Narkotika istifadəçiləri
HİV-ə daha tez yoluxur
Dünən Bakıda HİV
və QİÇS-in müalicəsi və profilaktikası
üzrə qanunvericiliyin təminatı sahəsində regional
əməkdaşlığın prioritetlərinə həsr
olunan Mərkəzi Asiya və Azərbaycan parlamentarilərinin
V-ci konfransı işə başlayıb.
Tədbirdə Milli Məclisin
sədr müavini Bahar Muradova çıxış edərək
bildirib ki, HİV infeksiyasının qarşısının
alınması və QİÇS xəstələrinin
müalicəsi Azərbaycanda ən yüksək səviyyədə
qarşıya qoyulan prioritetlərdəndir: «Məlumdur ki, bu xəstəliyə
yoluxanlara baxışlar eyni deyil. Onlar müəyyən
təzyiqlərə məruz qalırlar. Azərbaycan dövləti
və hökuməti, eləcə də parlament bununla əlaqədar
müəyyən nailiyyətlər əldə edib. Bu sahə
ilə əlaqədar proqramlar qəbul olunub, qanunvericilik
bazası təkmilləşdirilib, HİV-ə yoluxmuş
şəxslərin sosial müdafiəsi istiqamətində
çox ciddi addımlar atılıb. Dünyada hər gün
minlərlə insanın HİV virusuna yoluxduğunu nəzərə
alsaq, aydın olar ki, atılmış addımlarla
arxayınlaşmaq olmaz. Təkcə 2008-ci ildə 2.8 milyon
insan bu xəstəliyə yoluxub. 23 milyon QİÇS xəstəsi
dünyasını dəyişib. HİV virusuna yoluxmanın əsas
amillərindən biri narkotik vasitələrdən istifadədir.
Xüsusən də ineksion narkotik istifadəçiləridir.
2009-cu ildə Azərbaycanda bu xəstəliyə
yoluxanların 62.2 faizi məhz ineksion narkotik istifadəçiləri
olub”.
Konfransın əsasının
2006-cı ildə Qırğızıstanda qoyulduğunu
xatırladan B.Muradova deyib ki, tədbiri keçirməkdə əsas
məqsəd bu sahədə regional və beynəlxalq əməkdaşlığı
genişləndirmək, qanunvericilik bazasını təkmilləşdirmək,
lazım gələrsə yeni qanunları qəbul etməkdir.
Onun sözlərinə görə, konfransda 4 plenar iclas
keçiriləcək, məruzələr dinləniləcək
və yekin qətnamə qəbul olunacaq.
BMT-nin Cənubi Qafqaz ölkələri
üzrə QİÇS proqramının koordinatoru Manoela
Qrozdanova bildirib ki, bu xəstəlik terrorizm və separatizmdən
də təhlükəlidir: “Sevindiricidir ki, konfrans
iştirakçısı olan ölkələr bu sahədə
müəyyən nailiyyətlər əldə edə biliblər.
HİV-in profilaktikası və statitsik izləmə
sistemi təkmilləşdirilib. Bu da ilk növbədə bu
ölkələrin rəhbərlərinin siyasi iradəsinin
ortaya qoyulması ilə xarakterizə olunur”.
Qazaxıstanın səhiyyə naziri Jansılık Doskaluyev ölkəsində HİV virusunun qarşısının alınması və QİÇS xəstələrinin müalicəsi istiqamətində görülmüş işlərdən danışıb. Qeyd olunub ki, Qazaxıstan mövcud problemin həlli ilə bağlı xüsusi dövlət proqramı, səhiyyə məsələlərinə və əhalinin sağlamlığına dair məcəllə qəbul olunub.
Nigar
Palitra. – 2010. – 2 iyun. – S.13.