“Elm üçün kadr hazırlığına baxçadan
başlamaq lazımdır”
Professor Səlahəddin Xəlilov: “Alimin vətəndaşlıq mövqeyini
fərdi hadisə kimi başa düşənlər səhv
edirlər”
Layihə çərçivəsində
Azərbaycan Fəlsəfə
və Sosial-siyasi Elmlər Assosiasiyasının
İdarə Heyətinin
sədri, AMEA-nın müxbir üzvü,
professor Səlahəddin Xəlilovun
gənclərin elmi fəaliyyət baxımından
imkanlarının necə
artırılmasının lazım gəldiyi ilə bağlı fikirlərini öyrəndik.
- Gənclərin
elmlə effektli məşğul olmaq imkanlarını necə artırmaq olar?
- Bu maraqlı
məsələdir. Doğrudan
da elmlə bağlı insanlar belə bir sual
qarşısında fikirləşə bilərlər ki, bu
imkanları necə artırmaq olar? Bəlkə
yeni nəslin elmi-tədqiqat imkanları genetik yolla artır?
Xeyr. Müşahidələr
göstərir ki, insanın intellektual imkanı çox ləng
inkişaf edir. Məsələn, yeni erada
bu sahədə nəzərəçarpacaq təkamül hiss
olunmur. Qalileyin Aristotelə və ya
Eynşteynin Qalileyə nəzərən intellektual
üstünlüyündən danışmaq üçün
heç bir əsas yoxdur. Bununla belə
Qaliley Aristotelə, Eynşteyn isə Qalileyə düzəliş
verib. Məsələ burasındadır
ki, intellektual səviyyəsindən asılı olmayaraq hər
sonra gələn nəsil əvvəlki nəsildən miras
qalmış daha mükəmməl elmi aparata və metodlara
yiyələnmiş olur. Bu da problemlərə
daha dərin nüfuz eləmək imkanı yaradır. Digər tərəfdən qabaqcıl ölkələrdə
elmin sosial strukturu getdikcə təkmilləşir, əmək
bölgüsü güclənir, alimlər kənar
qayğılardan azad edilirlər. Bir
sözlə, bioloji genetika xüsusi rol oynamasa da, sosial-mənəvi
genetika inkişafın əsas hərəkətverici qüvvəsi
kimi çıxış edir.
Deməli, elmin inkişafına yönəlmiş dövlət
siyasətindən, sosial
elm sisteminin nə dərəcədə səmərəli
təşkil olunmasından
çox şey asılıdır. Bizim respublikada bu
sahədə vəziyyət
hələ çox ağırdır. Elm adamı ancaq öz başını dolandırmaq haqqında düşünməli olur.
Alimin vətəndaşlıq mövqeyini
fərdi hadisə kimi başa düşənlər səhv
edirlər. Ayrıca bir
alim nə qədər böyük qeyrət sahibi olursa-olsun, heç bir böyük problemi həll edə bilməz. "Tək əldən
səs çıxmaz"
hikməti eyni dərəcədə elmə
də aiddir. Adətən
böyük kəşflərdən,
dünya miqyaslı elmi nailiyyətlərdən
danışarkən gənclərin
yadına qeyrət hissini, milli iftixar hissini də salmağı unutmurlar. Lakin unudurlar ki,
elm sosial hadisədir.
Bizim elmi sahədə geri qalmağımız gənclərimizin intellektual
potensialının və
ya qeyrət hissinin zəifliyinə dəlalət etmir. Elm meydanı güləş
meydanı deyil. Halbuki müasir dövrdə hətta güləşdə
və boksda da mübarizənin taleyi rinqdə deyil, bundan xeyli
əvvəl - professional məşqçi
məktəbinin müntəzəm
fəaliyyətində, kadrların
seçilməsi və
tərbiyəsi prosesində
həll olunur. Elm
üçün kadr hazırlığı nəinki
aspiranturadan və ya ali məktəbdən, hətta
lap orta məktəbdən,
bağçadan başlanır.
Ona görə də milli elmi kadrların
həqiqi yüksəlişini
görmək istəyənlər
təhsil sistemində
sağlam sosial-mənəvi
mühit yaradılması
işindən başlamalıdırlar.
Lakin burada çox ciddi əks əlaqə də var. Təhsil sistemindəki vəziyyət də öz növbəsində
elmi kadrların intellektual və mənəvi inkişaf səviyyəsindən asılıdır.
Ona görə də təhsil siyasətinin təməlində sağlam
elmi mühit yaradılması durmalıdır.
Hər hansı bir sahədə atılan yeni bir addım
bir bataqlıqdan başqa bataqlığa, bir xaosdan başqa
xaosa gətirib çıxarmasın deyə
ciddi elmi prinsiplərə əsaslanmalıdır.
