Meyvələrin müalicəvi əhəmiyyəti

Sağlam bir orqanizm üçün güclü immunitet lazımdır. Bu olmasa, orqanizm bütün xəstəliklər və infeksiyalar qarşısında aciz olar. İmmunitetin güclü olması üçün antioksidantlar, vitamin və mineralların orqanizmə qəbulu vacibdir. Orqanizmin güclü olmasının sirri isə meyvələrdədir. Güclü immunitet üçün türk həkimlər A, C və E vitamini ilə zəngin olan meyvələrdən istifadə etməyi tövsiyə edirlər. Bu gün biz meyvə şirələrinin sehirli qüvvəsindən danışacağıq.

Portağal şirəsi - bu meyvənin şirəsi immun sisteminə ikiqat güc verir. Soyuqdəymə və qrip hallarının qarşısını alır. C vitamini ilə zəngin olan bu şirə öskürəyi də azaldır. Ürəyə gedən damarlarda tıxacları açır. Qan dövranını normallaşdırdığı üçün dərini də gözəlləşdirir. Gündə bir stəkan təzə sıxılmış təbii portağal suyu sizin sağlamlığınızın və gözəlliyinizin keşiyində durur.

Nar şirəsi - qanda şəkəri və xolesterolu normada saxlayır. Xərçəng hüceyrələrinin artmasının qarşısını alır. Bundan əlavə ishal zamanı və bağırsaqlardan parazitlərin kənar edilməsi üçün çox faydalıdır. İfrazat sistemi üçün xeyirli olduğu qədər orqanizmdə qan yaratması ilə də nar şirəsi faydalı hesab olunur.

Albalı şirəsi - qızdırmalı xəstələr üçün faydalıdır. Tərkibi A vitamini və potasium ilə zəngindir. Orqanizmdəki artıq suyu kənara çıxarır, mədə və qaraciyərin fəaliyyətinə yaxşı təsir göstərir.

Ərik şirəsi - tərkibi A, E və B3 vitaminləri, kalsium, magnezium, potasium və fosforla zəngindir. Bütün bu minerallar insan orqanizmini gücləndirir, qanı artırır. Bu şirəni əsəb xəstəliyindən əziyyət çəkənlər daha çox içməlidir. Bundan başqa ərik şirəsi sümük əriməsi xəstəliklərinin qarşısını da alır.

Alma şirəsi - alma B3 və E vitamini, potasiumla zəngindir. Bu maddələr immun sistemini gücləndirir, qanda şəkərin miqdarını normada saxlayır və başağrılarını dəf edir. Alma şirəsi böyrəkləri təmizləyərək xolesterolu da aşağı salır. Bundan əlavə revmatizm və mədə ağrıları zamanı olduqca faydalıdır. Bu şirədən çox istifadə ağciyər xərçənginə yaxalanma riskini aşağı salır və qan təzyiqinin artmasının qarşısını alır.

Şaftalı şirəsi - şaftalı A, B3 və C vitaminləri ilə zəngindir. Qripə qarşı əsil qalxandır. Zəhərli maddələri zərərsizləşdirir. Öd kisəsi və böyrək üçün faydalıdır.

Üzüm şirəsi - A və C vitamini, minerallar və dəmirlə zəngindir. Dərini yaşlanmadan qoruyur, revmatizma üçün münasib dərmandır. Qan yaratmaqla yanaşı ürəyin fəaliyyətinə müsbət təsir edir. Zehni və fiziki yorğunluğu dəf edir.

Pomidor şirəsi - C və E vitaminləri, potasium və digər minerallarla faydalıdır. Onun tərkibindəki likopen maddəsi müxtəlif qan xəstəliklərinin, o cümlədən xərçəngin düşmənidir.

Meyvə şirəsi 10 faiz meyvədən hazırlanır. Nektarlar isə 25-50 faiz təbii meyvə şirəsi ilə hazırlanır. Meyvəli içkilərdə isə təbii meyvə şirəsi 10 faiz olur. Meyvə şirələri daha çox Avropada insanlarıın sevimli içkisi hesab olunur. Almanlar ildə 46 litr şirə içir. Türkiyədə isə bu rəqəm 4.5 litrdir. Yəni bir türk ildə 4.5 litr meyvə şirəsi içir. ABŞ-da bu rəqəm 36 litrdir. Onu da bildirək ki, meyvələr şəkərli, yağlı və nişastalıdır. Mütəxəssislər şabalıdı yeganə nişastalı meyvə hesab edir. Meyvələr bişirildikdə və ya qurudulduqda vitaminlər yox olur. Ona görə də meyvə şirələrini təzə-tər meyvələrdən əldə edin. Yaşlı insanlar portağal, naringi, ərik, qarpız, çiyələk, böyürtkən, alma, şaftalı, üzüm şirələrindən tez-tez istifadə etməli və ya onları elə çiy halda yeməlidir .

İndi isə sizə təzə və qurudulmuş meyvələrin kalori cədvəlini veririk.

Təzə meyvələr:

100 qr. ərik 51 kalori

100 qr. portağal 45 kalori

100 qr. banan 88 kalori

100 qr. gilas 80 kalori

100 qr. əncir 80 kalori

100 qr. çiyələk 37 kalori

100 qr. quşüzümü 57 kalori

100 qr. naringi 44 kalori

100 qr. alma 58 kalori

100 qr. qarpız 20 kalori

100 qr. armud 61 kalori

100 qr. şaftalı 38 kalori

100 qr. üzüm 66 kalori

100 qr. şabalıd 213 kalori

Qurudulmuş meyvələr

100 qr. xurma 274 kalori

100 qr. əncir 274 kalori

100 qr. badam 598 kalori

100 qr. qoz 663 kalori

100 qr. fındıq 646 kalori

100 qr. ərik 268 kalori

Nüşabə

Palitra. -2010. – 14 iyul. – S.12.