bağlı həyata keçirilən tədbirlər nəticəsində 2009-cu il ərzində 2214 daimi iş yeri açılıb. Ümumiyyətlə, 2003-cü ilin noyabrından 2010-cu ilin yanvar ayının 1-dək 31.576 iş yeri açılıb ki, bunlardan 30.920 iş yeri daimidir. Beş il ərzində Bakı şəhərində açılan daimi iş yerlərinin 18,3%-i Səbail rayonunun payına düşür. Səbail rayonunda və ilk növbədə Bibiheybət buxtasında neftlə çirklənmiş, əhali üçün təhlükə mənbəyinə çevrilmiş torpaqların təmizlənməsi ilə bağlı işlər davam etdirilib, artıq Bibiheybət buxtasında 174 ha ərazi Dövlət Neft Şirkətinin Ekologiya Departamenti tərəfindən təmizlənib, burada 55 minə yaxın ağac və kol əkilib. Ötən il ərzində Səbail rayonu ərazisində böyük quruculuq və abadlıq işləri həyata keçirilib. Belə ki, MTN Mədəniyyət Mərkəzində, Nizami Gəncəvi adına Ədəbiyyat Muzeyində, Dövlət Gənc Tamaşaçılar Teatrının, Bəstəkarlar İttifaqının binasında, Dövlət İncəsənət Muzeyində, Rabitə və İnformasiya Texnologiyaları Nazirliyi Teleradio İstehsalat Birliyinin Teleqüllə kompleksində, Azərbaycan prospektində, Daxili İşlər Nazirliyinin binası qarşısındakı yeraltı piyada keçidində aparılan əsaslı təmir-yenidənqurma işləri başa çatdırılıb. Eləcə də Mərkəzi Klinik Xəstəxananın ambulatoriyası, Milli Məclisin yeni korpusu, Hesablama Palatasının yeni binası istifadəyə verilib, "Dalğa Plaza" İş Mərkəzi və Urologiya Xəstəxanasında əsaslı təmir və yenidənqurma işləri başa çatdırılıb. 2009-cu ildə aparılan əsaslı təmir və yenidənqurma işlərindən sonra sakinlərin və eləcə də şəhərimizin çoxsaylı qonaqlarının sevimli istirahət yerlərindən olan Sahil bağı və Filarmoniya bağı istifadəyə verilib. Hazırda Azərbaycan Xalçası və Xalq Tətbiqi Sənəti Dövlət Muzeyi üçün yeni binanın tikintisi və Dövlət Bayrağı Meydanındakı inşaat işləri davam etdirilir, Badamdar qəsəbəsində MTN-in yeni hospitalının inşası, Dənizkənarı Milli Bulvarda abadlıq və yenidənqurma işləri, Biznes Mərkəzinin tikintisi, "Yaxt-klub"da yenidənqurma işləri, müasir "Hilton" mehmanxanasının inşası davam etdirilir.

Səbail rayonunun qəsəbə və yaşayış sahələrində, məhəllə və həyətlərində abadlıq işlərinin aparılması ilə bağlı rayon İcra Hakimiyyəti tərəfindən "Abad həyət" layihəsi hazırlanıb ki, rayonun Badamdar qəsəbəsində onun icrası ilə bağlı qəsəbədəki 5 həyətdə əsaslı təmir-abadlıq işləri aparılıb. Bibiheybət qəsəbəsindəki kitabxana, xeyir-şər yeri və qəsəbə Mədəniyyət Evi təmir olunub və lazımi avadanlıqlarla təchiz olunub. Hazırda qəsəbənin girişində II Dünya müharibəsində həlak olan döyüşçülərin xatirə abidəsinin əsaslı təmir-yenidənqurma işləri başa çatmaq üzrədir. Dekabr ayında həyata keçirilən işlər çərçivəsində rayonun 20-ci yaşayış sahəsindəki yolötürücü dairə və Veteran Neftçilər bağında əsaslı təmir-yenidənqurma işləri başa çatdırılaraq sakinlərin istifadəsinə verilib. Eyni zamanda parkda yerləşən "Veteran neftçilər klubu"nda da təmir işləri aparılıb, klub lazımi avadanlıqlarla təmin olunub. Parkın və dairənin yeni işıqlandırma sistemi quraşdırılıb. Bundan başqa Yeni Azərbaycan Partiyasının yaranış günü - noyabr ayının 21-də xüsusi layihə əsasında Yeni Azərbaycan Partiyası Səbail rayon təşkilatı üçün 3 mərtəbəli yeni binanın təməli qoyulub, həmçinin Badamdar qəsəbəsində xeyir-şər yerinin tikintisinə və Badamdar qəsəbə Mədəniyyət Evinin əsaslı təmirinə başlanılıb. Keçən il tikintisinə başlanmış Səbail Rayon Polis İdarəsinin yeni binasında hazırda tamamlama işləri aparılır.

Ötən il dövlət büdcəsi hesabına 163 saylı orta məktəbdə əsaslı, digərlərində isə cari təmir işləri aparılıb, 91 saylı orta məktəbdə yeni müasir qazanxana quraşdırılıb, rayonun orta ümumtəhsil məktəblərində vahid məktəbli forması tətbiq olunub. Ölkə başçısının sərəncamı ilə keçirilən "İlin ən yaxşı ümumtəhsil məktəbi" respublika müsabiqəsində keçən il Səbail rayonunun "İstedad" Beynəlxalq Təhsil Kompleksi, 2 saylı Texniki-Humanitar Elmlər Liseyi, 190 və 239 saylı orta məktəbləri qaliblər sırasında olub. Eləcə də Prezidentin sərəncamı ilə "İlin ən yaxşı müəllimi" adına layiq görülmüş 100 müəllimdən 5-i Səbail rayonunun məktəblərində çalışır.

Nigar

Palitra. -2010. – 9 fevral. – S.11.