Hazırda elmi, xüsusən
ictimai elmləri təmsil edən adamlardan böyük əzmkarlıq, vətəndaşlıq
və qeyrət tələb olunur. Lakin bu hələ azdır. Elmi işçilərin ciddi meyar əsasında,
prinsipial surətdə
seçilməsi, sağlam
qüvvələrin səfərbər
edilməsi, onlara qayğı göstərilməsi,
elmin təşkilati strukturunun təkmilləşdirilməsi
daha böyük səriştə, daha böyük vətəndaşlıq
və qeyrət tələb edir.
- Bu baxımdan yeni elmi mərkəzlərin
formalaşdırılması barədə fikirlərinizi bilmək
maraqlı olardı...
- Respublikamızın gənc cəmiyyətşünas alimləri üçün elmi-tədqiqat mərkəzləri açmağa, yeni təşkilati forma fikirləşib tapmağa vadar edən də ilk növbədə elmi mühitə olan ehtiyacdır. Zira şəxsiyyət sosial mühitin məhsulu olduğu kimi alim də elmi mühitin məhsuludur. Təəssüf ki, gənclərimiz məhz bu sarıdan korluq çəkir, əsil elmi şəraitdə işləmək üçün xarici ölkələrin məşhur mərkəzlərinə ezam olunmağa çalışır, hansısa qrantın, sponsorun sayəsində məşhur bir alimin laboratoriyasına, məktəbinə "düşməyi" üstün tuturlar. Lakin belə əlaqələr müvəqqətidir və respublikamızda tədqiqatları əsas, mərkəzi problemlərə yönəltməyə, yerli elmi məktəblər yaratmağa kömək etmir. Bu mənada aspirant və doktorantların, ali təhsilli kadrların kənarda hazırlanması vəziyyətdən əsil çıxış yolu deyil. Hamısı birdir, onlar da aspirantlar kimi qayıdıb elmi mühitdən əsər-əlamət olmayan bir şəraitə düşürlər və yaranmış ziya qığılcımları şölələnmək və başqalarının da yolunu işıqlandırmaq əvəzinə tədricən sönür. Bu tədbirlər yalnız o zaman səmərə verər ki, respublikanın özündə elmi fikir ocağı olsun, necə deyərlər, "ümumdünya standartı" səviyyəsində elmi məktəblər olsun. Onda hər bir qığılcım elm ocağının daha da şölələnməsinə səbəb olar.
- Deyək
ki, ictimai problemlər elmi şəkildə öyrənildi.
Bəs əldə olunan biliklər kimlərsə tərəfindən istifadə
olunacaqmı?
- Axı
bilmək azdır, tətbiqin özü də xüsusi professional mədəniyyət və
təşəbbüskarlıq tələb edir. Real iş elmi biliklərdən
tətbiqi biliklərə,
ondan isə əməli vərdişə
keçməyi nəzərdə
tutur. Hər bir sahədə
düzgün texnologiyaya,
metodikaya əsaslanan əməli vərdişlər
əldə etmək çox çətindir.
İctimai elmlərin tətbiq sahəsi daha çox cəmiyyətin elmi əsaslarla idarə olunmasını əhatə edir. İndiyədək
bütün elmlər
içərisində tətbiq
üçün ən
az rəhbər
tutulan məhz ictimai elmlər olub. Öyrənmək və tətbiq
olunmaq hüququ bu elmlərin əlindən alınıb
və təbliğat funksiyasi ilə əvəz edilib. Ona görə də, ən yüksək diletantizm məhz idarəetmə sahəsində
özünü göstərir.
Rəhbərlik etməyə
can atanlar rəhbərlik
işinin yüksək
professional hazırlıq tələb
etdiyini və bu sahədə ictimai elmlərlə ittifaqın zəruri olduğunu unudurlar. Unudurlar, çünki uzun illər ərzində idarəetmə sistemində
təşəbbüskarlıq, müstəqillik onsuz da istisna olunurdu.
Ona görə də əksinə, rəhbərlik
işlərinə elmə
arxalanan, yaradıcı,
təşəbbüskar adamlar
əvəzinə yaxşı
icraçılar cəlb
olunurdu. Onlar sadəcə
olaraq yüksək rütbəli rəhbərlərin
- yuxarının göstərişi
əsasında fəaliyyət
göstərirdilər. Onların elmi biliyə ehtiyacı yox idi.
Bu ənənə hələ
tam aradan götürülməyib. Ona görə də bizim vəzifəmiz yalnız yığılıb
qalmış ictimai problemlərin səbəblərini,
mahiyyətini üzə
çıxarmaq və
onların həll yollarını tövsiyə
etməkdən ibarət
ola bilməz.
Biz həm də
bu tövsiyələrin
həqiqətən nəzərə
alınması, həyata
keçirilməsi işində
elm adamlarının özünün
iştirakını nəzərdə
tuturuq.
İlkin Ağayev
Palitra. -2010. – 2 iyun. – S.6.